تانكي ألمنيوم .. للبيع

[عااشق الدهناء]

السلام عليكم ورحمة الله وبركاته

تحيه للجميع ... والله يرزقنا وياكم

عندي تانكي ألمنيوم سعة 100 لتر تقريباً يركب على أغلب السيارات لأني مفصله تفصيل بحيث يكون ملائم لإغلب السيارات وطبعاً التانكي واقف مو سدح

طبعا له فتحتين لليات يمين ويسار
خالي ولله الحمد من الصداء
يوجد قواطع داخليه لمنع رجة الماء
مفصل عليه شراع تنزاني
له سنه ونصف تقريباً عندي وله ضمان خمس سنوات وطبعا الألمنيوم معروف ما يصدي ابدا مهما مر من وقت

نشوف سوماتكم ... والله يكتب اللي فيه الخير


ــ

[العتيبي 88]

السلام عليكم ياغالي يركب على باترول 98 صور لاهنت

[المميـز]

:

ينقل للقسم المناسب

:

[سفاري959]

اخوي عاشق الدهنا ارجو وضع وسيله اتصال بك او الاتصال على جوالي للضروره

0554488959

[PATHFINDER 4]

وش كان راكب عليه ؟

وليت تكتب مقاساته ارتفاع وطول

[عااشق الدهناء]

ابشروا يا الربع بنزل صور له ومقاساته ان شاء الله اليوم ولا بكره بإذن الله

[F77]

الله يرزقك

[السومر]

الصور تفيد الاعلان

[Al Sanidi]

اخوي التانكي انباع او لا واذا ما انباع كم حدك فيه

[عااشق الدهناء]

أخواني .. اعتذر اذا كان هناك تأخير في الرد او إدراج الصور

بالنسبه للتانكي لا زال موجود وسامه احد الأخوان 400 ريال

الصور


http://www.mekshat.com/pix/upload05/images246/mk185619_1.jpg








http://www.mekshat.com/pix/upload05/images246/mk185619_2.jpg







http://www.mekshat.com/pix/upload05/images246/mk185619_3.jpg







http://www.mekshat.com/pix/upload05/images246/mk185619_434.jpg






الصورة هذي توضح فتق بسيط بالخياط ما أثر على الشراع وبالإمكان خياطته


http://www.mekshat.com/pix/upload05/images246/mk185619_5.jpg




والله يكتب اللي فيه الخير للجميع , ,,

[عااشق الدهناء]

السوم وصل 450 على الخاص

ورجاء يا أخوان اللي يسوم يسوم بالعام ولا يحرجنا مع الرجال

الدعوة بيع وشراء ولا فيها عيب والحمد لله ما نبيع ونتشري شي حرام عشان نلووذ عن الناس

اتمنى اي سومه تكون بالعام

وبالنسبة للموقع بالقصيم .. وبالإمكان التوصيل للرياض مع اضافة 50 ريال للتوصيل للرياض ( شمال )


والله يكتب اللي فيه الخير .. ويرزقنا وياكم ,,

ــ

[همس الغدير]

اللـــــــــــــــــــــــــــــــــــــــــــــه يرزقك

[الكشتة هواي]

الله يرزقك

[بدر2011]

هل يركب لشاص

[عااشق الدهناء]

همس // الكشته
الله يجزاكم خير



أخوي بدر من الصور تتضح لك المقاسات وتقدر تعرف هل يركب ولا لا

[fai2]

كم سعره جديد

[عااشق الدهناء]

كم سعره جديد

أخوي هذا انا مفصله ما شريته جاهز

ومثلك عارف التفصيل ما له سعر ثابت قد يزود وقد ينقص مع ان المواري للزود بناء على ارتفاع الاسعار كل يوم عن الثاني

وانا والله ما اخفيك مفصله بــ 650 اكثر بشوي او اقل بشوي يعني فرق عشره عشرين لاني والله قاعد احوس ادور الفاتورة ما لقيتها ما ادري وين طست :(


يا أخوان احب اوضح نقطه مهمه .. فيه ناس يقولك فرق 100 ريال مو سهل يعني اذا بيشتري تانكي جديد ولا ياخذ هذا بفرق ميه مثلا ياخذ هذا لانه المنيوم ما يتأثر مع الوقت ولا يفرق عن الجديد بشي واضح

وفيه ناس تقولك لا والله لو الفرق 100عن الجديد آخذ جديد احسن

بكل الحالتين التفكير سليم وحسب الشخص وميزانيته وتقديره للمال


موفقين , ,,

[PATHFINDER 4]

ما يحتاج ادخل مواضيعك واضح يا بعدي كل شي من كلامك واسلوبك بالرساله

ما احد قال انك جاهل واذا انت بعت تانكي 120 لتر بــ 320 هذا شي راجع لك ان شاء الله تبيع ملابسك بريال ما لي دخل فيك
لكن انا عندي سلعة وتجي انت تقول غاليه لازم ادافع عن سلعتي وابين افضليتها واذا انت ما تعرف الفرق بين التفصيل والجاهز حاول تتذكر الثياب وتعرف الفرق

الامر الثاني انت ذكرت ان الامر بيع وشراء وبعدين تقول (لا تجلس تمدح في بضاعتك ) اكيد بمدح بضاعتي اذا هي تستاهل وهذا امر بيني وبين رب العالمين يحاسبني على كل كلمة اقولها

انت انفعلت وجبت حاصلك ولا ادري على وشو .. تهجمت وقلت كلام المفروض ما يقال

عموما الله الغني .. والله يعطيك على قد نيتك


ههههه المقصد يوم اقولك بعته 320 ان هذا اللي جابه الستيل في الحراج ولا ودي لو بعته باكثر وللعلم مكلف تفصيله فوق 1000

آمين وياك وبالتوفيق


كلامك متناقض .. الحين تلومني اني امدح سلعتي وتقول انت ودك لو بعت اللي كان عندك بــ 1000 !!

يا اخي اتق الله في نفسك ... واترك عنك استفزاز الناس

مو معنى ما اعجبك سعر السعله اللي انا عارض تتهجم على الناس وتستفزهم يا اخي ترى فيه ناس عندهم ضغط وفيه ناس عندهم سكر وقد ينفعل احدهم ويصبه شي او يأثر على اللي حوله جراء ردة الفعل

ما اعجبك السعر يا اخي غمض عيونك وانتهى الموضوع

عموما الحياة دروس وعبر وكل يوم نتعلم شي جديد .. وانت ان شاء الله مع الزمن تكبر وتتعلم

اكيد واعظم درس انك تقرأ الرد جيدا قبل لا تجاوب :)
الله يعينك على هالدنيا ماقدرت تضبط كلامك وشلون تضبط افعالك

وبالتوفيق


صار الطالب مطلوب بالنسبه لك الحين !!

ولا انت من قوم واجهه الصياح بالصياح تسلم !!

يا اخي وش تبي انت بلتني اليوم !!

ما عندي شي للبيع فكنا يا اخي خلاص .. التانكي يهرب ومصدي وطايح من قمة افرست على خشته


الله يسلط عليك بها اليوم الفضيل مثل ما تسلطت علي ورفعت ضغطي ... الله يسلط عليك من يشغلك حتى في منامك

حسبي الله ونعم الوكيل .. حسبي الله ونعم الوكيل


الله يشفيك ويعافيك ويرفع عنك مبتلاك احرص على الورد والاذكار وشرب زمزم :)

[عااشق الدهناء]

لاحول ولا قوة الا بالله

صحيح انك بلوه يا باف

اولا انت بينت الحين الى اي مدى تصل عقيلتك لان اللي صار يفضحك انت واسلوبك الاستفزازي مع انك حذفت الرسائل اللي قبل

الامر الثاني الموضوع هذا خاص بيني وبينك بالقسم الخاص ما يستفيد القارئ من كلامنا مهما كان
ولا يهمه اختلافنا وانت جيت ونقلته هنا ما ادري على اي اساس او مقصدك من النقل وهدفك

انا اقدر انقل الرسائل الاستفزازيه اللي جتني منك واظهرها بالموضوع لكن انا عقلي اكبر من اني ابحث عن تفضيل لنفسي وتشويه للاخرين

وكل شخص يا فتى يمثل تربيته واسلوبه بالكلام يدل على عقليته

انت لا زلت تواصل استفزازك لي وانا لا زلت اقولك رح يا شيخ الله لا يحللك ولا يبيحك دنيا وآخر


والرجاء من المشرفين أغلاق الموضوع .. تم التراجع عن البيع

ـــ

[PATHFINDER 4]

اوووووه صاير اخلاق فيذا .. وحلوة الذبة اجل باف
تحلل ولا ماتحلل وادع بيديك ورجليك ماهميتني لان كلامي وردودي واضحة ولو لك حق عندي اعتذرت لك .
لاتتعلل بالرسايل الاوله انا مسحتها لانها طويلة ولو تلاحظ كلامك كل شوي يحتد عقب كل رد لي

المهم ماوراي الا انت

قالو سكت وقد خوصمت .. قلت لهم ان الجواب لباب الشر مفتاح
والصمت عن جاهل او احمق شرف .. وفيه ايضا لصون العرض اصلاح

[PATHFINDER 4]

قبل لا انسى هذي الرسائل الاولى اللي وصلتني منك وردودي عليها
في الدنيا بيني وبينك المشرفين في الموقع
وفي الاخرة بيني وبينك الله









وعليكم السلام
صحيح كان على باف
موقعي بريدة
اما السومه يابعدي ما تخارج
اذا جديد باكثر من
ما اضن ان حقه

أمين الله يجزاك خير وبالنسبه للموقع
اخوي يداوم عندكم وبالإمكان توصيله لك ولا يا رجال خذ لك جديد ويح نفسك



الله يرزقك السومة الطيبة يالغالي وموقعي الرياض ولا بالود نشريه
موفق


والله اذا كان فيه توصيل ممتاز وارفع السوم 450 والله يكتب اللي فيه الخير

والله يا الغالي واصل السوم من رجال شرواك 450 اليوم

وحديته عليه بــ 580 ريال ولا أدري عنه بيجزم ولا لا

وبالنسبه لك انت اخوي احده عليك بــ 550 ريال سعر نهائي

ومثل ما قلت لك سعره جديد بــ 650 ريال ويمكن تزود
وانا ترى اتكلم عن خامه نظيفه مو شغل اي كلام لاني مفصله تفصيل مو جاهز

والفرق عن الجديد 100 ريال تقريبا بين حقي والجديد
اذا انت رجال تقول اخذ جديد احسن دام الفرق ميه توكل على الله
اذا تقول لا ليه ادفع ميه وهذا والجديد ما بينهم فرق لان الالمنيوم ما يتأثر خذ هذا

وترى فرق الميه زين :)


الله يكتب لنا ولك الصالح وييسر لنا امرنا وأمرك . ,,


لا والله مايناسبني غالي صحيح انه تفصيل لكن الجديد عند السنيدي قبل فترة 580 لكن الفرق انه 65 لتر او 70 الله يرزقك اللي تمناه

الله يوفقنا وياك .. مسألة انه غالي لا يا بعدي غالي عليك انت اما سعره مناسب جدا وفيه فرق بين 70 لتر و100لتر غير المصنعيه .. معروف ان التفصيل انت تتحكم بالخامه وسماكتها وافضل شي فيها اما الجاهز قدام عينك مغطا بشراع ما تدري وش تحته

عموما موفق خير .. وانا اعتبر انك ما سمته لانك سمته نفس سومة الرجال وانت اعتبر اني ما حديته عليك



لاحظو ردودي وردوده . <<< نقطة لاتحسبني بعود اشوف وش كتبت زود تهجم وبهتان .