افضل مرواح الكهرباء

[. ذيب ساحوق]

يا اخوان عندي الموتر الحراره مع المكيف ترتفع عند الوقوف وودي اركب مروحه اضافيه بقاطع طبعا قدام اديتر المكيف وش افضل نوعيه تنصحون اخوكم فيها السياره باترول 97

والله يوفق الجميع لما يحب ويرضا

[أصيل حجآ زي]

أذا تقدر تركب مرآوح المكسيما فهي أفضل مرآوح تبريد .
أو البنز . وبعضهــُم مدح مرآوح السبآرو الصليبية .
ان شاء الله يمر المهندس / مركز حرآرة على موضوعك ويفيدنا .

[. ذيب ساحوق]

اصيل حجازي شاكر لك بماتفضلت وبانتظار مركز حرارهـ والاخوان

لاهنت ياغالي

[خبايا انسان]

انا على موتري سوباروا ومايعاني خلاف ولله الحمد ,, وبالنسبه للأخ اصيل حجازي ,, كذا مره شفت في مواضيعك تذكر كله ( صليبيه ) مامعناها ؟ ؟

[رفيع المقآم]

شف يابعدهم

اذا بتشيل الميكانيكية ام سير لاتعدى سوبارو افضل مراوح ع الاطلاق

اذا بتضيف فقط من دون شيل ام سير

لاتعدى مروحة المرسدس 500 تجي 2 صغار

والمرسدس 300 تجي وحدة كبيرة اذا ركبت فياسلام

اذا ماركبت ركب حقت 500 مرسدس تجي صغيرة

وبالتوفيق

[ددسن مسدرك]

سوبارو وبس لا تركب غيرها

[. ذيب ساحوق]

يعطيكم العاافيه يالربع جميع وبانتظار اراء الاخوان

مشكلة مروحة المرسيدس الصوت المزعج والاهي من افضل المرواح

[You Like Me]

اخي ذيب ساحوق
انت اساسً عندك مشكله في الحرارة
قبل تفكر في تركيب مراوح ابحث عن المشكله في البدايه
شيك على التماتيك اذا مروحه السياره ميكانيكيه
الراديتر اذا قديم حديد غيره والأردني الصيني المنيوم ترا ممتاز وسعره معقول
واغلب اصحاب الباترول مركبيينه
اذا مبطي على السياره سيخه وغير الماء بماء أصلي
نظف رديتر المكيف

وافضل مراوح اثبتت جدارتها على الباترول السوباروا

والله ييسر امرك

[أصيل حجآ زي]

انا على موتري سوباروا ومايعاني خلاف ولله الحمد ,, وبالنسبه للأخ اصيل حجازي ,, كذا مره شفت في مواضيعك تذكر كله ( صليبيه ) مامعناها ؟ ؟



هلا أخوي / خبايا أنسآن


أقصــُـد نصرآنية { مسيحية حسب زعمهـُم }
شركة سوبآرو شركة أسسها نصآرى الشرق الأقصى .
وصممو سيآرتهــُم لتخدم نشر النصرآنية المُحرّفة بين بشر الشرق { شرق أسيا }
وصــُنعة أسآسآ للقسآوسة { المُنصرين } .

وهذا دليلي وآضح وضوح الشمس
صــُلبآن شعآر الشركة وسيآرآتها ومُنتجآتها تحت :
http://upload.wikimedia.org/wikipedia/en/thumb/4/47/Subaru_logo.svg/412px-Subaru_logo.svg.png




http://image.motortrend.com/f/9237443+w1500+ar1+st0/112_0705_11z+peter_solberg_subaru_impreza_rally_ca r+sliding.jpg



http://www.google.com.sa/search?hl=en&safe=active&rlz=1R2ADRA_enSA456&q=subaru&um=1&ie=UTF-8&tbm=isch&source=og&sa=N&tab=wi&ei=OLipT7vwGaXg4QT8-PWNCQ&biw=1366&bih=566&sei=OripT8CRDqaC4gS88djLCA



وأما في التأريخ :
أي مُظل { موديل } السيآرة فأذكــُر التأريخ على أنهُ صليبي وليس ميلادي .
لأن عيسى عليه السلام ولد في الصيف بشهآدة القــُرآن :
قآل تعآلى :
{وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا} [مريم:25]

والرطــّب معروف ما يجي الا بالصيف .
وهذا أكبر دليل على أن عيسى عليه السلام ولد بالصيف وهــُم يحتفلون به في الشتاء { ديسمبر }
هذي الشهور الصليبية أسآسآ شهور وثنية يونآنية .


والتأريخ الصحيح فقط التأريخ الهجري الهلالي .


هذا يالحبيب قولي صليبي .
فهل ترى أني مُتعصب أو جآهل ؟؟؟
لا والله لن أتعصب الا للحق والصحيح فقط لا غير .


:good2:

[وجعين]

ماخبرت الباترول البنزين يشكي من الحراره بالعكس بعز الظهر مع المكيف فوق الخط الاول بشعره .لا تركب شي شيك على تماتيك المروحه وصيخ الاديتر اوطق اديتر صيني جديد ونس الحراره

[مواطن مدني]

دام الحرارة فقط في الوقفه ركب مراوح سبارو ممتازة
انا قد ركبت لليوكن مروحه شفر صغيرة مانفعت مع الوقفه ترتفع الحرارة
وركبت مراوح سبارو ترهيم وماشاء الله ماعاد تعدت الحرارة الوضع الطبيعي لها تحت النص بشوي
حتى لو واقف بالساعات والمكيف شغال ماترتفع ابداً .. طبعاً ركبت المراوح بالاضافة للمروحة الميكانيكية حقته

[1 أبو يزن 1]

أولا / عالج مشكلة الحرارة عندك .
ثانيا / ركب مروحة البلد اللي تجي مع السوبر سفاري لأنها تركب بدون ترهيم قواعد قواعدها موجودة عندك بالسيارة وبدون تسليك كهرباء لأنه مسلك كهربها عندك فقط تحتاج كتاوت اللي بالكبوت حق بلد خذه من التشليح أو الوكالة .
ثالثا / للتنبيه لا تحط قاطع لأن المروحة إذا ركبته نفس كلامي تشتغل و تفصل مع المكيف بلد .

[. ذيب ساحوق]

الله يعطيكم العااافيه يا اخوان

كفيتو ووفيتو لاهنتم يالربع

[الدوادمي506]

مراوح سوبارو