مشكله في حرارة الفتك

[اوف لاين]

السلام عليكم ورحمة الله وبركاته
اعضاء مكشات
انا معي باترول فتك(قير تماتيك) في الفتره الاخيره لاحظت اني اذا دخلت النفود بدون تنسيم ترتفع الحراره وتوصل الثلث او النص او حتى بعض الايام مع التنسيم لكن زريت الموتر شوي ترتفع بعد وعلى طول تشتغل مراوح المكيف
شيكت على موية الراديتر والقربه كل شي تمام
اللي استغربت منه ان المروحه الميكانيكيه ما يشبك فيها التماتيك ابد (ما يطلع صوت الحنه)
حتى والموتر طافي ادور المروحه بسهوله يعني خفيفه
وفي الديره والخط السريع كل شي طبيعي
فما ادري وين المشكله
هل هي تماتيك المروحه يحتاج تغيير؟
او الراديتر يحتاج تنظيف وتسييخ؟
او طرمبة الماء؟
وبالنسبه لعداد الحراره وين يكون بالضبط في الحاله الطبيعيه على خط الربع او قبله او بعده
علما ان الموتر له سنة معي بس اول مره يسوي كذا
اللي عنده خبره يفيدنا ولكم خالص الشكر والتقدير

[sgl2002]

انت اذا شغلت في الصباح بدري هل تسمع صوت حنة المروحه

اذا لا فاكيد هو التماتيك خربان

[اوف لاين]

انت اذا شغلت في الصباح بدري هل تسمع صوت حنة المروحه

اذا لا فاكيد هو التماتيك خربان
لا ما اسمعه حتى مثل ما قلت المرحه تدورها بسهوله والموتر طافي
اخوي بالعاده خراب التماتيك مهوب انه يعلق يعني يشبك دايم
او اجتمال ان خرابه انه ما عاد يشبك؟
عندك خلفيه عن سعر تماتيك المروحه الاصلي؟

[ابو شريفة]

السلام عليكم ورحمه الله
المشكلة الي عندك اقرب ماله تماتيك المروحة علماً انك تقول اذا مشيت بسرعه يبرد الموتر
واذا وقف احتر ، سعر تمآتيك المروحة حول الـ700 وعليها شوي
ولكن غيره احسن لك حفاظاً على موترك وراس المكينة لاينشعر
دمت سالمين

[ذيب اللابه]

شف اسمع البترول معروف الحرارة على الربع طبيعية لكن اذا وصلت الثلث فيه عندك خلل
من واقع تجربة بترول 99

[اوف لاين]

السلام عليكم ورحمه الله

المشكلة الي عندك اقرب ماله تماتيك المروحة علماً انك تقول اذا مشيت بسرعه يبرد الموتر
واذا وقف احتر ، سعر تمآتيك المروحة حول الـ700 وعليها شوي
ولكن غيره احسن لك حفاظاً على موترك وراس المكينة لاينشعر

دمت سالمين

اخوي اذا وقفت ما يحتر
ما يحتر الا في النفود بدون تنسيم او مع جلد
يمكن اذا وقفت نص ساعه والمكيف شغال ترتفع شوي
انا عندي احتمال كبير انه تما تيك المروحه وما نستغني عن خبرتكم
شكرا على ردك اخوي الغالي

[ابو شريفة]

اجل هذي طبيعية ولآتخآف / اي موتر تزر عليه يحتر واذا اشتغل المكيف احيان تعدا الربع بشعره طبيعية جداً لاتخاف بس اذا موجعك وحاس بشي اشتر تمآتيك مروحة وخله تحت المرتبة اذا انفرط ركبه انت ترا مايبي له شي اربع مسامير بصدر المكينة واربعه التماتيك والمروحة وقضينا
دمت سالم

[You Like Me]

وعليكم السلام ورحمه الله

حرارة الفتك الطبيعية فوق خط الربع بشوي

وانت الله اعلم عندك مشكله التماتيك مدام تقول تحركه بيدك وخفيف فالمشكله منه
وطبيعي الحراره ترتفع مع الجور في البر
مدام سيارتك تماتيك ليه ماتركب مراوح وتريح السياره
واذا غيرت التماتيك الافضل تغير البلف مره وحده
والله ييسر امرك

[الدوادمي506]

كلتش المروحه

[اوف لاين]

بارك الله فيكم وشاكر تفاعلكم واهتمامكم

[ابوسند9]

اخوي حياك
الشباب ما قصرو الله يعطيهم العافيه
شوف حرارة الفتك اذا بالصيف وفي النفود وبدون تنسيم عادي توصل الثلث
اما الحراره الطبيعيه فوق الخط الثاني بشعره وخاصه بالزحمه
لكن لو التماتيك عطلان راح توصل معك النص او اكثر بالزحمه وللعلم تماتيك الفتك خفيف مره ولما تدوره بيدك تحس انه عطلان فلا تستعجل على الاستبدال
لكن ابا اقولك حاجه لو تدخل النفود وتدعس للسياره وتوصل الحراره النص او اكثر وبعدين توقف والسياره شغله وخلال دقيقتين او اكثر تنزل الحراره فهذا يكون من بلف الحراره يتاخر مايفتح
وانا صراحه اشك بالبلف

[sgl2002]

تماتيك المروحه في الباترول اذا وصلت الحرارة حول النص ماعاد يشبك

لذلك انت اذا شديت عليه بالنفود وما اشتغل التماتيك فهو عطلان

[اوف لاين]

صباح الخير ياشباب
ومشكورين على تفاعلكم واهتمامكم
الموتر ماشي الان حول ال200 ولا سيخت الراديتر او نظفته
تتوقعون يحتاج تسييخ او تنظيف
هل في طريقه تبين ان الراديتر يحتاج تسييخ بدون فكه؟
وبالنسبة اخوي ابو سند البلف وش السبب انه يتاخر ما يفتح؟
كنت اسمع انه يا يشتغل مضبوط يا يقفل وعلى طول تولع الحراره؟
علما ان موية الراديتر كويسه(موية الوكاله يمكن) مهيب موية عاديه

[صباح القايله]

اخوي اول حاجه اتعقد المشكله عندك الرديتر يحتاج تسييخ لانه اذا ابطيت ماء غيرت الماء يترسب ويسكر المجاري حقات الرديتر
والجاجه الثانيه غير البلف والخراطيش الي تحس انه تعبانه جاك الصيف ماء يرحم
بعدين الوقايه خير من العلاج

[مركز حراره]

نسم وريح موترك ونفسك

[مسفر الاكلبي]

بالنسبه للكشف على الاديتر بدون ما ينفك فيه في الصناعيه القديمه اذا كنت من اهل الرياض صاحب ورشه معه جهاز يكشف على صلاحية الاديتر وهو راكب اعتقد اسم الورشه دكتور الحراره او طبيب الحراره رح له وهو يبين لك المشكله ان كانت من المروحه او من الاديتر ونصيحه لاتغير شيء الا انت متأكد انه يحتاج تغيير

[اوف لاين]

بالنسبه للكشف على الاديتر بدون ما ينفك فيه في الصناعيه القديمه اذا كنت من اهل الرياض صاحب ورشه معه جهاز يكشف على صلاحية الاديتر وهو راكب اعتقد اسم الورشه دكتور الحراره او طبيب الحراره رح له وهو يبين لك المشكله ان كانت من المروحه او من الاديتر ونصيحه لاتغير شيء الا انت متأكد انه يحتاج تغيير
الله لا يهينك
ممكن تبين لنا مكان هالورشه
ومشكورين على اهتمامكم

[مركز حراره]

نحن كذالك لدينا جهاز لتاكد من الحراره ليزر

[دعكنه]

السلام عليكم
عندي سؤال هل اذا مشيت خط ترتفع الحرارة مع زيادة السرعة ؟
تأكد انه من الرديتر انا موتري ماكمل 100,000 او اقل وحصلت عندي المشكلة مع الدعس والخطوط وجلست المشكلة عندي اكثر من سنه ولا كنت اتصور انه من الرديتر
وفي النهايه كان الرديتر اكثر فتحاته متسكره تماماً وماشاء الله بعده الحراره تحت الربع في عز الحر.
تقدر تشيك بدون فك الطبه بس لازم يفك الرديتر ويطلعه برا ويشبك خرطوش الماء من الأعلى اذا الماء نزل من الفتحه السفلية ببطء فهذا يدل على ان الريتر متسكر بالجير الأبيض وعلى العموم رديترات النيسان فتحات الرديتر ضيقه جدا تتسكر بسرعه طبعا ليس عيب انه ضيقة لاكن كل ما كانت ضيقة كل ما كان التبريد اكثر.

[اوف لاين]

السلام عليكم
عندي سؤال هل اذا مشيت خط ترتفع الحرارة مع زيادة السرعة ؟
تأكد انه من الرديتر انا موتري ماكمل 100,000 او اقل وحصلت عندي المشكلة مع الدعس والخطوط وجلست المشكلة عندي اكثر من سنه ولا كنت اتصور انه من الرديتر
وفي النهايه كان الرديتر اكثر فتحاته متسكره تماماً وماشاء الله بعده الحراره تحت الربع في عز الحر.
تقدر تشيك بدون فك الطبه بس لازم يفك الرديتر ويطلعه برا ويشبك خرطوش الماء من الأعلى اذا الماء نزل من الفتحه السفلية ببطء فهذا يدل على ان الريتر متسكر بالجير الأبيض وعلى العموم رديترات النيسان فتحات الرديتر ضيقه جدا تتسكر بسرعه طبعا ليس عيب انه ضيقة لاكن كل ما كانت ضيقة كل ما كان التبريد اكثر.
شكرا اخوي
بالنسبة للراديتر نظفته وسيخته او استبدلته بجديد؟
واقرب شي عندي ان المشكله من الراديتر لاني التوماتيك تبع المروحه فحصه كذا واحد وقال سليم
بسوي تسييخ للراديتر مع تغير بلف اصلي جديد ومويه اصليه ونشوف ونبلغكم

[ابوسند9]

غير بلف ب 70 ريال وانا متاكد من كلامي ان شاء الله لانه صار لي زيك بالضبط وشكيت بالبلف وبديت بالاسهل والارخص
واجابه على سؤالك نعم البلف اذا تعطل ما يقفل مره واحده, لا يتاخر ما يفتح لان له عمر افتراضي بالكثير 3 سنوات

[اوف لاين]

غير بلف ب 70 ريال وانا متاكد من كلامي ان شاء الله لانه صار لي زيك بالضبط وشكيت بالبلف وبديت بالاسهل والارخص
واجابه على سؤالك نعم البلف اذا تعطل ما يقفل مره واحده, لا يتاخر ما يفتح لان له عمر افتراضي بالكثير 3 سنوات
الله يعطيكم العافيه شباب
طيب وش رايك اسيخ الراديتر وانظفه ولا اغيرالبلف ويكفي

[اوف لاين]

لا نستغني عن ارائكم المباركه
شاكر ومقدر تفاعلكم

[اوف لاين]

الحمد لله تم حل المشكله
تسييخ الراديتر وتنظيفه لانه كان متسدد
وتغيير التوماتيك لانه كان عطلان ما يشبك وفيه رجه بسيطه لكن الان فيه صوت حنه بسيطه من التوماتيك(ما تعودت عليها)
شاكر لكم جهودكم وتفاعلكم

[سوبر مكشات]

نصيحه اذا جتك مشكله زي كذا

ريح راسك وغير كل شيء له علاقه سيخ الرديتر وغير التماتيك وغير البلف
خل كل شيء جديد

افضل مويه للرديتر مويه تيوتا الحمرا مخلوطه وجاهزه
الفتك يا خذ جيكين وشوي
موفقين

[راعي الفتك06]

تحياتي للجميع ..

انا معي نفس موترك قير عادي .. ويصير معي نفس اللي يصير معك اذا زريت عليه بالنفود بدوون تنسيم ترتفع الحرارة الى حول النص واذا وقفت ترجع الحرارة على طول زي اول على الربع( وهالشي لاحظته بالصيف يعني بالشتاء ما كان فيه مشكله ) .


اتوقع ان الموضوع طبيعي ونصيحتي لا تحرك ساكن .

[بن لوتيه]

[QUOTE=راعي الفتك06;8454784]تحياتي للجميع ..

انا معي نفس موترك قير عادي .. ويصير معي نفس اللي يصير معك اذا زريت عليه بالنفود بدوون تنسيم ترتفع الحرارة الى حول النص واذا وقفت ترجع الحرارة على طول زي اول على الربع( وهالشي لاحظته بالصيف يعني بالشتاء ما كان فيه مشكله ) .


كلام سليم