مربط خاص

[ابو محمد1111]

السلام عليكم و رحمة الله و بركاتة

وشلونكم طيبين


ما اطول عليكم

انا عندي شاهين جبلي و الثانيه بحري

و مقيضهم عندي وش تنصحوني فيه من ناحيه المكان و العلف و هل تنصحوني بكورسات

عشان الحذف

وهذا الموضوع بيفيد الكثير لتناقل الخبرات

[تميم2222]

مشالله ..............

[GHAAM]

وعليكم السلام ورحمة الله وبركاته

بالنسبه للربط في البيت صراحه أنا أقدره لأني أربط بالبيت لا كن تراها غثا وهم يبيلك تنتبه
وبالنسبه للنصايح كالتالي:
1/يكون المكان الي فيه مريح للطير ماهو شرط تحطه في شبك لو تربطه في الوكر عندك في الغرفه عادي .
2/الأهتمام بالجو العام ،البراد مهوب شرط مكيف صحراوي،النظافه بأستمرار.
3/الأكل وهو مهم جدا جدا يعني الأصل سمان مثلج ،حمام حي،جرابيع وفيران)حقت بر( ،البيض كل سبوع بيضه،وحاول تكرمه لأنه أذا أرتفع وزن الطير زانت قرنسته .
4/لا بأس تفتح الدريشه أول الصبح تدخل الشمس عليه ويتنشط.
5/حاول ترشه بالبخاخ لأن المويه تنظفه وتبرد عليه.
6/أنتبه لتصرفات الطير وشكله فهي تدل على صحة الطير.
7/حط عنده غضاره والا سحله المهم أنها حديد وحط فيها مويه وغيرها كل يوم وأنتبه لاتصير كبيره عشان ما يطب فيها الطير لأن الغرض منها الشرب.
8/لا تكثر عليه لبس البرقع .

أرجوا أني أفدتك وما يقصرون الشباب الي عنده تعقيب والا تصحيح ودنا نستفيد كلنا

[ابو محمد1111]

شكرا للمروركم و بيض الله وجهك اخوي جهام

[GHAAM]

وجهك أبيض يا أبو محمد

[بدوي نمبر ون]

ولاتنسى الناموسيه ام لمبه زرقاء
تراها مهمه
والغضاره ابحث عن الفخار حتئ تكون بارده

[.راعي الطير]

انتبه انتبه تعطيهم كورس مضر لها بعدين

[(هزاع)]

اولا الله يوفقك لما يحب ويرضي ربي
(الكلام للشياهين البحريه)
الكورسات لها فوايدها الضاهريه ولها مضار كثيره
اما فوائدها فهي على تصفيه الريش وتناسق
اما مضاره وهذا الاهم ضعف قوام الريش حيث يحصل له تقصف
ونشطار الريشه وتكسر من الاخيرضعف بالريش
مواد تدخل في تكوين العضم وهذا كله ضار للطير
قرانيس الهوا يكون باقي معها من ريش العام واكلها (كوكتيل) من كل ماخلق الله ونادر اللي يصفي منهن
واول وتالي التوفيق بيد الله
انت اجتهد ونوع العلف وبعد ابعد عن الحمام ابو الاقلاع والديدان
والصيف جاك والجربوع ينادي وسيقان الدجاج يمدحونها والسمان الحي
والمنخل لاتنساه وجهاز النامس لازم وقدح الفخارللشرب يمدحونه
وندعيلك بالتوفيق

[راعي لادن]

السلام عليكم

ما قصرو الخوان الهوي الفتمينات مفيده جداً

[الغرشوب]

بسم الله الرحمن الرحيم ..
أنا اربط في الاستراحه ..
عليك برملة البر ( اكيد هذا مهم ) افضل تربط الطير على صخر عشان المخالب والبوز تحدهم . ووالتوزيع بالكل .. وكل ما كان طازج كل ما كان افضل ..مروحة الشفط . الناموسيه .. عندك شخال ( ملعقة حق قلي البطاطس ..الخ) وحط لها صخر صغار عشان تنظف حوصلتها .. البرقع لاا تقربه .. المكيف يفضل صحراوي واذا جيت تعلف الطيور خل في العلف شوي من الريش عشان الرووبجه .. وحط صحن حق الرز فيه ماء الشواهين تحب الماء كثير ... وبالنسبة لالكورسات لا تقربها .. اول شي الشواهين معروفه في سرعان انكسار الريش واذا استخدمة الكورسات اكيد تبي تضعفها اكثر . مافيه شي احسن من الطبيعي .... والشباب مايقصرون والمعذره على الاطاله

[ابو محمد1111]

شاكر لكم مروركم من ناحيت المكان جهزت كل شي بس بقى الناموسيه

بيض الله وجيهكم و عز الله ما قصرتو

[راعي شلهوب]

وعليكم السلام ورحمه الله وبركاته
ابرك ماسويت انك حطيت لك مربط فالبيت لان مافي احد بيعتني بالطير مثل راعيه وخصوص الشاهين
1_ تاكد من صحه الطير انه سليم من كل شي ميه بالميه من قلاع وغيره اهم شي القلاع والدود
2_ العلف اذا تعطي سمن مثلج ممتاز يفكك من الامراض والمشاكل ويحافض على العده
3_النظافه يومي مرتين اذا ماتقدر ماعندك مشكله مره وحده
4_الماء حطه بصحون بلاستك كبيره بحيث الطيور تشرب و تسبح كل يوم غير الماء لازم
وانتبه من صحون الفخار لانها تسبب الحفاه للطير
5_ حاول وظروري جدا مع العلف المجمد تعطي فيتامينات ظروووري
6_ وخل جو المربط معتدل لاهو بارد ولا هو حار يميل للبروده شي قليل على شان تزيد رغبه الطيور بالعلف
7_ خف الدوس على الطيور مهب كل شوي داخل عليها احد يغثها

وباذن الله الطيور تقرنس واتمنى اني افدتك
تقبل مروري

[أبو فااارس]

ماقصرو الاخوان انا بضيف لك نقطتين مهمه..
1.. نفسية الطيور احرص على عدم وجود الاطفال حولها لأن الطيور بالوقت هذا أشبه ماتكون بسجن والناس اللي حولها ويمرونها مثل الاطفال يخربون نفسيتها ولو كانت صنيعه ماتذب أبد.
2: احرص عليها من الكفخ شهر 8و9 لأن المواسي والردايف بالشهرين اللي ذكرت يكونن باديات يسوقن وأي كفخه يمكن يلتوي الطير بجريره وتنعمي ريشه ولاسمح الله لو تنعمي ريشه لاتنوسر ولا شي احتر للربطه السنه الجايه(((
موفق خير

[ابو محمد1111]

راعي شلهوب / ابو فارس

عزالله ماقصرتو

[جلاد الحباري]

بسم الله الرحمن الرحيم ..
أنا اربط في الاستراحه ..
عليك برملة البر ( اكيد هذا مهم ) افضل تربط الطير على صخر عشان المخالب والبوز تحدهم . ووالتوزيع بالكل .. وكل ما كان طازج كل ما كان افضل ..مروحة الشفط . الناموسيه .. عندك شخال ( ملعقة حق قلي البطاطس ..الخ) وحط لها صخر صغار عشان تنظف حوصلتها .. البرقع لاا تقربه .. المكيف يفضل صحراوي واذا جيت تعلف الطيور خل في العلف شوي من الريش عشان الرووبجه .. وحط صحن حق الرز فيه ماء الشواهين تحب الماء كثير ... وبالنسبة لالكورسات لا تقربها .. اول شي الشواهين معروفه في سرعان انكسار الريش واذا استخدمة الكورسات اكيد تبي تضعفها اكثر . مافيه شي احسن من الطبيعي .... والشباب مايقصرون والمعذره على الاطاله


الصخر او الحصاه يمكن تجيب الحفاه انا عندي الطير كان مربوط على حصاه لون ابيض ولا هي مستويه جابت للطير حفاه قوية وشاكر لك على المشاركة

[جلاد الحباري]

اخوي ابو محمد اهم حاجة نظافة المربط وتوفر الماء والناموسية ونوع الرمل وتشكيل العلف والاضاءة لازم تشتغل حزات وتطفي حزات وماتكون شغالة على طول ولا عكس ذلك ولا بد تعقم المربط بديتول مخلوط مع ماء وتبللها بقطعة قماش وتمسح الوكر وكفوف الطير ومنسره بلطف تقريبا كل عشرة ايام وذلك حماية للطير من الامراض والجدرة واهم حاجة العلف تهتم فيه وتنوع واحرص من الطازج لازم يكون نظيف ويعطى فوري للطير ودرجة حرارة الغرفة لازم تكون معتدلة بحيث ماتكون باردة مره او حارة لان الحرارة الشديدة تجيب النهيته للطير واهم شي يتم تشغيل المكيف بعد عشاء الطير لان الطير بعد العلف ومع اجوائنا هذي يحس بحرورة شديدة