تسجيل الدخول

مشاهدة النسخة كاملة : عندي عدة مشاكل بسيارتي باترول فتك 2003


راشد االشمالي
15/05/2012, 10:44 AM
عندي عدة مشاكل بسيارتي باترول فتك 2003 الاولى لمبة المكينه التشييك والعه وسويت فحص كمبيوتر وقلو عندك حساس الهوى والبواجي مع العلم ان الموتر صافي اشتغاله وتمام بس المبه مولعه ورحت ابغير البواجي قلو لازم تفك الثلاجه ومدري وشغلتاً طويله ويكلف تقريباً 600 ريال بس البواجي .

والمشكله الثانيه جت بعدين احياناً اول ما امشي يجي ثقل بالسياره ماهو طبيعي كانك ساحب الجلنط والموتر يمشي مافيه شي بس ثقل في القومه ماهو طبيعي قبله بكم يوم جته مشكله بالقير مايعشق الى دي واحد وبعدين راحة مدري وش المشكله.

والمشكلة الثالثه لمبت الايرباق تشر والبوري مايضرب الكمبيوتر يقول من جهاز كمبيوتر الايرباق خربان والكهربائي يقول من الشريحه الي في الدركسون.
ابي فزعتكم مادري وش اسويبه ونتم عارفين بعض الورش بس يبي يغير قطع وانتم عارفين قطع الفتك نار ونا توني شاريه وبلشة فيه عطوني حل والى المعارض على طول.
vetec 2003
15/05/2012, 11:56 AM
مشاكل معروفة في الفتك 2003 و الله يعينك , مالك الا الوكالة الحمراني الله يهديهم او يهدهم تعمل فحص ب 500 ريال و تاخذ تقرير على الاعطال و التصليح و قطع الغيار , لكن لا تصلح عندهم تراهم .............. ’ و ياليت اذا تعرف اسم ورشة تصلح الفتك 2003 او رقم تلفونها في الشرقية و تنصحنا بها انت او من يقرأ هالموضوع من اصحاب الخبرة لان عندي نفس المشاكل تقريبا , لاني ناوي انفض السيارة تشييك كامل و خاصة نظام التبريد و البخاخات و شمعات الاحتراق و التكييف و عندي احد كراسي المكينة بعيد عنكم مكسور و يبغي له تغيير .

و ننتظر الفزعة من اهل الخبرة انا و خويي راشد الشمالي

قواكم الله
استيعاب
15/05/2012, 12:33 PM
شيل اصبع البطاريه ربع ساعه ورجعها وجرب الموتر اذا ضبط معناها اكيد من الكمبيوتر
.. عن تجربه.."
GX-2010
15/05/2012, 10:51 PM
كلام أخوي استيعاب صحيح100%100
جرب ماراح تخسر شئ إن شاء الله تظبط
موفق خير........تحياتي
وحيد الدهر
15/05/2012, 11:34 PM
بخصوص البوري صح كلام المكنايكي

فحمه البوري خربانه غيرها ويضبط
ابوسند9
15/05/2012, 11:48 PM
اخوي حياك الله
بالنسبه للمبه جرب افصل البطاريه شوي
واذا ما نفع شيك على فلتر الهواء نفخه بالبنشر لان دائم يكون السبب
وكذالك شيك على خرطوش الهواء لايكون منفصل من ناحيه الثلاجه
نجي للثقل والعزم شوف جنب فلتر الهواء علبة فيوزات بالرفرف فيها 5 فيوزات كبار ثلاثه لونها ازرق بدلها كلها واحد للدعسه وواحد للقير وسعر الواحد 50 ريال لان موديل السياره 2002 فلا بد انك تغيرها وغالبا ثقل قومة السياره منها والقير برضو
اما بالنسبه للبواجي خليها اخر شي دائم اشتغله صافي ولا اعتقد انه من البواجي
اما سعر تغيير البواجي 600 ريال فواجد بالحيل با الكثير من 100 الى 150 ريال
واذا كان فك الثلاجه في الورش المتخصصه وتلحيم مسامير الثلاجه ب 200 ريال وهذا يقول 600 ريال بواجي!!
راشد االشمالي
16/05/2012, 12:08 PM
الله يعطيكم العافيه اخواني فتك وخوي استيعاب واخوي ابو سند وخوي GX وخوي وحيد الدرب
انا فكيت الاصباع اكثر من مره تطفي لمبة المكينه وبعد يوم او يمين ترجع تولع
اخوي استيعاب وشلون الكمبيتور يعني اغيره او اصلحه
انا كم واحد قالي غير الكتاوت الى يمين الكبوت بس الوكاله عندنا خايسه قبل العصر هم مسكرين ونا عندي دوام ابي اتفضالهم لي يوم وروح وبدل الكتاوت

والي يعرف لي ورشه تشتغل بالفتك بحايل لا يبخل علينا تكفون جنني ونا ناوي اسافر عليه الصيفيه وودي اضبطه قبل السفر
ابوفهد331
16/05/2012, 08:12 PM
اخوي انا اقدر افيدك بسعر البواجي الحبه ب45 الطقم ب270
وبالنسبه للقير مثل ماقالو الاخوان الكتاوتات اللي بالجنب خمسه غيرهم كلهم الثلاثه الزرق الحبه ب45 والاثنين الثانيات قريبات من نفس السعر
وانا سمعت كثير انه القطع عندكم بحايل غاليه لانه مافيه منافسين لهم
راشد االشمالي
26/05/2012, 08:47 PM
الله يجزاكم خير على التفاعل بس قبل كم يوم غيرة الكتاوت الزرق كلهم الثلاث ومافيه فايده لمبة المكينه لسى شغاله
عاشق الغضا
27/05/2012, 08:42 AM
الثقل عندك احتمال كبير من زيت القير من زمان ماغيرته . اذا الزيت ماغير يصير فيه ثقل واللمبه مولعه . لانه في ترسبات على خارطة القير