نقاش حول فتح ( مدرسة لتعليم فنون الصقاره )

[عـــرادي]

السلام عليكم ورحمة الله وبركاته . . . وبعد

اليوم جايب لكم موضوع جديد و غريب في

نفس الوقت ، وحاب إن الجميع يتناقشون فيه

لتوضيح سلبياته وإيجابياته على ( الصقر و الصقار )

والموضوع بإختصار لو فرضنا أنه تم فتح مركز أو مدرسه

لتعليم سبل وطرق الصقاره السليمه ، لأني لاحظت

أنه يوجد الكثير من إخواننا الصغار أو الجدد على الصقاره

بأشد الحاجه لمثل هذه المدارس لأن البعض

لديه هذه الهوايه ولايوجد بين أقاربه صقار

ولا يحب أن يسأل الناس أو يكون عبء على غيره

فيلجأ إلى شراء صقر وليس لديه أي معلومات عنه

فتكون النتيجه : ( تكسير وتعذيب الصقر أو موته وعدم الإستفاده

الكامله للمتدرب من شراء الصقر ويكون المتدرب عرضه لتلاعب والغش ).

أنا من وجهت نظري أن تفتح مثل هذه المراكز ويكون بها

مدربين مميزين وتكون مدة التدريب إسبوع تقريباً

ويشمل التدريب على طريقه نقل الصقر والمحافظة

عليه ، والتمييز بين أنواع الصقور والتدهيل والبرقع

والشلو والدعو والتغذيه والأمراض و و و الخ

أرجو من الجميع المداخله البناءه والهادفه

واي شخص تعجبه الفكره ويبي يفتح مركز لا ينسى نسبتي هههههه

وتقبلو خالص تحياااتي ،،،،،

أخوكم : بدر العرادي

[ذراع الذيب]

السلام عليكم ورحمة الله وبركاته..
مسيت بالخير يابوفهد..


من يوم ماشفت معرفك وكني شفت لي بارق وغديت انا مثل البل اللي حداها الذرى والشبك
وجودي وجود اللي حداها الذرى والشبك...شعتها البروق وذكرتها مرابعها..
هلااا والله وغلااا وحي الله العرادي وحي ماجاب فكره ولااروع وش رايك تكون اسم المدرسه مدرسة العرادي لانكم مدرسه في الصقاره,,
ماشالله عليكم والصقاره وارثينها اباً عن جد ولايهون احد من الصقاقير فكره طيبه ,,
ونشوف اراء المشرفين والاعضاء وتحياتي لك,,

[اقدم صقار]

هلا بخوي بدر
الفكره مفيده ومميزه ولاكن لو افترضنا وقلنا بنفتح مدر سه
اين المكان المناسب ؟
وشلون بيكون التدريس ؟ هل بيكون بتعليم نقلة الوحش وتعليفه وطريقة التعامل معه بعد التدهيل ؟
او جميع ما يخص الصقاره ؟
طيور التطبيق للتلاميذ هل هي من المدرسه ؟
اشياء واشياء كثيره وحبيت اوضح منها نقاط


ياطير ماحدك نصيبك على خير*** وراك مسجوناً بوسط الغمااره
حسبي على اللي عزّرو فيك تعزير*** تكفخ ويصلاك الحديد بحراره
في موترن مال الولع فيه تأثير*** تكسي اجارن مايعرف الا اجاره
حشّرة وحوش البر حتى العصافير*** من يوم دوّر من وراها تجاره
مال الغشيم من الولع غير تدمير*** دايم عماره صايراً في دماره
ياناقلين الطير من غير تبصير*** حصيلكم منه التعب والخساره
اوفوا حقوق الطير ولا اترك الطير*** لا تظلمونه ياجداد الصقاره
خلوه لمحمد عشير المناعير*** اللي اليا شاله يعرف اعتباره
مقدم هواة الصيد من توه صغير*** من خلقته يعطي عليه البشاره
يعطيه حقه في ليال المخاظير*** اليا بكر الوسمي ولجلج خضاره
قدام يظهر في نباته نواوير*** ينصاه لو انه بعيداً مزاره
مايمنعه دونه ردي الاشاوير*** في نجد ولا نازحات(ن) دياره
الطير يبغي له عنايه وتدبير*** رجل(ن) يعرف اهانته من وقاره
هذاك ابوتركي زبون المخاسير*** سمح الحجاج اللي يذري جداره
يفزع لمحتاج ويكرم مسايير*** وغيثاً على من يستجير بجواره
من جاه يشكي من الوقت تقصير *** مظهود ولا مستجيراً اجاره
ويطرب لنقل مصخر الخرب تصخير*** واطلاقة المسباق شفه وكاره
وينومسه فعل الفروخ المغاتير*** ومن كل قرناساً تخيّر خياره
هذا يخل الريش مثل المعاصير*** وهذا يشوقه لاحجل في طياره
كم ماقع(ن) قفر(ن) جهمله بتبكير*** واثعى بصيده حين يشرق نهاره
وان جا الضحى الضاحي وجت حومة الطير*** حوّل بروض(ن) في مفيضه قراره
وصكوا عليه اهل الوجيه المسافير*** والقهوجي قدامهم شب ناره
واستانسوا في جو مافيه تكدير*** ودارت سوالفهم عناد وعياره
واخذوا لهم مقدار ساعات لاغير*** لين الهوا يسكن ويركد غباره
ثم روحوا بين الصلاتين وعصير ***الشيخ فك سبوق طيره واداره
مستبشراً بالخير والصيد ماذير*** والطير صقاره يحب اختباره
واشرف عل جواً خضاره دواوير*** فيه الخزامى والنفل والشقاره
واخذ عن اللي عادته تلة السير*** ما يلتفت راعيه يسبر شناره
غلاص طلعاً له على الصدق تبرير*** ياخذ على الجو البعيد انحداره
حول على جولن تقافى مدابير*** زرق النحور اللي عليها الدواره
الطايره يرسل عليها مشاهير*** مثل الجهاز اللي بتوجيه اداره
والدارجه يرسل عليها جزازير*** كل افدعاً مع قو ظربه شطاره
يفرا نحرها فرية الدلو في البير*** تلقى الفؤاد مظهره من ستاره
في وقتها ينسى وداد الغنادير*** وينسى جميع معاملات الوزاره
هذي حقوق الطير ياظالم الطير*** ماهو ب حقه سجنته في الغماره


وصح لسان ابن عون وفى وكفى
تقبل مروري اخي بدر
اخوك ابو منصور

[الفيتو]

بسم الله الرحمن الرحيم
السلام عليكم ورحمة الله وبركاته
مساء الخيرياخوي / العرادي
.
يالله حيه .. كيف حالم عساك طيب ؟
يقال اليابان فيه معاهد تعلم الصقاره وتصدر رخص صقار
واوربا وامريكا كذلك
ولايحق لمنتج فتح مزرعه الا يكون حاصل على رخصه صقار
لديه خبره في التعامل مع الصقور
وهناك تفتيش مفاجي للمزرعه وتجديد الرخصه
يتم بعد تزكية الصقار والمزرعه من قبل المفتشين
والصقار يتم توقيفه وسحب الصقر منه اذا لم يكن
حاصل على رخصه تؤهله للتعامل مع الصقور
ليته صحيح ويتطبق عندنا
فكره جيده وتشكر عليها
*
والسلام
AL Khapt Brother of Naif
الحجاز
26-6-1433هـ

[@السيف@]

فكره طيبه لكن لابد من دراسة السلبيات والايجابيات بتمعن قد ينفع في امريكا ولا ينفع عندنا
لان هناك عندهم حقوق الحيوان ومهتمين بالحيوان اكثر من الانسان
واحنا ما عندنا حقوق انسان فما بالك بحقوق حيوان

[(هزاع)]

فكره غريبه جديده
خلتني اوقف عند الموضوع وتمعن
كيف وين ومن بتكفل ومن بيجي ومن بيتفرغ يعلم
قد صارلي موضوع عن رجل خير من سكان الرياض معه مثل القروب من الصقاره والهواه ويعلم الله انه مدرسه ويمتاز ماشاء الله عليه بوسع الخاطر والتهليل والتكبير والحماس وتسمعه على الجهاز ويعطي الفرصه للنقاش ولاعنده ربكه ولاعصبيه هادي حكيم متواضع يحسب لاكل شي
ماشاء الله عليه
وانت اخوي الله يجزاك خير واتمنا نجاح فكرتك
الله يطرح البركه

[ابو محمد1111]

المدرسه تفيد المبتدئ فقط ليش مو نادي و يكون فيه تحديات و يتعلم الصغير من الكبير و يكون اي شي يحتاجه الصقار فيها و هاكذا تحافظ على الهوايه لاكن انشالله احد يسمع لنا

[عاشق هدبها]

حي الله ابو فهد
والله الصراحه الفكره جديده وجيده بس انا عندي اقتراح ولا عليك امر المفروض اللي هاوي الصقاره ولا يعرف احد صقار سواء من اقاربه او من مدينته وراغب بالشي هذا عن هوايه وحب للطير انا اقول افضل شي له يتعرف بصقاقير شرواك وشروا من يقرا والغايبين من الصقاقير ما فيها شي لو يسدح له موضوع هنا ويقول انا صقار جديد وهاوي للصيد والصقاره وحب الطير وباي مدينه بحكم اذا فيه صقاقير منها ويتعرف عليهم ومعرفة الرجال تجاره ويكسب منهم ويكسبهم ويروح ويجي معهم ويتعلم منهم .. وهذا الله يسلمك مجرد اقتراح .. فمان الله

[ســـبــار ربــعـــه]

المدعى والجلسه في محلات الطيور والشراء والأتكال على الله والقراءه من مكشات تكفي عن الدراسه.
والطيور الصلفه احسن معلم لمن يرغب في الصقاره فاما يعزم ويكمل ولا يقطع الدرب من اوله ويرتاح.
وارجع واقول الطير الصلف الي يصيح ويهبد ويكوش ويحقل وينقل العلف ويكافخ مبرقع ولا مفرع ويفتر على التكيه ويفتر على الدس يولد عند الهاوي حب التحدي ويقوم بابتداع طرائق جديده في الصقاره ويزيد خبرة الصقار المبتديء طبعا في غير ايذاء الطير فيجب مراعاة الله سبحانه فيه. وسعة الصدر وطول البال اهم الأشياء وخصوصا في الصقاره واذكر قد عرضت طير في يوم من الايام في مكشات واتصل بي احد الأخوان المبتدئين مثلي الساعه ثلاث ونص بالليل!! والله انه مصحيني من نومي عشان يفرق السوم ويعلمني انه صامل. قلت الأن ما صبرت الى الصبح كيف بتصبر على طير قد يختلف اما في هدد او دعو او ارتفاع عده او حتى في صقارته وتدهيله وهو طير ربيب كيف لو الطير وحش ولنفترض اني قد بعته الطير وكان الطير وحش. سيتعرض للضياع بسبب عجلته على الهدد او يتنكر او يطبح عليه بسرعه ويطيح في النقل. اذا وسعت صدرك تعلمت وخبرت.
والفكره طييييييبه بالحيل ولا هي غريبه من بدر العرادي بيض الله وجهه.

[فهد الحنيني]

فكره طيبه يا ابو فهد لكن الموضوع هذا يبيله دراسات بتمعن ويشاف السلبيات والايجابيات فيه.
لكن مبدئيا الفكره ماعليها كلام وان شاء الله يصير لها اهتمام من المسؤولين

[عاذي]

مع وافر التحية والأحترام فكرة اتمنى ان لا تتحقق .. الأرض فيها ماكافيها من الصقاقير مع قل الصيد .. وضيق اراضي القنص والنمو السكاني المطرد ..

[حامد الحنيني]

السلام عليكم ورحمة الله وبركاته

ياهلا ومرحبا اخوي / عرادي

تشكر على هالفكره الممتازه وعلى طاري فكرتك طرتلي فكره

بدل فتح مدرسه ود وجب وهات يجي صقار عليه العلم ويصور فنون الصقاره

على سيديات ويكون مثال 10 سيديات وكل سي دي يتبع مرحله معينه من المبتدئ الى الخبير

ويكون التصوير واضح والشرح اوضح

مو هيك يالربع

النسبه من تصير له يالعرادي هههه

تحياتي لك.

[صقارعزاااام]

الله جابك يالعرادى ارسلتلك رساله على الخاص وطنشت والحين اقولها على العام ابى اشترى من طيورك الله لايهينك اذا عتدك فرخ انا شراى خلنى اصقره بالصيفيه لو ماوضعت الموضوع هذا انا وضعت موضوع لك

[مفتون الضبي]

سلام عليكم ورحمة الله وبركاته

اولا: اشكرك اخي العزيز العرادي على هذا الطرح والفكره

ثانيا: انا احب الهوايه هذي من صغري وجا الوقت اني حبيت انقل فيه لكن ماعرف الا القليل عن الصقاره وانا وغيري وكثير من الشباب المبتدئين مثلي لاتكفيهم معلومات يقرأونها مع العلم ان لي اقارب صقارين ولاكن ليس لي احتكاك بهم وانا وغيري محتاج يتعلم الكثير عن الصقاره


وشكرا

[صقار العنزي]

الله حيه والله فكرهه سديده مية ف المية

[أبو فااارس]

المدعى والجلسه في محلات الطيور والشراء والأتكال على الله والقراءه من مكشات تكفي عن الدراسه.
والطيور الصلفه احسن معلم لمن يرغب في الصقاره فاما يعزم ويكمل ولا يقطع الدرب من اوله ويرتاح.
وارجع واقول الطير الصلف الي يصيح ويهبد ويكوش ويحقل وينقل العلف ويكافخ مبرقع ولا مفرع ويفتر على التكيه ويفتر على الدس يولد عند الهاوي حب التحدي ويقوم بابتداع طرائق جديده في الصقاره ويزيد خبرة الصقار المبتديء طبعا في غير ايذاء الطير فيجب مراعاة الله سبحانه فيه. وسعة الصدر وطول البال اهم الأشياء وخصوصا في الصقاره واذكر قد عرضت طير في يوم من الايام في مكشات واتصل بي احد الأخوان المبتدئين مثلي الساعه ثلاث ونص بالليل!! والله انه مصحيني من نومي عشان يفرق السوم ويعلمني انه صامل. قلت الأن ما صبرت الى الصبح كيف بتصبر على طير قد يختلف اما في هدد او دعو او ارتفاع عده او حتى في صقارته وتدهيله وهو طير ربيب كيف لو الطير وحش ولنفترض اني قد بعته الطير وكان الطير وحش. سيتعرض للضياع بسبب عجلته عل
ى الهدد او يتنكر او يطبح عليه بسرعه ويطيح في النقل. اذا وسعت صدرك تعلمت وخبرت.
والفكره طييييييبه بالحيل ولا هي غريبه من بدر العرادي بيض الله وجهه.
أوافقك الرأي الصقاره ولع ماهي مدرسه وموضوعك طيب

[عـــرادي]

السلام عليكم ورحمة الله وبركاته..
مسيت بالخير يابوفهد..


من يوم ماشفت معرفك وكني شفت لي بارق وغديت انا مثل البل اللي حداها الذرى والشبك
وجودي وجود اللي حداها الذرى والشبك...شعتها البروق وذكرتها مرابعها..
هلااا والله وغلااا وحي الله العرادي وحي ماجاب فكره ولااروع وش رايك تكون اسم المدرسه مدرسة العرادي لانكم مدرسه في الصقاره,,
ماشالله عليكم والصقاره وارثينها اباً عن جد ولايهون احد من الصقاقير فكره طيبه ,,
ونشوف اراء المشرفين والاعضاء وتحياتي لك,,



وعليكم السلام ورحمة الله وبركاته
هلاااااا و الله و غلااااااا ببو ناصر
والله حنا اللي مشتااااقين لك ولكن انت الله يهداك تتغلى
وبالمعرفه ما عليكم زود انت وجميع اخواني بمكشااات
واسعدني مرورك وتشريفك يالغالي
مع خالص تقديري واحترامي

[عـــرادي]

اقدم صقار
هلا والله وغلا ببو منصور
حياااااك الله يالغالي
المميز هو مرورك الكريم
المكان المناسب في اي مدينه كبيره فيها تجمع
للصقاقير وفي حاله نجاحها تعمم على مدن اخرئ
وبخصوص التعليم يكون تعليم شامل من الالف
الى الياء والطيور اكيد تكون من قبل المدرسه
وتكون شامله لجميع انواع واصناف الصقور
مع خالص تحياتي


الفيتو
وعليكم السلام ورحمه الله وبركاته
مساء النور يابو صالح
الله يحييييك ويبقيك يالغالي
اليابان غييير هههههه
حنا حبينا نساعد اخواننا الجدد
ولكن ننتظر زيارتك يابو صالح انت والربع
وتقبل خالص الود والتقدير



@السيف@
هلا وغلا بخوي السيف
حنا الحين في مرحله الدراسه والمناقشه
والله لا يضيع لك حق يالغالي
دمت بود


( هزاع )
حياااك ربي
هذا هو الشخص اللي يصلح ولاهو اقصور بالربع
مجرد فكره واتمنى الاستفاده منها
سلمت و دمت
×× ×

ابو محمد1111
هلا و غلا
الهدف الاول والاخير هو الشخص المبتدئ
لكني نساعدهم كما تعلم الجميع
سلمت و دمت

عاشق هدبها
الله يحييييك يالغالي
انا اخالفك الراي الصقاره ممارسه لو الشخص
عرف كل ما كتب في النت عن الصقور صعبه
يطبق على ارض الواقع ، والممارسه زي
ما تفضلت انت هي الاساس ولكن تعرف ان
الجميع في هالزمن مشغولين والناس قصرت
في تعليم اعياله وهذي طريقه تسهل امور واجد
اسعدني مرورك وتشريفك
مع كل الود يالغالي


سبار ربعه
هلاااا والله وغلاااا
كلامك صحيح ولكن فيه ناس ما تحصله الجلسه
والطلعه والمقناص وهم من نقصدهم في حديثنا
والله يبيض وجهك يالغالي
والطيب منك وفيك ولا عليك زود
اسعدني مرورك العطر

فهد الحنيني
هلاااا و الله ومرحباا ببو صالح
وينك غايب لا حس ولا خبر
الله كريم ، وانتم يالمعلمين فيكم الخير والبركه هههه
سلمت و دمت

عاذي
هلاااا و غلاااااا
هههههههه عين خير يالغالي
والله لو الهدف الصيده انك ما تحصل احد قانص
ولكن الناس تدور الونس وخوة اللي مثلك وشرواك
والبر والمقناص مهم وخصوص للشباب يفكهم من
بعض الامور ويصقل رجولتهم
مع كل الود

[مربي الصقور]

السلام عليكم
انا اقول ايه يفتحون بس تكون فيه قوانين مثل العمر من فوق 14 سنه ويكون عنده نبذه عن الصقور الخ... والله يعطيك العافيه على هالموضوع
تقبل مروري

[falcon 1]

السلام عليكم ورحمة الله وبركاته
صبجكم الله بالخير جميعا
بصراحة اشكرك على طرح هالموضوع ..ونا بصراحه اؤيد هذا الموضوع
لو نرى الغرب ..فهناك نوادي للصقاره وهالنوادي تعلم الصقاره بالطريقة الصحيحة ..فاذف اردت ان تنقل اي جارح هناك فلابد من رخصة . وهناك ,,ايضا تنقل الطيور بدرجات ..مثلا اول طير تنقله هو الحميميج او العقاب ذو الذنب الاحمر. (red talied hawk)وبعده تتقدم الى الطير الي بعده فانا بصراحة اريد مدرسة حتى يستفيدون اجيالنه القادمه باذن الله . وشيء جميل

ونسمع اراء الاخوان باذن الله

تقبلو مروري
والسلام عليكم ورحمة الله وبركاته

[hadad098]

الله يعطيكم العافيه كل باسمه وماقصرتوا الجميع

لكن عندي رأي ومن وجهة نظر

( خلوا كل واحد يعلمه شايبه)

واتركوا عنكم المراكز والتدريب

الصقاره وراثه من سالف الجيل

وشكرا للجميع

[جـرح الشمـال]

هلا وغلا ابو فهد
وش اخبارك وين الغيبه
واخبار الوهيبيه بعد الامطار هي ربعت
اما بالنسبه لموضوعك من الصعب هذا الا بحاله واحده
اذا فتح هذا المركز في جميع مناطق ومحافظات المملكه
لان الصقاره الجدد صارو بزدياد وملفت لنظر وهذا غير مختصر على منطقه واحده
ويكون المركز مدعوم ماديا ومعنويا للمدربين لنه يكلفهم جهد ولايخفى عليكم
هذي وجهت نظري الله يحييك

تقبل خالص احترامي

[سنجااار]

فكره ممتازه وبودي ان المبتداء يعرف اذا الطير مريض قبل ينقله

كم طير مات بسبب جهل المبتدئين بالصقاره

تحياتي لكم

[أبومحمد عنيزة]

أشكرك أخوي العرادي على الموضوع الرائع..
وأنا بصراحة مبتدأ ولي شف بالصقارة حييل لكن للاسف ذهبت لصقاقير على قولتك لكن مافيه احد عطاني وجه وأنا والله ماودي أصير مدهالتن للناس وأجدع وجهي عليهم .هي النقطة الوحيده لو يوجد صقار يفتح قلبه لكل من وده يتعلم كان مالقيتو صقارين جاهلين ولايقدرون الطير مقداره. تقبل مروري

[من.بادي الوقت]

فكرة ممتاة بارك الله فيك

[عاذي]

ابو فهد الا علمنا طرق التفريخ وانتاج الصقور بما انك تملك مزرعة لانتاج وتفريخ الصقور .

[عـــرادي]

حامد الحنيني
وعليكم السلام ورحمه الله وبركاته
فكره ممتازه ولكن العملي افضل من النظري
والممارسه هي اساس التعلم
وتستاهل كل خير

صقار عزاااااام
هلا و الله و غلا
ابرك الساعااات ولكن العدد عندي قليل
وصعبه ابيع لك طير ما كمل ريشه
ولا تعرف مقاسه لانه ما اكتمل نموه
سلمت و دمت


مفتون الضبي
وعليكم السلام ورحمه الله وبركاته
لا شكر على واجب
وانا في الخدمه باللي اعرفه
ويسعدني ويشرفني خدمتك


صقار العنزي
الله يحييييك يالغالي
وابرك المواضيع اللي يعجبك
دمت بود


ابو فااارس
الطيب والله وجودك يالغالي
ولكن لم يخلق عالم والجميع تعلم من من سبقوه
سلمت و دمت

[رســــــلان الوجه]

الله يعطيكم العافيه كل باسمه وماقصرتوا الجميع

لكن عندي رأي ومن وجهة نظر

( خلوا كل واحد يعلمه شايبه)

واتركوا عنكم المراكز والتدريب

الصقاره وراثه من سالف الجيل

وشكرا للجميع



حيك الله أخووووووووي

الصقارة تكون وراثه وتكون هواية
وشايبي الله يطول بعمره وعمرك ومن يقرا ماهو صقار
والحمد لله أحببت هذه الهواية
أنا مع المدرسة وسجلني اول واحد ولا هو عيب نكرر ونعيد
والتكرار يعلم الشطار:good2:

[رســــــلان الوجه]

أشكرك أخوي العرادي على الموضوع الرائع..
وأنا بصراحة مبتدأ ولي شف بالصقارة حييل لكن للاسف ذهبت لصقاقير على قولتك لكن مافيه احد عطاني وجه وأنا والله ماودي أصير مدهالتن للناس وأجدع وجهي عليهم .هي النقطة الوحيده لو يوجد صقار يفتح قلبه لكل من وده يتعلم كان مالقيتو صقارين جاهلين ولايقدرون الطير مقداره. تقبل مروري



حي الله أخوي أبو محمد عنيزة
يقولون من سار على الدرب وصل
وصدقني يجي لك يوم وتنجح وتتعلم
أعضاء مكشات الطيبين والشقردية فيهم الخير والبركة
والنت ماخلا ولا بقاء تجد 95% من اللي تبيه بالاسئلة والاستفسارات
والباقي تطبيق
ولكل جواد كبوة المهم المواصلة والمثثابرة
والناس اللي تقول ماعطوك وجه ياخوي شي طبيعي في الحياه
أصابعك ماهي سوا لكن لاتكترث بتلقا الطيبين ان شاء الله اهم شي المواصلة
ولاتنسى وماتوفيقي الا بالله
وان بغيت شي اقدر اساعدك فيه ارسل لي ع الخاص

وانا مع المدرسة الله يوفق الجميع لما يحبه ويرضاه

أخوكم الصغير/ رسلان

[خالد العطااوي]

انا اشهد ان عاذي صااااااااااااادق في كلالالالالالالالامه وياليت انها ماتحقق
الحين مافيه صيد علشان يتعلمون الصقاره فياليت نكون كذا افضل هههههههه
..

[قرناس شماالي]

اضم صوتي لصوتك يابومشعل

وسلمت على القصيده

[كلي فخامه]

بصراحه فكره لابد ان تنما لرجال الاعمال منها يفيدون ومنها يستفيدون ورجال الاعمال ياكثرهم بالبلد

[طرح الشبك]

هلا وغلا بأخوي ابو فهد
انا اسأل اخواني الصقاقير هل تشوفون ان الصقاره لها طعم وطراة زي اول
هل هناك صيد يخليك تشوف وش فعل طيرك ام انك ماتلقى من نقلته الا التعب
والله ياخوي بدر اني من احرص الناس على الصقاره ولكن مخاسير على الفاضي وبرادة وجه نقنص اسبوعين كامله ماتشوف زول حبارى ولو جره هل هذا مقناص ام شقى
وش هي حاجت الطير اذا مافيه مقناص حبارى
وين هي حلاة المقناص وفي كل روض تلقى عشرين جهاز كراوين
وين هي حلاة المقناص والحبارى تباع بعشرة الاف اقل شي
وين هي حلاة القناص والطير الي ماهو صايد وجميع الطبوع الشينه فيه ويقول ب 20000 الف
هل تشوف ان وقتنا هذا وقت مقناص والله ان بيعة الطير وجلوسك بين عيالك ووالديك اعز من الحاله هاذي
اخوي بدر الحبارى باديه بالانقراض كل سنه يقل عبور الحباري بشكل كبير جدا وانت صقار وتعرف الشي هذا
حتى الطيور الوحوش اكثرها تفاريخ ماطارت ولا يوم واحد ويقولك طرح تركمانستان واهل الامارات يعرفون الشي هذا واكثر فروخ الشواهين والحرار الي دخلت للخليج هي تفاريخ
انا وعوذ بالله من كلمة انا بس اقول ليش نفتح مدرسة تعليم طيور والصيد منقطع ولا له ذكر

[عاذي]

هلا وغلا بأخوي ابو فهد
انا اسأل اخواني الصقاقير هل تشوفون ان الصقاره لها طعم وطراة زي اول
هل هناك صيد يخليك تشوف وش فعل طيرك ام انك ماتلقى من نقلته الا التعب
والله ياخوي بدر اني من احرص الناس على الصقاره ولكن مخاسير على الفاضي وبرادة وجه نقنص اسبوعين كامله ماتشوف زول حبارى ولو جره هل هذا مقناص ام شقى
وش هي حاجت الطير اذا مافيه مقناص حبارى
وين هي حلاة المقناص وفي كل روض تلقى عشرين جهاز كراوين
وين هي حلاة المقناص والحبارى تباع بعشرة الاف اقل شي
وين هي حلاة القناص والطير الي ماهو صايد وجميع الطبوع الشينه فيه ويقول ب 20000 الف
هل تشوف ان وقتنا هذا وقت مقناص والله ان بيعة الطير وجلوسك بين عيالك ووالديك اعز من الحاله هاذي
اخوي بدر الحبارى باديه بالانقراض كل سنه يقل عبور الحباري بشكل كبير جدا وانت صقار وتعرف الشي هذا
حتى الطيور الوحوش اكثرها تفاريخ ماطارت ولا يوم واحد ويقولك طرح تركمانستان واهل الامارات يعرفون الشي هذا واكثر فروخ الشواهين والحرار الي دخلت للخليج هي تفاريخ
انا وعوذ بالله من كلمة انا بس اقول ليش نفتح مدرسة تعليم طيور والصيد منقطع ولا له ذكر


بيض الله وجهك ياطرح الشبك .

[عـــرادي]

سنجااار
الله لا يهينك يالغالي
والهدف ان الجميع يتعلم
دمت بود

أبومحمد عنيزة
كلامك عين الصحيح
والله يعيينك
واذا تبي شي انا حاضر
العظيم مهو بعيد عن عنيزه
مع كل الود

من.بادي الوقت
تسلم يالغالي

عاذي
حيااااك الله
والله ابرك الساعااات
وتعال عندي وابي اعلمك كل شي
ولكن طلبك هذا زي اذا قلت لك انت صقار علمنا الصقار
مهو شي بسيط يسهل سرده ولكن يبي ممارسه وتعب
واي شي تبيه انت والاخوان انا حاضر


رســــــلان الوجه
الله يبيض وجهك
والعلم ما فيه شي وكلنا تعلمنا من ناس قبلنا
وانا ما عندي مدرسه ولكن بشجع الناس على تبنيها
واذا تجيني الله يحييك وابشر بما يسرك
سلمت و دمت

خالد العطااوي
هلا والله وغلا
الصيد توفيق من الله

قرناس شماالي
ابو مشعل خير من يمثلنا

كلي فخامه
صدقت والله يامرهم بس

طرح الشبك
لو حسبنا للخساره والربح ** ما زرعنا يالعصافير الشعير
والهدف من المقنااص هو خوه الرجال
وليس الصيده هي الهدف
وابشرك ان الخير واجد ولكن الصيد توفيق من الله
فيه ناس تهد على خمس و عشر وفيه ناس ما شاقت الجره
والغش في كل شي ، حتى وانت عند اعيالك كل شي من حولك مغشوش
وما انقطع الخير والصدق بين الناس
مع خالص تحياااتي،،،
عرادي

[طرح الشبك]

اخوي عرادي انت تقول الهدف من القناص خوة الرجال وليس الصيد
انا اقول والف نعم بخوة الرجال الي شرواك وامثالك ولكن اعتقد ان خوة الرجال شي ثاني الرجال نقدر نخاويهم في كل مكان وليس بالمقناص فقط
المقناص حلاته هدد ووناسة وليس نقلة طير على الفاضي والله لو في حباري تسوى كان نقلنا بدال الطير ثلاثة طيور ولا احد يلومك

[عـــرادي]

مربي الصقور
وعليكم السلام ورحمه الله وبركاته
لازم يوجد شروط لقوانين
بس وين اللي يتبنا هالمشروع

falcon1
وعليكم السلام ورحمه الله وبركاته
الله يبيض وجهك
وهذا الصحيح الواحد يدور الفائده لغيره
وهذا هو تراثنا

جرح الشمال
هلا والله وغلا
ابشرك كل شي على ماتحب
والارض طيبه وفيها صيف طيب
اول العبور عندنا
بس جهز نفسك تجينا يالغالي
وكلامك عين الصواب
سلمت و دمت