ياأهل الفتك افزعوا لخويي تكفون

[سطامكو]

السلام عليكم اخواني الأعزاء
الموضوع ومافيه:واحد من اخوياي ضايقن صدره واستشارني قلت ابطرح موضوعك بمكشات والربع ماراح يقصرون معك لأن ماعندي خبره بموضوعك
طولت عليكم ادري ههههـ
السالفه ان الرجال معه فتك 2008 وموتره ماشاءالله عليه مايشكي شي من نظرته طبعا ولكن يقول مع دخول الحر لاحظت ارتفاع الحراره مع السرعات العاليه ترتفع الى الثلث وذلك على سرعة 165 وفوق واول ماأرفع رجلي عن البانزين ترجع للربع بنفس سرعة عداد السرعه(اي نزول الحراره للربع يكون سريع) علما انه اثناء الوقوف والمشى العادي ثابته على الربع
يقول رحت وغيرت بلف ماء وغطاء اديتر وغسلت السرندل وغيرت الماء بماء اصلي وشيكت على تماتيك المروحه وعلى مراوح التبريد وكلها شغاله تمام؟؟
والمشكله مازالت قائمه
والرجال ضايقن صدره
وجزاكم الله خير.......

[اوف لاين]

يمكن الراديتر يحتاج تسييخ

[abo_Majed]

هل ترتفع بكل الاوقات حتى بالشتاء والا بس هالايام هذي ؟ اذا بهالوقت ترى عادي وان امكن صور عداد الحرارة وقت الارتفاع

[صباح القايله]

خله يجرب يفك دبه البيئه يمكن متسكره
يفكه ويجرب لا يفرغه

[ابو فهد...]

يسيخ الاديتر لانه ما ترتفع الا اذا اسرع

[وليد46]

شف طع شوري وخذ كلامي خله يغير تماتيك المروحه لانه خربااان ميه بالميه والتشيك مايبين انه خربان او لا

وقليل الي يعرف هو خربان او لا واحد من الاعضااء هنا بمكشات كتب مشكلته نفس مشكلة خويك ومديل الجيب ربع الفين وتسعه وطلع الخراب التماتيك مع العلم انه قال مشيك عليه وتمام بس شيك اكثر من مره وغيره

وصار موتره تما ماشاءالله. قل لخويك يغير التماتيك لانه مع السرعه العالي والشد على الموتر يصير هوا المروحة

مره ضعيف ويحتمي الموتر وتكفى اذا غيره علمنااا وش يصير لاتنسانا انت وخويك وبالتوفيق

[You Like Me]

واول ماأرفع رجلي عن البانزين ترجع للربع بنفس سرعة عداد السرعه(اي نزول الحراره للربع يكون سريع) علما انه اثناء الوقوف والمشى العادي ثابته على الربع


اتوقع والله اعلم المشكله من الحساس نفسه
خله يشيك على امبير الحرارة في الطبلون قبل المخاسير

[بني عدنان]

غير غطاء القربه الغطاء مهب غطا الاديتر

وشيك اذا ما فيه تهريب أو منشق وشيك على الخراطيش

[سطامكو]

السلام عليكم جميعا
وشاكر ومقدر تفاعلكم مع الموضوع
الموتر ماكان يعاني من هالمشكله لابشتاء ولابصيف ويقول وقفت الموتر لأكثر من شهر وطلعت عليه مشوار من القصيم للرياض بعز الظهر الاسبوع الماضي وبسرعه عاليه وارتفعت حرارته ومن بعدها والحراره فيه مع السرعه العاليه بس
والرجال يقول مفرغ الدبه حقت البيئه من سنه والاديتر نظيف ومايحتاج تسييخ وبدل غطاء الاديتر بالقربه والعكس وماتغير شي
وباقي كلام الاخ وليد46 بخصوص تماتيك المروحه
وكلام الاخ you like me
بخصوص حساس الحراره
وبرضه اقترحت عليه وقلت يمكن يكون واحد من الخراطيش مع السرعه العاليه يصفط
ع العموم عطيت الرجال العلم ويقول بأبدا يوم الخميس رحلت العناء وبمر على الكهربائي يشيك على الحساس واذا انه تمام بشوف واحد من الشله ببدل معاه تماتيك المروحه قبل ماأشري واتخسر والحل الاخير بشيك على الخراطيش...
وبتابع معاه وبعطيكم العلم باذن الله
ولاهنتوا جميعا

[patrol-fa]

اخوي دامه يقول موقف له شهر ثم سافر عليه

الإديتر يبي له تسييخ طع شوري

وتبي تتأكد شف لك اديتر ثاني وجرب

[راعي فتك 2005]

الحل عندي مثل الي صار فيني سيخت الرديتر وغير الخرطوش الي تحت ورجعت ربع حتى مع الدوس

[مركز حراره]

سيخ الرديتر موترك عادي ؟

[عاشق الغضا]

الله والعالم إن الحراره طبيعية 100% الحل انه يصور انبير الحراره . وتعرضه علينا بالموقع . وفي اي وقت ترتفع الحراره . وبنخبرك هل هي طبيعية ام فيه مشكلة . لان المشي الظهر والسرعة 165 اكيد بترتفع الحرارة . ونسبة كبيرة في الموقع معهم نفس الموتر وانا منهم .

[سطامكو]

مرحبا جميعا
الرجال موتره تماتيك
لكن بقوله بكره يصور الطبلون وانزلكم الصوره
وعطونا رايكم

[سطامكو]

السلام عليكم جميعا
ابشركم الرجال ضبط موتره والشكر موصول لكل المكشاتيين اللي شاركوا بالموضوع
طبعا بقولكم وش صار على خوينا
الرجال اصبح يوم الخميس ويقول رحت للكهربائي فيليب اللي بالخبراء
وفحص حساس الحراره وشيك على الامبير اللي بالطبلون وكله تماام
ومشيت من عنده الظهر وقلت اببدأ بالخطوه الثانيه:
اللي هي تسييخ الاديتر وتغببر الخرطوش اللي تحت احتياطا واتجهت لمحل التويجري ببريده العصر واخذت الخرطوش اللي تحت وطلعت من عنده لمحل السيف وفكيت الاديتر وحصلت اغلب المجاري مسكره بدون وسخ
واكيد انه من الوقفه سكرة المجاري ومن ملوحة المويه بعد
يقول بعد ماطبقت الاديتر ومسكت الخط رجعت الحراره طبيعيه ولله الحمد
على الخط الثاني او فوقه بشعره
والسلام عليكم....

[وليد46]

الله يبشرك بالخير والله يتمم على موتر خويك

[سطامكو]

تسلم اخوي وليد
وجزاك الله خير