مشكلة نقص زيت الفتك 2005

[خيال العيون]

السلام عليكم أعضاء منتدى مكشات الرائع

العذر من الجميع راح اشغلكم شوي بسبب مشكلة عندي بالسيارة وراح اشرح شرح مطول شوي

سيارتي باترول صالون فتك 2005

اولاً انا متعود اغير الزيت كل 6000 الى 7000 كيلو

المشكلة / قبل شهرين كان من المفترض اني اغير الزيت لأنه ماشي 5000 كيلو وكنت ناوي اروح من القصيم للرياض فقلت خلها بالمرة نغير بالرياض . لكن المفاجأة بعد وصولي للرياض ولعة لمبة الزيت ولما شيكت حصلت العيار ما فيه زيت .

غيرت الزيت وطلعت من الرياض للقصيم وبعد وصولي للمحطة اللي قبل نزلة الغاط شيكت وحصلته ناقص حوالي ربع علبة زيت مع وجود لون اسود على الصدام فوق الشكمان بإشارة ودود دخان خارج .
فعلاً تأكد انه بعد ما ادوس كامل البنص للسيارة يطلع دخان اسود من الشكمان .

وصلت بريدة على خير والحمدلله وابتدى مسلسل الورش .

اول ورشة كانت ابو خالد الخضير اللي بخضيراء فقالي لازم تتأكد وتغير الزيت وتمشي 3000 وتجيب السيارة .
بعده رحت لورشة رادار اللي بصناعية الرواف شيك عليه وقالي الدخان بنزين مع وجود شك برائحة زيت . ونصح اني اشتري منظف بخاخ من وكالة فورد بزعمه انه افضل منظف . اشتريت وعبيت بنزين 95 نص التانكي مع علبة وحدة منظف . مشيت 150 كيلو ولا زالت المشكلة موجودة .

لاحظت انه خلال المشي بسرعة 140 وزيادة يصير فيه نقص زيت اعلى من المشي داخل المدينة .

بعدهم رحت فحصت كمبيوتر وطلع كل شي سليم .

بعدهم رحت لم ورشة ابو خالد الكبير بالبصر فقالي انه الدخان بنزين ولا فيه زيت هذا احتمال بخاخ او منظم . وطلب فحص كمبيوتر .

رحت لم ابو صالح الرياعي وفحص الموتر كمبيوتر وطلع سليم ما فيه شي .

مع وجود شك من قبل ربعي انه يا اما جلد بلوف او شنمبر او تنظيف بخاخات .

والحين صراحة انا محتار ما ادري اتعب واشتغل جلد بلوف او انتظر مع ان السيارة الحين ماشية 3600 كيلو ومزيد عليها علبة قبل فترة والزيت بالعيار على اخر شي .
والصورة توضح اكثر نسبة الزيت . وياليت اللي عنده فايدة لي يعطيني المعلومة .

http://www.mekshat.com/pix/upload05/images248/mk172048_zyyyt.jpg

[عاشق الشعبيات]

اتوقع والعلم عند الله انك مغير زيت تجاري والدليل على كلامي انك فحصت المكينة وصارت سليمة لأن اهل الزيت هاليومين طايحين في الزيت المكرر ويغشون فيه المسلمين

فغير الزيت بأصلي عندك زيت الترا 7 20w50 ممتاز وفوكس نفس المقاس وغير السيفون من الوكالة وامش عليه الف كيلو وعاير اذا مافيه نقص فالسبب من الزيت المغشوش.

[محطم عنيد]

زي ماتفضل إخوي

واضح السبب من الزيت

لكن ياخي عندي لك حل بسيط

جب شرشف أبيض وحطه بالحوش بعدها دخل الموتر ووقف على الفرشة طبعا لما تغير الزيت ووقفه بعد مشوار 100 كم على الفرشة لمدة فوق 12 ساعة بعدها شف الفرشة هل عليها نقط زيت لأن من المحتمل يكون الزيت يسرب من أي مكان مو شرط السرة أو غيره


نصيحة فقط

[خيال العيون]

اتوقع والعلم عند الله انك مغير زيت تجاري والدليل على كلامي انك فحصت المكينة وصارت سليمة لأن اهل الزيت هاليومين طايحين في الزيت المكرر ويغشون فيه المسلمين

فغير الزيت بأصلي عندك زيت الترا 7 20w50 ممتاز وفوكس نفس المقاس وغير السيفون من الوكالة وامش عليه الف كيلو وعاير اذا مافيه نقص فالسبب من الزيت المغشوش.

حياك الله اخوي عاشق الشعبيات ومشكور على المرورو والمشاركة

لكن مشكلة ان الزيت تجاري هذا فعلاً خطرت ببالي ورحت شريت سيفون من الوكالة وزيت من شركة بترومين نفسهم وجربت زيت ثقيل وزيت خفيف والمشكلة لازالت موجودة . فلذلك استبعدت انه من نوعية الزيت .

[خيال العيون]

زي ماتفضل إخوي

واضح السبب من الزيت

لكن ياخي عندي لك حل بسيط

جب شرشف أبيض وحطه بالحوش بعدها دخل الموتر ووقف على الفرشة طبعا لما تغير الزيت ووقفه بعد مشوار 100 كم على الفرشة لمدة فوق 12 ساعة بعدها شف الفرشة هل عليها نقط زيت لأن من المحتمل يكون الزيت يسرب من أي مكان مو شرط السرة أو غيره


نصيحة فقط


مشكور اخوي محطم عنيد على المرور والمشاركة

وزي ما قلت لأخونا عاشق الشعبيات انه الزيت جربت على كلامة قبل وما صبط لكن مسألة انه فيه تهريب زيت برضه جت على البال وحاولت ادور على تهريبات او شي ما حصلت ابد اثر تهريب لا من المكينة ولا من غيره الحمدلله . لكن موضوع الشرشف ومشي 100 كيلوا هذي بجربها اليوم ان شاء الله واشوف واتمنى يكون تهريب ولا فك مكينة .

[واثق الخطوه-]

اخوي نصيحه دور زيت اسمه توتال 20w50 في الصيف والشتاء 10w30 وغير السيفون اصلي وحط 6.8 مع السيفون يعني سبع الا ربع بس شف ترا السيفون اللي عند البناشر تقليد سعره 7.5 ريال ويبيعونه 25 ريال الفرق بين الاصلي والتقليد الرقم على العلبه او الكرتون الاصلي يجي رقمه 3100p والتقليد 3100 ولون الكتابه يكون باهت في التقليد والاصلي يكون ناصع

[ابوعبدالله46]

ان شاء الله تطلع المشكله بسيطه
وانا اشوف ان تغييرك للزيت كل 5000 فيه اسراف
انا معي نفس موترك واجلده جلد وماشي حول 300 الف واغيرالزيت كل 10 الاف واحيانا 13 الف ولا نقص ولاشي الحمد لله
لكن نصيحه لا تتعدى ابو خالد الخضير

[شامان]

المشكله بسيطه بأذن الله وهي بلف التبخير الموجود على غطاء البلوف معلق ويسحب الزيت وقيمته بالشركة تقريباً80 ريال غيره وراح تدعيلي

[sgl2002]

المشكله بسيطه بأذن الله وهي بلف التبخير الموجود على غطاء البلوف معلق ويسحب الزيت وقيمته بالشركة تقريباً80 ريال غيره وراح تدعيلي


اضم صوتي لك وبقوة ولا هي اول مره تحصل



بعدين ياخوي الدخنه السوداء هذي احتراق بنزين زيادة ماله دخل بالنقص

ولو موترك به شمبر كان تحصل دخنه زرقاء

وجلد البلوف هذي اذا طولت واقف ثم دعست دعسه خفيفه تطلع دخنه زرقاء

لاتنسى ان معك باترول مايعرف النقص الا بعد 500 ويمكن اكثر

مشكلتك بلف التبخير غيره وتشوف وافحص الوجيه لايكون الزيت يطلع معها×

[خيال العيون]

اخوي نصيحه دور زيت اسمه توتال 20w50 في الصيف والشتاء 10w30 وغير السيفون اصلي وحط 6.8 مع السيفون يعني سبع الا ربع بس شف ترا السيفون اللي عند البناشر تقليد سعره 7.5 ريال ويبيعونه 25 ريال الفرق بين الاصلي والتقليد الرقم على العلبه او الكرتون الاصلي يجي رقمه 3100p والتقليد 3100 ولون الكتابه يكون باهت في التقليد والاصلي يكون ناصع

اخوي واثق الخطوة اشكر لك مشاركتك الغاللية

زيت توتال صراحة ما سبق اني جربته لكن السيفون انا ما اخذه الا من الوكالة فلذلك ائمن انه اصلي ان شاء الله اما الزيت صراحة جربت كذا زيت . سوبر جتي , قلف , موبيل , الترا سفن ونفس المشكلة

اما زيت توتال ما جربته وابجربه ان شاء الله بس ما اعتقد انه المشكلة من نوعية الزيت .

ومشكور مره ثانية .

[خيال العيون]

ان شاء الله تطلع المشكله بسيطه
وانا اشوف ان تغييرك للزيت كل 5000 فيه اسراف
انا معي نفس موترك واجلده جلد وماشي حول 300 الف واغيرالزيت كل 10 الاف واحيانا 13 الف ولا نقص ولاشي الحمد لله
لكن نصيحه لا تتعدى ابو خالد الخضير

جزاك الله خير اخوي ابو عبدالله

مدة تغيير الزيت انا لو صار الموتر جاية جلد واجد اغير عند 6000 او 7000 ما اتعداهم
واذا جاية على الخفيف اغير عند 8000 او 9000 لكن من بعد ما اكتشفت المشكلة صرت اغير وقت ما اشوف النقص زي اللي بالصورة لحد ما القى حل للمشكلة ان شاء الله

اما ابو خالد الخضير صحيح انه ممتاز بس مشكلته قالي كلام او مره رحت له وخوفت منه شوي

قالي : رح غير الزيت والسيفون وامش 3000 وتعال لمي ولا تفك ولا تحرك ترى المكينة هذي
( حرك تبلش ) تفك مسمار بسببه تفك عشرة .

ولا ودي افك واحرك شي الا متأكد منه .

[خيال العيون]

المشكله بسيطه بأذن الله وهي بلف التبخير الموجود على غطاء البلوف معلق ويسحب الزيت وقيمته بالشركة تقريباً80 ريال غيره وراح تدعيلي

مشكور اخوي شامان وجزاك الله خير

صراحة ما احد قالي انه ممكن تصير من بلف التبخير لكن كلامك مريح جداً وان شاء الله اليوم بروح اشيك على البلف واشوف عنه وحتى لو صار ب 800 بس اهم شي ما افك المكينة .

[خيال العيون]

اضم صوتي لك وبقوة ولا هي اول مره تحصل



بعدين ياخوي الدخنه السوداء هذي احتراق بنزين زيادة ماله دخل بالنقص

ولو موترك به شمبر كان تحصل دخنه زرقاء

وجلد البلوف هذي اذا طولت واقف ثم دعست دعسه خفيفه تطلع دخنه زرقاء

لاتنسى ان معك باترول مايعرف النقص الا بعد 500 ويمكن اكثر

مشكلتك بلف التبخير غيره وتشوف وافحص الوجيه لايكون الزيت يطلع معها×

مشكور اخوي sgl2002 وجزاك الله خير على المرور والمشاركة

وفعلاً كلام اخونا شامان مقنع ومريح وعساه تكون منه المشكلة


اما مسألة انه الدخان اسود هذا اللي مخلين على نار شابه انه دخان اسود ولا يطلع الا اذا دعست دعسة قوية وانا امشي وحتى اذا صرت واقف ودعست لحد القاطع يطلع الدخان قوي وبعدين يبدى يخف لحد ما يروح يعني زي طريقة الكربون . بس الزيت مشكلته متزامن مع الدعس القوي على المكينة يعني لو جاه جلد قوي نقص بشكل اكثر .

لكن عساه تكون من البلف او زي ما قلت وجيه وجزاكم الله خير على المشاركات المريحة .

[خيال العيون]

اخواني ابشركم حصلت سبب المشكلة عندي اللي مسببة لي قلق من شهر 4 حتى قبل اسبوع .

بشهر 4 كان موتري فيه تقطيع اول الصبح لما اشغل اروح للدوام يصير ضعيف مره لحد انه التقطيع يخلي الموتر ما يتعدى 20 فترة حول دقيقة ويضبط ويصير زي الحلاوة .

رحت لم ورشة ابو ابراهيم العثيم اللي بصناعية الرواف وفحص كمبيوتر وطلع كل شي سليم على كلامة وراح جزاه الله خير وتفلسف علي وقالي انه عندك الديلكوا غير موزون واعتقد المشكلة منه . فعلاً الرجال وزن الديلكوا وراح التقطيع والضعف وصار الموتر افضل من اول بالنشاط والقوة لكن كان فيه صوت لقلقة كانت شبيهة بصوت بكرة السير اللي كانت من قبل المشكلة وهي فيها صوت فما كنت ادري انه صوت اللقلقة مو من البكرة .

المهم بعد ما مليت من الورش وصار يوم الخميس اللي فات يعني قبل اسبوع طلعت انا وربعي فوق نفود نتقهوى المهم شرحت السالفة لواحد من الربع وقالي افتح الكبوت بشوف يمكن يطلع لي علم . المفاجأة ان الرجال اول ما شاف الديلكوا قالي انت مريح للديلكوا بقوة لازم تسوي له وزن المهم سمع الصوت وقالي هذي لقلقة من سبب تريحة الديلكوا والرجال ما قصر رجع الوزنة على اول المفاجأة انه لا دخان طلع ولا نقص زيت مع اني امشي بعزم الموتر لي اسبوع والحمدلله المشكلة انحلت .

لكن رجع الموتر على الضعف اللي قبل وصار ما يتعدى 140 بالمرة والتعشيقات صارت تتأخر لحد ما يوصل الـ RBM الى 4.5 .
لكن ضعف ولا نقص زيت . والحمدلله على كل حال

والف الف الف شكر للقراء والأعضاء اللي شاركوني بمشكلتي وحلها والله يوفقهم دنيا وآخرة .

[وليد46]

الله يبشرك بالخير اخوي

لكن ليش الضعف بالعزم ؟؟! جربت تبدل الكتاوت الي يسار الكبوت ؟! جرب يمكن من الكتاوت