مكيف الجيب !! اتمنى التفاعل لأيجاد الحلول!!

[داورد]

السلام عليكم ورحمة الله وبركاتة


سيارتي جيب لاندكروزر وطلع لي مشكله وتكررت اكثر من مره وهي :

ان المكيف يطلَع هواء حار مع الخطوط الطويله خصوصاً اذا كان الجو حار وانا مسرع ، لكن الغريب إذا هديت السرعه سواء عند مطب صناعي او نقطة تفتيش يشتغل و أحس فيه في دعسة البنزين إذا شبك ، وإذا مشيت واسرعت ترجع المشكله ويفصل حتى عن الثلاجه والمكيف الخلفي...

وللعلم الفريون معبيه جديد و أصلي و أذا كنت داخل الديرة او بالليل المكيف ولا
أحلى !!

هذه مشكلتي مع مكيف سيارتي و اتمنى التفاعل من الاخوان

وشكر اً

[العتيبي 88]

السلام عليكم ياغالي
كيف الحال .. من الدوادمي الله يحفظكـ ،،
فيه كهربائي راح يعلمكـ وشي المشكله وراح يحلها لكـ .. بس المشكله مسافر باقي تقريبا له اسبوعين .. ويرجع او ثلاث .. غير يمكنك درت ورحت ولانفع الباقين ماعندكـ أحد ..

[داورد]

الله يعطيك العافيه ..

بس منهو الكهربائي اكيد اني اعرفه ما دامه بالدوادمي ...

وكل الشكر على مرورك

[ابوراكان تبوك]

يا اخوي انا كان عندي نفس مشكلتك تقريباً في جيب لاندكروزر 2002 بس المشكلة تحدث اذا شغلت الثلاجه يقلب المكيف حاااااااااار
اكتشفت ان الكمبروسر محروق والسبب كان فيه تلحيم في رديتر المكيف ضيّق مجرى الفريون ومع السرعات العاليه يحمى الكمبروسر ويفصل
تأكد ان الاديتر عندك مابه سدد وقيس ضغط الكمبروسر

[داورد]

بالعكس الكمبرسر عندي يشتغل بالليل والاوقات البارده ولا احلى بس مشكلتي وقت الظهر ومع الخط الطويل يفصل

ومشكور يا ابوراكان على المداخله

[يكفيني نظرة]

شيك على الرابط:
يمكن عندك العكس انه يفصل ولا يشبك الا اذا هديت:

http://www.mekshat.com/vb/showthread.php?t=415962

[العتيبي 88]

اخوي تعرب الكهربائي الي مقابل التلميع الساطع الي على طريق الحجاز .. ابد اذا وقفت عند محل التلميع تلقاه مقابل من الشارع الثاني اللوحه لونها اصفر مع احمر مكتوب عليها كهربائي سيارات الكهربائي اسمه ساجي .. اذا جاء من السفر بعطيكـ خبر اهو ان شاء الله راح يعلمك وش العله ،، وبالتوفيق

[داورد]

اخوي ( يكفيني نظره ) الله يعطيك العافيه على الرابط بس في الواقع المكيف عندي مايضعف الهواء الطالع منه بالعكس الهواء قوي بس المشكله يقلب حاار
يعني ما اعتقد ان الكمبرسر يثلج انا اتوقع انه مايشتغل بالمره !!

العتيبي 88 كل الشكر لك على الوصف وراح يكون المرور عليه في الخطه القادمه

[داورد]

وين راحوا الشباب ؟؟؟

اتمنى التفاعل ..

[مجنون عسل]

عزيزي تاكد سلمك الله من الاسلاك يمكن احد اسلاك المكيف به شعر او حاجة
احيانا والعلم عند الله اذا موترك سته سلندر تلغي الهواء الحار وان شاء الله يضبط معك
اتمنى ان مشكلتك انحلت وتقبل مني فائق احترامي وتقديري

[داورد]

عزيزي ( مجنون عسل ) ما اعتقد ان ظفيرة المكيف فيها شي والدليل انه اذا صرت امشي بسرعات بطيئه ما احلى منه !!!!

وكل الشكر لك

[alanzikm]

السلام عليكم
اخوي انا صار لي نفس موقفك فوق الميه وعشرين يفصل الكمبرسر واذا هديت يشتغل زي الحلاوه وصلحته يوم الخميس.

الحل رح لمحل مكيفات خله يقيس ضغظ الفريون واذا ناقص خله يعبيه لك واذا تمام سو فحص كمبيوتر يمكن احد الحساسات خربان.

اتمنى اني اكون افدتك.

[داورد]

يالغالي الفريون قسته قبل كذا ولا لقيت فيه نقص بالعكس كهربائيين اثنين يقولون تمام وقبل شهر تقريباً رحت ابي افحص كمبيوتر وكل من جيته قال نفحص المكينه بس ( العمر الافتراضي اللي باقي ) لكن الكهرباء لا مافيه
وبعد جهدٍ جهيد لقيت واحد يقول افحص لك الكهرباء بالكمبيوتر ب ١٣٠ ريال وخليته يفحص ولابين معه شي الا حساس السرعه اللي بالقير فقط لاغير ...

وشكراً لك

[شمساوي]

اتوقع حساس التبريد خربان

اذا الكبرسر يطفا ويشغل اجل الحساس موب مضبوط

[داورد]

الله يعطيك العافيه ياشمساوي بس ياليت تقول لي وين مكانه حساس التبريد وكيف طريقته اذا خرب ؟

وكل الشكر لك

[السليطين]

صار لي نفس مشكلتك ... ورحت لراعي مكيفات . وفرغ الفريون وقال جبلي بلف مكيف وفلتر مكيف اللي يجي قدام الشبك . ونظف مواصير المكيف وضبط التبريد .

[داورد]

شكراً على مرورك يالسليطين لكن اي بلف اللي غير لان البلوف الظاهر اكثر من واحد ، فيه للمكيف الامامي وللخلفي وفيه للثلاجه بعد ..

وانا كل الامور عندي تمام ماعدا عند ارتفاع درجة حرارة الجو يقلب المكيف لأستشوار هههههههه

ووقت البراد مامثله

وللمره الثانيه شكراً لك

[داورد]

للرفع......

[خالد بن شعيل]

السلام عليكم
أنـا صار لي مثلك في موتري وتبهذلت ماحد عرف الخراب لفيت صناعيات الرياض كلها
وأخرتها رحت لباكستاني عند البيت وغيّر البلف حق المكيف وغيّر علبة الفريون
ونظف المواسير وصلى الله على نبينا محمد

ملاحظة: مكان البلف داخل الكبوت يجي في نهاية مواسير المكيف فالبدي الحديد يعني بين الكبوت والطبلون الداخلي
ومكان علبة الفريون عند الرديتر مع العلم ان موتري باثفندر بس اكيد متقاربه لان كلها ياباني

[داورد]

الله يعطيك العافيه ياخالد يعني تتوقع المشكله من البلف اللي ذكرت ؟ يعني اتوكل على الله و أغيره ؟
الظاهر انك لقيت الحل ...

وانا شاكر لك وممنون

[BLA6K]

قبل تسوي أي شيء تأكد من ( القسام ) اللي هي ليات الهواء واذا كان فيها شلخ أو كسر يوم تحط رجلك على البنزين يكتم الهواء واذا رفعت رجلك يطلع الهواء طبيعي

[داورد]

ماقصرت بس اللي اعرفه ان المكيف مافيه ليات كلها مواصير المنيوم !!

[سامي2011]

انا صارت معي في GXR2000
طبعا مره يشبك ومره يفصل ونا مسافر اذا فصل مايشبك الا اذا اخذة مطب اوهديت واشغل واطفي المكيف حتى يشتغل
لقيت المشكله في افياش الكمبروسر طبعا يجي له فيشين افصلها واشبكها من جديدحتى تسمع طقة الحابس حق الفيش تلقى واحد مرخي مع المطبات يشبك ويفصل طبعا انالقيته بنفسي
اذا تبغى الجوال راسلني وشكرا

[السومر]

أنا مؤيد لكلام سامي 2011

وبقولك ألية عمل المكيف علشان تضح الصوره عندك

(انه المكيف يفصل عند وصل درجة بروده الثلاجه الى درجة معينه بواسطة حساس الترمستات وعند انخفاض درجة البروده داخل الثلاجه يبدأ حساس الترمستات بتشغيل الكمبرسر )

ولكن أنت تقول ما يشبك مع الخط والسرعات العاليه فالتوقع مشكلتك بكهرب الكمبرسر ممكن ضعف بالاسلاك أو ضعف في حساس الترمستات

[داورد]

ياشباب والله ماقصرتوا لا انت ياسامي ولا اخي السومر ..

وكل الشكر لكم وجاري التشييك على الافياش والاسلاك

[المهاجر انا]

فيه كهربائي سوداني عند حراج بن قاسم اسمه جمال في الرياض

[داورد]

مشكور يا ابوعبدالله على مداخلتك وردك ....

[وجعين]

انت تقول لاجا مطب يشتغل وبليل يشتغل شف سلك الكهرباء الي اخره كلبس يدخل للكبرسر لاصار حار يرتخي وما ينشبك مضبوط وبتالي الكمبرسر ما يجيه كهرب فكه وكبسه بزراديه وشبكه ثانيه عسى ان يكون هو السبب

[omarx5]

اعتقد يوجد انسداد بالرديتر الخاص بالمكيف اغسل مجاري الرديتر بالبنزين مع ضغط هوا وغير غرشه الغاز(الفلتر)والفلف(الوال) الي عند الثلاجه الداخليه

[hamido]

طيب هل هو كله حار ولا بس الامامي ..... طيب اذا احتر الثلاجه بارده ولا تفصل بعد اذا كان هناك تفاوت في درجات التبريد بين الامامي والخلفي والثلاجه فاكيد من البلوف اما اذا كان كلهن يفصلن فهي من الكهرب او الكمبرسر

[داورد]

ياشباب والله ماقصرتوا على الردود وكل الشكر لكم

واللي سألني عن التفاوت اقوله لا يفصل عن الكل الامامي والخلفي والثلاجه بعد

والله يعطيكم العافيه

[السليطين]

شكراً على مرورك يالسليطين لكن اي بلف اللي غير لان البلوف الظاهر اكثر من واحد ، فيه للمكيف الامامي وللخلفي وفيه للثلاجه بعد ..

وانا كل الامور عندي تمام ماعدا عند ارتفاع درجة حرارة الجو يقلب المكيف لأستشوار هههههههه

ووقت البراد مامثله

وللمره الثانيه شكراً لك


غير البلف اللي بالثلاجه اللي تحت رجل الراكب