لمبة الأرباق

[bader56]

السلام عليكم
الله يمسيك بالخير جميع

يا الطيبين انا رجالا غيرت المسجل ولكن للاسف لمبة الارباق اشتغلت
والسبب انه وضع المفتاح على on ومن بعدها اشتغلت علامة الارباق

والسياره باث فندر 2012

كرما الي يعرف ورشه فيها مبرمج مفتح وفنان يدلني عليه

طبعا جميع الحيل سويتها وهي افصل البطاريه السالب واذا اصبحت اشبكه سويته والي قال حط المفتاح على علامة on وافصل البطاريه ثم اسحب المفتاح والمده عشر دقايق سويتها

وديتها لاكثر من ورشه وكل المحاولات فشلت وفحصتها عند ورشتين اول واحد قال كل شي سليم لكن السستم حق جهاز البرمجه رفض يدخل على جهاز السياره بحكم ان السياره جديده والاخر يقول عندك الاسلاك يبي لها فحص وهذي الورشه نصاب كبير اقوله السياره جديده مابعد كملت الاربع الاف كيلو ويقول الاسلاك فيها التماس

كرما الي يعرف ورشة عليها الكلام يدلني الله يجزاه الجنه
وشكرا

[ابوعبدالرحمن.]

السلام عليكم.

اخي الكريم لايعبثون في سيارتك الناس المتعلمة .

سيارتك ماشاء الله جديدة وتحت الضمان ارجع للوكالة يعملون برمجة ولا تغامر .

فيه طريقة سهله بدون خطورة:
1- تضع المفتاح في مكان التشغيل
2-تضع المفتاح على ON وليس START(لمبات بدون تشغيل) لمدة ثانية وتكرر هذا خمس مرات متتالية بنفس التوقيت
(بدون تشغيل اذا شغلت بالغلط اعد من جديد) الوكالة افضل من الكلام هذا كله.
اسال الله ان يوفقنا وياك

[bader56]

وعليكم السلام ورحمة الله وبركاته
هلااابك اكثر اخي الكريم

في البداية اشكرك بكل ماتعنيه الكلمه

جربة اخوي ولكن للاسف لاجديد يذكر

واليوم رحت وفحصت الفيوز الي في الكبوت السياره والفيوز الي داخل السياره

وكلها سليمه

الله ييسر امري وامر كل مسلم والله يفرج الهم





وشكراً لمرورك اخي الكريم

[bader56]

السلام عليكم

ابشركم انحلت وبأبسط الطرق وجزاكم الله خير

[هااااااااااوي]

السلام عليكم الله يسر امرك
كيف انحلت ياليت توضح لنا يمكن فيه احد عنده نفس المشكلة
وشاكرين لك

[السومر]

شكلك أناني يا بدر

يعني يوم لقيت الحل ما تعلمنى

[bader56]

السلام عليكم

هلاا بالجميع
هلاا هااوي ابشر اوضح لك والطريقه سهله جدا

الحل (( تدخل المفتاح في السويتش وتديره كأنك تبي تشغل السياره وطبعا بتطلع الك المبات جميعها حقت التشييك ومن ضمنهم لمبه الايرباق اول ماتضي طالع فيها واول ماتنطفئ اطفئ المفتاح مباشره لأنك لو تأخرت ما بتضبط البرمجة يعني السر في لمبة الايرباق نعيد عشان توضح تفتح المفتاح وتنتظر لمبة الايرباق ليما تنطفئ واول ماتنطفئ تسكر السويتش بالمفتاح وتعملها اربع مرات متواصله و الخامسه تشغل السياره مباشره ومبروك عليك البرمجه ))
هذا الحل الي لقيته

هلا بك يا السومر والله وانا اخوك ماهو من طبعي اني اكون اناني او اكتم علما يستفيد منه الغير
ولا تتوقع ان الناس مثل بعض يا الطيب وخل نيتك اصفى من كذا وانا اخوك واحسن النيه والله يعطيك على قد نيتك
ويسامحك وييسر امرك وامر كل مسلم
واعتذر على التاخير من الجميع

وشكرا

[السومر]

لا يابدر لا تزعل مني تراني أمزح فيها ولو رأيتني وأنا أكتبها لا ضحكت مني كثيرآ ( هههههههههههه)

عمومآ جزاك الله خير على الحل وعلى حسن أخلاقك