هديه لأول عضو يتصل

[ابو البر]

كان عندي جمس حوض طويل ومركب على الحوض اطراف حديد يتركب عليها الحنايا والشد
وشلتها وبعت الجمس بدونها .
افهمو قصدي اول
الاطراف اللي اقصدها يعني الجوانب اليمين والشمال اللي تجي مواصير ملحمه على بعض
ياليت احد يفهم قصدي
المهم انها هديه لآول عضو يتصل بعد الظهر والله ان نيتي طيبه وقصدي بدل ما ارميها اعطيها من توفر عليه فقط لاغير .
شمال الرياض

[اسيرالصمت]

بس لله الرحمن الرحيم
هاذا والله من طيب اصلك وياليت انك تكون قدوه واننطلق من موضوعك هاذا ويعطيك الف الف عافيه وشاكر لك والله من قلب تقبل تحياتي

[RW7..ALBDAWA]

نشششمي ووآفي من عرضضن وآفي ..

وجزيت خيراً

وهذآ والله من طيب اصصلــك الطيب ..

اسآل الله ان يجمعني ويآكم في الفردوسس الاعلى من الجنـــه

[ابو البرااء]

الله يكثر من امثالك

[al-qasab]

جزاك الله الف خير
والله يكثر من امثالك

[(هزاع)]

كثر الله خيرك

[وارف الظلال]

جزاك الله خير
بادرة طيبة منك
لعلها تفيد أحد الاخوان

[ابو البر]

الله يوفقكم لما يحب ويرضى

وأن شاء الله فيه أغراض بطرحها قريب بس ابي اتفضا لها اصورها جميع عساها تنفع أحد بدل ما يشتري وانا والله العظيم ما قصدي الا خير ولا عرضتها الا يمكن فيه اللي أغنا مني والله يزيد في رزقه ولاكن وش هو له يشتري اذا انا بعطيها هديه دامه عضو بمكشات وزميل لنا.
وودي بعد ان الجميع يطرح اللي عنده ومزاحمه بالبيت ولا له فيه حاجه ولا ينباع بذاك القيمه اللي تودي وتجيب .


رسولنا الكريم صلى الله عليه وسلم قال
(الخير في أمتي الى يوم القيامه ) .

[أبوعابد 22]

ابيض وجه ياذيبان والله يكثر من امثالك

[ابو البر]

ابيض وجه ياذيبان والله يكثر من امثالك
والله ان هاذا الصدق يا ابو عابد

عندنا أشياء ببيوتنا ما نحتاجها ويحتاجها غيرنا .

أنا مره
كنت محتاج لدولاب صغير في مخيمي

وبعد مده يمكن كم اسبوع
اشوف جارنا مجدد بيته وحط كل الأثاث بالشارع
ورحت شلت اللي أحتاجه وحطيته بالمخيم.

ابي اعرف وش فيها .

شي بسيط
ما فيه أهدار لكرامه ولا لسمعه .

أشياء يحتاجها ناس .
أخواني الاعضاء.
قصه قصيره لكم من باب الاعلام بالشي .
سنه من السنين كنت بالمانيا للدراسه .
وكانت جامعتي في مدينه صغيره مثل الخرج تقريبا او أكبر .
المهم
كانت سالفة اهل هالقريه انه في كل يوم سبت يحطون قدام بيوتهم الاشياء اللي مستغنين عنها ويبون يبيعونها(لاحضو) يحطون قدام بيوتهم يعني ما يوقفون على الاشياء اللي يبون يبيعونها .

وتمر الناس على هالأشياء واذا اعجبهم شي يطقون جرس باب البيت ويتفاوضون على السعر .

الغريب في الموضوع ........أن بجوار هالبضايع لافته تقول ان بعض هالاغراض مجانيه ومكتوب عليها أنها مجانيه .

تدرون يا شباب وش هي الأغراض المجانيه ولا تتصورون أنها أشياء رخيصه .
بالعكس أشياء ثمينه جدا .

هالأشياء
جميع ما يختص بالأطفال من أجهزة ومن حاظنات ومن كراسي وحتى في بعض المناطق يوجد بها غرف اطفال كامله .

هالاشياء
جميع ما يختص بكبار السن.
هالأشياء
جميع ما يختص بالمرضى.

ولو شافو واحد يبيع مثل هالأشياء ....................أيييييييييييييييييييييه تقوم الدنيا عليه من اولها لأخرها .

أخواني

ثقلت عليكم
يعلم الله اني خجلت من نفسي يوم شفت ردي الطويل .
الله يعلم بالنيه .

[moath2700]

ابيض وجه وقده وقدوووود ياذيبان ...

[ابوالفهد]

احنا ودنا نسرق الشيء الذي ما يبغاه راعيه ولا نطلبه منه حياءا وهذه مصيبه وبعيده عن الدين الحنيف الله يجزاك خير وحبايبنا والمسلمين

[عاشق الشعبيات]

الله يجزاك خير ويكتب أجرك

والله يكثر من أمثالك الكرام

[السومر]

جزاك الله خير

[ابو البر]

احنا ودنا نسرق الشيء الذي ما يبغاه راعيه ولا نطلبه منه حياءا وهذه مصيبه وبعيده عن الدين الحنيف الله يجزاك خير وحبايبنا والمسلمين
ابو الفهد

بضيف على ردك لو سمحت

حنا ما عندنا ثقافه خصوصا بالمواقع الكترونيه أسمها الأعلان عن تقديم شي او أهداء او أعطاء او سمها ما شئت .

اسمح لي بنقطه صغيره ولاكن كبيره بمعناها ....وبكل صدق .


مثلا يعني .

لو أنا عندي شي ما يستاهل اني احتفظ فيه لني خلاص مليت منه والانسان معروف ملولو.
ثم بغيت اتخلص منه وش بسوي .
احطه بالمستودع .
طيب بعد مده ومع مرور الوقت الاقي نفسي حطيت بالمستودع الكثير من الاشياء اللي ضايقتني .
طيب وش اسوي .
وخصوصا وفرضا لما تكون غرضين او ثلاثه .....والاعلان عنها للبيع ما يسوا......
هنا تجي ثقافة المجتمع .
شخص عنده شي ما يبغاه ويشوف ان هالشي ما يستاهل العنا والتعب لبيعه ....ويعرضه هديه للناس ..

تلاقي ثقافة المجتمع عكس مفهوم هاذا الشخص باأنه يهدي ما عنده .
وتلاقي الكرامه والعرف حائل بين الطيب والطيبه .....وبين .......شخص واقعي يحتاج لهاذي الاشياء.
اسف على الأطاله .

[ابو البر]

ردود طيبه والله يوفقكم لما يحب ويرضى .

وياليت يعطي كل من اطلع على الموضوع رأئيه المثالي لخدمة المجتمع وليس لمدحي ...حنا نبي نثري الموضوع بنقاش علمي يفيد الناس.

والله يعلم بالنيات .

[بواردي الدلم]

والله فكره حلوه وغايه نبيله

بيض الله وجهك وانا بعد اخبر فيه كم غرض في البيت ابحصيها واشوفها وتراها هديه للي يبيها

[جلاد الحباري]

بيض الله وجيه الجميع وياليت هالموضوع ينشر في كل المنتديات لانه فعل نادر وقليل من يسويه واتمنى ان الجميع يقتدي بكل من مد يده لفعل الخير والله يجزا كل مسلم بفعل الخير

[ابو البر]

أدارة المنتدى سباقه لكل شي جديد

الموضوع ما فيه اي شي محرج

مثلا بدل لو انا بحاجه طاوله
وحصلت عضو من العضاء يعرض طاوله جميله ومستغني عنها يكون بالرياض مثلي
ابنقز له وأخذها منه .
ايش فيها .
ماني فقير ولا أنا محتاج والحمد لله .
ولاكن هي طاوله اذا اخذتها من صديق او شخص ما يحتاجها فهاذا ما يدل على اني فقير او او او او


لا

يدل على ان اللي عنده هالطاوله ما يشوف ان الشغله تستاهل الاخذ والعطاء في سعرها .

يقوم يهديها لاعضاء المنتدى ويتم التواصل عن طريق الجوال بدون ذكر المعرفات او اي شي .

تعال وحياك الله وخذها وبس .
يكفي انك زميل لي بموقع مكشات .

وفيه شي بسويه بعد كم يوم

عندي أشياء كثيره بعلن عنها هدايا.
وساعدوني في الموضوع .

[ابوريان القحطاني]

من هذا المنطلق انا عندي رديتر افلون من 2007 وفوق ياخوان اللي يبيه كهديه يرسالني خاص ويبشر بالسعد

موقعي الرياض

[ذيب الديماكس]

أدارة المنتدى سباقه لكل شي جديد

الموضوع ما فيه اي شي محرج

مثلا بدل لو انا بحاجه طاوله
وحصلت عضو من العضاء يعرض طاوله جميله ومستغني عنها يكون بالرياض مثلي
ابنقز له وأخذها منه .
ايش فيها .
ماني فقير ولا أنا محتاج والحمد لله .
ولاكن هي طاوله اذا اخذتها من صديق او شخص ما يحتاجها فهاذا ما يدل على اني فقير او او او او


لا

يدل على ان اللي عنده هالطاوله ما يشوف ان الشغله تستاهل الاخذ والعطاء في سعرها .

يقوم يهديها لاعضاء المنتدى ويتم التواصل عن طريق الجوال بدون ذكر المعرفات او اي شي .

تعال وحياك الله وخذها وبس .
يكفي انك زميل لي بموقع مكشات .

وفيه شي بسويه بعد كم يوم

عندي أشياء كثيره بعلن عنها هدايا.
وساعدوني في الموضوع .

-
الله يرفع قدرك اخي الكريم
ووفقك الله
وقليل من امثالك ومن امثال اهل مكشات رفع الله قدرهم وجمعنا الله واياكم في الجنه
-
اخوكم ابو زيد

[Cyber]

موضوع ممتاز لو يتم تطوير فكرته لنشر هذه الثقافة