فزعتكم ...مشكلة كهربائية بالانفوي عقدتني ومحتاج مشورتكم ..

[haithaam2002]

السلام عليكم ورحمة الله وبركاته .؛؛
لدى سيارة انفوي موديل 2002 ركبت عليها مكينة من يومين شد بلد أمريكي موديل 2005 المكينة تحت الضمان امورها تمام .
المشكلة بدات معي لما جيت اشغل المكيف الكمبروسر لا يعمل رحت كهربائي شيك عليها لقى الكهرباء لا تصل الكمبروسر ويوم نزل تحتها لقا اسلاك 3 مقطعه قالي هاذي اسلاك حقت الكمبروسر وعشان تتصلح ناخذ منك 300 قلت ليه كلها توصيله اسلاك اذا المشكلة سببها اللي ركبوا المكينة بردها لهم..ممكن اثناء تركيب المكينة الجديدة تقطعت الاسلاك من غير قصد ... وفعلا رجعت لهم وجا فلبيني ونزل تحتها ووصل الاسلاك وبعدها اشتغل الكمبروسر ارتحت :)رحت اعبي فريون لانه ما فيها فريون وبعد ما عبيت فريون اصلي امريكي صار التبريد ممتاز ويوم خرجت بدى التكييف يضعف قلت برجع له اشوف المشكلة وين دقيت اشارة يسار لاني بلف للمحل بدت السيارة تنتفض وشوي تطفي رجعت وشغلت السيارة وقلت بشوف وش السالفة مع انها السيارة ماخذها بعد تركيب المكينة الانوار جهة اليسار ضعيفه ويوم سالت المهندس يقولي لمبه عندك خربانه وتحتاج تغيير .
المهم صلب المشكلة تكمن عند دق اشارة يسار او تشغيل كشافات الضباب او ادار مفتاح الانوار تبدا السيارة تعطيى اشارات وترتجف وتطفي مع ملاحظة العزم مرة طاح ويوم اشغل مفتاح التككيف كمان نفس المشكلة احس السيارة مو طبيعية وتجي مرات اقرا على الشاشة الفرامل محتاجه صيانة وتظهر لمبة abs وغير لمبات فجائية تظهر كلها مرتبطة مع دق الاشارة والانوار والتكييف .
وانا مقتنع هناك تماس كهربائي بس وين ما اعرف ؟ ورحت لكهربائيين اللي يقولك 1000 ريال نشيك الظفيرة والا يقولك شي ثاني . :mad:
وهل المشكلة ممكن تكون من البطارية ؟ ام الدينمو ؟ ام الظفيرة ؟ ام ان السيارة تحتاج اعادة برمجة بعد تركيب المكينة لان المهندس يقول ما تحتاج برمجمة فهل هذا صحيح ؟ ارجو نصيحتكم لاني محتار وابي مشورتكم وكل من له خبرة يفيدني ....
:(:(:(:(:(:(:(:(

[غدر الزمن]

رجعها للورشه اللي ركب لك المكينه من المفترض انه عنده كهربائي يجي دوره بعد تركيب

المكينه ارجع له يظبط لك الكهرباء ... توصيل الكهرباء كله غلط في غلط وهو المسؤول

عنه

[Magellan]

المكينة اخذتها بكمبيوتر او بدون
لأن في حالة انها بدون كمبيوتر يلزمك تسوي برمجة على اساس انها 2005
من الواضح الخلل بالكمبيوتر
طبعا يلزمك تشغيل المكينة يوم كامل مع الدعس عشان تشوف اذا هي تنقص زيت او دخان من الشكمان
اذا ماشفت شيء شوف الكمبيوتر وارجع لهم

[haithaam2002]

تسلموا على الرود انا الان حتى ظهرت مشكلة جديدة وهي الحرارة تطلع فوق النص مع التكييف والمؤشر يلعب يطلع وينزل ، كلمت مهندس الورشة وبرجعها اليوم العصر عندهم يكشوا عن العطل وين .
السيارة من طلعتها دعست ومشيت بيها ما في صوت بالمكينة وامورها تمام بس بس من يوم ما شبك الاسلاك حقت الكمبروسر والسيارة بدتتضعف وتطلع الاشارات اللي شرحتها بمشكلتي ومرات تطفي هي الاساس البرمجة احتمال كبيرمنها.
لما خذيت المكينة اخذتها بدون كمبيوتر ركبتها على الكمبيوتر القديم .

[ملك الفكتوريا]

الدعوة برمجة ان شاء الله

[BoOnD]

عندي مشكله شبيهه بمشكلتك بنوااحي

لكن السياره طبيعيه بس اذا بديت تصرف كهرب اكثر مثل اشاره او تكييف او تشغل اي شئ فصرفيت الكهرب تصير اكثر

ومثل ما استفدنا من الاخوان هنا بالموقع يقولون ابدأ بالسهل والارخص اولا


مشكلت سيارتك كهربائيه او من الكمبيوتر

والله العالم نبدأ بالسهل وهو كهرب السياره ضعيف اذا شغلت شغلات وبدت تصرف ما تحتمل وتطفي

شيك ع البطااريه ممكن ضعيفه وحتى لو جديده رح شيك وشف شحنها كيف

بالطريق شيك على الدينمو ممكن الضعف منه ولا يشحن مضبوط او خربااان

وان شاء الله ان ربي ييسر امووورك وتنحل مشكلتك وانا اخوووك

[Magellan]

للمعلومية قد يكون عندك مشكلة في الدينمو
يعني ترى البرمجة ليست كل شيء
من الواضح هناك ضعف كهرباء
والأهم لايضيع عليك الدينمو القديم

[haithaam2002]

الى الاخوة الاعزاء شاكر لكم تفاعلاتكم النيرة واحب اطمنكم امس وديتها الورشة اللي ركبت المكينة وسويت لهم فلم هندي وأزعجتهم يقولي المهندس حنا مو مسؤولين عن اعطال الكهرباء قلت العبها على غيري ولا قسم لأرفع شكوى وأفضحكم إنتم وشركتكم بعدها هدى ونادى الفلبيني يطلع معي بالسيارة نروح لقسم ثاني نفحص كمبيوتر قلت له مو على أساس قلتوا إنكم فحصتوا كمبيوتر ؟؟ شوف النصب ... :mad:
المهم جينا قسم الفحص ويوم شافها المهندس الثاني وشاف الانوار تلعب مع الاشارات وتطفى السيارة قالي الجهة اليسار عندك ملعوب بظفيرة اسلاكها ومسوية لك تماس كهربائي عليه مقدر افحص قبل اصلاح هالمشكلة وبس تصلح تعال افحص كمبيوتر وفعلا رجعت لهم وشرحنا كلام المهندس للورشة اللي قامت بتركيب المكينة طبعا من غباء التركيب لخبطوا اسلاك السيارة وسوت تماس :f.
المهم بعد اعتذارات منهم طلبوا اترك السيارة وراح يصلحون الخطأ واليوم ان شاء الله بروح استلمها وخلاصة الكلام يا اخوان نصيحة : اللي بركب مكينة عند احد ما ياخذ بكلامهم وبس لزوم يفحص كمبيوتر وهو على راسهم واقف ويتاكد من سلامة كهرباء السيارة لانها بجد امس وانا رايح بيها الورشة قلبت مخي والله ستر ما سوت تماس قوي حرق السيارة والحمدالله على كل حال .
كل الشكر والتقدير لكل من شاركني خبرته المتواضعه وان شاء الله بعلمكم وش يصير بس استلم السيارة وافحصها .

[BoOnD]

الله يوووفق

فرحتنااااا يا خوووووي

[THE KILLER]

الله يوووفق




فرحتنااااا يا خوووووي


ها بشرنا عن مشكلتك تصلحت ولا .؟؟
:eek:

[BoOnD]

ها بشرنا عن مشكلتك تصلحت ولا .؟؟
:eek:




هلا والله

نسيت من الفرحه

راجع الموضوع وتلاقي اخر رد وانتهاء المشكله ولله الحمد

[haithaam2002]

أسعد الله أوقاتكم أصدقائي ..
يقولون: يا فرحة ما تمت ...
نخلص من شي تظهر لنا مشكلة جديدة وهالمرة أكيد محتاج مشورتكم ونصيحتكم
كما تعلمون ان اخر مرة كان في مشكلة بتماس كهربائي بالظفيرة حقت الأنوار هو اللي كان مسوي المشكلة السابقة والمشكلة الحمدلله انحلت ولكن ما هو امر وأصعب هو مشكلة الحرارة ... فبعد اصلاح السيارة من العطل الكهربائي وديتها فحصتها كمبيوتر وما ظهر شي بالفحص كله سليم اخذت السيارة وطلعت من عندهم ومشيت بالسيارة ولكن مع التكييف ظهرت لي الحرارة حيث انها تصل فوق النص بثلاث شرطات مع ملاحظة وجود ريحه بنزين ..
رجعت للورشة اللي صلحت فيها مشكلة الحرارة طلع الميكنيكي بالسيارة ولاحظ الحرارة وكان الجواب انه كلتش المروحة ما يشتغل على السرعة الثانية ويبيله تغيير رحت وشريت كلتش مروحة جديدأمريكي مو أصلي وركبناه للسيارة وقمنا بالتجربة مرة ثانية ولكن مع الأسف ما زالت الحرارة موجودة بعدها رحنا لورشة ثانية تابعة للورشة الأولى وفحصها الفلبيني بالكمبيوتر وجد أن الكمبيوتر لا يعطي اوامر للمراوح بزيادة عدد الدوران عند السرعة الثانية .. تركت السيارة عندهم أمس على اساس يتم فحص كامل للظفيرة ومعرفة الأسباب .
كلمني الميكانيكي اليوم تين ان الظفيرة كلها سليمه وما في شي .. طيب والأدهى من كذا كلتش المروحة القديم شغال مو عطلان ... واليوم راح اضطر ارجع اللي شريتها .. أنا بتخميني المتواضع أخمن ان المشكلة الرئيسية هو برمجة السيارة كاملة لأني أشك بعد التغيير للمكينة ممكن يبيلها برمجمة والله تعالى أعلم ..
أرجو من الأخوة افادتي بهالموضوع هل المشكلة برمجمة مراوح او برمجمة سيارة ما خليت شي ما شيكت عليه بالسيارة أتعبتني بجد .. وفي مشكلة ثانية وهي شم رائحة بنزين داخل السيارة وما اعرف اسبابهامع إن الفني شيك على السيارة ما فيها تهريب للبنزين!! احد يقدر يفيدني ؟ واكون شاكر... اذا في احد يعرف ورشة بالرياض يسوون برمجمة وعندهم فنيين بروفيشينال يفهمون مو حاب اتوهق مع احد يتعلم تعليم

[tevo]

السلام عليكم
اخوي اذا مراوحك كهرباء فمشكلتك برمجه .
انا عندي افلانش 2005 مبرمج المراوح ومغيرها طريقة البرمجه انك تقول للمروحه اشتغلي علي درجة كذا وافصلي علي درجة كذا واشتغلي السرعه الثانيه علي درجة كذا.
اذا تبي تتاكد جرب شغل المكيف واسمع صوت المراوح اذا كان عالي يعني المراوح شغاله وتمام التمام بس يبيلك تبرمج وتقدم تشغيل المروحه واذا انت من الرياض ارسلي خاص عطيك رقم الي برمج لي.

[haithaam2002]

شكرا اخي تيفو يا ريت ترسلي رقمك على الخاص حتى اقدر اكلمك او ترسلي رقم الفني اللي برمجلك وكم التكلفة
وشكرا

[Magellan]

هيثم ايش اسم الورشة او المحل اللي اخذت منه المكينة

برأيي فيه مشكلة معهم سواء التركيب او المكينة نفسها
مارتحت ابدا للموضوع
عندك خلل في المكينة
اقترح تفتح الرديتر وهو بارد شوف اذا فيه فقاعات تخرج منه او لا؟
بعدين تشغل المكيف وتمشي على طريق سريع على الأقل سرعتك 80 كلم فما فوق وشوف الحرارة كم تصل بالنهار؟

[haithaam2002]

اخوي مجلان والله توي جايب السيارة وتقرير امس كالتالي :
1- امس الورشة اللي ركبت المكينة بالاول ما طلع معها شي وقدامي امس قاموا جربوا ضغط المكينة وسولها فحص حتى يطمنوا من سلامة المكينة-اسمه فحص ضغط المكينة - عدى الفحص مرتين بالكمبيوتر ولقوا الضغط يوصل 150 بالجهاز ويقولون ممتاز وشاروا علي اني اشوف كهربائي شاطر واسم الورشة اللي شريت منها المكينة وركبتها شركة البيان بالصناعية القديمة .
2- مريت على مركز الشاهين بالصناعية القديمة حصلت فني هندي كهربائي فحص بالكمبيوتر مرة ثانية وطلع لي لسته ب10 نقاط فيها مشكلة معظمها حساسات مثل حساس الشكمان واشياء بسيطة لا تؤثر مباشرة بالتبريد .
3- صلح لي مشكلة ريحه البنزين لقي عندي لي حق البنزين اللي واصل المكينة منثني وهو منه المشكلة وتم اصلاحه .
4- سوى تنظيف لدعسه البنزين واعاد برمجتها .
5- سوى اعادة برمجة المروحة .
الان المشكلة الاساسية هي الحرارة امس بعد ما اعاد برمجمة المروحة القديمة جربت السيارة وظهرت الحرارة ورجعت له وشاف المشكلة وظهر بالكمبيوتر سرعة المروحة 450 مع انه مفترض تكون اكثر من 750 بالتالي قرر انه المشكلة المروحة عطلانه قلت له انا جايب معي مروحة بالكرتون ركبها قالي مقدر الان منقفل خلي السيارة وبكره الصباح تكون جاهزه .
فعلا رحت له الصبح لقيته مركبها ويوم جيته قالي ترى المروحة مو اصلية مو اكيد تزبط
قلت جرب ........ فعلا جربها وظهر لنا نفس المشكلة الاولى .
قالي خلني اركب لك مروحة اصلية من عندي وجربها ان نفعت كان بها ركبها لي وجربت السيارة عنده وكانت السرعة للمروحة مرتفعه فوق 750 يعني ممتازه وجيت راجع عملي وعطيته اجرة تركيب فقط بدون سعر المروحة اللي خذيتها من عنده لاني خليت المراوح الثنتين عنده الغير اصلية .
السيارة طبعا بكل تجربة اكون مشغل التكييف ويوم جيت ماسك خط ومشغل التكييف الحرارة ثابته على النصف وشوي بدت ترتفع شرطة شرطتين ثلاث اربع بعدها قلقت طفيت التكييف وانخفضت الحرارة للنص وتوي اكلمه بالتلفون يقولي خلها اليوم معاك جربها زين واذا بقت المشكلة موجودة فالسيارة فيها مشكلة كهربائية ولازم يتم التشييك على ظفيرة السيارة كاملة ممكن المشكلة منها .
بعد هالشرح الطويل اتنمى تساعدوني بارائكم يا اخوان :( لاني صراحة طفشتني :mad: السيارة ما خليت شي ما فحصته او غيرته الرديتر حتى اكون صادق غيرت الطبات حقته بس ما سيخته هل له تأثير ؟؟؟
وكل الشكر للاخوة المتفاعلين معي بالموضوع وبنورونوا بارائهم ...

[Magellan]

أولا : انا ابغى تسوي كم تشييك تتأكد من امورك تمام وخصوصا انها بلاش وبدون استعانه من احد:
1- في الصباح الباكر افتح غطا ارديتر وشغل السيارة ، هل فيه فقاعات ام لا لمدة 5 دقايق ثم اغلقه
2- امشي في الموتر بسرعه بدون تشغيل المكيف لمدة 5 دقايق ثم افتح غطا الزيت هل ترى لونه حليبي ام لا؟
طيب اذا تأكدنا مافيه فقاعات ومااصطبغ الزيت بلون حليبي تطمنا لأسوء الأحوال فنبدأ بالأشياء الأسهل:

شوف انا من الناس اشوف مشكلتك مع التكييف يعني لو شغلت المكيف ارتفعت الحرارة وغيرها لا
1- ممكن انت ملغي ليّات التكييف الحار وهذا قد يسبب ارتفاع الحرارة
2- قد يكون المشكلة من غطأ الراديتر
3- قد يكون المشكلة من البلف (الثرموستات) يحتاج لتغيير
4- قد يكون هناك انسدادات في الرديتر
5-ارتخاء سير السيارة
6- طرمبة موية
،،،،
لكن انصحك انك تشتري بلف جديد وتسيّخ الرديتر وتتأكد انه مايهرّب ،ثم تخليه يغسلة دورة التبريد وبعدين تجيب علبة موية رديتر مرسيدس زرقاء او بريستون وتحطها والباقي ماء مقطر وشوف وش يطلع معك

[haithaam2002]

أسعد الله صباحكم اصدقائي واود شرح ما توصلت له حتى الان للمشكلة املا منكم التشخيص واعطاء النصح والارشاد ..
اخي العزيز ميجلان قبل يومين رحت لمحل رديترات اسوي تسييخ يوم شاف الرديتر قالي ما ينفع تسيخ لازم تغيره قلت غيره جت على الرديتر بس فكني من مشكلة الحرارة .
غير الرديتر كامل بواحد مستخدم وكالة بـ 650 ر.س وحط مويه حمرا اصلية وموية مقطرة واشترطت عليه يعطيني ضمان على الحرارة والرديتر وعطاني ضمان لمدة سنة على الرديتر فعلا ظلت السيارة شغالة ساعة عنده كاملة والتكييف شغال بارد ممتاز والحرارة تمام وخذيت جولة بالسيارة اشوفها بالمشي ولقيتها لا بأس كويسه أفضل من قبل بكثير طبعا التجارب هذي بالليل .
ثاني يوم الظهر جربت السيارة بخط وداخل المدينة لقيتها بالخط توصل النص مع المكيف وداخل المدينة الاحظ المؤشر يلعب يطلع فوق النصف بشرطة شرطتين وينزل والتبريد ممتاز احلى ما يكون بس سبب ارتفاع المؤشر فوق النص بالظهر شرطة او شرطتين شو سببه ؟؟؟ علماً إني شايل بلف الحرارة هل هو سبب ذلك ؟
الشي الثاني شيكت عند حق الرديترات على طرمبة الموية والغطاء تمام ما فيهم مشكلة اما بالنسبة لليات التكيف الحار والله وانا اخوك محتار هي ملغية او لا بس اذكر مرة زمان قالي واحد حق تعبئة افريون انها ملغية وايش سلبياتها على السيارة ؟
سير السيارة من شريتها ما غيرتها وما ادري راعيها الاول متى مغيرها ؟؟
بس الاحظ بعد تركيب الرديتر عزم السيارة بالسرعه اولى بطىء نوعا ما وعلى فكرة جربت السيارة بدون تكييف والحرارة ممتازة تحت النصف، الاستهلاك للبنزين اصبح أكثر من أول ممكن تكون مشكلة هالشي بلف الحرارة لأني شايله وهالشي كمان بؤثر على عزم لسيارة ام لا ؟؟
وشاكر ومقدر جهودكم ونصائحكم ..

[Magellan]

نعم رجّع البلف وهو مهم لتنظيم الحرارة
او اشتر جديد يجي مع كوع بسعر 220 ريال
لكن رجعه فقط وشوف
طيب ليش الميكانيكي رفض تسييخه، شو المشكلة؟

[haithaam2002]

اخي ميجلان ما خبي عليك انا حسيت فيه لعب بكلامه بس طالما بتتصلح مشكلة الحرارة مو مشكلة المهم فيه ضمان على شغله وان صار شي ارجعه له بالنسبة للبلف أنا مفكر اجيب بلف بس تنصحني ببلف معين يعني له رقم معين للحرارة ؟ وبالنسبة للسير بغيره كمان انشاءالله ... اما بالنسبة للات التكيف الحار تنصحني رجعهم او لا ؟
ارجو مرة ثانية نصيحتكم ببلف الحرارة السيارة موديلها 2002 والمكينة موديلها 2005 ايش افضل رقم او نوع بلف مناسب للسيارة وشكرا ...