مشكله في النمرة الثانية لجمس سييرا 2006

[دهام السرايا]

السلام عليكم ورحمة الله وبركاته وبعد.

إخواني الكرام.

عندي جمس 2006 دبل قير اتوماتيك

من النمرة الأولى الى الثانية يتأخر في التعشيق مما يسبب حنة ونتله ملحوظة.

السيارة كفو من مكينة ودبل وبودي ولكن هالمشكلة طفشتني من السيارة.

مريت أكثر من ورشة متخصصة في القيرات وكان تشخيصهم متفاوت.

بعد فحص حساسات القير بالكمبيوتر قال لي المهندس تروس القير تعبانه !!!!! ولازم توظيب. مع العلم اني شكيت في هالورشة لأن فني الكمبيوتر قال لي الجهاز ما تعرف على كود القير ( يعني طلع الفحص بلوشي ) لكن مشرف الورشة كان حريص انه يآخذ فلوس الفحص وقال لي الحساسات سليمة قلت كيف ؟ والجهاز اصلا ما تعرف على القير ؟ قال لي لو فيه مشكلة في الحساسات تطلع في الفحص.

ورشة آخرى تقول حساسات !!!!
ورشة أخرى تقول القير سليم وما فيه شي وهذي النتلة طبيعية !!!!!

مع العلم اني اذا دعست للسيارة على خفيف ما تطلع هالمشاكل.
لكن اذا كنت في زحمة وامشي بشويش تقول كأن واحد صادمني من الخلف !!!


تكفون يا جماعه الخير أفيدوني ( مهندسين - اصحاب خبرة - مجربين ) ما استغني عنكم وعن افاداتكم.

ولكم جزيل الشكر.

[قمة افرست]

افحص كمبيوتر هذا احد حساسات القير ماهو ثابت

[دهام السرايا]

افحص كمبيوتر هذا احد حساسات القير ماهو ثابت


يعطيك العافية
بكره بأشوف الوضع وأعطيكم النتيجة

[YUKON_GMC]

اتوقع حساسات .. والنتله لأن الموتر يطمر نمره يعني مثلاً يقوم بالاول ويطمر للثالثه .. لو القير فيه عطل يطلع ريحة حرق الكلتشات في الزيت

لكن فحص الكمبيوتر يبين لك العطل .. وإذا مبطي ماغيرت فلتر القير .. غيرهـ وتفقد اسلاك الحساست اللي في كرتير القير تأكد انها راكبه بالحساسات مضيوط اثناء فك الكرتير لتغيير الفلتر والزيت حط اصلي

[Lover gmc]

شم ريحه زيت القير

اذا محترق كان الله في عونك

[دهام السرايا]

اتوقع حساسات .. والنتله لأن الموتر يطمر نمره يعني مثلاً يقوم بالاول ويطمر للثالثه .. لو القير فيه عطل يطلع ريحة حرق الكلتشات في الزيت

لكن فحص الكمبيوتر يبين لك العطل .. وإذا مبطي ماغيرت فلتر القير .. غيرهـ وتفقد اسلاك الحساست اللي في كرتير القير تأكد انها راكبه بالحساسات مضيوط اثناء فك الكرتير لتغيير الفلتر والزيت حط اصلي

الحساسات بأشوف وضعها السبت.
بالنسبة لزيت القير توني مغيره من أسبوعين أصلي وفلتر أصلي. والمشكلة زي ماهي.

[دهام السرايا]

شم ريحه زيت القير

اذا محترق كان الله في عونك

الحمد لله شافه مهندس وقال الزيت ما فيه ريحه احتراق.

[طبيشي]

عندي بليزر 2006 وتقريبا اعاني من نفس المشكلة ياريت تزودوني بالحل لان المهندسين متفاوتين في تشخيص المشكلة ناس تقول منظم الهوا وناس تقول ثلاجة التبريد وناس وناس ابغى الحل تكفوووووووووووووووووووون

[Magellan]

النتلة طبيعية واكثر ماتجي بالصيف
سالفة تغيير حساسات او توضيب ماينفع
لأنها ترجع
الأكيد من يريد انها تروح ،فأفضل حل بعد التخبيط
يطلب بطيخة وكلتشات رياضية وترانزقو وسيرفو وكم شغله عشان يتحسن اداؤه
وعشان يعطي عزم خيالي

[دهام السرايا]

اسعد الله أوقاتكم بكل خير.

تم إصلاح مشكلة القير عند مهندس فلبيني فااااهم ( وبدون كمبيوتر )

وطلعت المشكلة ( تنظيف البودي بلف والخريطة في القير مع الكارتير يعني بدون فك القير ولا شي )

وكلفت الشغله كلها ٢٥٠ ريال والحمد لله القير بدون أي ملاحظات الآن

الدولية في الدمام ( الله لا يوفقهم قال لي المهندس القير مخبط ) لو إني طاوعته ووظبت القير رحت فيها.

حبيت انقل لكم تجربتي للإستفادة منها

ولا أنسى كلمة قالها لي المهندس ( يقول الحساسات في قير أي سيارة ما تحتاج فحص لانه اذا كان فيها مشكلة راح تطلع رسالة تحذيرية في الطبلون )

[فهداحمد]

انا كانت عندى وحدة القير ارضي كان احيان يعشق واحيان لا ما يعشق واذا عشق يروح نمرة ثلاثة والعزم عزم السيارة يجي العزم بطي لانة على نمرة3
السبب طلع انة سلك من القير الى الكرتير كان مفصول مقطوع ما يبان الين فكيتة من المسمار تحت السيارة سلك القير

[مكشآتي للآخر]

معنآ جمس 2003 وفية نتله من الاول والثاني نفس الي عندك بالضبط
لاكن سئلت الوآلـد هل قمت بتغير الزيت من إن قمت بشرآءه
رد علي وقال ولا مرة
السبب إتوقـع من زيت القـير

[دهام السرايا]

معنآ جمس 2003 وفية نتله من الاول والثاني نفس الي عندك بالضبط
لاكن سئلت الوآلـد هل قمت بتغير الزيت من إن قمت بشرآءه
رد علي وقال ولا مرة
السبب إتوقـع من زيت القـير

زيت القير لازم يتغير كل 60 ألف واذا ما غيرته فيه احتمال يخبط القير اذا طول بدون تغيير.