استفسار من الأخوان.

[قابوس]

السلام عليكم ورحمة الله وبركاتة .

الحقيقة يا اخوان انا من عشاق استخدام الغزول والمعرف ان هل قطر اكثر من يستخدم الغزول (هذا من خبرتي الشخصية) .

بس الي حاب اعرفه متى احسن وقت لنصاب الغزول هل يكون في الصيف او الشتى في السقي او الثبر في الليالي المقمرة او المعتمه ؟

ونا الصراحة جربت انصب في جميع الحالات لكن حاب اكتسب خبره من الجميع .

واتمنا مشاركة اخوي راعي الدنقي ولا يهونون الباقين.

[بومحمد]

السلام عليكم::::
النصب عدة انواع اذا تقصد النصاب حق الكنعد لازم يكون فى سون الظلام علشان الغزل ( يسحر ) والنصاب نوعين 1- المقيط 2- المكوسر وحق الخباط حجم العيون 3 انج ......وغزل الشك حق سمجة الارض( الصافى..البدح..البياح......)ويكون مب جنيع فوتين كفاية أى ما يكون مرتفع ... ويعتمد النصب على المكان
المكان المفظل للنصب على جفاف الغزير علشان عند نزول السمك من الرق الى الغزير فى الجزر يكون الغزل فى الوجهة ...وان شاء اللة فدتك؟؟:alarm:

[قابوس]

السلام عليكم ورحمة الله وبركاته.

الأخ خلقون مشكور على المشاركة الطيبه.
والصراحة هذي فرصة طيبة اني أشكرك على مشاركاتك السابقة في المنتدى الي كانت جدآ جميلة ومفيدة واتمنى انك تفيدنى اكثر في المشاركات القادمة .
الصراحة انا ابي معلومات اكثر عن نصب الغزول على السيف (الطرقة والوقت والمكان المناسب).
ومشكور على المرور.

[راعي الدنقي]

أخوي / قابوس
شحالك ربك طيب ،،،،<O:p</O:p
بصراحة ماقصر أخوي خلقون كفى ووفى أنا بصراحة
أحب مثل نصبت الشيبة وهاذي النصبه تصلح حق سيفنا الشمالي الشرقي الممتد من الذخيرة لين المفير السيف الي مابقى الأ كم كيلو منه تقدر تمد لك غزل فيه كان الغزل عندنا قطن والطول مايتعدى 90متر والكرب الكبارمال أول والداسي من الحصا وننصب في بياضه قريبة من السيف على شكل مستطيل منحني ومفتوح من الأمام ومربوط في نصف فتحة الدجيج حبل الصداق لين السيف هاذي من النصبات الي محببة عندي وتصلح هاذي النصبة في مكان بطح على السيف وأحسن شي أذا تبي تنصب وعندك دنقي مثل الدنقي مالى موديل 76ياماها قرف وماكينة 9.9 <O:p</O:p
لين طقت الماية طبولها وصكت فوق أنزل بسكات ومد ولين شفتها تثبر روح وسكر<O:p</O:p
بالغزل من صوب أقرب رق وقبل لاتشيل خاوض شوي واذا عندك خطرة بعد أحسن <O:p</O:p
تخوبط بها وتحد السمجه أو السمكة صوب التسكيرة بس على شرط المكان يكون فيه سمكة ونصبنا بالعشرين والثلاثين غزل ربطة وحدة بس صراحة غزل واحد وسيفي أنا يكفيني طبعاً مع القمر أحسن علشان الغزل مايسحر عكس الخباط على ماأظن يبون المنصب يسحر صح أخوي /خلقون
ولا انا عندي كل السالفة غلط أفيدونا يانواخذه ويابحاحير،والسموحة على الأطالة بس لأني أحب سوالف البحر أنشاء الله أكون أصبت في شرحي لبعض ماورثته من أهله وناسه وأن أخطأت فأنا بشرعاد برأيك أخوي قابوس شوف الدنقي الي عندي صار له ثلاث سنين ماحول بحر شرايك نروح مكان عجيب مع بداية شهر عشرة نفس الفترة قبل سنتين صدت فيه تقريباً أربعين كيلو صافي بالطريقة الثانية بعد ماصكت المايه مديت ويوم سحبت سكرت وحديت قام الصافي في الجن العقربي يتموه وينخش نيزة ماعندي لقيت بيب والله يااخوان أولع على الصافية اليت ولاتتحرك أما البدحة والقرقفانة بيدي أصيدها أسويلها شناقة والليت في عينها وازرقها زرقه أبد ماتفك،،<O:p</O:p
شرأيك نروح واذا أحد من الشباب له خاطر حياه أحنا نتشرف ها شقلت بويه
قابوس تسير معاي بحاري سيافي ،،،،،،،<O:p</O:p
والشكر موصول لأخي / خلقون / على المعلومات القيمة
أنشاء الله سابدأ من الاسبوع القادم في السوالف عن رحلات السبعينات والثمانينات
وشلون كان السمك وفير والسيف نظيف والهواء صافي ونقي والي أبوه بحار يسولف
لنا من سوالف الأولين الي في الرحلات ودشات البحر الاولية خلونا نتذكر ماضينا
وماضي أبائنا وأجدادنا وللحديث بقية أن كان في العمر بقيه
وداعــــة الله
<O:p</O:p

[بو راشـد]

السلام عليكم ورحمة الله وبركاته
والله المشاراكات حلوه بس حبيت أشارك في جم شي حبيت أضيف شي أنه لبياحه مايبيلها غزل نزيل يعني مب مثل الصافيه لأنه الميد والبياح ساعات يأتون على شكل (راس) سرب واحد فينط الغزل. فطريقه لهم أما أن تنصب غزلين وره بعض أو تركب (عواشي) وهي تركيز الخطرات او العصي وحط كثر ماتبي وتخلي الغزل معلق عشان ماينط الغزل وإذا بغيت العين الزينه حق هصيد عندك 2 أنج او 2,5 أنج. وحق الصافي مثل ماقال أخوي خلقون بس أحنه أنسويه أسرائيلي والأسرائيلي يكون من ثلاث صفات وره بعض وتختلف حجم العين من صفه والصفه الأخرى.

أما عن النصب من السيف فتوجد ثلاث طرق عندك (التسكيره) وهي أنك أجوف السمك وتكون الماي غزيره وتسكر عليهم وتحدهم مع السيف. والطريقه الثانيه وهي مثل ألي شرحته فوق بأنك تركز عصي وتخلي الغزل ممدود من تحت إلى فوق عشان ماينط السمك مثل الميد والسبيطي وبعد ذالك تسكر الغزل . والطريقه الثالثه وهي تعمل حظره بلغزل وهي أنك يكون معاك غزلين واحد يكون قصير وتمده على شكل مستطيل والثاني أطول وتمده على طول إلى السيف وتقوم بتثبيت الأول وتخليه مستطيل والثاني بعد ثابت وممدود. وعلى فكره شرح هذه الطريقه موجود في الخيمه ولاكن مادري وين وأنشاء الله ألاقيه لك.

وتحياتي لكم جميعا.........................................

[قابوس]

السلام عليكم ورحمة الله وبركاتة.

الأخ راعي الدنقي والأخ ابو راشد.

مشكورين على المشاركة والصراحة أنا مسرور على تفاعلكم في الموضوع وحرصكم الدائم في اثراء المواضيع بلمعلومات المفيدة .
الحقيقة يا اخوان اني في الأصل ماني راعي بحر لأن لا ابوي ولاجدي براعي بحر .
لكني تولعة في البحر والصيد من كم سنه وخبرتي في البحر ماتعدى نصبت غزل على السيف .
بمشاركاتكم يستفيد الي مثلي ويتعلم في امور الصيد ولو معلومه بصيطة يمكن تنفعه في البحر .
اطلب منكم المزيد وللأمام دائمآ.
استفار بصيط.
كم من المفروض يكون طول اليد حق النصبه؟ وكم العمق الي تكون فيه الحلقه (المستطيل) ؟

اخوكم قابوس .

[بو راشـد]

هلا أخوي قابوس لا أخوي هذي واجب وحياك الله. أخوي في موضوع قديم عن شرح الطريقه الثالثه ألي شرحته لك بس مب عارف وين ويمكن تلقيها أهي في المواضيع القديمه وهي مشروحه بصور والمقاسات المضبوطة.
وسأبحث لك عنها.

وتحياتي لك................................................ ...

[gulfhunter]

السلام عليكم ورحمة الله وبركاته

حياك الله أخوي قابوس في منتديات مكشات وبالأخص الخيمه البحريه وان شاء الله تلاقي اللي يسرك ويرضيك وتفيد وتستفيد

بالنسبه إلى موضوع الغزول موضوع كبير ويحتاج إلى اكثر من موضوع من وجهت نظري ...

الأخوان ماقصرو عطوك شرح الواحد يعجز عن شكرهم

الأخوان خلقون راعي الدنقي بو راشـد

الله يعطيكم العافيه على المعلومات الرائعه

تحياتي لك وللجميع

[Alhzzen]

حياكم الله:p :p




مشكورين على الشرح والافادة



شكرا:)