الناقه بركت ولا ثارت الفزعه وش الحل

[ابوبدرالعريمه]

السلام عليكم ...أخواني عندي ناقه القحه لها سبعة أشهر واليوم ابركت ولا ثارت جبت رافعه ورفعناها وراحت للشبك وعلفت ما عندها اخلاف ولاكن الراعي قالي من حوالي عشرة ايام وهي ماتثور الا بعد عدة محاولات واليوم ابي فزعتكم وش المشكله والعلاج بعد توفيق الله تحياتي للجميع

[قزيزالنعام]

مرحبا يا بوبدرالعريمه
ناقه كبير في السن ويمكن باركه عليه ناقه
او فيه ابو دبه مرض يصيب الابل بكثره
وناقته ماتحب الارض الطلوع والهجيج

[ابوبدرالعريمه]

مرحبا يالغالي ابو دبه وش علاجه واعراضه الناقه رفعتها برافعه وقامت واليوم حاولت عدة مرات وثارت اخذت علاج من البيطري وعلى الله كل شئ

[ابو الشبرميات]

ابو بدر
عليك بالحلبة اطحنها واخلطها مع حبة سوداء
بمقدار واحد الى سبعة
( حلبة 7 والحبة السوداء 1 )
وبعدين اعجنهن مع تمر منزوع منه النوى
وخلهن على شكل كور صغيرة
وعلف بها الناقة لمدة اسبوعين
وخذ لك علاج وفيتامين للاعصاب من البيطري
وباذن الله ما تشوف شر
...

[قلب ذيب]

الناقه متوهنه او باركه عليها شي م الابل .
من الافضل عزل الناقه وتظليلها من الشمس , واحضار من يوسمها على الفقار صاحب خبره ومعرفه
( وسوم خفيفه ) وعليك بدواء الخيل للاعصاب والوهن . الله يوفقك .

[ابوبدرالعريمه]

مشكورين وبيض الله وجيهكم والله الناقه هذي حيرتني البارح ابركت وقامت مافيها شئ وسرحت وبركت وعجزت تقوم حاولت عدة مرات وثارت ودينها الشبك وبركت ولا ها الحين وهي باركه

[راكان745]

سلام عليكم

الناقه لاتعطيها ابر خيل حقت الاعصاب لانها لاقح

بس الناقه غير مكانها وحطاها في رمل وحاول انك ترفعها وخلها تمشي ولا تبرك هذا اسمه ( الوهن )

وشكرا

[ابوبدرالعريمه]

شكري وتقديري للجميع وماقصرتو الناقه ماتت الله يخلف علينا ببرك منها

[عواد الشمري2]

الله يخلف عليك الناقه ثقلت وهي كبيره بالعمر ماهوو مرض مار العلاجات هي بعد الله الي ذبحته

[ابوبدرالعريمه]

مرحبا أخوي عواد اشكرك على مرورك وتقبل تحياتي

[ابوبندر2012]

الله يخلفها ببرك منها الله عوض عليك راسك الباقي:lr

[راعي معيرة]

اخوي عندك منتديات مزاين العياده البيطريه اسالهم وان شاء الله تلقى العلاج بعد الله بعض الناس حاول ان يفيدك وجزاه الله خير وبعضهم يتفلسف وذبح الناقه وهي حيه