تعلم الصقارة

[عاذي]

ابذكر قصة بداية حياتي وكيف تعلقت بالطيور .. عندما كنت في العاشرة من عمري وعند عودة والدي لممارسة هوايته احضر احد معرف والدي اطال الله بعمرة فرخ شاهين ويقول له يابوفهد والله ان ماكرها يذبح الحباري فرخ لاتفرط فيها واني سافطها لك .. المهم طال التحقيق مع والدي من قبلنا نحن ابناءة عن الطيور وسوالفهن ومن هالقصص اللي خلتنا نندمج مع الوالد وحديثة لو تقطع من الواحد ما انتبه لك ولا حس فيك .. والله ان نومنا هك الليلة عندها بالحوش ومن يوم اتحرك او اتفلفل القريب منها ماهو بخير من الطلاب والنهر لو ماسوا لها شئ بس انه قريب منها .. المهم جونا الربع والمعارف وتذاكروها واللي جاب لبوي شبكة والي عطاه وكر وكل يوم انغير المسابيق والبرقع من دون اي سبب مرة لقينا ابوي مركب مسباق احمر ومسباق اخضر قلنا ليه يبه .. على شان يبرر لنا ويصرفنا قال على شان تهد على الصيدة .. صدقنا يالله وش نسوي .. انا وواحد من اخواني اتحدنا وصرنا نهتم اكثر من الاخرين وصرنا نقوم الفجر ونمر على الجبال اللي حولنا ونشوف الطيور بمواكرها وشفنا هك الطيرة عندها فروخها وهي تعلمهن الطيران يوم تاخذ العلف وتطير فية والفروخ تتبعها .. ورجعنا لابوي والسيارة بين السماء والارض من السرعة علمنا ابوي قال ماله داعي ما كل ماكر ينفع طيرة خلوهن .. ما اقتنعنا بكلامة .. اخذنا شبك الحمام اللي عندة وسرحنا الفجر وحمامنا معنا وماجتك الساعة تسع الا هك الطيرة وواحد من فروخها معنا .. ووالله انا ماخذنا خمسة عشر يوما الا حنا جايبين في يوم واحد تسع طيور .. يوم شافهن ابوي قال ولا واحدة تبقى يالله فكوهن .. وابتدأت رحلة العمر الجديدة بالنسبة لي .

[وزاري]

يامرحبا بعاذي

ابتوقف عند قصة ابوك---- يوم انكم تجيبون 9طيور---- يوم انه يقول ولا واحدة تبقى يالله فكوهن ..

الناس الأوولين ناس ترحم-----ناس تفهم----ياخذون على قد حاجتهم

لله دره

مــــــــاكر الطيور الأولين عليه وسم------خلاص ماتجيه ولاتقربه

اذن فيه ميزان ----ماينقرض

ولا الحيــــن الله المستعان

أنا قد شفت شيهانة بحريةوحــــش ---ولاحبــيت اطرحها وموثقها بالصور والفيديو --لسبب انها.......

أبنزل التقرير ان شاء الله عما قريب

[عاذي]

مرحبا فيك اخي وزاري وبيض الله وجهك .

[ذراع الذيب]

السلام عليكم ورحمة الله وبركاته..
مسيت بالخير ياعاذي..

لاهنت على هالسالفه الطيبه والله يعطيك العافيه ويبارك فيك..
وبأنتظار جديدك تحياتي لك,,

[ابرق الحرار]

اول الطيور كثيره ياربع واليوم قلة الطيور سنة بعد سنة وين الي تحصل يفك طيره وان اطلقه ينطرح في نفس اليوم

[(هزاع)]

بارك الله بك قصه وعبره
ان الطيور كانت كثيره والناس اجواد ولازالو انشاء الله
ولاكان عندهم شفحه
اتذكر قريب من 30 سنه كنا نقنص الارانب بويب وفوق من الطوقي
وملاقي الوشغ بشعيب الجرذي اللي بعلو بويبات بهاكلوقت ولارميناه
ونت اذا طلعت من القرى 10 كيلو تصيد
واللحين وين الصيد
السياره والسلاح والشفحه قضت على الصيد
الله المستعان

[وسًاام]

الله يعطيك العافية
قصة ممتعة

[عاذي]

شكرا لكم جميعا على مروركم وبارك الله فيكم .

[حامد الحنيني]

السلام عليكم ورحمة الله وبركاته
صباح الخير اخوي عاذي

قصه جميله لبداية صقار بيض الله وجهك

تحياتي لك.

[بو غازي]

مرحبا اخوي عاذي
سالفه جميله
والاجمل الحكمه فيها
سلمت :)

[عاذي]

ياهلا ومرحبا بالجميع .

[عبدالعزيز610]

ايـــــــه ي السسلاح ,, لعـن خير الصيد بانواعـه :(

مالحقناا الغزلان ولا الارانـب بديارناا بسسبب هـ الســلاح ,, لكن الله كريم
لاهنـــــــت