ابي فزعتكم لاهنتو ابوي زعلان علي

[awn050]

السلام عليكم ورحمة الله وبركاته

كيف حال الشباب وعسا اموركم دايم بزود وبستر وسلامه

اخوكم وصاه ابوه وراح للمعارض وتنقاله موتر جيب vxr لوميتيد بريمي علي بابه ٩\٢٠٠٦ وبلأستماره ٢٠٠٧

لحد الحين الأمور على كيف كيفكم

المهم اخوكم مسوي فاهم ولا فيه احد يقدر يضحك عليه وفحصت السياره عند مركز فحص بمعارض الشفا بالرياض وقالي اتكل علي الله واشتر وعطيته ٣٠٠ ريال ومشيت

رحت للغرابي انجده قالو لي هناك شطرطوناته تجاريه وطلع كلامهم سليم

قلت مهنا خلاف عادي وباقي مسوي ذيب

جاني واحد قال عندك رفرفين اماميه وكبوت قلت عادي اصلاً البدي مو همي اهم شي المحركات وباقي مسوي ذيب

المصيبه ان فيه عره من ال٨٠ الي ٩٠ تقريباً وباقي الامور عادي ماعندك مشكله اصلاً ابوي دايم يسرع ما يعرف يهدي

نجي لزبده وهنا المصيبه صدق

امس عشقته ريوس وابوي راكب معي ودبله معشق ظاغط الزر حقه لفيت يمين الى قبل اخر شي باقي طقه ويتيم الدركسون ورجعت ريوس وقامت انواع القربعه تحت بطن الموتر اكثر شي جهت الخلف الصوت طق طق طق طق وعدلت الدكسون وراحة تدريجي لين اعتدل ولما استوى كفراته الاماميه وباقي امش ريوس انتها الصوت اسرعت بالريوس ومعاد رجع

عشقته ثاني مره ريوس مع دبل ولا لفيت الدراكسون وما طلع الصوت

المهم الحين مفتاح الجيب ناشب بجبهتي وبوي يقول جيب قروشي
ايش السواه

ملاحظه اذا مشيت مع خط مستقيم بدون دبل وسرعه 40 او 50 كان فيه ونه او عره ناس يقولو عادي وناس ما ادريايش يقولو

وترى القصه صدق ولاتحدوني احلف

[sgl2002]

ياخوك الجيوب كلها كذا اذا عشقت الدبل وانت على زفلت او مكان قاسي تحس الموتر يجيم مايمشي وان دعسته بقوة فتراك بتخربه

معروف الدبل اذا عشقت لا تلف لاخر شي عشان ماتكسر العكوس

بعدين انت عشق الدبل وجرب الموتر في النفود وشف بيطلع او لا


بعدين اذا تبي تفحص موترك صح رح للبريدي اللي في النسيم بطريق عبدالرحمن بن عوف وراح يطلع كل مسمار فيه واللي خربان

[أصيل حجآ زي]

وعليكـــُم السلام ورحمة ُ الله وبركآتـــُه


الله يجيرك في مُصيبتك


صل الفجر اليوم في جمآعة
وبعد ما تصلي السنة صل ركعتين
أقراء في الأولى قـُل يا أيها الكآفرون
والثآنية قــُل هو اللهُ أحد
وأطلُب الله في السجود بقولك ياحنآن يامنآن أفرجها علي وألح في الطلب .
كثر من قولك في السجود قبل الدُعاء بقولك ي الله ي الله ي الله كثيرآ .


أكثر الشريطية لصوص ونصآبين ولا تنسى التشليح .
رآح اللي يخآفون الله ولم يبقى الا نصآبين ولا تُغرك كثرة اللحى أو المظآهر .
قآل رسول الله صلى اللهُ عليه وسلم :
""" من غشنا فليس منا """


والله قهر أن كثير من يغــُش هو من
أبناء جلدتنا من أخوآننا وأقآربنا وجيرآننا وهلــُم جرة .

مفروض يبين لك عيوب { مسآوي } السيآرة وميزآتها
حتى تكون على علم وآضح وتثمنها باللي تستحق فقط لا أقل ولا أكثر .

والله أذا بسيآرتي خلل أو عيوب أني ما أبيعها أبدآ .
أهديها لفقير أو صديق مُحتآج بعد محآولة أو أصلاحها .
وأبين لهُ ما بها من مشآكل حتى لا يدعي علي وما تسوى دعوة مظلوم .



الله يعوض عليك وحآول ترجعهُ للبآئع حتى لو خسرت بعض المآل .
هددهُ بالشكوى للحقوق ولو أنك ما رآيح تحصل حقك أسألني أنا مُجرب كثير .


وبعد ذلك لكــُل حدث حديث .






وترى القصه صدق ولاتحدوني احلف






لازم تحلف وتجيب شآهدين ومزكية .
وأذا أحد منهـُم يشرب الدُخآن
أو حآلق لحيتهُ .
ما نقبل شهآدتــُه
:good2:

[ملك الفكتوريا]

والله ما ألومك كل شئ ولا تكون سبب بزعل ابوك


انا يوم سويت حادث على السيارة وجاب ابوي السمكري وقاله السعر


عطاني نظرة بسببها جبت التعويض 14500 ريال تعويض من الشركة في شهر مع كل الاجراءات بالشركة والمرور والأمانة

[عناز الحره]

عسى اللى باعك السياره لايتهنى لابمال ولابصحه
آآآآآآآآآآآآمين

[وبل نجد]

السلام عليكم
اولا الله يعوضك خير ي رب ويفك حقك من الظالم
ثانيا بالنسبه للعره اللي تطلع منً ٨٠/٩٠ فالله اعلم انه عمود الدبل او الكردان والغالب عمود الدبل يمكن يبي ترصيص او صلبان
واما القربعه اللي ف بطن الموتر اذا شغلت الدبل
فلازم تروح ميكانيكي يكشف عن بطن الموتر كاامل من جلد مقصات واذرعه ومساعداتً وكراسي الغماره وغييييررها



موووفق

[ابوراكان تبوك]

كل اللي ذكروه الاخوان عين العقل طبقه بالحرف الواحد
والله يوفقك وييسر أمرك

[قمة افرست]

والله دائما نحذر ونوه من السيارات المستورده من الامارات والخليج
متعرضه لحوادث عنيفه او متقلبه من التطعيس
ويوقومون بالتعديل فيها من التشليح ويغشون المسلمين فيها
انا رايي اذا السيارة تستحق التصليح ماعي مقلوبه الي ذكرت من مشاكل ميكانيكيه ممكن تصلحها
رمان عكوس او عامود الدبل امره بسيط
اهم شي باقي السيارة وقفتها كهرباء السيارة فتشها قبل تخسر
اما اذا شفت السيارة ماتنفع بيعها ولاتغش الي يشتري وربك يعوضك

[اصغراكبرخان]

عليك بشيخ المعارض اذا كانت المشكله ميكانيكيه

يرجع لك قروشك قرش ينطح قرش

اول شي شفلك مكنيكي سعودي يكون فاهم وياكثرهم

اما اذا سمكره او شي ظاهر الله يعوض عليك

[بدوي جنوبي]

الله يهديك ليه تفحص في ورش العارض
كلهم نصابين ويعرفون الشريطيه
ويعرفون المعارض وسياراتهم

صاحب المعرض او الشريطي بيقول انا ما لى دخل
انت فحصت الموتر وطلع سليم
المفروض تشتكى على المركز اللى فحص لانه قالك كل شي تمام .

[GMC89]

اخوي مشكلتك باذن الله بسيطه وهونها تهون
انا اظن المشكله ما تطلع من عامود الدبل
وده لاقرب ورشه افحصه

[awn050]

لاهنتو يا شباب واشكر كل من تفاعل مع الموضوع والله اني متورط من جد

رحت علي الجيب لورشة في الصناعيه القديمه بتاع اعمده وقالي سليم رحت لميزان اليرموك قال كل بطن الموتر سليم رحة لميزان العضيب قال عندك ثلاث كفرات فيها مسحية فرامل غيرها رحة لوكالة دنلوب بشارع الضباب قالو لي نرصصها ب١٤٥ ريال ويظبط رصصتها وباقي كل شي عل وضعه فيه ورشه متخصصه تدلوني عليها لا هنتو وانا كاتب الموضوع بجهاز ايفون وخارج مدينة الرياض مودي ابوي لمناسبه بلقصيم علي جيبنا المبروك الي خمسين كيلو نمدحه وخمسين كيلو نسبه واذا جا مجال في البيع والشراء قال ابوي مثل شريتك البايخه وخسارتك العضيمة لي جاني ازمه من الموضوع
ودمتم بود اخوكم مخسر ابوه الله يعوضنا بخير

[mekshaat]

ان شاء الله مافيه خساره وكل درس بفلوس وراح تكون هالشريه حافز لك
بعدين في انك تنافس الشريطيه في الخبره لاجيت تشتري سياره مستعمله
والجيوب شراها صعب لأن فيها زيادة محركات عن السيارات العاديه وبعضها
تنكرف بالبران فيبغى لها واحد فاهم بالفحص لاجا يشتري ولاتنسى ان البعض
يفك الجيب وكاله وعلى يده ويشتكي من بعض المشاكل بالمحركات فلا تستغرب
على المستعمل.

[GMC89]

اخوي وده للصناعيه القديمه ومر على الورش وشف ردهم ولا تاخذ برد اي احد منهم شف وش يقولون
ورد لنا هنا وحنا باذن الله نفيدك
والموتر ماشاء الله وصل القصيم يعني باذن الله ما فيه مشكله عظيمه
وكل مشكله ولها حل باذن الله

[صياد الجبل]

يمكن بس تشحيم وتربيط فقط لاغير

وشيك على زيوت القير والدبل والدفرنس والكارونه

غير المساعدات وشوف جلد البدي

[الفين6]

السلام عليكم ورحمة الله وبركاته



كيف حال الشباب وعسا اموركم دايم بزود وبستر وسلامه


اخوكم وصاه ابوه وراح للمعارض وتنقاله موتر جيب vxr لوميتيد بريمي علي بابه 9\2006 وبلأستماره 2007


لحد الحين الأمور على كيف كيفكم


المهم اخوكم مسوي فاهم ولا فيه احد يقدر يضحك عليه وفحصت السياره عند مركز فحص بمعارض الشفا بالرياض وقالي اتكل علي الله واشتر وعطيته 300 ريال ومشيت


رحت للغرابي انجده قالو لي هناك شطرطوناته تجاريه وطلع كلامهم سليم


قلت مهنا خلاف عادي وباقي مسوي ذيب


جاني واحد قال عندك رفرفين اماميه وكبوت قلت عادي اصلاً البدي مو همي اهم شي المحركات وباقي مسوي ذيب


المصيبه ان فيه عره من ال80 الي 90 تقريباً وباقي الامور عادي ماعندك مشكله اصلاً ابوي دايم يسرع ما يعرف يهدي


نجي لزبده وهنا المصيبه صدق


امس عشقته ريوس وابوي راكب معي ودبله معشق ظاغط الزر حقه لفيت يمين الى قبل اخر شي باقي طقه ويتيم الدركسون ورجعت ريوس وقامت انواع القربعه تحت بطن الموتر اكثر شي جهت الخلف الصوت طق طق طق طق وعدلت الدكسون وراحة تدريجي لين اعتدل ولما استوى كفراته الاماميه وباقي امش ريوس انتها الصوت اسرعت بالريوس ومعاد رجع


عشقته ثاني مره ريوس مع دبل ولا لفيت الدراكسون وما طلع الصوت


المهم الحين مفتاح الجيب ناشب بجبهتي وبوي يقول جيب قروشي
ايش السواه


ملاحظه اذا مشيت مع خط مستقيم بدون دبل وسرعه 40 او 50 كان فيه ونه او عره ناس يقولو عادي وناس ما ادريايش يقولو


وترى القصه صدق ولاتحدوني احلف





ابشرك امورك طيبه
اسمع كلامي اخوك صاحب ورشه ومرت علي كثير من هالحالات
بالنسبه للطقطقه اللي تلف يمين ويسار والدبل معشق
هذي فظاوه بالعكوس الاماميه ما تأثر
ملاحظه
هل مقاس الكفرات اللي قدام وورى نفس المقاس ولا لا؟؟؟؟؟
اذا المقاس ماهو واحد يسبب طقطقه وثقل بالوتر لما تعشق الدبل
اما بالنسبه للعره اللي من 80الى 90
تفك العمود الامامي والخلفي وتشيك على الصليبات وتشيك على الفظاوه اللي بالذكر والانثى
واذا طلعن كلهن مظبوطات
افحص العمدان على المخرطه لايكون فيهن طعج
وان شاء الله تضبط سيارتك
وانا مسؤل عن كلامي واتحــــــــــــــــــــــــــــــــــــــــــــدى
ملاحظه بسيطه حتى نكون قد التحدي
خل الميكانيكي يشوف هو فيه فظاوه بالبنيون (البنيون يكون في مقدمة الدفرنش اللي يركب عليه العمودعند الصوفه)
وبالنسبه للعمود لازم يكون الثابت على الثابت والمتحرك على المتحرك

[هواوي الشمال]

حسبنا لله ونعم الوكيل مايقهرني الا الي يجيك عافي اللحيه وشكله متلزم ودين وتحسبه ثقيل ويطلع اكبر غشاش شريطي ...حسبنا الله ونعم الوكيل شوهوا سمعت الدينين..اخوي دام المكينه والقير والدفرنس سليم..ف امورك طيبه وان شاء الله سهالات غير الكفرات

[mostafa a a]

افحص في الوكالة و
الله يعطيك العافية

[YUKON_GMC]

عوذه كل البلاوي هذي بالموتر ولاحسيت بها وقت الفحص كذا طلع الموتر مجرد خرده

اجل 300 ريال حقت الفحص وش عليه لاصار كل شيء خربان

اشتك عليهم واحتفظ في ورقة الفحص ورايح تتحملها الورشه اﻷي فحصت عندها

أرسلت بواسطة GT-N7000

[BDER-C1]

الله يعينك ويعين الجميع ذكرتني بسوالف قديمه ...مافيه مشكله الا وتهون ان شاء الله
اول شي زعل ابوك حله بالرضاء واللين
وتاليها شف مشكلة الموتر شيك على اكثر من ورشه وان شاء الله انها بسيطه وتهونولاتلحطم ولاتكبر الموضوع الفلوس تروح وتجي والزعل يوم ولايومين وينتهي ان شاء الله
بس قو قلبك والله الله : بسم وطال عمرك وابشر خلها على لسانك .
وتوصلون وترجعون بالسلامه

[GM_400]

اول شي احمد الله على كل حال وكل طقه بتعلومه مثل مايقولون ولا تثق باحد أبد الا من رحم الله

المهم اللي بقوله لك الدبل ان شاء الله سليم عندك

لن كل المواتر الدبل اذا كسرت الطاره تجرش العكوس وتطلع صوت طبيعي جداً الصوت لكن حاول ماتكسر كثير وانت مشغل الدبل

موفق خير

[راعي براوننق]

السلام عليكم
الموتر من كلامك ما فيه شي
المشكله انك عشقت الدبل والدركسون ملفوف
فاحيانا يصير مثل القربعة
فاحرص عند تعشيق الدل يكون الدكسون متجه للامام
وبعدها لف يمين او يسار على كيفك

[عبدالله المطيري]

اكبر خطأ تشغيل الدبل على الاسفلت

[خبايا انسان]

على فكرة ,, بالنسبه لمراكز الفحص بالشفاء ,, ف اليكم /

مركز فحص ساسكو / مره رحت بشتري سيارة ووديتها فحص ساسكوا , السوري يسألني بصوت منخفض لكي لا يسمع البائع , يقول هل انت البائع ولا المشتري ؟؟ وكأنه يبي يمشي الامور او يضبطها , عموما قلت له مالك دخل وكمل شغلك وافحص السيارة


مركز فحص السلام / ( الخبير حقهم السوداني ) فحصت عنده جيب وطلع بمشكله قال مجرد تصفيه مكينه من بواجي واسلاك وغيرها , ولما شريت وتوكلت على الله طلع راس المكينه خربان


مركز فحص مادري وش اسمه نسيته بس مكانه على الشارع الموازي لشارع المعارض ( شارع المستودعات المحطه الثانيه ) / ( العمال فلبينيه ) كان عندي جيب ببيعه ومتأكد منه وواثق فيه وطلب مني الزبون نذهب لذالك المركز , فلما فحص في النهايه قال ان الموتر فيه سبايك مكينه !!


والله على ما اقول شهيد

[sgl2002]

افضل فحص واسال مجرب اللي هو البريدي

وتلقى الشريطية يحاولون ينحشونك عنه

وانا ما افحص الا عنده

[رحال7]

حسب فهمي الصوت مع الدبل ولفة الدركسون ريوس او امام على الاسفلت او على ارض قاسيه عادي وليس عيب في الموتر ابدا!

ثانيا: اذا كنت شغلت الدبل على الاسفلت فهذا تصرف غير عادي الا للاختبار السريع فقط وبشرط ما تلف الدركسون!

قم بنفس التجربه على رمل او على ارض غير قاسيه ولف الدركسون اذا ما طلع صوت فموترك سليم 100% على الاقل الدبل

وفي النهايه الله يعيننا وياك..وسوق المستعمل في الغالب غش..اذا لم يكن من المالك فمن المعرض او الشريطي وما ادراك ما الشريطيه

والله اعلم

[أب رحي]

وعليكم السلام ورحمة الله وبركاته


والله يالغالي ماعندي خلفيه ....
بس أسمع من الناس إن هذا شي عايدي الدبل شغال وانت راجع ريوس ولاف الدركسون
ويطلع عندك صوت قرقعه يعني كل اللي عندهم جيوب مرة عليهم هذي الحاله....
وبالنسبه للونه او الزن اللي من 40 إلى 50 هذا شي عايدي في الجيوب....
أما الاشياء التجارية هذي في ذمت البايع والله أعلم....
وأهم شي يالغالي رضى الوالدين لاتزعل أبوك وأمك نصيحه من أخ لأخ ولجميع الأخوان....

وتقبلو مروري يالغالي.