عن نسيان الطير للحبارى وقصه ان شاءلله تعجبكم ..

[خالد العطااوي]

السلام عليكم ورحمة الله وبركاته


كيفكم عساكم بخير


بنتناقش عن موضوع الطير اللي ينسى الحبارى


صار معنا موقف السنه اللي فاتت
شرينا طير ومشروط انه يذبح الحبارى وطير حر ادهم مزيون
ومره من المرارير ههههه ع مقال سبار سبعه


جبنا له تفريخ قلنا نبي نهد ونشوف هل يهد عليها ولا لا


المهم هديناه وعيا يهد لين نجي ونطرحها وندعيه يجي


يروح شوي ويوقع والتفريخ ماتطير الا خفيف


قلنا يمكن يبيها طيياااار وقنصنا اليوم الثاني ولقينا حبارى


والطير طلاع وطيرناها له وهد شوي وجنب عنها ووقع


ومن بعدها غسلنا يدينا منه وعلى ان الرجال شرط عليه لكن مادري وش السبب :(


ورجعناه لراعيه والسلام ختاااااااام ...


وسمعت ان بعض الطيور تنسى الحبارى ولاتهد الا بتعلوووم .. وموضوعنا هو نسيان الطير للحبارى


تحياتي لكم

[صقار مبتدئ]

هل الطير جير
فإذا كان جير لا تشره عليه الذاكره تخونه ههههههههه
اما اذا كان اصيل فلاصيل ما ينساها ابد لو انه صايدها

[خالد العطااوي]

حر يالغلا حر اصيل .. عدلتها .. نسيت ههههه

[قلب ذيب]

حياك الله / خالد العطاوي .
شرينا طير ومشروط انه يذبح الحبارى وطير حر ادهم مزيون
.................................................. .........
الطير الحر والكثير من الطيور حتى طيور الجير ماتنسى الحبارى , اللي حصل انكم ماشنذرتوا الطير او ماوجبتوا الطير , وكثير طيور عندنا بعد الربطه ندعيها وهي صايده العام عندنا ونجردها بالملواح وعندما ناظر بها على الحبارى ماتبيها ! وتقول ما عرفها ؟ وعندما نشنذرها ونريحها .. تقول وينها لو تطير الحبارى على بعد تطلبها وتصيدها .
... الطيور الحرار القرانيس وحتى الشياهين وخاصه اللي اصلها خلوي ماتهد على الصيده الابعد ان تحذف الشبيكه من فرستها وتزين نفسها وتكون على وجاب , الطير دائما يصيد لنفسه فأن كان شبعان او على صدره شحمه قليل اللي يهد منها خاصه الطير النزر و قرانيس الهوى ...... والله اعلم .

[خالد العطااوي]

كلامك صحيح وطرينا الشنذره بس ماشنذرناه

[انور العنزي]

مساكم الله بالخير اول الوقت وانا اخوك لاتشره عليه اكثر الطيور باول الوقت نفسيتها تكون وسط انا بعت طير لي انا شخصين وشرط الحبارى وتفجأة اول الوقت بالرجال يدق يقول الطير صد عن الحبارى قلت بدون تردد ارسل الطير وتجيك فلوسك وفوقهن فلوس الربطه الرجال رفض يرجع الطير وبعد فترة دق علي قال ابشرك الطير طلع معانا على خرب بدون جره ومطراد ثلاثه كيلو ياالله انثبت معاه بالسحاب ههههه رديت عليه وقلت ايوه هذا طيري اللي شرطت عليه مو الاول اللي صد انا مع كلام اخوي قلب ذيب

[وزاري]

موضوع جميل


أتفق مع قلب ذيب


لكن روووح شوف سوق الرياض .وكل طير يطب السوق ويحرج على انه صايد حباري


و اول سومه يبيعه


معقووولة كل هاالطيور اللى تطب السوق صايده


ياخي رحنا للشرق والشمال _ يالله وبالله نحصل حباري وأحيانا مانحصل


والحباري لكوبرت روعت الرجال فما بالك بطير _ الا طير صامل ومايحتاج


والطير الشره على الحباري مايبيعه راعيه


الا تطق باب الرجال ولا تجيه بالمدعي وتدفنه بقروش



تراني شويه عصبت _ والموضوع نسيان الطير وأنا نسيت الموضوع

سامحونا على القصور



ولله ولى التوفيق

[وسًاام]

شنذره وفالك الخرب

[جبار1]

ابدا بالاسباب اولآ

ثم قدم العذر لراعي الطير

[خيرها بغيرها]

والله أنكم حمستونا للموضوع الشيق السلس اول احبارى الثانية الثالثة المشكلة راعية شارط علية معنا شنذرناة نبتناة
خطريناة الممهم مخلينا ولا عذر رجعناة لرعية وعلمناة وش صار قام واحد من اخوينا الله يهدية وراح شرا نفس الطير
نفسة قال بصيد معي المهم حصل واحد من اخوينا احبارة جا راعي الطير قال بفكة وإنشاء الله بيصدها جا وقع جنبها قال طيروها يبغاة الطيار وروحت وهو في محلة وفكيت الشاهين وجابة اللة خلاصة الموضوع ان طير الحبارى
بين
ودمتم سالمين

[(هزاع)]

ياهلابالموضوع وراعيه
كان لي نقاش مع العويدي حول الموضوع هذا
نعم الطير يصيد لنفسه والشنذره لها دور كبير برغبة الطير بالصيد
وليس نسيان الصيد
اكثر الناس يتناسا موضوع الشنذره وهو هام جدا
وبعض الطيور تتعض لمواقف صيد تهاب بعدها ان تصيد
وبعضها رفالة صقار وصنع الطير تهبط عزومه وصملته

[ذراع الذيب]

السلام عليكم ورحمة الله وبركاته..
مسيت بالخير ياخوي..

صدقو خويانا والطير ماينسى ابد واللي يقول الطير يبيله تذكير اقوله انت غلطان..
الطير اللي مايهد على الصيده اللي يعرفها مستغني عنها(غني ) وعلى قول وزاري طيور السوق بها ريبه..
والبنت المزيونه ماتنخطب الا من بيتها ولاهنت على هالموضوع الطيب وتشكر عليه..
تحياتي لك..

[خالد العطااوي]

مشكوورين وبييض الله وجيهكم ع الردود وانا اقوول من االشنذره لو مشنذرينه نبي نشووف فعله
والطير مايتفرط فيه سبوق ومزيون وصامل لكن والله تحسفنا عليه
وقيمته االي شارينه من الرجال 20 الف
والطير يستاهل ولو انه ذبح ماصقرنا غيره ..

[سلطان 1]

يالربع أنا اخاااالفكم. ان كل طير ما يجئ الحباااارااا الا وهو مشنذر

يمكن اقول بعض الطيور نعم اما كلهاااا لا. فيه طيور تنقلهااا من مربطهااا
وشرط انها تهد وتصيد الحبارا
وانا أتكلم من تجاااارب طيور بعض الطيور هدااااااد ما عليه وبعضها لا ما يعطيك من عمره الا بالخزم.

[مذخور]

حياك الله اخوي خاالد العطاوي
اتفق مع راي اخونا قلب ذيب برايه
انا كان عندي طير اشنذره مرتين بالموسم
ولو ارتفع عن وزنته خصوصآ لاصار الوقت دافي تعافه علمآ انه طير طيب
واتفق مع راي بعض الاخوه
بعض الطيور شره شنذرته او ماشنذرته هداد
ولكن الشناذر بعد القرنسه مهمه
اتمنى لك التوفيق ,,,

[خالد العطااوي]

بس الشناذر يبيلها واحد فااااااهم يعني يمسكه ويجاهده
وفيه طيور تموت من الشناذر لاابد واحد فاهم فيها

[عبدالرحمن بن ذياب]

انا مع كلام اخوي قلب ذيب لاهنت يا صاحب الموضوع

[عبدالرحمن بن ذياب]

نعم يا اخوي خالد كلامك صحيح اخبر فيه طير من طيور احد الاعضاء
مات الطير بسبب الشناذر ما عرف يشنذره

[خالد العطااوي]

هلا وغلا باللي ردو ومشكورين ع المرور وحمستونا صراحه

[جلاد الحباري]

لا وجب الطير واستهد للهدد يوريك فعله الطير يصيد لنفسه