سؤال لاهل الخبره من الصقاقير

[الشلاعي]

السلام عليكم ورحمه الله وبركاته

مساكم - صبحكم الله بالخير جميعاً
وكل عام والجميع بخير بمناسبة قرب شهر رمضان الكريم
********************

يا اخوان الموضوع ومافيه اني افكر اشتري شيهانه واحترت بين البحريه والفارسية

البحريه مايعيبها الا قرنستها
والفارسيه نوعين جبلي وبحري ولا اعرف عنهن شي
وخايف اطيح ببحريه فارسيه وماتقرنس ههههه ونتوهق
ولا اعرف عن الفارسيات شي بالفعل والسبق ياليت من له خبره فيهن يفيدني وكم اقيامهن الجبليات الفارسيات .؟ وكم توصل مقاساتهن ؟... ابي من مقاس 14 ونص وفوق عرض ... وكيف قرنستهن؟

ودمتم كما تحبون

[(هزاع)]

وين توام الفارسيات
الفارسيات الجبليات ياطويل العمر بهن التام والتبع
وهن يصفن مع الطيور وياصلن 15 انش عرض
وبهن سبق واللعام شاهدتلي طيره عند واحد وصلتها 8000 ولاباع
وتامهن نادر مشاهده ولاملكتها لاتفكها ابد

[الشلاعي]

هلا والله ببو مشعل وش قصدك بياصلن 15 بالقيمه والا بالمقاس؟

ولاهنت على الافاده وبيض الله وجهك

بأنتظار الاخوان

[بن قنور]

السلام عليكم ورحمة الله وبركاته
اخي العزيز شلاعي

فيه قول يقولونه كبار الصقاقير عن الشياهين
(حمراهن صيودهن )
(وسوداهن سدودهن )
( وبيضاهن شرودهن)
اخي العزيز اما الجبليه فهي سهله في التجرنس اما البحريه حسب ما اسمع
فهي تتأخر ومن له خبره فيها يعرف نوع
من كبسولات لا اعرف اسمها حالياً تساعد الجرناس
اخوك ابوفيصل

[عيد العازمي]

عليكم السلام ورحمة الله وبركاته


والله ياخوك الزين والشين فيهن لاتقولي بحريه او جبليه

بس الاحسن البحريه لان 30 بالميه منهن اللي ماتجي الكروان والجبليه عكس ماقلت بالبحريه




والصقاره صحيح لها دور لكن ان وفقك الله باللي تشتريه بحري او جبلي تاكد كا بدايه بتحب الطير اللي انت بديت فيه ومع الوقت بتعرف الفرق بين البحري والجبلي ان كملت مشوارك في الصقاره لكن الزين والشين في الاثنين اللي ذكرتهم واذا اخذت جبلي او بحري وطلعت زينه فهذي توافيق من الله سبحانه وتعالى


ومن ناحيت قلت تبي من 14 ونص وفووق

اقولك زين ما اخترت ياخوي العزيز وعسى ربي يوفقك

على طاري القرنسه هذي مايعلم بها الا رب العالمين واللي تقرنس معه بدري توافيق من الله


لايقولي من هالاكل او غيره


الا اذا كان يقرنس بحبوب او من هالاشياء اي


والله خالي عنده طيور وشياهين ماي مو حرص على نظافته حييل وعلفه دجاج وبالاسبوع او الاسبوعين حمام طبعآ كله طازج وماشاءالله تقرنس عنده الشيهانه مثل الطيور باول الوقت وتطلع منه اشيهانه زرقه وطبعآ توافيق من الله يالله لك الحمد

تحياتي لك انت والجميع .

[ابرق الحرار]

مجربها ولاتفكها وسريعه وصاملة وتقرنس مثلهن مثل الطيور

[تميم2222]

والله الفتره الاخير .. كثرت اللي تقرنس مع الطيور ... وتطلع...لانها تفاريخ .. وتباع على انها اصيله .. فركز من ناحيه هالنقطه .. اذا كان يهمك هالموضوع .. علما اني شفت منها شي يلحق شي خيال ويتحدون بها مشالله على زواجل قوي 13 و14............ وعسا الله يوفقك

[سيف الهواء]

شف يالشلاعي تراك تبي تروح ودور واخر شي تطيح بتفريخ ثم نجلس نرفع الطير وانزل الطير
واخر شي نكتشف انها تفريخ يوم نكتشفها ولاحنا باذلين جهدنا والموسم رايح وانت معك حبوب ضغط
وانا معي حبوب صداع من هالشيهانه اللي تبي تورطنا فيها... لكن نصيحتي لك تشتريي طير معروف
او فرخ جبلي وحش مقاسه زين ..وسلامتك

[الشلاعي]

السلام عليكم ورحمة الله وبركاته

اخي العزيز شلاعي


فيه قول يقولونه كبار الصقاقير عن الشياهين
(حمراهن صيودهن )
(وسوداهن سدودهن )
( وبيضاهن شرودهن)
اخي العزيز اما الجبليه فهي سهله في التجرنس اما البحريه حسب ما اسمع
فهي تتأخر ومن له خبره فيها يعرف نوع
من كبسولات لا اعرف اسمها حالياً تساعد الجرناس
اخوك ابوفيصل


وعليكم السلام ورحمه الله وبركاته
هلا يالله حي ابو فيصل


(حمراهن صيودهن )
(وسوداهن سدودهن )
( وبيضاهن شرودهن)

اول مره اسمع هالشيء ومنكم نتعلم
وبيض الله وجهك على ردك يالامير

[الشلاعي]

عليكم السلام ورحمة الله وبركاته


والله ياخوك الزين والشين فيهن لاتقولي بحريه او جبليه

بس الاحسن البحريه لان 30 بالميه منهن اللي ماتجي الكروان والجبليه عكس ماقلت بالبحريه




والصقاره صحيح لها دور لكن ان وفقك الله باللي تشتريه بحري او جبلي تاكد كا بدايه بتحب الطير اللي انت بديت فيه ومع الوقت بتعرف الفرق بين البحري والجبلي ان كملت مشوارك في الصقاره لكن الزين والشين في الاثنين اللي ذكرتهم واذا اخذت جبلي او بحري وطلعت زينه فهذي توافيق من الله سبحانه وتعالى


ومن ناحيت قلت تبي من 14 ونص وفووق

اقولك زين ما اخترت ياخوي العزيز وعسى ربي يوفقك

على طاري القرنسه هذي مايعلم بها الا رب العالمين واللي تقرنس معه بدري توافيق من الله


لايقولي من هالاكل او غيره


الا اذا كان يقرنس بحبوب او من هالاشياء اي


والله خالي عنده طيور وشياهين ماي مو حرص على نظافته حييل وعلفه دجاج وبالاسبوع او الاسبوعين حمام طبعآ كله طازج وماشاءالله تقرنس عنده الشيهانه مثل الطيور باول الوقت وتطلع منه اشيهانه زرقه وطبعآ توافيق من الله يالله لك الحمد

تحياتي لك انت والجميع .


وعليكم السلام ورحمة الله وبركاته
حياك الله اولاً مافهمت عليك باللي بالخط الاحمر

ثانياً انا سبق وصقرت ماني جديد ههههه

والطير الطيب طيب سواء بحري او جبلي بهذي صدقت
وماقصرت ومنكم نستفيد لاهنت

[الشلاعي]

مجربها ولاتفكها وسريعه وصاملة وتقرنس مثلهن مثل الطيور


هلا يا ابرق الحرار حياك الله
والله كل اللي جربوها يمدحونها لكن الله يكتب اللي فيه خيره

[الشلاعي]

والله الفتره الاخير .. كثرت اللي تقرنس مع الطيور ... وتطلع...لانها تفاريخ .. وتباع على انها اصيله .. فركز من ناحيه هالنقطه .. اذا كان يهمك هالموضوع .. علما اني شفت منها شي يلحق شي خيال ويتحدون بها مشالله على زواجل قوي 13 و14............ وعسا الله يوفقك
ههههههههه ايه هذا بلا ابوك ياعقاب لكن ربك يكتب اللي فيه خيره والطير الطيب ماعلي منه سواء اصيل او تفريخ بس عسى الله يوفقنا بالطيب

[الشلاعي]

شف يالشلاعي تراك تبي تروح ودور واخر شي تطيح بتفريخ ثم نجلس نرفع الطير وانزل الطير
واخر شي نكتشف انها تفريخ يوم نكتشفها ولاحنا باذلين جهدنا والموسم رايح وانت معك حبوب ضغط
وانا معي حبوب صداع من هالشيهانه اللي تبي تورطنا فيها... لكن نصيحتي لك تشتريي طير معروف
او فرخ جبلي وحش مقاسه زين ..وسلامتك
هلا بسيف الهوى يالله حيه
هههههههههههههههه لو ادري وين الطير اللي يجيب لك الصداع شريته ههههههههههههه بس عناد فيك
اضحك الله سنك يالامير
وانت تعرف ان رغبتي بالشياهين اكثر من كل الطيور . وابي شيهانه اتحداك فيها انت وابو عبد العزيز وشلتكم هههه بكل شي>>متجهز لكم

لاهنت على المرور والرأي

والله يكتب اللي فيه خيره

[معسف العاصي]

أجل تبي تجاكرنا
خذ من حدا الفروخ اللي عندنا ياخي أظمن قرنسه وفعل ان شاء الله مظمون اذا صقرتها زين
تخبر اللي العام وش سوت .. مادري شفت لها هدد ولا لا اللي ماتت مع الرجال ؟
الله يرزقك باللي تبي عالعموم

[الشلاعي]

أجل تبي تجاكرنا
خذ من حدا الفروخ اللي عندنا ياخي أظمن قرنسه وفعل ان شاء الله مظمون اذا صقرتها زين
تخبر اللي العام وش سوت .. مادري شفت لها هدد ولا لا اللي ماتت مع الرجال ؟
الله يرزقك باللي تبي عالعموم


ياهلا والله وغلا يالله حيه
هههههههههههه ابي اجاكركم والحق عليكم والله الجبليات صقرتهن حليلات لاكن لامني جيت عند الصقارين ولا كلهم طيورهم حرار وبحريات هههههههههههه بهاللحضه كأني صاقر لي بشبوط هههه


ما اعرفها اللي تتكلم عنها او رايحه من بالي

عالعموم ماقصرت على النصيحه والمرور

[الشلاعي]

????????????????????????????

[راعي قزاز]

السلام الشلاعي مساك الله بالخير شف من ناحيت البحريه افضل الشواهين :good2: طبعن بالسرعه وصمولتها على فريستها بس تعذبك بالقرنسه :( هذا عيبه الوحيد اما اذا تبي غيره احسلك تطلع بساع مع الطيور وتراء البحريه انا عندي وحده والله والله رافعه راسي ماتخيبني لوتجيب اي حمام انه غير تجيبه لو للغيم وعلى فكره قلبه قوي ماتهاب شيء وان شاء الله تلقالك الطيره الطيبه ~~اذا ناويلك احد تبي تلحق ولاتتحدى عليك بالبحريه ههههههههههههههه





{ . . . :) وبالتوفيق إن شاء الله . . . }

. . . أخوكـ احمد . . . :)

[الشلاعي]

هلا والله بأحمد حياك الله ...... كلامك على العين والراس وهذا انت قلتها مشكلتها القرنسه ... اي والله اني ناوي ناس واجد هههههههههههه والله يوفقنا باللي تنومسنا

وشكرآ لك على المرور والرد

[بو عبدالله 11]

ما شاءالله الاخوان خبره وافادونا كلنا

الله يرزقك بالطير اللي يسر خاطرك


بس وش الحل مع تأخير القرنسه ؟؟ مالها حل يعني ؟

[الشلاعي]

بو عبد الله جزاك الله خير

وان شاء الله يفيدونك الاخوان

[راعي الطييب]

السلام عليكم ورحمه الله وبركاته


معروفه البحريه افضل من الجبليه

البحريه اصيد من الجبليه حسب تجربتي والطير توافيق من رب العباد

والجبليه افضل من البحريه بالقرنسه فقط بنظري وتجربتي

ياطويل العمر بقولك سالفه وماهو شرط تكون دليل

وقت القنص قانصين في الدبدبه

فاكين براقع الطيور منها احرار وشياهين وجيرهـ
بينهم شيهانه بحريه طولها 14 *14.50 جلسه تكفخ تكفخ قال راعيه يجماعه الطير يشوف شيء

قلنا لا مايشوف شيء لو يشوف كل الطيور شافت مثله

مسكنا طير طير رفعناه مايكفخ راكد

مسكنا الشيهانه ورفعناها الا تكفخ وتصيح تشوف لها شيء وفكر راعيها سبوقها وحطها وكرها الا كفخت وارتفعت ونزلت بسرعه ورحنا لها الا هي ذابحه قرطه ( قطوه البر ) هذي البحريه والطيور مجوعينها كلها وقت قنص وصيد

ماهد الا هي وهذا ماهو دليل

واسف على الاطال تحياتي لك وللجميع

[الشلاعي]

وعليكم السلام . حياك الله ياصقار الحباري < اسمك غريب ههه

هذا انت قلتها مشكلتها ماتقرنس

شكرا لك على السالفه والمرور

[سيف الهواء]

معسف العاصي علمك بالعلم الاكيد بس انت .....؟

[باترول هدد]

ياشلاعي مسيت بالخير

دور لك جبليه مصقوره ومشرطه بالحمام والكروان والقرنسه بدري وشتره ولا تحسف بعد توفيق الله

عندي لي شيهانه مقاسه صغير لكن ماشاء الله تبارك الله مايطير طيرها

وياويل الكروان لو يرف جناحه ههههههههههههههه

[الشلاعي]

معسف العاصي علمك بالعلم الاكيد بس انت .....؟
انت تروح وترجع على الموضوع ؟ هههههههههه بأذن الله لاشتري الطير اللي يخليك تكره طيرك وخطير تذبحه هههههههههههههههه

[الشلاعي]

ياشلاعي مسيت بالخير

دور لك جبليه مصقوره ومشرطه بالحمام والكروان والقرنسه بدري وشتره ولا تحسف بعد توفيق الله

عندي لي شيهانه مقاسه صغير لكن ماشاء الله تبارك الله مايطير طيرها

وياويل الكروان لو يرف جناحه ههههههههههههههه

هلا بك ياباترول ومسيت بالنور


الجبليه ماني مشتهيها لو انها لاشافها الكروان جاه اغماء ههههههههههه وعسى الله يبارك لك بطيرتك

[ســـبــار ربــعـــه]

سلام عليكم.

شوف يا الغالي فيه مصري توه جاي من الحج. واستقبلوه ربعه وجماعته وكلن يقول حياك الله يا حاق فلان.
بعد ماشربو الشربات واكلو الكوارع والفسيخ والكشري وشربو شاي في الخمسينه.
قال له واحد منهم عايزينك تتكلم عن الحج والمناسك بتاعته قال لهم: دنا حقيبها ليكم من الأخر, الي عاوز يحج يروح مكه.

واستنادا على الروايه الممله الي فوق اقول لك.
لو عاوز طير انتظر لين وقت النقله واشتر فارسيه جبليه جبعا عرضها اكثر من طولها وحش ولا تشره الا على صقارتك. واما كلام ابن قنور فهو ميه ميه ومن يومي ورع وانا اسمعه.
الله يوفقك بالطير الطيب.

[الشلاعي]

سلام عليكم.



شوف يا الغالي فيه مصري توه جاي من الحج. واستقبلوه ربعه وجماعته وكلن يقول حياك الله يا حاق فلان.
بعد ماشربو الشربات واكلو الكوارع والفسيخ والكشري وشربو شاي في الخمسينه.
قال له واحد منهم عايزينك تتكلم عن الحج والمناسك بتاعته قال لهم: دنا حقيبها ليكم من الأخر, الي عاوز يحج يروح مكه.


واستنادا على الروايه الممله الي فوق اقول لك.
لو عاوز طير انتظر لين وقت النقله واشتر فارسيه جبليه جبعا عرضها اكثر من طولها وحش ولا تشره الا على صقارتك. واما كلام ابن قنور فهو ميه ميه ومن يومي ورع وانا اسمعه.

الله يوفقك بالطير الطيب.

هههههههههههههههههه هلا هلا بالدبلوماسي يالله حيه حلوه القصه بس ترا نسيت الطعميه ههههههههه

ماقصرت يالامير لكن الطيور اختلط حابلها بنابلها وماندري وش الوحش الاصلي من التقليد هههه

شكرا لك

[ســـبــار ربــعـــه]

هههههههههههههههههه هلا هلا بالدبلوماسي يالله حيه حلوه القصه بس ترا نسيت الطعميه ههههههههه

ماقصرت يالامير لكن الطيور اختلط حابلها بنابلها وماندري وش الوحش الاصلي من التقليد هههه

شكرا لك

توكل على الله وعينك ماتغشك بأذن واحد احد.
وانا حاضر وسؤالي هل مستشفى الطيور يقدر يطلع التفريخ من الاصيل عن طريق الفحص؟؟

[الشلاعي]

توكل على الله وعينك ماتغشك بأذن واحد احد.
وانا حاضر وسؤالي هل مستشفى الطيور يقدر يطلع التفريخ من الاصيل عن طريق الفحص؟؟
ونعم بالله ....... والله علمي علمك اذا المستشفى يطلع التفريخ من الاصيل او لا ياليت اللي عنده علم يفيدنا
ولا هنت ياسبار ربعة

[تميم2222]

ونعم بالله ....... والله علمي علمك اذا المستشفى يطلع التفريخ من الاصيل او لا ياليت اللي عنده علم يفيدنا
ولا هنت ياسبار ربعة
محد يقدر يطلع التفريخ من الاصيل ....خصوصا الشبات اللي تدخل غير نظاميه اللي تجي من قطر وغيره... قالو انه توجد شريحه وبعد البحث اتضح انه لايوجد شريحه ولا شي .... خبره الصقار بهالمجال .. هي اللي تحدد انه تفريخ او اصيل......تقبل مروري

[الشلاعي]

تميم2222

شكرا لك على الافاده