فزعتكم نبي العلاج بعد الله سبحانه

[مولع بالطير]

السلام عليكم ورحمة الله وبركاته كلن بسمه اخواني رواد المنتدي الشامح اصبح ومسي عليكم بالخير
اخواني مابي اطول عليكم عندي خلفه فيها انتفاخ بديوسها وبرجولهاا من قل المشي ونا رجال حاطها لي اكثر من 3 اشهور ماقدر افكها لاهي ولا الي معها ابي علاج انا وعوذ بالله من كلمت انا جربت الدهون والابر ابي شي مجرب ونافع لو اسويلها كورس لان بنتها قصرت بسبت الوريم مافيها لبن والخلفه مضربهااا وان شالله انها لقحة عشان كذا ابي شي مايضرها وتفيخ وسلامتكم والعذر من الله ثم منكم اذا طولت عليكم :(:(:( وسلامتكم

[ابو الشبرميات]

وعليكم السلام ورحمة الله وبركاته
اخوي مولع بالطير
الناقة ما تنحبس الله يجزاك خير
وشولون تبي علاج وانت منتب مخليها تمشي
3/4 العلاج بالمشي

عموماً هذا يسمونه الخباش او وريم الديس
واذا زادت قوته نزل على الرجلين وهذا اللي صار لناقتك
وهو خطر على المطية لانه ممكن يعطب شطورها واذا عاب الديد ما عاد للناقة فايدة الا ان كانها بطن وتبيها تنتج فقط
العلاج بالمشي وهو الاهم وبالابر والدهون والماء البارد ترش به الديد
ولازم تخلي الديد من الحليب باستمرار واذا انت مضربها ولاقحة
غرزها وارتح من الحليب والوريم معه
...

[مولع بالطير]

الله يجزاك خير دوامي مبهذلني خلها ع ربك ولا اول افكهم من صلاة الفجر ولاردهم الا المغرب لاكن الله يقسم الرزق وجزاك الله خير وابي تفيدوني ماعليكم امر الهيام وشلون اعرفه وش الابره الزينه لها

[ابو الشبرميات]

الهيام الله يعيذنا منه واياك وكل مسلم
يصيب الناقة وريم في نحرها وليونة قوية كانه سفنج
وتورم ديودها ورجولها وتلقى العِرق اللي بجنبها وارم بقوة وكبير مرة من النحر لين الديد
وتصير ما تاكل زين وينسل حالها شوي شوي
العلاج ابرة فرنسية والا هندية والافضل الفرنسية
واذا اكتشفته بدري وعالجته تبرى باذن الله
واذا تمكن من الناقة فحظك نصيبك وغالباً تموت المطية منه
...

[كليب1]

اخوي ابو الشبرميات بيض الله وجهك وجزاك الله خير

والله اني متابع ردودك على اخوي مولع بالطير
عزالله انك نصحته وماخليت شي

زد على ذلك ابرة وريم تلقاها عند البيطري وخل عطية الله تمشي لازم تمشي والا تراها بتمرض هذه نصيحة اخو
وناقتك مافيها هيام الهيام اول ما يبدا انتفاخ امام الديد وآخرها انتفاخ في النحر ويسمى الجرجور ويصعب علاجه

الله لايهينكم وأتمنى اني اضفت على رد اخوي ابوالشبرميات

[سلمان القريني]

السلام عليكم علاج الوريم 1ـتغسل خلوف النا قة بماء بارد +ملح
2ـ تدهنه بدهون يباع عند البيطري دهون فكس
3ـبعد الغسل والدهون شملها عشان ما يكشها الهوا
4ـحاول تغير مرا حها او تغير التراب الموجود بالحوش +لازم انك تفك النا قة تمشي لو ساعة وحدة باليوم
بعدين اخوي نصيحة انتبه من الابر

[صيادالجبيل]

علاج الخباش المشي غيرة لاتدورعلاجات لأن اكثرالعلاج الي عند البيطري ممكن يضر الناقة واذا مشت الناقة راح الخباش من الديدومن الرجلين ولاتحسب فيها هيام ولاغيرة انتفخت الديود والرجلين من السجن وتلقا شبكها صغير بعد ماتقدر تمشي الناقة فيه مسافة وبصراحة اسأل مجرب لو تخليها تمشي من اليوم لمدة ساعة او ساعة ونصف وترجعها بتلاحظهابعد ثلاثة ايام قدراح شئ كثير من الانتفاخ وانت خلها تمشئ ولاحظ بعد ثلاثة ايام او اقل ولاكن ضروري تمشيهاواذا كان الحوش قديم حاول تغيرة ولاتجيب رمل نظيف واجدوتدفن بة محل القديم.وبالتوفيق.

[بازار شريف]

بسم الله الرحمن الرحيم
ناقتك انشالله ماعليها خلاف يمكن من الطعام اللي تعطيها احيانا
الرودس يسبب وريم للقحه لانه يحتوي على ملوحه شوي زايده
احيانا من الشوار (النخاله) اذا كانك تطعم من هالنوعين اقطعه وشوف اضف على ذلك
عطشها يوم واعطيها ثوم معصور في الماء وخلها تشربه والمشي زين على كل الاحوال وابشر بالخير من الله..

[free world]

حياك اخوي
حذاري من علاجات البياطره اطلق الناقه وبتشوف خير باذن الله لمدة ثلاثة ايام وان كان ما راح ابعطيك العلاج

[مولع بالطير]

اخواني الله يجزاكم خير ولايريكم مكروه انتم والمسلمين اجمعين
عطيتها الابره الهنديه اليوم العصر بس اشوف الناقه بعد الابره كل شوي تمرغ وبدت تعرق ويالله تشيل روحها هل هاذا شي طبيعي وخف الورم شي ملحووض وان شاء الله خير

[ابو الشبرميات]

إبرة الهيام حارة مرة
ويمكن أنكم وافقتوا عصب والا عظم
وهذا اللي خلاها تمرّغ
الوضع طبيعي بإذن الله
الله يشفيها ويرزقك منها مايسرك ويغنيك
...

[تربة الشمال]

اخي الحبيب الابل علاجها المشي خلها تمشي ونشاء الله تشوف الفرق

[جابر نت]

اخي العزيز علاج الناقة من الوريم وهي محجوزة بالشبك بعد الله الماء المالح (ماء + ملح) ودهون من الصيدلية لونه بني داكن وهذا انا مجربة