هل يجوز منع البعير؟؟؟؟؟

[سليمان1111]

السلام عليكم عندي سوال ودئما اسمعه في المجالس يقولون هل صاحب الفحل اذا منع تضريب البعير لناس هل يجوز له
او لا

يعني انا بجنبه ورحت لمه وقلتله عندي الناقه ابضربه من البعير ومنعني هل يجوز يمنعني من بول البعير ولا لا
لانه في ناس يقلون يجوز وناس تقول لاميجوز وانا مااااااااااادري ليتكم تفدوني

ارجو الرد سريع

[محمد الظاهري]

حياك الله
اولا .الي يمنع الفحل عن الناس اولا هاذا حلاله
واذا تردا على نفسه
اما الرجال الي يفتح للناس حلاله هاذا فيه البركه وكسب اعظم شي وهو الاجر
حتى الناس يترزقون من انتاج الفحل
وكسب قولت فلان والنعم

[سليمان1111]

الله يجزاك خير يامشرفنا

[أبوعابد 22]

سمعة انت انه حرام بس تأكد وانا واخوك

[بازار شريف]

هذا ياخوي الماعون والماعون مايمنع الا عند الردي
بعدين ذكرت بسؤالك ضراب البعير وبول البعير

[سليمان1111]

قصدي ضراب البعير فيه ناس تسميه بول البعير

[salem63200]

في هذه الأيام يقوم بعض ملاك الإبل بتأجير الفحل المميز لتلقيح النوق، فما حكم ذلك؟
ج:لا يجوز أخذ الأجرة على التلقيح لأنه"صلى الله عليه وسلم نهى عن بيع عسب[ماء]الفحل"البخاري
فإن أعطي صاحب الفحل إكرامية من غير شرط فلا بأس[ينظر:اللجنة الدائمة15/74]
ويستحب إعارة الفحل لذلك مجانا، وقد أخبر صلى الله عليه وسلم أن من حق الإبل(إطراق فحلها)

المصدر
جوال زاد
بإشراف الشيخ محمد صالح المنجد
للاشتراك ارسل رسالة فارغة إلى 80600

[قلب ذيب]

حياك الله .
لايجوز منع البعير الاعن الناقه الجربا او الناقه اللي ميت ولدها ولم تكمل العده .
لكن الفحول المشهوره واللي يتزاحم عليها الناس مثل الوافي وخشبان يقوم اصحابها بتنظيم الاضراب عليها
حتى لايتدافع الناس ويتشاكلون , ويتم ترييح الفحل لكثرة الابل اللي تساق عليه .

[كليب1]

منع البعير عن المسلمين في الدين وعند العرب حرام وعيب

لاهنت على الموضوع

[ابو الشبرميات]

هو صحيح انه حلاله
وحر في تصرفه ولا احد يجبره
يعطيه احد او يمنعه
لكن منع البعير في نظري
يرجع للعرف والعادات والتقاليد
ومن عادات العرب
الكرم والفزعة والنخوة والشهامة
ومنع الرجال بعيره من الضراب للناس
يدل على دناءة النفس والبخل والحسد والانانية



انا خابر رجال عنده بعير طيب بالحيل
المهم انه ما يخلي احد يضربه
وجاه واحد اقشر وتهاوش مع العمال
وقال اني ابضرب البعير منعوه وقال ابضرب غصب
اتصلوا العمال على راعيه ورفض طلبه
قال ان كانكم منعتوني وحرمتوني من ضرابه
الله يحرمكم منه ولايجزاكم خير ولايكثر خيركم
يوم اصبحوا العمال من بكرة وهم يفكونه
وهو يتناوش هاك البكرة السمين النشيطة ويطرحها ويبرك عليها
يوم انه جاء يتواسا عليها وهي تثور به
والاه يوم نهض اختل توازنه وهو يطيح على وجهه
والا يده منكسره ويجيبون البياطرة
ويعالجونوه ويبونه لكن ربي حرمهم منه
وياخذون لهم كم يوم والاهم ساحبينه ميت في الحزم
الله لايبلانا ولا اياكم ولا يضرنا ولايضر بنا
...

[سليمان1111]

الله يجزاكم خير على الردود

[تربة الشمال]

ياخي بالنسبه الحلال الاحرام الله واعلم لاكن في عادة البدو يعتبر منع البعير عيب عند اهل الباديه

[سليمان1111]

الله يجزاكم خير على الردود

[أبو عبدو]

صحيح انه حلاله
ولكن ان منع فهو لئيم

[w9l]

السلام عليكم ورحمة الله وبركاته ...

سؤال جميل واتمنى منكم سعة الصدر والقراءه بروية وتمعن .. وبالنهايه هي وجهة نظر بين الصواب والخطأ لا اعلم لأي كفه تميل

وفالبدايه ماراح اتكلم ان كان الموضوع حلال او حرام اقول الله اعلم

ولكن بقول رأيي الشخصي بالموضوع . اولا بما اني شخص عادي على قد حالي اتمنى ان محد يردني اذا جيت اضرب من بعير شخص ما .... واكيد بيحز بنفسي اذا منعني .. واتمنى يجيني انتاج طيب من البعارين الطيبه اترزق الله منها هذي متأكد محد معارضني فيها :D

طيب خلنا نشطح شوي ونقول انت ياللي تقرأ الموضوع لو عندك فكسار توك فاكه من الوكاله وش زيييينه ماخذه ب 300 الف لو يجي ولدك اللي هو ولدك ويبي يروح عليه مثلا هو واخوياه يتمشون ويشخصون فيه بالعررربي وهو عنده سياره طبعا بس انها نقوووووول كامري موديل 2003 وش ردك ( بأمانه )

اللي بقوله ان الحلال غالي عند راعيه هذا شي والشي الثاني محد ينلام في حلااااله على فكره
وتراني ضربت مثل سياره بقيمة 300 الف وهي حديد يعني ... فما بالك بعير وقيمته ملاااايين الريالات

وهذا كله بكووووووووم وبعض اقوووول بعض الناس اللي تجي تضرب تقوووول بعير ابوه وبعضهم يوجع البعير وبعضهم يتغااااااافلك ويضربه ابره بلاااااااوي يارجل

واااااااااااااااااخرتهااااااا بووووووووووول بعير ((( منتك بالتراب يعني ))) طيب اسألكم بالله هذا مايغثك انت ياراعي الفحل ؟؟؟؟؟ وتراني سمعت معلومه الله اعلم بصحتها انه كثرة الضراب للبعير مهب زينه .....

وبعدين ياجماعه اسألكم بالله من من البدوان اللي مايقدر يشتري بعير ؟؟؟؟ كلن يقدر ( اقصد عشان ماتحيل ابله ) مو شرط يكون ضغط عااالي يعني . او قعود ويصبر عليه
ولكن مشكلة (البعض) للأسف الشديد هي الشفااااااااح الله يكفينا شر الشفاح وعدم الرضا بما قسمه الله لنا من رزق ...

انا شخصيا شاهدت حالتين بنفسي عند اشخاص مشهورين وعندهم فحوووول طيبه على مستوى ..... واحد يبي يفتك من غثا العالم رااااااح مكااااااااااان بعيييييييييد محد يقدر يووووووووووصله الا عشره من بين 1000 هذي وش معناتها ؟؟؟؟؟ اكيد انه منغث من الموضوع بس شافله تصريفه محد يقدر يلومه فيها

والثااااااااني شراله بعير منتج يقيمة 700 او 800 الف وحاطه للضرااااب جب ابلك وامسك سرا ابد مايرد احد ...... ماسلم من الناس لاااااااااا مانبي ذا نبي الثااااااااااني اللي فاكه فأبلك ههههههههههههههه يعني ياجماعه تراها شغله ووجع راس ورب الكعبه
وبعض الناااااااس الله يهدينا وياهم ابد عند وجهك بالمشاااااريه اخذ ولد .... ويمكن لو يجيه واحد يبي منه سلف 10 الاف ماعطااااه وتعذر وهو سلف ماهو عطا

خلاصة الموضوع ...... ياحلو غناة النفس ويازين وضع الامور في ميزانها الحقيقي
اللي تجمل فيني فهو صاحب فضل ومعروف وبدعيله ... واللي منع نقول الله يباركله في حلاااااله والرزق على الله مهب على يده ولا على يد غيره

خاتمه بسيطه وفيها حكمه .... لله في خلقه شؤؤن . لو كل الابل زينه ؟؟؟ لو كل الناس عندهم ملايين ؟؟؟ لو كل السيارات مرسيدس ؟؟؟ لو كل الناس مدراء ؟؟؟
لاتعترض على حكمه الله وارضى بما قسمه الله لك انتهى :D

[wafi6556]

انا راعي حلال...غنم وليست ابل
والصحيح اني مستغرب راعي الحلال سواءً غنم بل ليش مايشتري فحل لحلاله ويعز نفسه

طيب لو فلان من الناس شاري فحل بذاك الكلام
وش سبب شراءه
تميز
مزايين
ولا ليش يدفع المبلغ الفلاني
واجي انا وآخذ خلاصة تعب الرجل
عن نفسي ما ارضاها وولله ما اطلب واحد فحله لو ابيع الحلال
الا كان الرجال امون عليه واعرف انه يفرح بخدمتي وجميله مقدور ولا غيرها لا ولله
مجرد رأي

[mike2k]

W91 كلام سليم

[Saud 2002]

الله يعين

كلن بعقله راضي والناس احرار فيما تملك

[عبدالله الموسي]

حلاله وحرامه على صاحبه
وانت مالك الا طيبة النفس
اذا عطاك خير وبركه وان ماعطاك حقه وهو حر
واكيد عذره معه
يمكن لك في رفضه خيره
يمكن ربي بيرزقك بعير أفضل من بعيره
فلاتزعل ولاشي وماعليك الا ان تحمد رب العالمين