ودك يجيك فرخ حر طيب وتبدا من الصفر ...... ولكن

[جلاد الحباري]

في مخيلتي اني اصقر لي طير فرخ واعلمه بطريقتي الخاصة وفي ذمتي مايشوف الا الملواح ويكون هذا عشاه وهذا يحفظ الطير من الخراب ولا جى اخر الوقت وقبل الربطة نجرب فيه على التكاية ونركده ونعلمه على حبارى ونهده من التكاية عليها في حال انه ركد ولا يشوف الحمامه بعينه هذي ياجماعه افضل صقاره للطير وهي صقارة الشيبان الاولين واللي ردني من هالموضوع كله سبب كبير هو قلة الحبارى وقلة الخويا اللي يعزلون ماصدقوا انهم يلقونها ويهدون تبيهم يعزلون اتمنى من الجميع يدلي بدلوه وناخذ رايكم في كلامي

[عواد الشمري2]

الله يعطيك العافيه على الموضوع الطيب
وبنسبه للصقاره الصقاره بحر كل يوم تعرف شين جديد وتختلف الصقاره من شخص للشخص مثل عندك الي مايهده على حمام ومثل الي مايهده على ارنب فاء تختلف من واحد للواحد
والطير بعد تختلف فيه الطير المزاجي وهذا الي يغثك وفيه الطير الي ينكار بساع وفيه الطير النزر وووو
وحتى الصقار يختلف من واحد للواحد فيه الي مابه صبر على الطير ووو
وونبي نشوف راي الربع وشو

[ســـبــار ربــعـــه]

الصبر الصبر الصبر اهم شي في الصقاره سواءا تبي ملواح ولا حمام ولا تسبير على حبش. واغلب المشاكل الي تصير هي اما صنعه او شبيكا او ملع او ضعف او وحاشه والصبر يجنبك الأمور هذي والطير بريء من بعض مايتعرض له فالبلا من صقاره واغلب الطيور الي تفشل العامل الرئيسي في فشلها هو الي صقروها...
فالطير يهاجر ويقطع البحور ويواجه انواع الصيد وينازل الأجوال في الطبيعه ولكن هناك عوامل مشتركه في العلاقه بين الأنسان والطير اذا تحققت نجح واذا فشلت فمردودها على الطير نفسه.
ترا ماني فاهم اي شي من كلامي بس حبيت اشارك ههههههههههههههههههههههههه.
تحياتي.

[بحر الخليج]

الحمااااااااااام يخرب طلع الطير ويخرب ركادته ومشكور على الموضوع .

[ابوماجد6641]

كلامك طيب اخوي جلاد الحباري ولا عليه اغبار ابد ولكن تركيد الطير خله بعد صيد الحبارى. ووره الصيده الكبيره مثل الحبش والفزنت والرومي الصغير حتى الكروان لا تهده عليه’ وجعلك ان شاء الله تلقى حبارى ويهد فصيل ان شاء الله قل امين

[خالد العطااوي]

الله يعطيك العافيه على الموضوع الطيب
وبنسبه للصقاره الصقاره بحر كل يوم تعرف شين جديد وتختلف الصقاره من شخص للشخص مثل عندك الي مايهده على حمام ومثل الي مايهده على ارنب فاء تختلف من واحد للواحد
والطير بعد تختلف فيه الطير المزاجي وهذا الي يغثك وفيه الطير الي ينكار بساع وفيه الطير النزر وووو
وحتى الصقار يختلف من واحد للواحد فيه الي مابه صبر على الطير ووو
وونبي نشوف راي الربع وشو

انا مع عواد الشمري كلالالالالالامك بالصميم ...

[فيصل الذيب]

يعطيك العافيه

الطيب طيب لونك تهده صبح وعصر على الحمام

بس افضل يتعود الطير على الملواح على بداياته ولايتعود انك تسحب الصيده منه
عشان يسلم من الكوشه ونقل العلف اما بالنسبه للحمام الطير الي مايلحق الحمام ذالزمان
مايجيب قيمه لكن ان كل صقار يبي يعرف جناح طيره عشان لياراح من عنده وصار فارط بالحمام
بينقال عنه غشيم وراح الطيب من عنده

لكن الطيور الطيبه طيبه لونك تهدله اعبر الحمام يوميا وهاذي لها قصص واجد

مثل شاهينن عندي الحمام تموت به بس ليا شافت الكروان دخل البلاد ماتعاين بالحمام
وحتى اذا ماشافته نعلق الهرن وهي مع الموتر تدور الكروان لينهاا تعودت اذا دقيت هرن فهو كروان دايركت
والحبارى صادت فصيل


وهي يوميا حمام يعني الطير وطيبه وطبوعه الي صقر عليها مظبوط ولا يخرب

[جلاد الحباري]

اشكر االجميع على المشاركة وفيتو وكفيتو وانا شاكر وقدر مروركم جميعا تاج راسي كلكم

[أحمد الشمري1]

تساؤلات اخوي جلاد الحباري في نفسي , سألت شيباننا الصقارة عن صقارة الوحش وتدريبة على الملواح ( ملواح حباري ) وهل ادربة على الحمام واهده , وكلن له وجهة نظر , احدن قال ان هدت الطير على الحمام تجرد الطير وتطلق جنحانه , واحدن قال تخرب طبوعه وليا هديته بكرا على الحباري ذل منها ما يبي غير الحمام , واحدن قال اللي طيره ما يلحق الحمام يحلم بالكراوين والحباري.

فارى ان اخذ بكلام الكل .
اعود طيري على الملواح واخليه يلاعبه اكثر من مره بالاسبوع واهده على الحمام اكثر من يوم في الاسبوع .


تقبل تحياتي.

[قلب ذيب]

ارحب ياجلاد الحباري .
احييك واحي طرحك الجزل وموضوعك المفيد وتواصلك الصادق .
ومرحبا باخواني وابنائي الصقارين .
.. أكيد ان كل منا له تجاربه ولو القليله لكنه استنتج منها الكثير من العوامل التي يعقتد بصحتها , اليوم كثروا نقالة الطير , ومدورة الطرائد , ومصافحين الصحاري لاشباع رغبتهم في ممارسة المقناص والوناسه ومعرفة حقيقة الرفاق ومن هنا نستطيع ان نقول ان هناك اطر عامه تحكم التعامل مع الطير واعداده للمقناص . في عجاله نوع الطير ونوع المقناص عاملان اساسيان في اعداد الطير , اذا كان الصقار بيقنص ديرة حباري وطيره من النوع الجيد الغالي فلابد ان يبتعد عن الحمام والتعامل معه , ويعلم طيره على الملواح والحباري الحيه ان وجدت وما يشابهها , اما اذا كان الطير وسط والمنقاص دوجه والحبارى قليله فلاباس ان يستانس بهدد الحمام والمعاياه مع ربعه حول ذلك الهدد .
... بعض الطيور اللي تعلم على الحمام والكراوين تكسل ولاترغب الطرائد الكبيره و دايما عينها على الحمام وما في شاكلته وتقول في قرارة نفسها مالي ومال الحبارى ! ابغي الحمامه صغيره وحلوه وبابعد بها وباتعشاها !
.. شفت بعض القنوص اللي ناوين العراق وما شاببه مايهدون طيورهم ابدا على الحمام وعلى حتى على الكراوين , وعند سؤالهم يقولون الحمامه تخرب الطير ( خاصه الشيهان ) وتعلمه على الرباده ( الكسل )!؟
اجل يا اعزائي ( كل يقول وكوكب الشعر مانات ) وللناس في تصرفاتهم شئوون . تقبلوا تقديري .

[(هزاع)]

لاعودت طيرك على الحمام
افطن لشبك الحمام لاقنصت لاتنساه
الملواح هو ادات الصقار المحترف
ولاباس بحمامه كل ماخذت فتره
وابتوفيق

[راعي - عديم]

مساكم الله بالخير جميع وأشكرك أخوي ع الموضوع الطيب

أكيد الهدد ع الحمام يجرد الطير ويطلقه ويعطيه لياقه تامه

والأولين ماخلو للتالين شي

لاكن الشلو هو صقارة شيبانا واللي تعلمنا عليه

وذلك لأسباب

1- أذاكان الطير وحش أكيد ماراح تدعيه ألا بشلو
2- أذا طلع طيرك وهديته وضيع طلعه ماراح تجذبه ألا بشلو
3- أذا حصل لك مهد ع حبارى أوغيره ولاسمح الله طرح طيرك ماراح تدعيه ألا يشلو لأن الحمام يخرب طبع الطير
ولاجا نهار وشافت العين العين قامت برقى جناح تقلب يمكن مايطلبها لأنه تعود على حاجه صغيره ألا وهو الحمام
وأسمحلي أخي الفاضل ع الأطاله وكلن وحسب عرفه وماتعلم عليه
وتقبل مروري