قصيدة البر

[عين هداج]

السلام عليكم اقدم لكم هذه القصيده المتواضعه عن البر وارجوا ان تنال على رضاكم واستحسانكم اخوكم / عين هداج



لا رحت أنا للبر قفلت جوالي=أبعد عن الإرسال وأبعد عن الديره
أسج نفسي مع فجوج الخلاء الخالي=وحفظي على اللي مكون الكون ومديره
يا بو سعد يالقرم يا طيب الفالي=شد العزم يا صاحب الراي والشيره
قم زهب العزبه وانا اجيك في الحالي=من فوق جيب تعجبنك مواطيره
نيسان باثفندر على الكيف يبرالي=يطربك لا وقف ويطربك في سيره
وارد من اليابان وجبناه بالغالي=يا سعد منهو يركب الباث ويديره
لامن وصلنا فيضه عرقها سالي=زان الربيع وفتحت لك نواويره
هات الحطب ثم اشعم النار طوالي=ونزل دلالك ثم زد البن تبهيره
وانشد طواريق تسلي لوعه البالي=وتقرب اللي قد غدت به مشاويره
واسكب لنا من دلة الكيف فنجالي= يشفي عماس اللي من الهم في حيره
يالله يالمعبود يا ربنا الوالي=تغفر لعبدك كل ذنبه وتقصيره
وختامها صلوا على المبعوث والآلي= وعداد من صلى وكبر بتكبيره


هذي القصيده كتبتها قبل ما يجي 6 سنوات اول ما شريت الباثفندر وفرحت به :D

[يوسف الخليفة1]

وعليكم السلام ورحمة الله وبركاته

حياك الله أخي العزيز عبن هداج

[نديم المجره]

صح لسانك
والقصيده غير موزونه في بعض ابياتها
فربما سبب ذلك اختلاف طريقة نطق الكلمات
حيث ان اغلب الكلمات تكتب بطريقه واحده وتنطق بعدت طرق حسب المناطق الجغرافيه والقبليه
دامت لك المسرات
تحياتي

[عين هداج]

اخوي يوسف لا هنت على المرور الطيب وبيض الله وجهك

[عين هداج]

اخوي نديم المجره لاهنت على المرور الطيب ونقد في محل الاعتبار ولا هنت

[مكرم الضيف]

صح لسانك شاعر متمكن وقصيده جزله

لاتحرمنا جديدك

اخوك

ابو نادر

[عين هداج]

مرحبتين والله يا ابو نادر صح الله بدنك ولا هنت على المرور الطيب