نتيجة فحص الكمبيوتر للفتك...

[فتك08]

السلام عليكم

يالربع أنا ولعت لمبة تشيك انجن للفتك و سويت فحص كمبيوتر و كانت النتيجة...

1-الكويلات 2-البخاخات 3-منظم الهواء 4-حساس الشكمان

طبعا كنت مغير البنزين من95 الى 91

فما أدري هل الكويلات تبدل كاملة أم إن الخلل راح يكون في واحد منها أو جزء منها...

بالنسبة للبخاخات أكيد تنظيف...

لكن منظم الهواء هل يتنظف أم لا زم يتبدل

طبعا سعر الكويلات لدى الحمراني1700

و سعر منظم الهواء 2200

فأتمنى الإفادة و شكرا

[ms662]

لا تأخذ بكلامي وتأكد قبل هي معلومات قرأتها وسمعتها من ميكانيكيين
بالنسبه للكويلات العطلان منها يسبب تفتفه او نفظه في المكينه فالتغيير يكون للعطلان.
منظم الهواء اذا كنت تقصد حساس الهواء الي يجي بعد فلتر الهواء فسبق قرات لاحد الاخوان انه غير بحساس هواء باثفاندر موديل 2006 وسعره اقل على كلامه.
وقبل ماتشتري جرب تنظفه ببخاخ الكترونيات تطلع الحساس من مكانه وترش عليه من البخاخ هذا بدون ماتلمس شي داخله واتركه حتى ينشف وركبه وبرضه رش على الفيش شوي واتركه ينشف هذي طريقة تنظيفه

لكن تأكد من الاعطال كل الاشياء هذي يعني نظام الوقود والهواء والكهرب خربت مره وحدة

[ابوسند9]

اخوي فتك
اولا ليتك ذكرت موديل السياره وكم ماشيه
ثانيا بعد ما ولعة اللمبة هل اختلف علىيك؟ يعني تقطيع؟او تفتفه او ما شابه
ثالثا مو معقول كل ها الاشياء عطلانه او تعطلت فجاءه!
لكن لمبة المكينه لها اسباب واجد
وغالبا يكون فلتر الهواء متسخ فا انت جرب فك الفتر ونظفه بالهواء وانفخ حساس القربه وبعد ذالك افصل البطاريه شوي الموجب وبعدين جرب وقبل شهر احد الزملاء عنده نفس المشكله وطلع من الفلتر
اذا ما اتغير شي شوف فيه علبة فيوزات بجانب القربه وعددها خمسه فكها واحد واحد واطرقها طرق خفيف بمفك لانه احتمال وجود كربون عليها
كذالك شيك على خرطوش القربه الخارج للبخاخ لايكون فيه شق بسيط
اما استبدال البنزين من 95 الى 91 عادي وهو اصلا يتعبئ 91
اما الكويلات يتغير فقط العطلان ونادرا جدا تتعطل الكويلات وانا اتوقع لو كان من الكويلات كان فيه تقطيع ونفضه بالسياره
لكن انا اقول ابداء بالاسهل ولا تخسر نفسك اشياء وبالاخير يطلع السبب شي بسيط

[فتك08]

عافاكم الله على الإفادة

طبعا الموديل 2008 ماشي115000

طبعا بعد ماولعت اللمبة غيرت فلتر الهواء و فعلا كان متسخ.....و مافاد النفخ معه كان متشبع

بالأوساخ و قديم.....و بعدها فصلت البطارية و أعدت تركيبها و إختفت اللمبة لكن بعد يومين

رجعت و جربت مرة ثانية و رجعت كذلك....طبعا عداد الضغط يثبت على الشرطة الخامسة

و أحيانا بينها و بين الرابعة و كأن فيه تفتفة خفيفة غير محسوسة....

بالنسبة لحساس القربة؟؟وين مكانه؟؟

و اللي الطالع من القربة للبخاخ وين يكون؟؟

و مالمقصود بالقربة؟؟هل هي قربة الأديتر الأمامية أو الخلفية أو أنها قربة أخرى....

[فتك08]

بإذن الله بأجرب أفك الفيوزات الخمسة و أنفضها و بأعطيكم خبر....

[وبل نجد]

لايعقل ابدا ان تكون كل هذي خربت مره وحده
ولو خربت كلها كان ماتقدر تمشي بالسياره من التفته والنفظه
لكن نظف حساس الهواء بننظف الكترونيات والحساس يركب في الخرطوش اللي طالع من فلتر الهواء(القربه)وذاهب الى البخاخات هذا مكانه
وايضا شف الخرطوش نفسه لايكون منشق او تكون القفزان حقته غير مشدوده ومرتخيه فلابد تصلح هالشي
وايضا الكويلات لو احدها خربان تلاحظ بالسياره نفظه وتفتفه لكن اجعلها اخر شي ويغير العطلان فقط من دون الباقيات
وايضا لابد تغير صفاية البنزين حتى لو ان الخلل مو منها لاجل المحافظه ع سلامة البخاخات ونظافة. غرفة الاحتراق داخل البستم

واي خدمه انا حاظر

[فتك08]

لاهنت ياوبل نجد

طبعا البواجي مغيرها من الوكالة و كذلك صفاي البنزين....

لكن سؤالي أثناء تنظيف منظم الهوا هل أطلعه برا أو أرشه و هو في مكانه...

و ياليت إسم بخاخ التنظيف لاهنت؟؟

طبعا أذكر يوم من الأيام لقيت الخرطوش منفك ماكبس زين و كبسته...

و قد يكون خلال تلك الفترة دخل به أوساخ...

[وبل نجد]

اثناء تنظيف المنظم لابد تطلع من مكانه مع عدم نفخه بالهوا بس ترش عليه بالبخاخ فقط
اما اسمه فلاعلم لي لكن علبته زرقااء يباع عند محلات قطع الغيار قل لهم منظف حساسات
وان حصل تفك الخرطوش وتطلع برا وتشوف اذاً فيه شقوق. لازم تغيره وتنظف بالهوا اوتمسحه بقطعة قماش مبلول بالماء وتركبه من جديد وتشد على القفزان بقوه حتى تضمن عدم دخول التراب والوسخ
ايضا حساس الشكمان يفك وينظف مثل حساس الهوا×

[فتك08]

لاهنت يا وبل نجد على المساعدة

بإذن الله راح اخذ و أعمل بنصايحك...

طيب سؤال...وصلة الخرطوش المستقلة على حرفu طرفها اللي جهة السواق عليه سستة

شد دائرية دقيقة أما الطرف الاخر اللي جهة وجه الموتر ليس عليه قفيز أو سستة....

هل هو يجي كذا أم إنه ناقص لابد من قفيز؟؟؟

[فتك08]

بالنسبة لحساس الشكمان....وين مكانه؟؟؟

[ابوس11م]

السلام عليكم

اخوي الموتر اذا واقف في تفتفه يعني مو ثابت الضغط جرب شغله بسيطه اسحب فيش حساس الهوى شوف الموتر يصفا يصير صافي جربها مرتين

اذا طفى الموتر تكون مشكله ثانيه لكن اذا ماطفا الموتر الحيل بسيط شوف عندك حساس الهوى يكون متصل في شوته ووراه شوته سوده اصغر تكون عند صدر المكينه على طول متصله بالشوته اللي فيها حساس الهوي يمكن تكون مشلوخه ولا فيها تسريب هوى يعني فيها عيب تسبب الاشياء هذي اما اذا الكويل خربان الموتر يدخن دخان ابيض والموتر مايمشي بالمره
لكن اذا فيه نفضه وتفتفه اذا مشا هذي ميه الميه الشوته السوده الصغيره تلقاها من تحت منشقه وغالب ماتصير من حراره المكينه بالذات المواتر اللي عليها هدرزات او كان عليها هدرز

[فتك08]

أشكر الجميع على تفاعلهم و تقديم نصائحهم

و أبشركم إنحلت المشكلة بوقت لا يتجاوز 20 دقيقة و السبب بسيط جدا

طبعا جربت علبة الكتاوت الخمسة نفضتها و نضفتها و مافاد.....

بعدها نظفت الثروتل ببخاخ اي سي دلكو و نظفت ثلاجة المكينة و طلع بلاوي و تحسن

الموتر شي بسيط لا يذكر لكن لازالت لمبة تشيك انجن شغالة......

لكن اليوم فصلت اصبع البطارية السالب بعدها فيش الحساس بعدها فكيت حساس الهواء

و نفخته بالهواء و نظفته و كان عليه قطرات من المنظف و بقايا أتربة و مسحته مسح

خفيف براس المنديل و نفخت فلتر الهواء مع العلم بأنه جديد و نظفت لي القربة بمسحه

من الداخل و بعد التركيب شغلت السيارة و إختفت لمبة تشيك إنجن و أصبح إشتغال

المحرك صافي....طبعا لا أحد يقول إن فصلة البطارية تختفي معها اللمبة مؤقتا...

لأن اللي يخفي اللمبة أو يعيد البرمجة على قولتهم فصل البطارية و المفتاح في السلف

على وضع التشغيل.........