------ كيف تعرف ان الطير صايد الحبارى في القاع ---- ؟؟

[قلب ذيب]

السلام عليكم ورحمة الله وبركاته .
... تبعد الحبارى بالطير وتوقع له في القاع لكنه مايجيها يريدها طيار , تخب وتهرب وهو يناظرها , راعي الطير بعيد والقاع وعر مايوصل الطير الا قد راحت الحبارى !
... تكرار ذلك يزهق بالصقار ويعوفه الطير , ويقرر بيعه , مع ادراكه بأن المشتري لن يكتشف ذلك العيب الابعد مده , ويمكن ان تمتد تلك المده الى ان يعين المشتري حبارى ويهد عليها ... وبالتالي يكتشف عيب الطير ( الله يبلاه مايجيها في القاع ) !!؟
علشان كذا باعه ولاعلمني اشهدنه ماعنده ذمه !
طيب . . . كيف تعرف ان الطير مايجي الحبارى في القاع قبل ماتشتريه ؟؟
نسمع من الصقاقير .

[ذراع الذيب]

السلام عليكم ورحمة الله وبركاته..
صبحت بالخير ياقلب ذيب..


هلا بالكاتب الرائع يالله حيه بالنسبه لسؤالك اذا كان الطير في الربطه صعب احكم عليه..
ولاكن اذا كان خارج الربطه وابي اعرف وشلون هو يهد على الحباره بالقاع او لا احاول بقدر المستطاع اجيب له حباره آليه(مخيله) تسوي حركات الحباره تكوبر الخ..
لاكن السؤال هنا وين احصل الحباره الالكترونيه علشان اختبر الطير فيها :D والله يعطيك العافيه وبأنتظار ردك وردود الاخوان..
وتحياتي لكم..

[حامد الحنيني]

السلام عليكم ورحمة الله وبركاته

اتوقع والله العالم اذا لوحتله بملواح جنحان الحبارى

وقام ينش الملواح من بعيد لبعيد لو تحطه له بالارض مايدبسه

اتوقع اني ابكتشف انه رخمه .................
ويهاب الحبارى بالارض .

[زنااااح]

يامرحبا براعي الموضوع


اخي العزيز

من وجهت نضري
مستحيل تعرف ذالنقطه الين تشوف هدده في عينك

وحتا لو تجيب له حبارا معزوله ماهي بمقياس
حبارا الروض على ماقال فيها شعرت ذيب ماكل طير بيدبسها
الله من طير حبارا الكرتون ماتمغط كراعها ولا عينتها في الروض جاه حاقط باقط ؛)



الخلاصه موضوعك جميل ولاكن ماله حل ؛)))

[قرناس ثالث]

يامرحبا براعي الموضوع


اخي العزيز

من وجهت نضري
مستحيل تعرف ذالنقطه الين تشوف هدده في عينك

وحتا لو تجيب له حبارا معزوله ماهي بمقياس
حبارا الروض على ماقال فيها شعرت ذيب ماكل طير بيدبسها
الله من طير حبارا الكرتون ماتمغط كراعها ولا عينتها في الروض جاه حاقط باقط ؛)



الخلاصه موضوعك جميل ولاكن ماله حل ؛)))



كفيت ووفيت

هذا الي كان بقوله :good2:

[معسف العاصي]

اتوقع ان هالعيب ممكن يتعدل بالطير مع الوقت. لكن ميزه زينه شينه بعض الطيور مايدرا روحه يظرب بنفسه بأي شي وهذا الطيار زين له. وغالبا اذا الحبارى نزلت قبل الطير واخفته بتخمر ويجي راعيه يطيرها له لانها لو تبي الطيار ماطبحت. ومنكم نستفيد

[(هزاع)]

كلام اخوي زناااح %
ترجع لشجاعة الطير وتعلوم الصقار
اذا الطير ينقصه الشجاعه يقاصر
وكثر ماتحصل المسئله ذي عند بعض التفريخ مافارس الصيد بالخلا

[جير دبي]

هلا وغلا ياتحفة مكشات
ينعرف الطير يابوماجد اذا منكف من مقناص من اواخر ريش اذنب اذا صايد فى القاع ولا لا
وتكون في دلايل كثيره يعرفها الصقار بسهوله وفى نفس الوقت يصعب على الصقار التعرف على الطير الا بلهدد
وفي طيور تروح على الكسير ولكن من الروض تنكرها وهذا شفته عن تجربه .
وتسلم على الموضوع الطيب ..

[قلب ذيب]

الله حيهم .
ردود جزله وطيبه , وجهات نظر لها دلالاتها في المعرفه بالطير .
... لكن حن نقول طير لقيته في السوق ا و على الشبه , والا عند راعيه وقالك الطير صايد شروط , اشتريت الطير ودعيته يجي على الملواح , ولايخليها تمغط ظهرها طيار لكن من توقع ضايف وقع حذاها , هناك بعد كيلو
او أكثر , وهذي عادته . عاده عوفت راعيه الاولي فيه , ولاتكتشف الى ان تهده على حبارى .
فيه مواري فيه علامات فيه شي يدل على تلك العاده السئه قبل مشتراه ؟؟

[ســـبــار ربــعـــه]

ارحب يا ابو ماجد.

في الحقيقه ليس لدي ادنى فكره وقد واجهت مواقف عديده مع طيور بهذه الصفه.
لكن ابو عواد ما يقصر يطيرها ويوم يعلقها الطير الا منشق اديتر ولا تاير ولا جنط.هههههههه
تحياتي وفي انتظار ما لديك واظن ما كتبت الموضوع الا عندك طريقه.

تقبل تحياتي ولا تبطي علينا.

[عواد الشمري2]

الله يعطيك العافيه على الموضوع المفيد
هد له دجاج حبشي الي هو يقال له سندي يجي اربش وخيط على الدجاجه جنحان حباري وشف

[ربع خالي]

وعليك السلام ورحمة الله وبركاته

هلا يابو ماجد
بالنسبة لي ! لا والله مـا اعرف الطريقه اللي تخليني اعرف الـطـيـر اللي به هالعذروب
اعلن عجزي هههههه
تقبل مروري

[nassr_11]

وعليكم السلام ورحمة الله وبركاته سؤال محير يابو ماجد لاكن بنرمع مع اللي يرمعون وبنقول الصيحه المفرطه بالطير لعل انها سبب . هذا والله اعلم ×

[nassr_11]

عفوا مانتبهت لهذه العباره( ولا تكتشف الي ان تهده على حبارى)

[صقار قديم]

موضوع جميل

في و جهة نظري ، ليس من الممكن معرفة هذا العذروب في الطير قبل الهدد على الحبارى.


مع التحية و التقدير

[عبدالرحمن بن ذياب]

ما عندي خلفية عن سؤالك يا بو ماجد وننتظر العلم

[ابو سلطان898]

مالها حل طال عمرك مانت بعارف هالشغله لين تهده

وابقولكم سالفة طيرين معنا

واحد مايجيها بالقاع فرخ وبكر وثنو وثالث وبعته رابع وصاد بالقاع مع اهله الي شروه مني

وكلموني مستغربين لأني قايل لهم مايجيها بالقاع وصاد معهم

ثمان حباري كلها يهد عليها بلقاع

وواحد مايجيها بالقاع فرخ وبكر وثنو وثالث

ويطلع هالسنه رابع ولا اعتقد انه بيجيها فالقاع ابداً

[بدوي نمبر ون]

الطيور طبايع ونفسيات
انا اعرف باعوها اهلها ماتجي للحبارا هي نوب
واللي شروها فعلت معهم

[البرنس الليبي]

يالربع صلوا على النبي ....ما احد يقدر يعرف إلا بعد مايصقر الطير ...وبعدين ترى اكثر الطيور اللي ماتحب الحبارى في القاع هي الطيور السباق ...وبعدين بعض الصقاقير وانا واحد منهم إذا صاد الطير الحبارى في القاع احس كني صايدها بالشوزن ....يالربع الوناسه صيدها فوق ماهو بالقاع .

[الفيتو]

بسم الله الرحمن الرحيم
السلام عليكم ورحمة الله وبركاته
مساء الخير ياخوي / ياقلب ذيب
.
بالنسبه لي
مافيه ضمان الا لكان راعيه ثقه وهذا علمه
واذاكان صايد حباري واجد وتوه منكف من المقناص
الريش لكن مهو اكيد مثلا الرابعه مكسوره
طمول على وجه الطير وداغره وإشغره
واذاكان ياخذ فوق نادرا مايسلم ريش الذيبا
اما الأكيد انه صايد في القاع لاقال اكثر صيده في المغرب هههههههه
موضوع جميل وصعب لكن اتوقع بيان علم اكيد من حدى الاعضاء
ننتظر
*
والسلام
AL Khapt Brother of Naif
الحجاز
28-8-1433هـ

[قلب ذيب]

الحقيقه
ليس هناك دلاله واضحه على الطير اللي مايصيد في الارض ( القاع ) لاتوجد ماريه !
فقط عليك بشراء حبارى وهدها له , او تهد له ( طير بحر صلال يسير ومركّب عليه ريش حبارى ).
/
/
/
/
اذن لاتوجد دلالات ولاعلامات على ان الطير صايد في الارض الاكلام راعيه ومدى صدقه !
تقلبوا تقديري .

[صقار قديم]

لا تعليق !!

[شقرااااان]

مسيتو بالخير ياوجيه الخير

حيالله كلن بنكه


باختصاااااااااار

بالنسبه للجير

بعض الجيره لاوجبته جاها قاع وشان جناحه
ولا اكرمته عافها قاع وجاها طيار وزان جناحه





الطيور عامه

اعرفه من جرئته على المفارس بالقاع مهوب شرط اجيبله حباره

اجيبله وز رومي حليو واشوف مواريه


ان ماهد (بتلحقني الشكه بكلام الي باعه)




شكرا

[ســـبــار ربــعـــه]

ارحب يا قلب ذيب.

صراحه طريقة عواد فيها شيء من الحيله ولكن تكون الدجاجه الحبشيه او الوزه كالحبارى. والطير يعرف الحبارى والمتحبريه ههههههههههههه والدليل فيه مجسم الحبارى المحنطه بعض الطيور تنظر فيه ما كنه موجود.
واما الحبارى وخص الخرب لا قام يطقطق بحنكانه تضيع علوم الرجال ماهو الطيور.
وانا لا شفتها في الروض اضغط كلدش بدال الفرامل وادوس بنزين برجلي اليسرى.
حتى انا اهابها في الروض هههههههههههههههههههههههههههه.
تقبل تحياتي يا قلب ذيب.

[Turki1]

كل عام والجميع بخير
حياك الله يابوماجد والجميع. وماشاء الله كل مواضيعك مميزة .
اما أول يوم الحباري واجد فالواحد في الموسم يحكم على الطير من الطمول على صدر الطير ودواغرة ومن اطراف ريش ذنيباة اللي تصير كأنها مصنفرة واحيانا منكسرة من المداوس.
في وقتنا الحاضر مالنا بعد توفيق الله الا الشراء من ثقه أو توصيه من رجال شاف فعله شوف العين.
فيه طريقه أخرى قد تفيد وخصوصا اذا ماعندك حبارى تعلوم وهي صعبه الآن الا ماندر، وهي الاستعانه بحبارى صناعيه وخصوصا انه ممكن استخدامها عدة مرات لان الرأس ينفصل عن الجسم ولها قاعدة تدفن في الرمل ،والزين انها مجسمه وهي تكوبر مع ان التجسيم ماهو متقن جدا( السعر في حدود 150 دولار)وهذي صورتها:
http://photos.imageevent.com/sa_photography/falcons/websize/ArtiHubara.jpg

[بحرة حوشان]

ان كانه هداد ومايخالطها فالقاع
اقصر عليه وشوف عنه
اما انك تبي تعرف الطير يخالط فالقاع من ماريه معينه
لايمكن .
ومبارك عليكم الشهر

[بوخالد الكعبي]

قلب الذيب مبارك عليك الشهر

وانا اقول الطير الشجاع و الفتنه مايهاب لحباره في القاع ولا طايره يعلقها فووق هذا يرجع للشجاعه و علومت راعيه للطير من البدايه

بعض الطيور يخاف لحباره لين تكبرت له في القاع و يلزم راعي الطير انه يسووق و يطير لحباره له من جديد انا ماشوفه عيب في الطير ولكن مثل ماقلت يمكن بقاع الوعر يهابها لين حطت له

ولكن مع كثر الهدد له و الصيد في قاع مقناص به حباره ينسى الخوف هذا بعد صيد كم وحده و يتشجع الطير لها و يداوسها

[قرناس شماالي]

والله يالغالي موضوعك جميل

لاكن بنسب لطير والله مانت شاري الى كومت ريش

ولو يقول صايد قد ريشه مايهمك توكل على الله وخذه

[القوبعي]

بالعكس بسيطه تقدر تعرف الطير يجيها في الارض ولا لا
بس فيه شرط :)
انك تكون مخاوي جني راح يسأل الجني رفيق راعي الطير الي قبلك ويعطيك برنت

ههههههه
حبينا نضحك ياخوي انا اضيف صوتي لصوت مشرف خيمه الصقور
هذي جديده ولانعرفلها

وصدقني الطير الي بيقوم ياخذ من ريشها طيار بيحقل عليها وبيذبحها في الارض
لو تروح بعينه كبر الطلي

[قلب ذيب]

ارحب ياالقوبعي .
مزحتك مقبوله والله يحييك .
كثير من الاخوه اللي ردوا يتكلمون عن هدد الطير على الحبارى , حنا نقول اذا اشتريت طير وقالك البايع صايد الحبارى , هديته على حبارى طيار ماخلاها تروح , ولك بعد ماوقعت وقع حذاها , مع العلم انه صادها طيار
ريشه تام ولاتقول ان امواسه ماصكت وخايف عليها ,ولاتقول ان الطير ماشنذر وفيه نزاره , ولايوجد حووووم
لاطير فوقه ولاعقاب !؟
... المقصود ان بايع الطير تخلص منه لانه مايصيد الحبارى في القاع , وهو رف ان المشتري مابيكتشف ذلك العيب في الطير الا بعد فتره طويله , وبالتالي لايمكن ارجاعه الى البائع .

[المنصوري-قطر]

بسم الله الرحمن الرحيم

السلام عليكم ورحمه الله وبركاته


حبيت ادش وياكم في الموضوع

من وجهه نظري ان اول شي باخذ علومه من راعي الطير ااذا انا شريته صايد وبقوله علومه مع الحبارا صاد في القاع ولا الطيار وعقب بشوف الطير بعيني لو حتى على علومه

[راكااااان]

سلام عليكم ورحمه الله وبركاته اداره وعضاء مكشات جميع

[راكااااان]

اهلا وسهلا

[قلب ذيب]

الله يحييك يابوذيب .
كلامك في محله بس بعض الصقاقير يشتري الطير من شبه في السوق والا وهو في طريقه للمقناص ويقال له الطير صايد , مثلا في طريقنا للعراق في مقانيص اول , نمر على محلات طيور على الطريق ويعجبك طير او انت محتاج طير لتعليم طيورك الوحش اول الوقت والحبارى لفو اذا طارت وقعت يعني بيصيدها اي طير ماتبغي طير سبوق !
... تشتري الطير على شرط صايد وفي اول المقناص يوهقك , هذي البلوى . اثمن حضورك .

[المنصوري-قطر]

ماقد صادفني ذا الموقف بس والحمدالله عندي طير من يومه فرخ حباراه فصيل
وصيده في كل سنه وحده والحين بينشل قرناس ثالث والطير من يومه وحش عندي
والطير ان الله وفقك فيه يعطيك من خيره النوماس والطير الطيب

واسمحلي ع المداخله اذا طلعت برا حدود الموضوع

[صقار الأسياح]

انا بقيت متفرج دورت جواب من كل جهه مالقيت لها جواب صراحه الا حلف راعي الطير اما قصدك مواري اتوقع مستحيله بس موضوع شيق

[عيد العازمي]

حج الطير وبذن الله يجيها بالقاع مع احترامي للجميع

[قلب ذيب]

الله يبارك لك في طيرك يابوذيب . ونسمع انهاصايدها هالسنه حول الصخبريه .
صقار الاسياح . نعم الحلفه احد وسائل تأكيد صيد الطير وكذلك الشهود .
عيد العازمي . ان شاء الله انه يجيها في القاع .

[النـادر]

هناك امور قد يستشهد بها البعض وان كنت اعتقد انها قد تصدق وقد لاتصدق ومنها

عضمة القص : الطير اللي يداوس فالقاع تلاقيها مدقدقه وبها اثر ضربات اما من الارض او من جناح الحبارى اثناى المداوس
ظلوع الطير :دائما رقيقه واثناء المداوس تنكسر وتجبر بعدها وتترك اثر لانها لاتجبر بشكل طبيعي 100%

هذا اذا كان الطير ريشه نظيف مابعد قنص موسمه ولا صاد في سنته
اما القانص تحسحاس الريش من الذنيبا بالذات وريش الجناح الداخلي علامة

طبعا كل هذه العلامات لاتعني الجزم وانما مؤشرات قد تصدق وقد لاتصدق وانا قد مرني فروخ وحوش فيها بعض هذي المواري وداوست فالقاع

اتمنى ان اكون قد افدت الاخوان في جوابي

[الصقارالمغربي]

الله يعطيك العافيه

[راكااااان]

سلام عليكم ورحمه الله وبركاته انا من وجهت نظري كثير من الطيور ماتعرف الحباره وخاصه التفريخ لاكن كيف تعرف الطير اذا كان يصيد الحباره واحد ديك دجاج عربي الديك يكوبر ويضرب الطير وز بط على نفس لون الحباره وزي ماقال اخوي عواد الشمري حبشي برضو يجيب نتيجه وتعرف اذا كان الطير شجاع او لا واذا كان شجاع معناها يصفط الحباره حدر جناحه وهاذي وجهت نظري ومجربها كثير ودمتم سالمين غانمين جميع 🌟

[راكااااان]

سلام عليكم ورحمه الله وبركاته المشاركه الثانيه في نفس الموضوع بنسبه كيف تعرف الطير صايد حباره بنسبه لي انا شخصين في كثير من الطيور ماتعرف حباره وخص التفاريخ مايعرف شي اسمه حباره ابد غير تدريب والحاجه الثانيه تعرف طير اذا صايد حباره ولا لا من شجاعته كيف تعرف انه شجاع تهده على ديك دجاج عربي الديك العربي يكوبر ويضرب الطير ويمكن يعوره بعد وعلى وز او بط او حبشي زي ماقال اخوي عواد الشمري على شكل حباره اذا الطير هد اعرف انه شجاع ويصفط حباره حدر جناحه بنسبه لي انا مجرب كثير طريقه هاذي وينجح ودمتم سالمين غانمين جميع

[مقناص الكويت]

يعطيك العافيه علي الموضوع بس الطير مايبين وتقطع الجك الا باليقين لازم حباره تشوفه عليه بالعين بخصوص الملواح ماعتقد يبين الطير الثروق اذا جاه الملواح الملواح ريش وكل طير يدور العلف فيه والله يوفقك