لوحة سيارتي اريد استبدالها بأخرى

[كرويف]

السلام عليكم
ماهو المطلوب و هل الاجراءت سهله ؟

[الشهابة]

و عليكم السلام ..

و الله و انا اخوك ابعلمك باللي اعرف و العلم عند الله ثم أهل الخبرة ..

انا أشتريت يوكون XL موديل 2011 و طلعت عليه لوحه لك عليها شوي و بغيت اغيرها ..

المهم رحت لقسم مرور المربع في الرياض و قال لا يمكن نغيرها و لكن رح لمرور الناصرية و أسأل هناك ..

رحت للناصرية و قالوا لا يمكن تتغير إلا بعد كتابة معروض لمدير مرور الرياض و تدخل عليه و سالفة طويله ..

قلت لهم مافيه حل ثاني .. قالوا إلا واحد من اثنين ..

الأول : تجيب سيارة ثانية بأسمك عليها لوحه انت تبيها و نسوي لك مناقله للوحتين بين السيارتين بشرط الاستمارات و الفحص لكل السيارتين جديده مع التأمين .. و رسوم المرور لكل سياره 450 ريال يعني 900 ريال للسيارتين من غير الفحص و التأمين و غيره ..

الثاني : تروح لمزاد المرور و يكون كل يوم اثنين في مرور دله في الرياض بعد صلاة المغرب و تشتري لوحه من المزاد و تركبها على سيارتك و نسقط لك اللوحات القديمه و انت و حظك في قيمة مشترى اللوحه و رسوم المرور نفس الشي 450 ريال .. و اللوحات هناك يوم سألت من 1000 ريال و فوق و على شي مايستاهل ..

و دورت لي معقب في المرور يضبط لي الأمور و طلبوا ممن 2500 و 3500 ريال و انت طالع على شي ما يسوى ..

في الأخير هونت عن كل السالفة الي انا مكبرها و هي ما تسوى قطعة حديدة بحروف و ارقام و نص العالم ما يعرفون حروف و ارقام لوحات سياراتهم ..

و بيني و بينك انا اللي مضايقني في لوحة سيارتي أن حروفها لها معنى شين شوي و الا و الله ما فكرت اغيرها .. و الحين لها سنه عندي و اموري تمام و لله الحمد ..

عاد هذا اللي اعرفه و انت الله يسهل امورك في ما نويت ..

[كرويف]

جزاك الله خير

[tevo]

ألمزاد فيه لوح باسعار رخيصه لو تمره يوم موب خساره

[baaasss]

وعليكم السلام
سبحان الله ليه هالتعقيد في اجراءات تغيير اللوحة !
اجل هذي طريقة سهلة مرة
فك اللوحة وتخلص منها بطريقة مضمون يعني احرقها او قصقصها حتى لا تروح لغيرك وبلغ انها مسروقة ويطلعون لك جديدة

[الشهابة]

وعليكم السلام
سبحان الله ليه هالتعقيد في اجراءات تغيير اللوحة !
اجل هذي طريقة سهلة مرة
فك اللوحة وتخلص منها بطريقة مضمون يعني احرقها او قصقصها حتى لا تروح لغيرك وبلغ انها مسروقة ويطلعون لك جديدة

صحيح كان هذا النظام القديم .. و لكن الحين يطلعون لك نفس لوحتك القديمة .. و تاخذ الإجراءات أسبوع من تاريخ التقديم .. و الا بغيت أسويها ..

[baaasss]

من متى تغير؟

[الشهابة]

و الله مادري بالضبط .. و لكم الأكيد إني سألت قسم مرور الروضة و قالوا تطلع لك نفس اللوحه حتى لو كانت اللوحتين كلها ضايعه نعطيك نفس اللوحات ..