مكيف الباترول يفصل اذا وقفت بالظهر

[sgl2002]

ياشباب عندي مكيف الباترول تبريده ممتاز


لكن البلا اذا وقفت بالظهر عشر دقايق يبدا يضعف ثم شوي يعطي هواء عادي والكمبرسر يفصل

واذا مشيت على طول يرجع يبرد

وش المشكلة علما ان مافيه فلتر هواء والكمبرسر مايفصل ابد الا اذا طول واقف الظهرية ، يفصل ومايبرد الا لا مشيت

والمراوح تشتغل وحطيت ورقه وشفطتها شفط يعني شغالة

هل هو في الباترولات كذا والا عندي مشكلة

مع العلم ان حرارة الموتر هي الطبيعية وراء الخط الابيض بدرجتين

الموتر سوبر سفاري 98

[وجعين]

لا ونا اخوك انا عندي 92 لو اوقف يوم كامل بلعكس يبرد زياده شف يمكن الفريون ناقص بلعالده اذ كان الفريون ناقص يفصل كل اشوي ونتبه من الفريون الصيني عبيته يوم واحد ب80 ومن بكرى فضيته وعبيت اصلي ب125 وثلج المكيف رح لواحد تعرفه لا يغشونك

[sgl2002]

الله يجزاك خير

امس فكيت الدرج وفكيت غطا اسود واحصل ما ادري هي اسمها الثلاجة او ما ادري

المهم متراكم عليها الوسخ

واخذها بالهواء وفركتها

واليوم العصر مشغل المكيف وواقف واشوف الكمبرسر قام يفصل ويشبك طبيعي والظاهر انه اول كان مكتم


لانه اول يبتل يشتغل ولا يفصل الا فصلة وحدة مايشتغل بعدها الا لما امشي

[قناص ينبع750]

عليك فصل قسام التوماتيك وخل الكومبروسر شغال مع التكييف دايركت دون فصل هذا راي طال عمرك

[وااضح]

عليك فصل قسام التوماتيك وخل الكومبروسر شغال مع التكييف دايركت دون فصل هذا راي طال عمرك

كيف افصل التوماتيك

[sgl2002]

^^^
لو فصلت القسام بيصير يبرد ع طول

وبعدها يثلج ولازم تطفيه وترجع تشغله

فالاحسن خله

[adil33]

دور لك كهربائي يغير طقم كلتشات للكمبرسور او ابحث عن كمبرسور مستعمل او مجدد لانه من كلامك يتضح انه بدا يتعب ومع الضغط في المشي يعطي نتيجه واذا ما عليه ضغط ما يعطي نتيجه وهذا دليل واضح على ضعف الكمبرسور انا عندي نفس سيارتك واضطريت اغيره بواحد جديد من الوكاله قيمته 3400 ريال لكن ارتحت منه ومن ضعف التبريد الحمدلله

[سراي-01]

السلام عليكم ,,,, الشهر مبارك عليكم جميعاً انا معي سوبر سفاري مكينه4500 قبل 6 او 7 شهور كن المكيف ما قام يبرد زين ولا كنت اسمعه يفصل رحت لمهندس شاطر واعرفه برا الرياض وغير لي فلتر مكيف موقعه قدام الشمعه اليمنى شكله مثل القوطي نحيف ,,طويل ,,,لا وتجاري بعد قلت ياولد تجاري قال ما عمري ركبته لاحد من اللي اعرفهم ورجع لي ... توكل على الله ,,, ومن ذاك اليوم والتبريد تمام وقمت اسمع الموتر يفصل مثل الناس والفريون اصصصصصلي ... على فكره الفلتر التجاري ب60 ريال والاصلي في الوكاله ب300 وزياده اتمنى اني افدتك ... تحياااااااااتي للجميع.

[sgl2002]

ياليت ياخوي توضح زيادة موقع هذا الفلتر لاني اول مره ادري ان في الباترول فلتر للمكيف

[سراي-01]

موقعه طال عمرك خلف الشمعه الاماميه اليمنى ,,,, وهو نازل شوي تحت يعني تقريباً اعلى شوي من مستوى نصف الاديتر ,,,, شكله مثل القوطي النحيف ,,,, هذا يقول الكهربائي انه يمتلي وصخ مدري كربون الزبده انه يسدد الفلتر ويضعف التبريد ويتغير (ما يتنظف) وبعدها ان شاء الله تزين الامور ,,,, اتمنى الوصف واضح

[sgl2002]

الله يعطيك العافيه وبكره اشيك عليه

[سراي-01]

السلام عليكم ..... مكان الفلتر بالضبط قدام دبة موية المساحات على طول لونه رصاصي

[xp.vip]

يارجال لا تحوس مكيف موترك ولا تغير شي
شف ونا اخوك ازرق لاي فني مكيفات
وخله يركب الساعه وعينك على الساعه
القراءه الصحيحة للباترول ثلاثين درجة تزود شوي او تنقص
اذا كانت القراءه زي ما قلت
عليك ببنت اللبوه
الثلاجة موقعها ورى الدرج يبي لها تنظيف
ونصيحة اخو لا تتعبث بمكيف موترك
الثلاجة شيك عليها
وترى الطريقة سهله جدن العدة سكروب مربع وبس
وهذا موضوع
ياليت تشيك علية
http://www.mekshat.com/vb/showthread.php?t=316124

[محسن اليامي]

والله اعاني نفس مشكلتك

وزياده صوت مثل الونه

[السومر]

المكيف اذا يفصل معك

تأكد من فيش الحساس اللي يركب على علبة الفلتر اللي قدام قربة ماء المساحات

احيانآ يظهر لك وكأنه سليم ولكن من داخله متاثر . فكه وركبه وحركه والمكيف شغال اذا شبك وانت تحركه فهو الخلل

اقطع الفيش وركب مشابك نحاسيه بدال الفيش

[sgl2002]

قبل كم يوم بدلت الفلتر وفكيت الدرج ونظفت الثلاجة اللي رايحه فيها من الوسخ

والحمد لله ضبط الموتر

لكن تبين لي ان في الباترول عيب مصنعي ومن سؤالي لاكثر من واحد

وهو ان عند تشغيل المكفين يضعف التبريد خلال الوقوف فقط

لكن الفصلة صارت تمام يشبك ويفصل وهذا اضن السبب الرئيسي ان الثلاجة اللي تحت درج الراكب كانت متسخه جدا ويكتم المكيف ويخليه يفصل

والحين تمام

لكن ضعف التبريد خلال الوقوف وتشغيل المكيفين لاحد يبحث فيها لانها عيب مصنعي

وفيه حل لها كاتبه واحد عماني موجود بمنتديات تطعيس

واشكر جميع من مر على موضوعي وافادنا

[مسلم سني]

ياشباب عندي مكيف الباترول تبريده ممتاز


لكن البلا اذا وقفت بالظهر عشر دقايق يبدا يضعف ثم شوي يعطي هواء عادي والكمبرسر يفصل

واذا مشيت على طول يرجع يبرد

وش المشكلة علما ان مافيه فلتر هواء والكمبرسر مايفصل ابد الا اذا طول واقف الظهرية ، يفصل ومايبرد الا لا مشيت

والمراوح تشتغل وحطيت ورقه وشفطتها شفط يعني شغالة

هل هو في الباترولات كذا والا عندي مشكلة

مع العلم ان حرارة الموتر هي الطبيعية وراء الخط الابيض بدرجتين

الموتر سوبر سفاري 98



لا البترولات ماهن كذا عندك تهريب بمواسير المكيف وحرارة موترك مو طبيعيه لان الطبيعيه ربع وتنقص شي بسيط عن الخط الابيض

اول شي عبه فريون اصلي واذا مازال تبريده وسط خل العامل يشيك على المواسير

ياليت لو تعلمني اذا امور بالسليم

[مسلم سني]

غير سلك السالب وحط سلكين جدد سلك من المكينه لسالب البطاريه وسلك من البدي اللي تحت البطاريه لسالب البطاريه

راح احط موضوع مفصل :)