صيد الحوقيل

[karam122]

أكيد كلكم تعرفون الحواقيل واللى ما يعرفها هذه صورتها:

http://www.mekshat.com/pix/upload/images17/mk27593_hagool.jpg

المهم طريقة الصيد كالتالي:
الخيط من 30 -50 ملم الميدار يفضل الصغير مقاس 15 أو 16 تركب عدد 2 ميدار بالصورة التالية يكون الثقل آخر الخيط وقبله ب 30 سم ميدار وقبله 30 سم الميدار التاني ويكون بعد الميدار عن الخيط تقريبا 10-15 سم
الطعم يكون ميد مقاس صغير نسميه احنا بالحساوي ( حراسين ) ويفضل يكون جديد ويلبط
صيد الحراسين ببدايه اللسان بنفس المنطقة بعجيناو خبزيابس

مكان الصيد أكيد عارفين المنطقة الجديدة بالعقير المظلات الجديدة هناك لسان مسويته البلدية عند نهايته

من الساعة 9 صباح الى الساعة 1 ظهر تقريبا وعبيلك ثلاجة تقريبا والله اني اصيد بالسمكتين جميع

ملاحظة:
خلي بالك وانت تشيل الميدار من ثم الحاقول تراه ملعون وقوي لا يشق يدك

[أبو ستري]

موضوع جميل يا كريم .
ولكن الحواقيل هذا موسمها ولا أعتقد أنها تستاهل هذه المميزات والتجهيزات لصيدها , فهي سمكة ملقوفة تجدها في الشكة ( المد ) بكثرة وتجها حداق بكثرة .

[صياد السبيطي]

صحيح كلام اخوي وتراني احدق

للسبيطي بميد ويجيك الملقوف

وياكل والمشكله انه يقص الخيط من اسنانه الحاده وقوته

والخيط 50
بس اخوي مهما يكون ماقصرت على الموضوع

والنوع الثاني الي يشبهه السلس

السلس فمه صغير واحجامه صغيره وطعم ولا احلى للسبيطي

[صياد السيف]

انا تعبت ما صدت الا واحد والمشكلة اشوف كميات قدامي استفسار اخير احط عوامة وللا ما احط

[صياد القطيف]

هلا والله اخوي
صراحه موضوع حلو
لاكن انا صرت لي فتره اصيد في الحواقيل طفاحي بدون ثقل
وصراحه الى يبي يشوف كميات كبيره يروح جعيمه ماشاء الله اهناك ملاقيف صح وحجامهم حلوه
ومشكور اخوي على هل الموضوع

[Alhzzen]

يعطيك الف عافية

ماقصرتت


شكرا

[أبو ستري]

قبل 3 شهور في أبو قميص كانت حصلية صيدنا ( ثلاجة ) حواقيل :(

[ღ♥ღالصيادღ♥ღ]

انا اكره هذا النوع


و مين اصلاَ يدوره



يعطيك العافية و ما قصرت

[سواق الجيب]

اخويkaram122 مشكور على طرحك لهذا الموضوع

انا بالنسبه لي احلى حداق هو حداق الحاقول فيه متعه واثاره

احنا طال عمرك مانحدق له على السيف لاكن ننزل له واذا وصل الماي قريب الصدر نوقف ونحدق له

ودائما نكون مجموعه 5 أو 6 ويصير التحدي منهو يصيد اكثر

وأكبر

متعته انك تشوفه فوق الماي وهو ياكل الييمه ويطير فيها

والاثاره اذا جيت تمسكه عشان تفك منه الميدار

الخيط اللي نستخدمه مقاس 70 أو 80 واحيانا يقصه اذا كان

حاقول كبير يعني طوله اكثر من متر

مكان صيده في منطقه بين ام حويض وسلوى احنا نسميها الطعس

لان مكان الحداق في نزله بين طعسين

موسمه من بدايه شهر 7 مثل هذي الايام لغاية نهاية شهر تسعه

وجنونه ايام الرطوبه والوقت من الظهر الى غروب

الشمس




اسف على الاطاله

[عاشق القنص]

والله هالملعون خطير
يقص خيط مقاسه 80
مره احنا نحدق والماي تقريبا الى الحزام ((البطن))وشوي يجيك هالملقوف وياكل الطعم
ويجيك بسرعه تصورتها 200 كم جاي جهتنا نبيه يرووح قاعد يطاردنا تالي خدرته بصيخ
على راسه وفلته بالثلاجه

ومره قاعدين نحدق وكل شوي مادق علينا واحد وقص الخيط ومره نقص الخيط وطار في
يد واحد والله الخيط كانه دبوس من قوت السحب وتالي انقص قصص خيوطنا مابقا منها
شي قلت لازم نسوي حيله جبت سلك كهرب وطلعت النحاس الا فيه وركبته وصله في اخر الخيط طولها متر
والله سلمنا من شره
واقوليكم انتبهوا منه تراه خطير يعض


وتسلم اخي على الموضوع

[BlueSky]

السلام عليكم ورحمة الله وبركاته
اخوي صياد القطيف وين المكان في الجعيمه ارجو اعطاءي وصف دقيق اذا ممكن وماهو احسن وقت لصيد الحواقيل والجيمه اللي يحبها ولك الشكر

[gulfhunter]

السلام عليكم ورحمة الله وبركاته

حياك الله أخوي karam122

الله يعطيك العافيه على الموضوع

أخوي سواق الجيب الله يحييك

بالنسبه إلى حداقكم هذا فيعتبر خطر جداً وترجع الخطوره إلى سرعة انقضاض الحاقول ويمكن يعوركم

تحياتي لك وللجميع

[سواق الجيب]

الله يمسيك بالخير اخوي gulfhunter

كلامك صحيح انه فيه خطوره لاكن هواية الحداق

(بلوى مثل العسل )

[صياد السبيطي]

السلام عليكم ورحمة الله وبركاته
اخوي صياد القطيف وين المكان في الجعيمه ارجو اعطاءي وصف دقيق اذا ممكن وماهو احسن وقت لصيد الحواقيل والجيمه اللي يحبها ولك الشكر



عليك بالميد وخليه طفاحي والله بيأديك اديه اهم شي خلي خيطك قوي بالحيل

والمنطقه ياخوي نهاية الجعيمه اخر دوار على يدك اليمين

والوقت الصباح ادا سقت

واسف على اللقافه................

ووينك يصياد القطيف من زمان موشايفينك