زيت الفتك

[فتك08]

السلام عليكم

يالربع أنا شريت لي فتك ماشي 100000 موديل2008 من أحد المعارف و الموتر

مايعيبه شي حتى راعيه ألح علي أفحصه و فحصته فحص شامل و سليم أبشركم...

طبعا راعيه سألته عن الزيت قال أستخدم سوبر جي تي علبة سودا((فوكس 20W50))...

يوم جيت أغير الزيت كان معي أربع علب سوبر شل علبة حمرا((20W50))و شريت

زيادة ثلاث علب شل من محلات قطع الغيار بالصناعية فيوم جيت أغير الزيت عند البنشر

لاحظت إن الثلاث الأخيرة فيها إختلاف في القصدير اللي تحت الغطاء عليه علامات بخلاف

الأول كان سادة أخذني الشك فغيرت و توكلت على الله فعايرت الزيت و كان كويس....

رحت و مشيت عليه حول400كم مشاوير داخل البلد و كان العيار كويس بدون نقص

و بعدها سافرت عليه900كلم و كان ممشاي140 و بعد ماوصلت بيومين عايرت الزيت

لقيته ناقص و على الخط السفلي ناقص حوالي400ملي زودته و مشيت عليه حوالي500كم

داخل البلد و أنا ماإرتحت قلت مالك و مال الغثا غير الزيت فبدلته من علب سوبر شل كانت

موجودة معي و هي الأصلية اللي أثق فيها و عايرت الزيت و كويس و مشيت عليه900كم داخل

البلد و إلى الان الزيت كويس بدون نقص....سؤالي هل زيت الشل سوبر يجي منه مقلد؟؟؟

و إذا كان مقلد فهل معناه إنه راح يتبخر؟؟؟أم إن الفتكات ينقصن مع الخطوط الطويلة؟؟؟

طبعا الموتر مافيه تهريب في السيفون أو في الكرتيل....

.................................................. ..........

طبعا الكتلوج ينصح بإستخدام زيت بلزوجة5W30 إذا كان متوفر....

طبعا أقرب شي له و متوفر10W30 ....فسؤالي هل لو غيرت إلى النوع الأخير

سيتغير الموتر من ناحية هدوء صوت المكينة و الحرارة هل تنزل أو ترتفع؟؟؟

أم أن له نتائج سلبية على المحرك....

أنتظر تجاربكم و نصائحكم.....

[ابوسند9]

والله يا الغالي الغش اليوم طال كل شي
لكن انا لي 6 سنوات ما اغير اللى التر سفن وامشي فيه 10 الاف واجلده جلد ولا شفت نقص ولاشي الحمد الله
اما الزيت اللى ذكرت ما ني متاكد كاني سمعت ان فيه نوع مغشوش
اما الفتك ابد ما ينقص واتذكر العام مشيت عليه 13 الف نسيت ما غيرته ومنها 3 الاف سفر وامشي 180
فا احتياطا انت حاول تشتري الزيت من موزع معروف وتاخذ بالكرتون
بس لاتنسى بدون سيفون 6.5 لتر
ومع السيفون 6.8 لتر

[فتك08]

والله يا الغالي الغش اليوم طال كل شي
لكن انا لي 6 سنوات ما اغير اللى التر سفن وامشي فيه 10 الاف واجلده جلد ولا شفت نقص ولاشي الحمد الله
اما الزيت اللى ذكرت ما ني متاكد كاني سمعت ان فيه نوع مغشوش
اما الفتك ابد ما ينقص واتذكر العام مشيت عليه 13 الف نسيت ما غيرته ومنها 3 الاف سفر وامشي 180
فا احتياطا انت حاول تشتري الزيت من موزع معروف وتاخذ بالكرتون
بس لاتنسى بدون سيفون 6.5 لتر
ومع السيفون 6.8 لتر


لاهنت و ابيض وجه

طبعا كنت اخذ بالكرتون و من موزع معروف لكن الكرتون في البيت و انا بمنطقة ثانية

مابقي معي الا اربع علب عشان كذا كملتها من السوق.....

و من ناحية الكمية فأشكرك و هذا الصحيح و هو المسجل بالكتلوج.....

لكن الترا سفن كم لزوجته اللي تستخدمه؟؟؟

[200]

أنا أستخدم ألترا 7
20 دبليو 50
هذا ألي أستخدمه علبته رصاصيه والحين غيرو أسمه سوبر الترا 7

[فتك08]

أنا أستخدم ألترا 7
20 دبليو 50
هذا ألي أستخدمه علبته رصاصيه والحين غيرو أسمه سوبر الترا 7


تسلم لاهنت

لكن لأي سيارة تستخدمه؟؟و مانوع الزيت الموصى به في الكتالوج؟؟

[sgl2002]

والله انا استخدمت الترا ٧ بترومين وقالوا انه ثقيل شوي

ورجعت على سوبر جيتي الاسود

[فتك08]

والله انا استخدمت الترا 7 بترومين وقالوا انه ثقيل شوي

ورجعت على سوبر جيتي الاسود


تسلم لاهنت

و لاحظت أغلب أهل الفتكات يستخدمون سوبر جي تي الاسود

لكن ماأدري وش السر؟؟

[sgl2002]

والله ما ادري وش السر

لكني ابرجع للزيت الترا ٧

لان موتري مكينته راس واحد ٤٥٠٠ بخاخ وماشي واجد والافضل اني احط الثقيل

[فتك08]

والله ما ادري وش السر

لكني ابرجع للزيت الترا 7

لان موتري مكينته راس واحد 4500 بخاخ وماشي واجد والافضل اني احط الثقيل


ليش ترجع للثقيل؟؟؟

هل لاحظت على السوبر جي تي شي؟؟كتبخير أو تنقيص مثلا؟؟

و كم ماشي موترك؟؟

[sgl2002]

والله المهندس بدوي جنوبي يقول ان لزوجته تخف بعد٣٠٠٠

وبعدين يوم كنت استخدم الترا ٧ وكان الموتر ماشي ٣٠٠٠ على الزيت ورجعت من الشرقيه الساعه ١ الظهر الى الرياض والحرارة ٥٠ الظهر

وامشي ١٧٠ ومع ذلك ماتغير لونه كثير ولا نقص ولا راحت لزوجته

واخونا المهندس اصيل حجازي دايم يوصي باستخدامه لانه زيت ممتاز جدا

وهو ترى ثقله نفس سوبر جيتي ماهو بعيد

موتري ماشي٣٥٠ الف

[فتك08]

والله المهندس بدوي جنوبي يقول ان لزوجته تخف بعد3000

وبعدين يوم كنت استخدم الترا 7 وكان الموتر ماشي 3000 على الزيت ورجعت من الشرقيه الساعه 1 الظهر الى الرياض والحرارة 50 الظهر

وامشي 170 ومع ذلك ماتغير لونه كثير ولا نقص ولا راحت لزوجته

واخونا المهندس اصيل حجازي دايم يوصي باستخدامه لانه زيت ممتاز جدا

وهو ترى ثقله نفس سوبر جيتي ماهو بعيد

موتري ماشي350 الف


تسلم يالغالي على التوضيح و الإفادة

و عسى الله يعطيك خير الموتر و يكفيك شره و يبارك لك فيه

[200]

أستخدمه لكل سيارتي لصني ولددسن وأغلب الشباب يغيرون لترا 7

[برايدوي عنيد]

هلابك اخوي

بالنسبه لي اغير سوبر جتي علبه السوداء بلاستيك 6,5 لتر من غير سيفون مع سيفون 6,8 لتر

طبعا امشي عليه 5000كم والحمدلله لا نقص ولاشي

طبعا الافضل انك تعاير الموتر الصبح ويكون على ارض مستويه

طبعا احيانا بعض المواتر يكون تبخير شي بسيط 200 مل تقريبا هذا عادي

تقبل مروري........

[فتك08]

200
برايدوي عنيد

تسلمون على الإفادة و المشاركة بالمعلومات

شكرا لكم

[فتك08]

هل فيه إحتمال يكون تبخير للزيت عن طريق غطاء فتحة تزويد الزيت

بمعنى أن الغطاء يكون تالف مع إني شيكت على الربلة و شكلها سليم...

لكن قد تكون ضعيفة و لا أستطيع تمييز ذلك!!!

و لو كان من بلف التبخير فكيف أعرف و أين مكانه؟؟

و هل فيه إحتمالات أخرى؟؟

[فتك08]

للرفع و المساعدة لاهنتوا عن سبب النقص

[VTC 2002]

زيت سوبر شل يجي نوعين نوع مكتوب عليه شركة الاسواق والنوع الثاني مكتوب عليه شركة الراجحي طبعا الراجحي افضل من شركة الاسواق
ومدام انك تقول غيرت الزيت ولا نقص فالحمد لله فالمشكلة اكيد من الزيت الاول
ويمدحون زيت الترا 7

[فتك08]

زيت سوبر شل يجي نوعين نوع مكتوب عليه شركة الاسواق والنوع الثاني مكتوب عليه شركة الراجحي طبعا الراجحي افضل من شركة الاسواق
ومدام انك تقول غيرت الزيت ولا نقص فالحمد لله فالمشكلة اكيد من الزيت الاول
ويمدحون زيت الترا 7


هلا بك و سلمت يالغالي على الإفادة

بالنسبة للزيت النوع الثاني تصحيحا للمعلومة شركة الجميح و ليس الراجحي

لكن كأني لا حظت نقص مجددا و خفيف مشاوير داخل البلد

[فتك08]

لكن ما أدري أنا أشك في حاجة

هل كرتيل الفتك عريض مقارنة بغيره بحيث تكون المعايرة للزيت حساسة

جدا و تتأثر بأدنى ميول للسيارة قد لا يلاحظ

[VTC 2002]

هلا بك و سلمت يالغالي على الإفادة

بالنسبة للزيت النوع الثاني تصحيحا للمعلومة شركة الجميح و ليس الراجحي

لكن كأني لا حظت نقص مجددا و خفيف مشاوير داخل البلد

هههههههه حلوه الراجحي
ابي اكتب الجميح وكتبت الراجحي من كثر ما الراجحي مبهذلنا:D بالاقساط مهذرين به

[فتك08]

أبشركم و لله الحمد و الشكر

الموتر مشى بعد تغيير الزيت 3000 كم و بدون نقص

طبعا بعضها خطوط و بعضها مشاوير داخل البلد و لا تجاوزت سرعة130كم

فالنقص الأول 99% إنه بسبب الزيت....

حبيت أسألكم لو غيرت إلى زيت لزوجة 10w30 هل بيفرق أداء الموتر و صوته...

و صرف الوقود...

[متعب العطاوي]

أبشركم و لله الحمد و الشكر



الموتر مشى بعد تغيير الزيت 3000 كم و بدون نقص


طبعا بعضها خطوط و بعضها مشاوير داخل البلد و لا تجاوزت سرعة130كم


فالنقص الأول 99% إنه بسبب الزيت....


حبيت أسألكم لو غيرت إلى زيت لزوجة 10w30 هل بيفرق أداء الموتر و صوته...



و صرف الوقود...




احب اصححلك معلوماتك النقص ماهو من الزيت اخوي الفتك لاتعايره الا هو بارد او واقف اقل شي ساعه لان الفتك عله الزيت اذا طلع فوق ماينزل بسهوله حصلت معي كنت اتوقع من الزيت وكل شوي وانا ازود ههههههههههه

وجيت الصباح وعايرت لقيته فل ودبل وثري وبعدها عرفت علته عايره وهو بارد وشوف ماراح ينقص ملي واحد

[فتك08]

احب اصححلك معلوماتك النقص ماهو من الزيت اخوي الفتك لاتعايره الا هو بارد او واقف اقل شي ساعه لان الفتك عله الزيت اذا طلع فوق ماينزل بسهوله حصلت معي كنت اتوقع من الزيت وكل شوي وانا ازود ههههههههههه

وجيت الصباح وعايرت لقيته فل ودبل وثري وبعدها عرفت علته عايره وهو بارد وشوف ماراح ينقص ملي واحد


بيني و بينك لحس مخي و أحس إن فيه جني في المكينة و يستهبل:D

صراحة أول ماأغير الزيت و أنا في البنشر أعايره قبل ماأمشي ألقاه فل الخط العلوي

طبعا أحط حسب الكتلوج و بعدها بكم مشوار يوم أو يومين أحس إنه نقص و الظاهر السيفون

إنه نزل له الزيت....و أشك بأنه حساس جدا لأدنى ميول و أعتقد بأن هذا الشي يرجع

لشكل و تصميم الكرتيل و موقع صيخ العيار بالنسبة للكرتيل إما جانبي بأحد الجهات

أو في المنتصف.....المهم إنلحس مخي إلى الحين و أنا ماني مستوعب الحاصل:D

[الدهريز]

السلام عليكم مقبول سعيكم جميعاً وكل عام وانتم بخير .
بعد اذنك اخوي صاحب الموضوع انا شريت لي فتك سفاري 2006 م قبل حوالي اسبوعين والموتر نظيف ولله الحمد ويقول راعيه انه قريب مغير له الزيت ( سوبر شل ) وبعد كم يوم من مشتراي عايرت الزيت الصباح والسيارة واقفة في مكان مستوي من الليل ووجدت الزيت نصف العيار بين الخطين والحقيقة انني خفت ان المكينة تنقص وكلمت راعية واكد لي ان الموتر مايعرف النقص ابد وشكيت ان اللي غير له الزيت ماحط له العلب الكافية بعدها غيرت الزيت مع السيفون
( فوكس سوبر جيتي ) والان ماشي على الزيت حوالي الف كلم وكل يوم اعاير الزيت اكثر من مرة والمقاس تمام مانقص والله يستر .

[كاشت بالبر]

الزيوت اللي جربتها :

بترومين الترا سفن 20W50
فوكس سوبر جي تي 20W50

كلهن :good2:

لكن تأكد انه مب مغشوش
بعد ما تفتح غطاء العلبة بتلقى على القصدير شعار شركة فوكس او بترومين
قصديره واحده


اذا جيت تعاير الزيت
لازم تكون واقف على ارض مستويه تماماً

وبعض أو يمكن اغلب السيارات تشغلها وتحميها .. ثم تطفيها وتنتظر 3 أو 4 دقائق .. ثم تعاير الزيت

أقرأ كتالوج سيارتك

أهم شيء لا تزيد عن علامة الفل Full أو الماكس Max .. لأنك اذا زدت الزيت تنفقع الصوف والمكينه تبدأ تهرب زيت

[فتك08]

الدهريز
كاشت بالبر

تسلمون جميعا الله يبيض وجيهكم و لا يهينكم

شاكر لكم الإفادة الرائعة بمعلوماتكم و تجاربكم