السفاري يرج رجة غير طبيعيه .

[K.S.A.A]

السلام عليكم ورحمة الله وبركاته

مساء الخير

كما هو موضح بالعنوان

معي سفاري موديل 99 بخاخ .

وقفته أكثر من شهر تقريبا عندي في البايكه وطلعته قبل يومين ورحت مشوار عليه

وتفاجأت أنه يرج رجه قوووووووووويه

أمشي 120 وأضرب أصغر مطب يرج الموتر كله رجه قويه تجبرني أهدىْ السرعه إلين تروح الرجه.


تتوقعون وش السبب ؟؟ اللي عنده معلومه لايبخل علينا .

[أصيل حجآ زي]

http://im.gulfup.com/2011-02-10/12973306271.jpg

ركــَز أنتبآهك وفحصك وعلومك
على الأطآرآت { الكفرآت } ما دآم تقول وآقف شهرين .


أذا توقفت السيآرة / الطيآرة / المركبة
/ العربة على الكفرآت مُدة طويلة
يسير فيها بُقعة مُسطحة من تحت
بالنصف تُسمى { فلات أسبوت Flat Spot }
أو أنبعآج للدآخل .
وتتسبب في الرجـَة والدجة والصجة .

[لسان الحقيقة]

افحص الكفرات

[رِجم]

السلام عليكم

وش كفراته

[صقرالحروب]

شيك على الركب اللي قدام وكمان شيك على مساعد الدركسون

[K.S.A.A]

أشكر الجميع على التفاعل والردود

الكفرات دنلوب وممتازه والهواء ممتاز

[السامي2011]

الكفرات محبله غير الكفرات من احد اخوياك وشف

[الوسيطاء]

ياناس لا تتخرصون على الرجال

يقول لكم لو يضرب مطب صارت الرجه

والكفرات على طول رجه بدون مطاب

اخوي شيك على ذراع الدركسون وجلد الدفرنس الامامي

[ابوسند9]

اخوي
شيك على هواء الكفرات لو كان كفر فيه 30 هواء والاخر فيه 20 يرج
واذا الهواء سليم جرب بدل كفرات قدام باللي خلف عشان تقطع الشك باليقين من ناحيه الجنوط والكفرات
وشيك على مساعد الدركسون
وعلى البنهارد لايكون الربلات تعبانه

[عاشق الشعبيات]

كفراتك سليمه مافيها شي

المشكله عندك في أحد الاشياء هذي:
* جلد أذرعه تعبانه << أتوقع هو السبب
* مساعد دركسون
* رمان هوبات اللي يجيك في نهاية أطراف الدفرنس فوق وتحت فيه رمان ممكن تكون تعبانه.

[h999mdn]

ياخوي سارت معي وطلع السبب من رمانات الهوبات الاماميه تحتاج الى شد..وتم شدها وراحة المشكله

[hamido]

وانا صارت معي نفس حالتك وطلعت الاذرعه متطلقه كبستهن عند ورشه وضبطن

[K.S.A.A]

الله يبيض وجيهكم ويجزاكم خير الجزاء . وأسأل الله أن يجلعنا وإياكم ووالدينا وأخواننا المسلمين من العتقاء من النار في هذا الشهر الفضيل . اليوم إن شاء الله بفحص الموتر وراح أعلمكم بالمشكله لما أحصلها ..

[كديان]

الكفرات اذا كانت محبلة
فان الموتر يبدا. ينتفض باستمرار
معنى التحبيل
دعسة الكفر تكون مهب وطيه وحده يعني
به انخفاض و ارتفاع
انا استبعد الكفرات

اتصور السبب من البنهارات ذراع الشاصي
غيره احد الربع لباترول ٩٧ و راحت الرجه
بحدود ال٧٠٠ ريال

شيك و شد على رمانات العكوس

[أبوصالح9]

اسمع قبل لاتوديه ورشة

دور لك احد من ربعك وركب كفراته بجنوطها انتبه تركب الكفرات بدون جنوط تراه بينفتح باب الشنطة عشان ماتخسر ويقعدون يتعلمون على موترك

همن اذا ركبتهن ومالقيت رجه اعرف ان السبب من كفراتك

اذا استمرت الرجة ذاك الوقت شيك على الموتر من الى

ولاتنسى تشيك على باب الشنطة يمكن منه الرجه --حبيت افيدك واداعبك

[سفااري]

السلام عليك اخوي عندك مشكلتين اولاً/ إذا اكلت المطب وصار الموتر كله يرج تحس انه مثل ام جنيب يرج كله من اوله الى الاسبير فهذا رمانات قدام يبيلها شد وثانياً/إذا اكلت المطب والرجه قدام بس فهذا ذراع الشاص او مساعد الدركسون غيره

[ابوفهيدان]

صارت معي
وطلع السبب المساعد الامامي اللي يجي معترض لحاله
تلقاه بين الكفرات الامامية

[عاشق نجد111]

شف مشكلتك بسيطه ان شاء الله
اذا الرجه خمات يعني مره تطلع ومره ما تطلع مع المطاب والحفر واذا طلعت لو ماهديت تحس الدركسون بينطلق من يدك

فو الله انها كانت عندي في باترول ٩٥ وقالو لي رصص وغير مساعد الدركسون وسويتها ومانفعت

ومره شاف الموتر واحد من الربع وقال لي غير جلب (ربلات) الذراع المعكوف وطبعا لازم تكبسها فالمخرطه ولا تكلف شي
والذراع المعكوف يجي قدام الدفرنس الأمامي

وفعلا سويتها وضبط الموتر

سوها وبتدعيلي إن شاء الله

[K.S.A.A]

الله يجزاكم خير الجزاء
أشهد بالله إنكم كفيتوا ووفيتوا
أسأل الله أن يعتق رقابكم من النار.
تم فحص السياره وأكتشفنا إن المشكله من ذراع الشاص .
الرمانات ولله الحمد ممتازه ، والمساعد ممتاز.




بيض الله وجيهكم ع التفاعل والردود .

[h93313]

السلام عليكم
نفس مشكلتك صارت عندي وطلعت من ذراع الدركسون وليس المساعد وكبسته في المخرطه ب20ريال وراحت الرجه من فضل الله