سؤال عن مراوح الكهرب الله يجزاكم الجنة

[عساس سهيل]

معي جيب 97 صالون و حبيت اركب له مراوح كهرب بدلا من المروحة الشد بلد ، الموتر تطلع حرارته خصوصا اذا صرت موقف لاكثر من نصف ساعة تقريبا بحدود النصف او تزيد شوي احيانا ، مع العلم ان البلف بلف ديزل و جميع اغراض الماء و التبريد جديدة مثل تماتيك المروحة و طرنمبة الماء و الراديتر ايضا مسويله تسييخ ..
السؤال : هل مراوح الكهرب عمليه و تبريدها اكثر و ماهي افضل انواع المراوح
و هل صحيح ان عزم الماكينة يكون افضل و شكرا :s:s:f

[عبقري91]

شلها وبقوه ولا تشاور
انا مركبها علا يوكن فرق في التبريد مشالله وتروح الحنه حقت المكينه
وفيه واحد بشفا يقالله الناصر او النويصر او المبارك
انت اكتب بقوقل المبارك ويطلع رقمه وتواصل معه
بس بمواعيد من الرحمه
مشالله الله عليه
ورجل نصوح وانا ركبت المراوح عنده ب١٤٠٠ ضمان اربع شهور
طبعن لاتقارنها بمراوح سوبارو سوبارو صغيره
الرجال شغله عدل ونطيف
وانت وميزانيتك
انا حصلت مراوح اليوكن بلوكاله الكهرب قرابت ٢٠٠٠
من غير حساس وكتاوت وشغل اليد والاسلاك
وهذا الشغل كله ١٤٠٠
اتمنا افتك

[sgl2002]

اذا بتركب مراوح كهرب فالحرارة وقت الوقوف مابترتفع

لكن مع السرعه بترتفع لان سرعتها لها حد معين ماتتعداه

وكذلك الدينمو راح يخرب عليك ولازم تغيره بدينمو مكسيما

ان بغيت شوري لاتركبها لان الكهرب حق الباترول ماينلعب به

[sgl2002]

اذا بتركب مراوح ركب ورا الشبك مروحتين او مروحه زي حق ٩٨ وفوق وبكذا بتخف معك الحرارة مع المكيف

[عساس سهيل]

اشكركم على المرور و ما قصرتوا ، الموتر طبعا تويوتا ماهو نيسان

[أبو اريام]

معي جيب 97 صالون و حبيت اركب له مراوح كهرب بدلا من المروحة الشد بلد ، الموتر تطلع حرارته خصوصا اذا صرت موقف لاكثر من نصف ساعة تقريبا بحدود النصف او تزيد شوي احيانا ، مع العلم ان البلف بلف ديزل و جميع اغراض الماء و التبريد جديدة مثل تماتيك المروحة و طرنمبة الماء و الراديتر ايضا مسويله تسييخ ..
السؤال : هل مراوح الكهرب عمليه و تبريدها اكثر و ماهي افضل انواع المراوح
و هل صحيح ان عزم الماكينة يكون افضل و شكرا :s:s:f

اخوي زي ما تفضل أخونا sgl2002 ركب مروحه خارجيه امام الرديتر اما بفاصل والا بحساس او مع المكيف لان خراب المراوح الكهرب للداخليه كثير ويمكن تخرب عليك في طريق والا في وسط نفوذ بعدها تكره اليوم اللي ركبت فيه المراوح الكهرب

[sgl2002]

اخوي مادام موترك تويوتا فطبيعية النص عند الوقوف ولاتعدل به شي

بس تاكد ان المروحه اللي ورا الشبك شغاله تمام وذلك بوضع منديل و
امامها

وشف بتشفطها بقوة والا لا

[hsdt]

لا انصحك في مراوح الكهرب لانك وبك بساطه سدخل في مشاكل الكهرب
اعتقد ان الجو حار مع وقوف نص ساعة مع المكيف عادي تكون على النص
انا في الصيف اشيل البلف واركبه في الشتاء
شل البلف وجرب
موفق

[عساس سهيل]

بيض الله وجيهكم وفيتو وكفيتوا ــ تم العدول عن تركيب المروحة الكهرب ، لكن حاجة و محتار فيها و هي نقص ماء الراديتر ، خصوصا الدبة . تقريبا كل 3 ايام اعبيها و هي تفضي تماما ، ما ادري وش رايكم و تعقيبكم على هالملاحظة و شكرا

[صاحب الكشتات]

تأكد من عدم وجود تهريبات او غطاء الرديتر عطلان لان بعد ذلك هذا يعتبر بداية تهريب وجه الراس لكن إن شاء الله مايكون هو

[عبقري91]

شف اذا مافيه تهريب شف طرمبة الما بصدر المكينه مرات ماتهرب لين تمشي السياره او تدوس بانزين تبي تشوف تحت زي بقايا موه متبخره اذا مافيه صاجه

[أبو اريام]

شيك على ليات المكيف الحار احيانا تكون الليات قديمه ومهتريه وهي تكون طالعه من خلف المكينه الى داخل السياره

[عساس سهيل]

يعطيكم العافيه ، و الحقيقة يا أخ ــ صاحب الكشتات ــ ان المكينة تنقص و يطلع دخان لونه ابيض بكميه قليله بعض الشيء و خاصة اول ما اشغل السيارة سواء الصباح او في اي وقت و طبعا ترا وديته للميكانيكي و قال هذه بدايه شنابر ، لكن هل يتسبب هذا بنقص الماء و بزيادة الحرارة ؟ الموتر ترا ماشي اكثر من 470000 كيلومتر