وين ارخص مكان احصل فيه تانكي ماء (الرياض) ؟؟

[PATHFINDER 4]

السلام عليكم

يا اخوان لي مدة ادور تانكي المنيوم للسيارة ولاحصلت المطلوب مرات يكون البايع برا الرياض ومرات اواجه مشكله في تركيبه لان موتري فيه طبق المهم

نويت اشتري الوطني مريت فرعهم في شارع خالد بن الوليد (انكاس) وجربنا كل الانواع ولاركبت في موتري باثفندر القديم

ثم رحت للسنيدي وبرق الحياء والبرية ومحل رابع معروف في الشرق نسيته وكلهم ماعندهم الا المنيوم وغالي

ثم رحت للرماية وحصلته يبيع تانكي الوطني والوادي

جربت تانكي الوادي السدح وركب تمااااااام كم سعره ياصديق قال 400 !!!

قلت نزله اخبره يباع 250 بالكثير 280


سؤال وين يباع تانكي الوادي في الرياض ويفضل شمال الرياض وباسعار رخيصه ومناسبة ؟؟؟

سمعت عن محل في المروج اسمه ذئب الصحراء لكن ما اعرف الوصف

بانتظاركم يا اخوان ...

[سعود2006]

هلا اخوي يمدحون ورشة المميز على كلام الشباب في مخرج 18 عندهم ألمنيوم + استيل + حديد وبالمقاسات الي تبي
طبعا تفصيل وليس جاهز..وادخل على الرابط وفيه اكثر من ورشة
http://doraan.com/vb/showthread.php?t=60765

اتمنى اني قدمت لك الفائده..

[PATHFINDER 4]

يعطيك العافية لكني ابحث عن الوادي لفارق السعر

التفصيل اغلى بكثير من الجاهز
وللاسف حتى تانكي السنيدي الالمنيوم الجاهز مايركب على طبق الباثفندر !

الوحيد اللي ركب بالملي هو الوادي

[فتك2004]

هلا بك اخوي

تفضل هذا رابط يوضحلك الوكيل او المنتج الرسمي لتوانك الوادي

الموضوع لأحد اعضاء مكشات وبيض الله وجهه على الاعداد والصور


http://www.alrahalat.com/vb/showthread.php?t=15538

وسعر التانكي ما يتجاوز 225 ريال سعة 145 لتر

لكن تاكد اذا بداخله قواطع او لا ؟؟

[راعي هدد 2007]

نصيحه مجرب رح لصناعيه القديمه ابو يمن
وفصل على مزاجك الستيل غالى المنيوم ارخص مجلفن رخيص مرة وفصل المقاس الى تبى وبعدها سيده الغرابى
فصل عليه تلبيسه وعازل واطنخ و الفيبر يروح بعد فترة
تطلع المويه مروحه وفيه طعم مخنز

[PATHFINDER 4]

التفصيل غير انه متعب ودوران مكلف جدا حتى لو المنيوم
خزان الوادي محد اشتكى منه ابي وين يباع في الرياض

حصلته في الرماية لكنه يباع 400 هل هذا سعره ولا ممكن احصله بارخص
طبعا ارضي وحجمه 90 لتر

[غليص1]

اخوي تحصله في ضهرة لبن مقابل نادي الرياض متخصص في خزانات البيوت والسيارات

ومايتعدى سعره 260

ايظا في الزامل طريق الملك فهد شمال مقابل صحيفة الجزيرة

[Dr.Salman.r.h]

شف وان اخوك انا كان معي باثفندر موديل ٩٢
وركبت فيه التناكي الفيبر نفس الي بالصوره... اخذته من الوطني بـ٢٢٠ قبل سنتين تقريبا

http://www.mekshat.com/pix/upload04/images194/mk42457_241220106232.jpg

جبت مرباع طويل وقصيته على المقاس مابين الرفارف الداخليه عشان يرفع التانكي ابد وجات كلها على مستوى واحد
المرابيع والرفارف الداخليه وثبت التانكي عن طريق وايرات في مشكبيات تحت المرتبه الخلفيه وجاي ولا احلا
واي استفسار انا بالخدمه...

تقبل مروري

[PATHFINDER 4]

اخوي تحصله في ضهرة لبن مقابل نادي الرياض متخصص في خزانات البيوت والسيارات

ومايتعدى سعره 260

ايظا في الزامل طريق الملك فهد شمال مقابل صحيفة الجزيرة


الله يعطيك العافية وبيض الله وجهك لكن وش اسم المحل الاول ؟
الزامل جمب البيت ومريتهم يقول وقفنا صنع خزانات السيارات


شف وان اخوك انا كان معي باثفندر موديل 92
وركبت فيه التناكي الفيبر نفس الي بالصوره... اخذته من الوطني بـ220 قبل سنتين تقريبا

http://www.mekshat.com/pix/upload04/images194/mk42457_241220106232.jpg

جبت مرباع طويل وقصيته على المقاس مابين الرفارف الداخليه عشان يرفع التانكي ابد وجات كلها على مستوى واحد
المرابيع والرفارف الداخليه وثبت التانكي عن طريق وايرات في مشكبيات تحت المرتبه الخلفيه وجاي ولا احلا
واي استفسار انا بالخدمه...

تقبل مروري


هلا اخوي شغلك تمام لكن اللي عندي طبق واحتاجه لترتيب الاغراض وعفشي واجد وماهنا اصغر من شنطة الباثفندر صعب افصل له مرابيع ابي كل ركن في الموتر الفز فيه العفش

[البرحه]

هلا اخوي شغلك تمام لكن اللي عندي طبق واحتاجه لترتيب الاغراض وعفشي واجد وماهنا اصغر من شنطة الباثفندر صعب افصل له مرابيع ابي كل ركن في الموتر الفز فيه العفش

حطها زي الطبق فوق الرفرفين وحط تحتها اغراض وفوقها التانكي .. مثلا اشتراك ماطور عدة والاشياء اللي استخدامها قليل .. واذا بغيت تطلعها اسدح المرتبة وطلعها من قدام ..

[فتى الثمامة]

أنا شريت سبعين لتر نوع خزان الوطني بسعر 200 ريال من فرع المصنع في حي لبن قريب من نادي الرياض