بغيت احط خيمة ثابتة بسطح بيتي وش تنصحوني به .. احترت

[زعفرانه]

السلام عليكم ورحمة الله وبركاته


نظرا لضيق المكان عندي في البيت ولاني اسكن بالدور العلوي ولايوجد لدي حوش فكرت باذن الله ان اشتري خيمة واحطها بالسطح بحيث تكون دائمة في الصيف والشتاء بدون ماشيلها
رحت اليوم السنيدي حصلت عنده التنهات حليوة بس ماعجبني تصميمها لانها مقوسة
وكان جمبها نوع ثاني نسيت اسمها بس كان شكلها حلو ودخلت مزاجي لكن ترددت لان سمعت كثير مايمدحون خيام السنيدي
بروح للقاضي بشوف خيمة البيرق وبرضو ودي اشوف خيمة الوسم والفرسان
وش تنصحوني بخيمة تتحمل حرارة الشمس وتتحمل المطر والهواء بحيث انها راح تكون موجوده على طول بدون فك ونصب كشكل عجبتني خيمة الفرسان والوسم
ودي بخيمة مايكون بوسطها عامود لان لدي اطفال وراح يضايقهم ويضايقني

انتظر رايكم ابغى خيمة ثابتة مايحركها الهواء

جزاكم الله خير

وياليت تعطوني وصف لمحل القاضي بالضبط وهل هو قريب من السنيدي ووين احصل خيمة الفرسان والوسم

[أبورزان100]

السطح وانا اخوك حط شينكو بين الجدارين بميول ممتاز عشان المطر والباقي قماش ولا تبعد عن الغرابي الفرق عن المحلات كبير

[الشهراني12]

السلام عليكم

اخوي انصحك ببيت الشعر احسن من الخيمه خاصه انها بمكان مرتفع ومكشوف
لاهو بالحوش ولا هو بمكان نازل وغير كذا ناوي تخليها على طول

لاني كنت بسوي مثلك قبل كم شهر وسألت ناس ونصحوني

هذا ماحبيت انقله لك والله يوفقنا وأيآك لمايحب ويرضى

[سرهيد]

السلام عليكم

هلا بك اخوي الكريم

اي خيمة تجوز انصح بان يتم فكها في الصيف ، عندنا شمس ما ترررررررررررحم ، يعني بتلعب فيها لو انها وش تكون ...

لذا حاول تاخذ اللي تكون سهلة التركيب وسهل الفك وما تسرب المطر ويكون فيها اماكن لتصريف الدخان ان كنت تريد ان تشب النار فيها ...

مع الحرص على ان تكون مرتفعة 20سم لكي لا يدخل عليك المطر - ربي يجيبه -

او فصل لك بيت شعر مثل ما قال البعض يكون على نفس المكان اللي عندك بس انصح بعد ما يتم التركيب تخلي فوقه بركس يحمية من الشمس ومن المطر زود ... هذا الكلام من تجربة فقد كنت واضع خيمة في استراحة وبعد ست او سبع سنين بدت تشغلني من تسريب الماء ومن التشقق ....

وترا السوق ما عاد فيه خامات اصلية ، كل شخص يقول اصلي ومع الوقت تلقاه يتشقق واعني الشعر ...

وموفق اخوي الكريم

[الأحوذ]

اذهب للمحلات بخط الميه ، يفصلون خيام ثابته ممتازه ، مثل محل الفراسه ، و استغل مساحة السطح بالتمام و قم بتوصيل الكهرب و الماء ، و التكييف ضروري و لا تنسى العازل للخيمه و المشب ، أما الخيام المذكوره فهي خيام رحلات لا تصلح لك لا شتاء و لا صيف و لا غيره ، وفقك الله...

[وحيد الدرب]

السلام عليكم
اخي الكريم لا بد أن تنتبه لشيئ مهم وهو أن تكون أرضية الخيمة مرتفعه على شأن مايدخل عليك الماء ويحوس عليك الشغلة يعني ما تحطها مباشرة على السطح انا فصلت من شارع المية خيمة وخليت الحداد يرفعها عشرين سم وحطيت خشب 18ملم فوقها وبالنسبة للسقف حطيت pvc مع عازل مائي وحراري والجوانب قماش خيمة لكن لونها أسود ومخطط بأبيض مثل شكل بيوت الشعر والحمد لله لها سنتين ماشفت منها شيئ وحطيت وجار حديد واشب فيها وكلفتني حوالي خمسة الاف من غير ادوات الكهرباء والوجار والفرش ولا يدخلها ماء ولا يهزها هواء وللمعلومية بعد سويتها ملكي يعني يحطون بلاكاش مع الجوانب بين الرواق والبطانة على شان الجوانب ماتهتز مع الهواء وتزعجك وبصراحة خلتني أنسى البيت وقعدتي دايم فيها

[الأحوذ]

مثل ما قال الأخ وحيد الدرب تمام...

[زعفرانه]

شكرا لكم ماقصرتوا