برد الجو وطلعت مشكلة القاعده®® الدخول للاهميه©© [الأرشيف]

مشاهدة النسخة كاملة : برد الجو وطلعت مشكلة القاعده®® الدخول للاهميه©©

تساهيل1

24/08/2012, 11:11 PM

السلام عليكم ورحمة الله وبركاته

حي الله قروم العيالي

مثل ما انتم خابرين الجو كل ماله يبرد وكل قام يظبط اموره

من كل النواحي

اما انا عندي مشكله من ناحيه وحده وهي

(((القاعده حق اريل الكنود والاريل)))

انا استخخدم قواعد من محلات الاتصالات وامورها وسط تنفعك مع ربعك اللي طالعين معك

والناس القريبه حدود 10 الى 20 كيلو فقط

كل المواضيع يمدحون ويذكرون تجاربهم

لاكن لاسف كل واحد تجربته في القاعده والارايل اللي يرويها عمرها

4او 3 سنين

وكل مايذكر قاعده او اريل تلقى نص الردود ان لم تكن كلها

ينصحونك بنوع ويقول ((خذ القديم لان الجديد مقلد مافي اصلي )))

وينتهي الموضوع بنصايح لقطع لم تعد موجوده او بمعني اصح الوكيل حقها توفى

الله يرحمه :p
############

والله يرحم والدينكم مانبي اللي يقولون كنت استخدم وكان فيه وتخر شي يقول ماعتد يجي انقطع من السوق
هذولا لايشاركون حياهم الله يجون يقرون ويطلعون ولا يلخبطوننا **

##########

اللي ابي في هالموضوع هو الاتي

1-- شخص يكون اشترى قاعده واريل في مده لم تتجاوز 3 شهور ((عشان نظمن وجودها بالسوق))

2--يصور لنا القطعه وهي بالكيس او الكرتون عشان مانضيع اذا رحنا المحل

3--يصور نفس القطعه خارج الغلاف وكل ماكتب إليها من حروف وارقام

4--يذكر لنا اقصى مدى لارسالها او اقصى مسافه راسل فيها شخص اخر

ابي اريل عليه الكلام لو انه مصنوع بأفغان استان

عشان تراسل مسافات كويسه بالبريه

وبالله التوفيق

اخوكم // محمد

سعود501

25/08/2012, 03:04 AM

والله شف يالغالي

اصلي مافيه مغير تحط 250 -200 على الفاظي

خذ تجارية ام ٣٠ ريال ماعليها زينه

زويحان 2

25/08/2012, 06:14 AM

خذ قاعده مغنطيس تايواني
شريتها من المرسلات بالرياض
قبل ٧ اشهر
و الاكيد انها موجوده ان شاء الله

تساهيل1

25/08/2012, 12:09 PM

يعطيكم العافيه للمرور ولاهنتو

هو التجاري دايم نستخدمه مثل اللي ذكرتو

وجيد في مسافات 10 و20 كيلو

ودك اذا صرت بالبر تراسل 150 الى 100

تخبر لازم تراسل وتسال عن الاماكن في الربيع والمحلات الزينه

وتاخذ احداثيتها بالكنود ومثل هالامور

لاكن الله يعين للحين على التجاري قصير المدى مالقينا حل

شكلي بجيب استيشن البيت واثبت له قاعده بالموتر لزوم البر هه

لعل احد الاخوه يفيدنا بشي طيب

وشكرا

العاتق

25/08/2012, 01:03 PM

The End

25/08/2012, 02:23 PM

اخوي قبل اسبوعين شريت جهاز 2200 واريل دايموند 285H وسلك دايموند للأريل بدون ماص (يركب على القاعدة الي تثبت على باب الشنطة) ،،،
راسلت واحد من الربع مسافة 150 كيلو تقريباً وكان يسمعني بكل وضوح ،،،
الجهاز مع كامل ملحقاته شريته من العضو أجهزة يدوية

تساهيل1

25/08/2012, 08:53 PM

الله يعافيكم للمرور

واسعدتني مشاركتكم

لاهنتو

الوووحيد99

26/08/2012, 02:40 PM

ياهلا باخي ذكرتك

ابذكرلك تجربتين كلها قريبه

المسافة : 55 كيلو بالبر حزوم وضلعان
الجهاز : كنود 271

الاريل الاول : براوينق وتذكر شوزن براوينق عشان ماتنسى الاسم
الاول في الارسال والاستقبال بلا منازع شريته من الامارات من وكيله باور دايركشن بقيمة 380 درهم ونصحت فيه احد الاخوان وقالي حصلته بالمرسلات بالرياض طبعا الاريل سنه كبيره مثل اريل انتنكس .

الاريل الثاني : دايموند 285H
واقل بالارسال من الاريل الاول ببرج واحد فقط ويبيعه رجال بالمنتدى ويشرطلك انه الاصلي .

ملاحظة : اغلب الناس غافلين عن سلك الاريل وهو اهم من الاريل .
نصيحة : خذلك سلك اصلي بالمتر واشبكه بايات قاعده يفضل تبتعد عن المغناطيس وتحاول تخلي القاعده بنص السيارة .

الصور : اخوك عليمي وتوه لاحق التطور لاكن موجودة مع واحد من الاخوان بالبلاك بيري اذا كان حولك بلاك بيري يقدر يرسلهن لك صور الارايل اما القراطيس ياعلك ماتروح للي راحن له .

ارجو اني افدتك وافدت اي واحد يبحث عن اريل مثلك

تقبل تحياتي

تساهيل1

26/08/2012, 03:16 PM

الوحيد ربي يسعدك
للمعلومات ولاهنت وش رايك بالعابر احصل شي والاخرطي .؟
انا بالاساس ماحبيت قاعدة المغناطيس

لاهنتو ولاهان كل من مر وشارك

شكرا

علي العساف

27/08/2012, 09:23 AM

يالربع انتبهوا لايوجد بالسوق اريل ياباني ولا امريكي صدقوني كلها تجارة
انا كنت بالرياض برمضان فريت المحلات كلها مافيه شي يثبت ان فيه أريل أصلي
حتى لقيت انتنكس مكتوب على ميد ان USA ويقول راعي المحل تقليد مو أصلي
حتى وكيل ايكم دار البوصلة ما عنده أصلي حتى اريل ايكوم هو يقول انه بايواني
فالرجاء الانتباه والحذر

فيه أريل سيريو ايطالي اصلي وارساله طيب ويجي ثلاث مقاسات
50 سم ومتر ومتر ونصف

اما الارايل الثانية انا ما اسبها بس اقول مو اصلية وممكن تكون ممتازة

ختاما ابغى اوضح ان الارسال مجموعة توليفية من قاعدة وسلك جيد واريل ممتاز
وجهاز قوي من حيث الواط تشكل لك هذه التوليفة ارسال قوي
وتأكد ان الارايل توافيق يعني قد يكون اريل بسسعر اقل افضل من اريل غالي

والله يا ناس عندنت ناس بالقصيم يراسلون باستيشن صيني سعره 140 والله ارسالهم
زين بالحيل ويقطعون على ناس ارايلهم اربع وصل وثلاث وصل اسعارهن حول الالف

فالتجربة خير برهان

اسف طولت عليكم بس نصيحة اذا بغيت تشتري اريل خذ سيارتك للمحل واشترط التجربه
وجربه عند المحل وراسل اثنين بعيدين لازم اثنين عشان الجهات تفرق وشوف كم برج يزود
اذا زاد 3 او 4 خذه على طول والا قل مايصلح ما تغيرن الابراج ورجعه

بالتوفيق للجميع

الوووحيد99

27/08/2012, 01:40 PM

اخوي ذكرتك والله لا اعرف ماذا تقصد بالعابر

ولا تعدي على اخوي علي العساف جميع ماذكره صحيح لازم يكون تسليك الكهرب مظبوط وتسليك الاريل مظبوط عشان الجهاز يعطي قوة واط بالارسال والاستقبال

وانا نصحتك بالقاعدة الثابتة لانه يصير فيه راجع بالاريل
والمغناطيس مايطلع الراجع 100 بال100 وهذا مع الوقت القصير يسبب ضعف بايسيات الجهاز وبهذا الوقت تعتقد ان الضعف يكون من الاريل وهو بالصحيح من الجهاز فعليك بالقاعدة الثابته لانه تكون لاصقه بجسم السيارة وتطلع الراجع على طول على جسم السيارة .

وبالنسبة لاريل سيريو الايطالي صدقة اخي علي العساف قوي لاكن انا سويت له مقارنة الي يجي 3 وصل اعتقد طوله متر مع الارايل الي مدحتهن سابقا وتفوقن عليه كلهن بالاستقبال والارسال ببرجين الى ثلاث ابراج .
ملاحظة : سويت المقارنة بجهازي وانا متاكد 100 بال 100 من توصيل الاسلاك بالطريقة الصحيحة الكهرب والاريل .

ومن ناحية انه اصلي وما هو اصلي لجميع الارايل المذكورة :
1_اريل براونق صناعته ماليزي وانا شريته من الوكيل نفسه بالامارات لاكن اذا كان متوفر بالسعودية وهذا ذكره لي احد الاخوان لا اعلم هل هو اصلي اولا الموجود بالسعودية
الاريل مرن ويصلح لحقين البر والممكاشيت

2_اريل دايموند 285H شريته من رجال بالمنتدى وظمنه لي انه الاصلي من نفس شركة دايموند وهذا شي راجع لذمته .
الاريل يصلح للبر والمكاشيت لاكن يعيب عليه انه قاسي وينعفط شوي مع السرعات العالية بالزفلت .

3_اريل سيريو الايطالي شريته من المرسلات من محل زنر وطلع لي نوعين قالي هذا رقم واحد وهذا رقم ثنين وخذيت على ذمته رقم واحد ولا تسالني وش الفرق لاني والله العظيم شلون تفرق بينهن لانه له اكثر من سنة .
قصير لاكن يعيبه انه 3 وصل ودايمن ينفصلن عن بعض غير مناسب للي مثل حالاتي دايمن يدخل تحت الطلح .

واي شي تحتاجه اخي الكريم ذكرتك انا بالخدمه بالشي الي انا جربته بنفسي انا مستعد .

ابوغلاب

28/08/2012, 01:41 PM

السلام عليكم ورحمة الله

من غير قصور في الاخوان اللى افادوك عندك اربعة نقاط اساسية يجب الانتباه لها

1 - الاريل
2- الكيبل
3- القاعدة
4- الجهاز

الاريل عندك خيارات كثيرة لكن بحكم الموجود في السوق فيه اريل جودته عاليه واستخدمة ولاحظت الفرق فيه وهو دايموند سوبر قين SG-2000 الكسب فيه 5.2 ديبي وهو كسب عالي جدا بالنسبة للموبايل ولو ان عيبه الطول تقريبا 3 وصل بطول 153 سم ويباع عند دار البوصلة بسعر 350 الى 330 ريال
http://www.cmesolo.com/content/uploads/mtoc/product_images/antsg2000.jpg
او عليك بالدايموند DIAMOND M285H ولكن يجب ان تقص منه الطول المناسب بحذر لانه يأتي اطول من اللازم فيجب ان تقصه على طول التردد المتوسط الاستخدام يعني بالظبط 145MHZ ويأتي معه مخطط لتوضيح الطول لكل تردد
وسعره في حدود 180 ريال الى 200 وموجود في دار البوصلة
http://www.rpmhamradio.com/content/uploads/mtoc/product_images/extra/images/img0272.jpg

الكيبل فيه نوعيات ممتازة ولكن غاليه لكن ما تعارف عليه والموجود في السوق المحلية هو

الاندرو

او البلدن
http://www.rpmhamradio.com/content/uploads/mtoc/product_images/bel9914.jpg
لكن انتبه للمقاومة يجب ان تكون 50 اوم وتجدها على السلك وبإمكانك تسأل البائع

القاعدة مشاكلها كثيرة ولكن حسب سيارتك اذا كانت جيب فيجب ان تاخذ قاعدة جانبية وتكون موصله مع البدي جيدا ويكون القراوند ممتاز والقاعدة الموصلة مع البدي افضل من المغناطيس بكثير

الجهاز يجب قياسه وملاحظة كم الخارج منه قد يكون الاريل والتوصيلات ممتازة ولكن الجهاز ما يطلع حتى 10 واط !! وتحصل كثير

تساهيل1

28/08/2012, 11:59 PM

علي العساف

الوحيد

ابو غلاب

يعطيكم الف عافيه للمرور والمعلومات

الله لايهينكم

ومشكورين

راعي سهوه

03/09/2012, 02:14 PM

خذ لك اريل دايموند اصلي مع قاعده اصليه... شريتها من رجال موجود هنا في المنتدى والله اني راسلت فيها مسافة ما يقارب 500 كليو وربي شاهد على كلامي... اما مسافات ابو 250 كليو ونازل كأنك تشرب مويه ههههههههه... اذا بغيت راسلني على الخاص... اتمنى اني افدتك تحياتي

اخوي ابي اسالك القاعده الي راسلت منها هي السودا مكتوب عليها دايموند. ووين موقعك يوم راسلت 500 كيلو وكيف كان الجو فاتح. ولا ﻻ. وكم مره راسلت مسافات بعيده. وشكراء

راعي سهوه

06/09/2012, 12:04 AM

لررررررررررفع

خبايا انسان

07/09/2012, 01:42 PM

يا اخوان انا عندي ايكوم 2100 ,, ويجيب 40 واط ,,

وتسليك الكهرباء من الاسلاك الي بمحلات الزينه الي يجي فيها فيوز ( اسلاك الكنود ), سلكته انا من البطاريه لداخل الغماره

والانتن صغير اسمه انتينيكس مع قاعدته الصغيره مغناطيس والسلك

هل وضعي الان ف السليم ؟ ؟

مع ان استخدامي بيكون ف البر والمكشات واتمنى ان اراسل ل 100 كيلو ف البر ,,

وبالنسبه للراجع ! كيف اعرف ان عندي راجع ؟ ؟

وبالنسبه لتسكيرة الباب على السلك حق الاريل هل تسبب مشكله ؟

علي العساف

07/09/2012, 02:39 PM

خبايا انسان

08/09/2012, 12:00 AM

اول شي عندك ضعف بالايسي لأن المفروض يعطي 65 واط
مستحيل تراسل 100 كلم مهما كان ارسالك
نعم تسكير الباب على السلك يسبب مشكله بعدين
الراجع عن طريق الساعه تعرف
بالنسبه للاي سي نعم عندي ضعيف ,, وديته مركز العامة قال المفروض يكون 55 واط ,, واذا ابي اغير اي سي , اغيره ب 200 (( لاكن ف الوقت الراهن 40 واط تناسبني ))

-------

بالنسبه للارسال ل 100 كلم , تقول انه مستحيل اراسل المسافه هذي مهما كان ارسالي!!
هل قصدك بسبب ضعف الاي سي عندي او عموما مهما كان الجهاز مايوصل ل100 كلم ؟ ؟

-------

وبالنسبه لتسكيرة الباب على السلك !! وش الحل اجل ؟ ؟ مع العلم ان القاعده مغناطيس مافيه حل الا اسكر الباب على السلك ؟؟

-------

ومافهمت قصدك بالراجع ؟ ؟ ياليت تشرح لي

------

وماعلمتني رايك بالانتن الي عندي ( انتينكس ) صغير

-----

وحبيت اسأل ,, شفت احد المواضيع يحطون تأريض للسياره , حبل او شي يكون متدلي من السيارة على الارض !؟ الي فهمته وقت البرق والامطار يسبب شحنات كهربائيه ف الجو وتنتقل مع الاريل وتتخلص عن طريق التاريض ,, هل هذا صحيح ؟

خبايا انسان

09/09/2012, 09:50 PM

للرفع يا اخوان للاستفاده ,,

الحربي حاتم

01/01/2013, 01:40 PM

بسم الله الرحمن الرحيم
بارك الله فينا وفيكم أستفدنا من الردود

تساهيل1

18/01/2013, 03:17 PM

خذ لك اريل دايموند اصلي مع قاعده اصليه... شريتها من رجال موجود هنا في المنتدى والله اني راسلت فيها مسافة ما يقارب 500 كليو وربي شاهد على كلامي... اما مسافات ابو 250 كليو ونازل كأنك تشرب مويه ههههههههه... اذا بغيت راسلني على الخاص... اتمنى اني افدتك تحياتي

ياقوها هالقاعده مدري السالفه.....!

الستيشن وانت رافع حول 50 وحاط امبي فير
ماوصل 300

ويش هالدايمنوت السيار اللي يوصل 500..؟

غالي1

22/01/2013, 04:22 AM

يمكن ٥٠٠ متر خخخخخخ