وين هجرة قمران ويش معلوماتكم عنها ولاحول ولاقوة الا بالله

[توكلت على ربي]

السلام عليكم ورحمة الله
الوجيه الطيبة
هذا اول موضوع لي
ولا اعرف وين احطه لكن إن شاءالله إن هذا المكان المناسب
الي حصل إننا حنا من سكان الرياض
وتم بعد 15 سنة ظهور اسم حدى المقربات في بداية شعبان وترسيمها كمعلمة رسمية
والوزارة كالعادة ماطلعت مكانها الي رسموها فيه إلا أمس
تخيلوا امس؟؟؟

يعني لاشعبان ولا رمضان سووا شي
الحين حنا في قمة التعب وفي وورطة كبيرة وين هجرة قمران فيه؟
صحيح في وادي الدواسر لكن وينها في الخريطة؟
كم تبعد عن الرياض
كم تبعد عن وادي الدواسر كم بينها وبين القرى الي حولها
اسألكم بالله
يمدي الواحد في يوم واحد يدور على سكن في هذي الهجر والقرى؟
وين تسكن فيه؟
والمواصلات من السكن للمدرسة؟
شيء يشيب الراس
أبي معلومات ممله بالتفصيل والشرح أبي كل معلومة تفيدنا

وين أحسن مكان ممكن تسكن فيه
معلمة مع اطفالها والشغالة فقط فقط طبعا الرجل في منطقة آخرى
ابي مكان يكون قريب لهجرة قمران
ويكون متوفر فيه الظروف المناسبة مستشفى سوق دكان جيران ماء صالح للشرب كهرباء اتصالاات.......


الله يفرج عن كل واحد يعطيني معلومات ولايجعل له في دربه عسير إلا تيسر


.

[تاحوف معاصر]

الله ييسر أمركم

ان شاء الله اللي يعرفون المنطقة ما يقصرون يفيدونك . والحمد لله في كل مكان تجد الخدمات اكيد مكان فيه مدارس بيكون فيه حياة . اعتبرها تمشية وعمل في نفس الوقت وخذها بسعة صدر وربك يسهل لمن توكل عليه.

[الحيران421]

شوف هذي المعلومات انا حصلتة في احد المنتديات ويحكي فية قصتة ومرورة هذهي القرية

السلام عليكم ورحمة الله


يوم الجمعة13/4/2012 قررت انا وخوي ابو محمد التوجهة ان شاء الله الى الرياض.. انطلقنا من بيشة الساعة التاسعة والنصف صباحا..


بدأت رحلتنا من معلم من معالم بيشة جبل الصايره.. وكان الهدف من هذا المشوار معرفة كل صغيره وكبيرة عن هذا الطريق الذي اختلفت الاقوال عن جاهزيته.. وفي نفس الوقت لنتمتع بالامطار .. واصلنا على الطريق حتى وصلنا تقاطع طريق وادي الدواسر رنية..(والطريق حتى هذه النقطة طريق جاهز للاستخدام وامن طريق مخطط ويحمل جميع علامات وارشادات السلامة)..


وبعد التقاطع باتجاه الرياض وجدنا الطريق ازفلت ولكن لا يوجد به علامات ارشادية.. وبعد 20~22كم انقطع الازفلت واستمرينا على طريق مردوم.. وقد واجهتنا بعض المصاعب في الطريق بسبب الامطار والسيول التي حفرت الطريق.. واصلنا الرحلة حتى قاربنا من جبل يسمى ابا الاكوان وحسب المعلومات يقال بأن به مركز يسمى عسيله.. واستمرينا في الطريق ننتظر بزوغ الاسفلت..!! المنطقة ممطورة ولله الحمد احياننا نرى بعض الخيام والبدو ولكنهم قله.. واصلنا الطريق وبدأت الهضاب تظهر لنا.. وفي تمام الساعة 11:30 اصابنا بنشر خلفي علما بأن السرعة كانت اكثر من 150كم وتحديدا قرب هضاب كلاخ (حسب الجهاز).. ركبنا الاسبير وانطلقنا وبعد مسافة وبالقرب من هجرة قمران بنشر الاسبير.. وهنا خربت خطة السير وكان لابد من وجود خطة بديلة..


اشار علي خوي ابو محمد بالعودة الى الهجره المجاورة.. واتجهنا بسيارتنا الى هذه الهجرة التي لا يوجد بها الا بقالة وخزان بنزين حاولنا ان نجد عندهم استك او تيوب لأن الكفر لايمكن ان يرقع برقعة التيوبلس الا انه لا يوجد عندهم شيئ كل ما هناك ماطور هواء يحتاج تصليح..!! وجدنا احد الشباب وسألناه عن اقرب مكان يمكن ان يسعفنا الا انه قال لا يوجد مكان الا الوادي او الحصاه ويقصد حصاة قحطان الوادي يبعد 170كم والحصاه 120كم.. عزمنا الرجال وقلنا الله يخلف عليك.. وركب سيارته ومشى دون ان يبادر بالمساعدة او اي خدمة..!!! تعاطف سوداني البقالة معنا وكلم احد المصريين الموجودين وحط العفريته وفك الكفر عله يأتي من يسعفنا بشيمة ولا قيمة الا أن الحال بقى على ما هو عليه.. هذه الهجرة تسمى قمران يوجد بها اقل من 10 بيوت ومدرسة.. طلبنا من المصري ان يتصرف وركب سيارته وغاب عنا وقت ليعود بأحد السعوديين.. طلبنا منه ان يسعفنا بشيمة ولا قيمة فقال يصير خير..!! وكأنة يقول القاع لا تستعجل..!! وبعدها وصل واحد ثاني بسيارة تشبة السيارة الاولى وبرز مع خويه الاول.. قلنا يالربع حن متعطلين ونبي اسعاف.. ركب الاول سيارته وحرك والثاني قال كم تدفعون؟؟ وكأن سؤاله يقول كم معكم!!؟؟ قلنا شفلنا اقرب مكان نجد فيه اسعاف لنا وكم تبي.. قال انت كم تدفع؟؟ قلت يابن الاجواد حنا ما نعرف الديرة اللي بتودينا لها.. قل لنا كم تبي اذا فلوس المشوار معنا رحنا.. طالعني من فوق لي تحت وقال انا مشغول وركب سياته وحرك.. وفي طريقة قابله صاحب سيارة ثانية.. وقفه ورجع معه بمسافة 1كم وجلسوا يراقبونا.. بالصدفة جاء صاحب جمس يعبي بنزين.. قال السوداني ترى هذا مسافر مش من الديرة.. اتجهت له وسلمت عليه وقلت عندنا مشكلة ونبي فزعتك.. قال ابشر بسعدك..


قلنا بشرنا ولا عندنا سبير.. قال ابشر بالسبير وين وجهتكم؟؟ قلنا الرياض قال اعطيكم تلفون شخص تحطون الاسبير عنده اذا خلصتوا منه.. قلنا الا بنروح معك الوادي ونعطيك اسبيرك.. حلف يمين الا تروحن لدربكم وعسى الدنيا فداكم.. بيض الله وجهك يا (صالح ابن عيد الدوسري) اشهد بالله انك تجملت.. قال تقدرون تتجهون بمحاذات ابراج الكهرب لهجرة صيحة وبعدها تلقون الازفلت.. هجرة صيحة تبعد حوالي 30كم من الهجره المشؤمة (قمران).. جمل الله حال من اسعفنا والله لا يجمل حال من قابلنا من هجرة قمران..


ركبنا كفرنا وهل الهايلكسات يطالعونا.. وعنما تحركنا باتجاه الطريق وطالعة في المرياه الا الهايلكسات محركة ورانا.. وعجتهم مكومة.. سميت بالله وتناوشت البنزين وجملنا موترنا الله يجمل حاله.. سبقتهم على الوادي والشعيب واتلااا العهد بهم وراي.. الامطار والسيول معدمه الوادي اللي جيت معه لكن الحمد لله الله ستر.. وصلنا صيحة وركبنا الزفلت و واصلنا رحلتنا حتى كبري مزعل على الخط السريع.. وجدنا امطار وخيرات ولله الحمد وإن شاء الله ان اكرر الرحلة بشرط ان يكون معي الرشاش..


الغريب في الامر ان لوحات سياراتهم مشيوله.. تقول يمكن علشان ساهر لا يصيدهم في المهمل..



استفدنا من الرحلة:


ان لا تصدق ما تسمع


ان كلام المجالس حول طريق الرين بيشة وجهازيته كذب


تعرفنا على رجال اكرمنا بجميلة (والادهى والامر إنه عائلة ولم اخذ بالي منه ولا كان ما خذيت اسبيره)


وفي الختام اتركم مع هذه الصور علها تريحكم بعد ما غثيتكم برحلتي..


الصورة الاخيرة عندكم يا هل الرياض..



تحياتي للجميع


ابو سياف

[ابو ماجد 2]

هلا بك
الله يعينكم والله اني تعاطفت معكم واجتهدت بالبحث بقوقل
ولم اجد الا ان هالهجرة توجد واحدة تتبع لحايل والأخرى لوادي الدواس
ولم اجد الا اخبار متناثره منها اقتبست التالي
بعد توفيق الله تحركت من الرياض مع أخوين فاضلين من هواة الرحلات البرية ومشاهدة المواقع التاريخية وهما الأخ زابن بن محمد بن شثين والأخ فهد بن مسعود بن حزام
وذلك عصر يوم الأربعاء الموافق 22/ 4 /1433هـ
وبعد خروجنا من الرياض مع طريق عقبة القدية أخذنا مع طريق الرين / بيشة الجديد الذي يفلج عروق قنيفذه وسرنا معه بعد أن أدينا صلاة العصر مجتازين كل القرى والمناهل والهجر التابعة لمركز الرين وأذكر من تلك الهجر التي مررنا بها أوشاهدة اسمها في اللوحة قرية شلاح ثم حويمضة فمفرق بعد مسافة جهة اليسار لسر آل كعدة ثم هجرة برودان وهي بينجبال سود في أرض طينية وبيوتها متفرقة أغلبها من الطراز الشعبي القديم تجاوزناها ودخلنا في أرض واسعة تحيط بها الجبال من جهة الجنوب والجنوب الغربي وأجبل متفرقة يمينا وشمالا ، لايزال الطريق فيه اصلاحات ، وعندها دخلنا حدودمركز الحصاة (عماية قديما) وهذا المركز لحاضرة قحطان في تلك الجهة ويتبعه عدد لا يحصى من القرى والهجر القديمة والحديثة بعد مفرق الحصاة بما يقرب من 10 كيلو تقريبا أتانا مفرق يسار يتجه لمركز صيحة ( صيحتان قديما) وهنا يرى مسيل وادي الركا العملاق ، انتهى الاسفلت وبدأنا في طريق ترابي ( ردميه) قبيل غروب الشمس وكان اتجاهنا الى الجنوب الغربي مابين بني موزر و بعد مايقارب من (5) كيلو مترات تراءت لنا أنوار احدى آخر قرى الحصاة المحيطة بها سرنا حتى اجتزنا وادي الارمض وهو واد متوسط وعر ملئ بشجيرات الحرمل وعلى ضفافه أطعس صغيره ثم خلصنا الى واد رغيب كثير الرمث تحف به أجبل متقاودة وذلك عند الساعة السادسة والثلث تقريبا من بعد المغرب
سرنا مع بطن ذلك الوادي وكان يتسع حينا ويضيق حينا آخر بسبب الجبال التي تتخلله وقد كنا قلقين بسبب قلة وقود السيارة وخائفين من أن تعلق السيارة في رباضات الوادي ( التغريز)
مما حد ا بأحد الرفقاء أن يقول مازحا ( وادي ومطبات وتغريز) المهم أننا مررنا بمجموعة من المنازل والغرف الشعبية المتهالكة في طرف شعيب تحف به جبال صغيرة وعلى جانبه آبار نثائلها كالكول منها القديم ومنه الجديد اجتزناها ومنا من يردد
أشهد ان الليل ظلم وديرتهم بعيد
غيبت الامثال من دونهم والفكر تاه
وماهي الا لحظات واذا بأنوار هجرة قمران تظهر لنا وكأننا قد ولدنا من جديد ، انعطفنا يسارا باتجاه الهجرة التي أخذت اسمها من وادي القمرا القريب منه وهو واد شهير بين وادي الركا وحزم الدواسر وسيله يبدأ بفرعين رئيسيين ، أحدهما يأتي من ناحية جبل الضيرين وهضبة خديرة ، والثاني يفترق رأسه مع رأس وادي سلامة ثم يلتقيان ويسيران باتجاه شرقي جنوبي مكونان مجرى واحدا ينتهي جانب نفود الدحي وهو معروف منذ الجاهلية بهذا الاسم ، دخلنا الهجرة وتزودنا بالوقود منها وشرينا بعض الحاجيات ثم تحركنا باتجاه الجنوب قاصدين الهضب على طريق بيشة الجديد المزمع سفلتته ومشينا مسافة خمسين كيلا ثم انعطفنا يمينا لأجل أداء الصلاة جمعا ولأجل المبيت واعداد وجبة العشاء وبعد قضاء الفرض اوقدنا النار وأنزلناعدة الطبخ ( العزبة) من السيارة ومع ايقاد النار
وايضا وجدت هذا الحادث والذي توفي فيه طفل رحمة الله عليه
والخبر قد يخدمك في بعدها عن القويعيه
خيم الحزن يوم أمس على أهالي هجرة قمران التابعة لمحافظة وادي الدواسر حيث لقي طالب يدرس في الصف الأول الابتدائي بمدرسة مدرسة جابر بن عبد الله مصرعه وكانت وفاته مأساوية للغاية حيث سقط من سيارة أحد أقاربه حيث كان برفقته في طريق العودة إلى المنزل من المدرسة إذ انفتح الباب وتدهور الطفل أسفل عجلات السيارة.

وبذل والده وبعض أقاربه محاولات لإنقاذه حيث نقل على الفور لمستشفى الحفيرة التابع لمحافظة القويعية والذي يبعد عن مكان الحادث قرابة 100 كلم

[توكلت على ربي]

تاحوف معاصر (http://www.mekshat.com/vb/member.php?u=223049)

جزاك الله خير

[بتارالذرعان]

ولله ياخوي الله يعينك ويعين الجميع صدق صراحه ولله قهر يعني معلمات من الشرقيه يودنهم الشمال ومن الشمال يجوبنهم الجنوب وياليت كذا بعد الا يقطونها في قلعت وادرين؟ يعني في هجره كحيانه ونجاء المطر ولا العج تلاقي المدرسه من الداخل ومن الخارج تسبح ماء هذا ولله يستر اذا كان البنات ماعندهم امحرم ماقول الله يعين ويعيني على الذهاب الي الدوادمي.

[sameer_1798]

وعليكم السلام ورحمة الله وبركاته ....... والله يعينكم ويبارك فيكم
بصراحة ماعرف ذيك الديار ولاقد سمعت فيها ولكن من كلام اخوي الحيران بحثت عن هجرة صيحة بالجارمن ولقيتها وكذلك هي تبعد حوالي 28 كلم شرق أبار قمران وما ادري ان كان هجرة قمران حول الابيار ام لا
على العموم هذه الاحداثيات اللي بالجارمن وإن شاء الله يجي احد الاخوان يفيدك اكثر
هجرة صيحة :
N 22 08.505
E 044 51.822

ابار قمران :
N 22 03.705
E 044 36.311

[ERIC7]

الله يعينا وياك وييسر امورك انا عن نفسي تارك المره تقر في بيتها والا هالمذله كم بيعطونها يعني 7000
لو حسبتها حق السكن والتنقل والغثا مايسوى ولا يجيب همه ولا راح يصفالها من راتبها شي يسوى
فما بالك بمنطقه مقطوعه ومشوار بعيد عن الديره اللي انت شغال فيها وبعض الديار للاسف الرجال مايامن على نفسه فيها فمابالك يترك اهله فيها لحالهم والله لو هي محتاجه ، آمن واشرف لها تشتغل اي شغله اقل من مستواها وتحصيلها واقل راتب ولا ذل الوزاره لها ول زوجها او وليها
لاكن مانقول الا الله يعينك على مبتلاك

[توكلت على ربي]

ERIC7 (http://www.mekshat.com/vb/member.php?u=102357)

الأمر له ضروفه وأسراره
والخطأ الاول والاخير من الوزارة المفروض كل معلمة في منطقتها
ليش يودون معلمات الشمال للجنوب ومعلمات الشرق للغرب؟؟؟

لكن الرسول صلى الله عليه وسلم قالها:
اللهم من ولي من أمر أمتي شيء فشدد عليهم فاشدد عليه

هم شددوا علينا وحنا مالنا أي حيلة مالنا أي اختيار يانمشي معاهم يااقعد في مشكلتك

والحين حنا في داخل الزجاجة ومن الحكمة أني أخفف الموضوع أدور حلول كأن تكون منطقة قريبة لمنطقة التعيين والأمر على ماقالوا سنة وحدة ثم تطلب النقل
ويجعل الله بعد العسر يسر

[توكلت على ربي]

الحيران421 (http://www.mekshat.com/vb/member.php?u=155274)

جزاك الله خييير
بس هو جاي من بيشة؟

[عكشات]

الله يكون في العون والمعونه ونعم من توكلت عليه بتوفيق ان شاء الله

[magadasd]

ايش اسم المدرسة

[العتيبي111]

الله يكون بعونكم و يسهل امركم

[GABER65]

الله يعيننا وياكم

[sameer_1798]

أخوي اكتب موضوع في خيمة الرحلات البرية او اطلب بنقل موضوعك
اكيد الكشاته وصلو لها ويفيدونك افضل

http://www.mekshat.com/vb/showthread.php?t=502447&langid=4

[توكلت على ربي]

ابو ماجد 2 (http://www.mekshat.com/vb/member.php?u=38293)

جزاك الله خير

[salih100]

بحكم مروري منها ابي افيدك عن الطريق لها وانت جاي من الرياض بأتجاه الرين وبعد ما تتعدا الرين تقريباً ب135 يجيك مفرق قريه صيحه ع اليسار تمشي على الازفلت مسافت 60 كلم تزيد او تنقص شوي ثم تجيك هجرة صيحه وفيها ينتهي الازفلت وتمشي مع عمدان الكهرباء لمسافة 30 كلم تقريبا وتجيك هجرة قمران

فيه طريق رملي بس ما انصحك فيه لانه تغريز ويسلكونه المهربين لانه يختصر

هجرة قمران ما بها الا بقاله والي فيها سوداني طيب والله وعنده تانكي بانزين وفيها كم بيت بس ما ادري كم

واي خدمه انا جاهز ولو تبيني اخاويك ع شان تضمن عدم الضياع انا جاهز وابشر بسعدك وهذا جوالي 0590115118

[ابو الشبرميات]

توكلت على ربي


اعجبني معرفك كثيراً
ومن توكل على الله كفاه
اسال الله ان يعيينا واياكم ويسهل امورنا واموركم وكل مسلم
واحيي الاخ saleh100
على عرضه وفزعته غير المستغربة من المكشاتيين
الله يجزاه خير
...

[راقي المعالي]

مرحبا اخوي
وسجلت بالمنتدى عشان اقدر اقدم اللي يفيدك باذن الله

قمران هجره صغيره مره يا دوب بقاله وطرمبة بنزين زي ما قالو الاخوان
واكثر اللي حولها بدو من اهل الحلال من قبيله الدواسر
وقريب منها هجره العبده للشيابين من عتيبه ونفس الوضع
والجوال ما فيها جوال الا في بعض المواقع يروحون يكلمون منها ع حسب خبري من سنه تقريبا

وما اتوقع تلقون سكن فيها والله اعلم

واقرب قرية لها زي ما قالو الاخوان صيحه
وفيه عسيلة بس بعيد وفيه الحصاه بس كلها هجر

والخط بوضحه لك في الخريطة المرفقه

واقرب قرى لك صيحه وقرى صغار ما اتوقع تلقا فيها سكن او الرين تسكن مفروش وتلقا نقل يودي لها
ويمكن الاخوان يفيدون اكثر مني
والله يوفقك
http://im12.gulfup.com/2012-09-02/1346587503531.jpg (http://www.gulfup.com/show/X2cs4mw33fh1cg)

[الدوسري2010]

هجره قمران شمال وادي الدواسر تقريبا 190 كم اذا معك قارمن حط على الخارطه بيطلع عندك هجره اسمها السواده (( وتسمى صيحه)) قمران غربها حوالي 28 كم امسك خط القويعيه بيشه الجديد يسمى خط الجيش الخط قريب من السواده افرق وخل عينك مع القارمن (( من سال ماضاع وابشر بالوناسه ))

[الواهبي]

الله يعينك
والله ان فرقا قمران عيد.. اشهد اني تعطلت عندهم ولا تجملو في وزودن على ذلك اطردوني يبون يشلحوني شافو السيارة جديدة وقالوا ان وجهي وجه نعمه:D..

الله يصلح الحال لكن اذا نويت اسكن عسيله اشوف فيها عمارة كبيره مدري مدرسة ولا شقق مفروشة:) ...

الموضوع مبطي اربها قد انتهت مشكلتك وانتهت فترت التعين الاجباري..

مدري له احس ان وزارة التعليم عندنا اشبه ما تكون بقطاع عسكري من ايام هتلر..
لازم تجنيد اجباري اقصد تعين اجباري:D.. يا ناس وحده حدتها الضروف على العمل بعد التعب والدراسة علشان تستر حالها ومن تعول وتحذفون بها في ديرة ما فيها والي..

ياناس تقدرون تشغلون المستقدمين في ذا الديار وهم يعرفون انهم ما جاو من ديرتهم الا يتحملون المشقة والتعب..
عجيييب امكرم بنيياتنا تحذفون بهم في الهجر والاجانب تكرمونهم في المدينة.. عجييييييب امرك يا وزارة:mad:..

للجميع فائق التحيا

ابو سياف

[الدوسري2010]

هههههه الله يوفقك

[ذيب حضن]

يابنت يلي بين قمران ومغيب = مغزل بيدك او مغزلن تاسمينه