مشروع تركيب مكينة اكستيرا على باترول ربع .. )

[دحيم الحربي]

السلام عليكم ورحمه الله وبركاته

شالاخبار والعلوم ؟

براسي فكره وهي تركيب مكينة اكستيرا على باترول ربع 2009 !

بس ابي مساعده منكم .. :

وين القى المكينه وكم تسوى النظيفه ؟
وتصقط على طول ولا لازم اغير بعض الاشياء ؟
وودي اركب عليه قير اكستيرا ان حصل كم يسوى القير ؟

واذا كان احد يعرف كلل التفاصيل يسعفنا بالقطع والتكلفه تكفون

وتراي مالقيت احسن من منتداكم ناس حريفه وتعرف للنيسان والف شكر مقدما .. :good2:

[الأحوذ]

بالتوفيق ، ما لي خبره بالتعديل لكن ما فكرت بمكينة الفتك..

[H_S_L_T]

دامك تبي ترهيم ركب مكينة اقوى ومجربة وترهيمها سهل , واذا تبي شيء استخدام عادي بيع موترك واشر اكستيرا :D
حتى لو شكله ماهو زين بس اللي يعرف ينصب يضبطه :good2:

[أبو أسامة]

نصيحة تراك بتخسر دراهمك بس يا اخي مكينة الاكس تيرا 4000 والباترول 4500 يعني اقوى بالعزم على السرعات الخفيفة بالذات مع استخدام الدبل .... نعم مكينة الاكس تيرا اقوى بالقدرة الحصانية ... لكن اقرب مثال شف هل شاصات التايوتا يتمنون ترجع مكينة 4500 على الشاص التايوتا .... نصيحة خلك على مجنونك لا يجيك اجن منه وإذا مصر ركب مكينة فتك صحيح غالية لكن بالنهاية قوة مضمونة و صرفية اقل وتتطبق على نفس القير والكراسي والضفيرة يعني بدون قص بس فك وركب ... وبالتوفيق..

[السناعيس .f16]

نصيحة تراك بتخسر دراهمك بس يا اخي مكينة الاكس تيرا 4000 والباترول 4500 يعني اقوى بالعزم على السرعات الخفيفة بالذات مع استخدام الدبل .... نعم مكينة الاكس تيرا اقوى بالقدرة الحصانية ... لكن اقرب مثال شف هل شاصات التايوتا يتمنون ترجع مكينة 4500 على الشاص التايوتا .... نصيحة خلك على مجنونك لا يجيك اجن منه وإذا مصر ركب مكينة فتك صحيح غالية لكن بالنهاية قوة مضمونة و صرفية اقل وتتطبق على نفس القير والكراسي والضفيرة يعني بدون قص بس فك وركب ... وبالتوفيق..
كان نفس ردي

[الأحوذ]

من خلال اختيارك لمكينة الاكستيرا يتضح انك تبي استعمال عادي ، و في الحاله ذي يكفي لو تركب هوائيات و برمجه و ترفيع بسيط...

[دحيم الحربي]

قريت ردودكم .. لاكني جان الادهى والامر

انا على بالي ترهيمه على كيفي رحت لواحد بخيص راعي تشاليح ودايم يرهم مواتر

طلع يبي شغل وبلاوي ووصلات وخرابيط غير المكينه وشغلته ووجع راس وحسّب لي كلل شي

الدعوى به حول 30 الف غير الموتر اللي حسافه تهريمه وقال لي اذا خلص الترهيم بيطلع لك مشاكل بعده

فعلشان تسذا قررت ادور اكستيرا مستعمل 2010 او 2011 ازين من اني ارهم واوجع راسي "

شكرا على تفاعلكم .. :burnout2:

[السناعيس .f16]

السلام عليكم ورحمة الله وبركاته
صباح الخير بس متاخر صح

((المثل يقول اذا كليت بصل اشبع بصل))
((المثل يقول اذا ضربت اوجع واذا اطعمت اشبع))
انت الحين خربته تبي ترهم رهم ترهيم جامد ترهيم طناخه
اول نقطه تروح لتشليح و تشتري ربع بترول بدي
ثاني نقطه تطلع لحد الكباتن مثل الصمعاني او السويداني او الرشيد تخليه يرهم لك LS 5700
يعني مكينة كابرس 8سرندل وشف ما راح تكلف اكثر من ترهيم لمكينة الاكستيراء
بعدين الاكستيراء 4000و الربع 4500ليه تبي تحط 4000على ربع لا تنساء ان الربع اثقل من الاكستيراء يعني لو تركب مكينة الاكستيراء على الربع طلع بايخ
\


هاذي نصيحه و انت بكيفك

[خبايا انسان]

مكينة الباترول 4500 فيها حقها ,, ركب لها هدرز ممتاز وفلتر , وتعطيك اداء مقبول