يااهل الرياض وشي الاماكن الزينة عندكم ...

[الوهم]

السلام عليكم

ياجماعة الخير

انا عندي مشوار بكرا الظهر الى الرياض وسأقضي الثلاثاء والاربعاء في الرياض

لكن ماادري وين الاماكن الزينة اللي فيها وناسة

انا رحت كم مرة للرياض بس الصراحة طفشت لاني ماادل ولا اعرف اماكن استانس فيها

ياليت تساعدوننا ياجماعة الخير

[غالي]

مثل وشو الاماكن بر والا كفي والا وشو؟ ياليتك تحدد
وهل انت عزوبي والا عائله ؟ ياليتك بعد تحدد علشان نقدر نفيدك انشاء الله قبل لانطلع ننام :)

[almohab]

اخي الكريم

حياك الله في الرياض

اضافه لما ذكره الاخ الكريم غالي .. هل تريد امكان العاب .. مطاعم .. مقاهي ..

حدد ما تريد وان شاء الله تعجبك الرياض

[فيـ27ـروخ]

اذا كنت تبغى سوق اواني منزليه (العويس _العليا_)
واذا تبغا تراثي رح (الزل _الديره_)
محل بنادق (الرمايه _التخصصي_)
تبغى متاحف رح (متحف صقر الجزيره_الدائري الشرقي)
تبغى منتزهات رح منتزهات الثمامه(طريق الثمامه)
تبغى الطيور بانواعها رح(سوق الحمام جنوب الرياض ملاصق مصلخ الخرفان)
(واذا كانبعيد عليك بعليك بفيفا سوق حمام ثاني طريق الستين بعد الكبري مع الثلاثين)
(محبك اخوك فيـ27ـروخ)(الزلفيzulfi)

[الملتاااااااع]

اخوى الفاضل \ الوهم

فيه اماكن كثيره للعزوبيه ...

في الثمامه والطعوس ويوجد أماكن ترفيه بالثمامه كثيره ...

في قريه ثلجيه بطريق الملك عبدالله والله مايسعني اسمهاا الأن

في شارع التحليه كوفى شوبات يوجد اماكن للجلوس في جو شاعري ركز بذي جو شاعرى ....

فيه بالتخصصي بجنب العزيزيه بنده حديقة حيوان مصغره جميله جداااا

وأذا كنت هاوى البر فيه شعيب قريب للرياض اسمه شعيب العينيه والجبيله على طريق القصيم القديم فهو شعيب جميل وقريب من الرياض ...

أما اذا كنت معك عائله ففي ..

عدة اسواق والله اني ناوي اخسرك واجد ..

اسواق طيبه \ العويس \ الأندلس \ القريه الشعبيه \ العليا مول \ الرياض مول \سوق حجاب ؟؟؟؟\ فيصل مول

وفي منتزهات للعوائل ...
قرية الثمامه \ البحيره \ حديقة الوطن \ منتزه السلام \ حديقة الحيوان \ حديقة مكتبة الملك عبدالعزيز

والملاهي للأطفال ...

ملاهي الخيمه .. ملاهي البراجون ... ملاهي تولان ...

وارجو ان ماقصرت عليك بشى اخوى الوهم ...
باقي عاد مواقعهااا اخوى من سئل ماتاه احفظ الأسامى ومنت بضائع ..

[شبح الصحراء]

إسأل عن دوار العويضة في الرياض فيه ما لذ وطاب من المتنزهات والأسواق المعروضة على الهواء الطلق والألعاب النارية :hot: ( لا يفوتك عرض الدلافين في فانتزي لاند ).


حديقة حيوانات الرياض من أجمل حدائق الحيوان في الشرق الأوسط فلا تفوتك :butt3: .

حديقة جبل مخروم الرائعة :) .


الأسواق ويا عيني على الأسواق ساكو أكسترا الكترو العليان وكل عجائب التقنية الحديثة وأغراض البر والإلكترونيات المدهشة تجدها في أسواق الرياض :type: .


البطحاء ومافيها من عجائب وغرائب :bounce: .


قصر المصمك والمتحف التاريخي والمربع :good: .


متحف صقر الجزيرة للطيران ( على الدائري الشرقي بالقرب من مخرج 10) فيه أحدث الطائرات الحربية اف 15 وطائرات حربية أخرى وطائرات من الحرب العالمية الثانية ، وتستطيع ركوب طائرة الملك عبد العزيز يرحمه الله ، انا ركبت طائرة الملك عبد العزيز :) هههههههههههه يا حظي :p .


الجسر المعلق يستحق الزيارة .


وجبة عشاء فاخرة في بلورة برج الفيصلية المذهل :dance: .


سوق المعيقيلية وسوق الزل وما فيهما من التراثيات والتحف :BUTT1: .


والمزيد مما لا تسعفني فيه ذاكرتي ولكن الرياض مدينة رائعة وتستحق الزيارة وأتمنى لك رحلة ممتعة وسفراً موفقاً .

[اخت رجال]

حياك الله في الرياض اسفرت وانورت :D
ولا ازيد على كلام الاخوان
تبي مطاعم عندك شارع التحليه طول بعرض فيه افخم مطاعم الرياض اذا تبي لبناني عند مطعم عبد الوهاب فرع للي في لبنان ان كانك قد رحت لبنان :) وعندك الريف اللبناني افضل مطعمين في الاكل اللبناني
واذا تبي ايطالي عندك الريف الايطالي حلو بعد
واذا تبي بحري لايفوتك في مطعم اسماك النافوره عندهم بوفيه كل ويكند رهيييييييييب
اضافه على ( قلوب) في الفيصليه بالاضافه الى سبازيو في المملكه الدور 77 اذا انت من هواة ناطحات السحاب :D
او عندك البرازيلي بعد فخم ولا تفوتك الرقصصه البرازيليه :D

لو معك عائله ممكن توديهم للحكير لاند او ستار ستي طبعا هذولي ملاهي :o واذا تبي تصير معهم ممكن تستاجرون شاليه في المرسى وكلهم على صفه وحده
بالنسبه لعالم الثلج الحين الفتره الصباحيه للرجال والعصر للحريم
فيه اشياء كثيره بس انت ياليت تحدد للعزاب والا عوائل ;)

[الملتاااااااع]

شكل الرجااااااال وصل الرياض ورجع وحنا نوصف ماعندنا احد ؟؟؟؟

[فتى طويق]

وش جاكم يا أهل الرياض شقيتو القربه على طول أرررررركدوو:dance: وخصوصا (ملتاع/ فيروخ 27/أخت رجال/شبح الصحراء)لاتفشلونا:no2: :no2: خلونا نعرف وشو من لحية ونعلمه اللي يبي ............. لويبي نتمشى به ماعندنا مانع.:redcar:

[أبومناحي]

كانك بتروح الرياض عائله

لايردك ألا قريه الثمامه

[حمد808]

اقول عندك مطاعم الرومانسية للمثلوثة
ولا الناضج
ولا قصر الأجداد تراثي وممتاز في حي السلام شرق الرياض
خذ مدفون نعيمي
واحمد ربك
واترك عنك بربسة لبنان وايطاليا

[ابوعبيده]

دامكم يا اهل الرياض جبيوا العيد والدعوه خنبقه خذ يالغالي :

1 معلم الرياض الكبير حراج بن قاسم ..
2/ سوق عتيقه
3/ سوق الكمبيوتر الصالحيه
4/ مطعم عالم البهارات في العليا ,,
والباقي لعطيتنا خبر عن وصولك بس هذا تشويق والزبده بعدين ..

[ابوسليمان119]

ههههههههههههههههههههههههه

يا حليلكم والله ويا حليل علومكم

تعجبوني والله

[الكونترولCONTROL]

عندي احسن ثلاث اماكن بالرياض و لا يهونون الاخوان :
1- تمسك خط القصيم و تمشي 350 كم !!!! و تلقى كل شي حلو يا حلو !!!!!!!!!!
-------------------------------------------------
2- تمسك خط الشرقية و تمشي 350 كم و تلقى البحر و العلم الطيب بس حاول تنام الى الظهر عن الحر !!!!!
-------------------------------------------------
3- تمسك خط مكة و تعتمر و تدعي لنا !!!!!!! و لا تحاول تجرب الطائف !!!!!! انتهت من زمان !!
======================================
الا اذا عندكم احد ثقيل ( عسى ربي يفرج لكل مسلم ) فعندنا بالرياض عدة محلات لمشي الحوامل
و كذلك عدة محلات للتخييم الليلي في المخططات الجديدة !!!!!!!!
هذا كل اللي عندنا بالرياض يا الغالي !!!!!!!!!!

[ابن الصحراء]

انا رحت الرياض ومافيها شيء يذكر الا العلياء ذبحونا فيها
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[الوهم]

غالي
المحب
فيروخ
الملتاع
شبح الصحراء
اخت رجال
فتى طويق
ابو مناحي
حمد
ابو عبيدة
مقلوب بالعكس
الكنترول
ابن الصحراء


يعطيكم العافية ولاقصرتوا

رحنا للرياض وجينا ولله الحمد لكن الوقت مااسعفنا اننا نقضي بها وقت وماقدرت اتابعكم بالمنتدى لضيق الوقت

لكن المرة الجاية راح اتبع نصائحكم وياليت تزيدونها شوي ومواقعها

نبي شي فيه تجمعات ووناسة

للمعلومية انا اروح عزابي وابي اماكن للعزوبية فيها وناسة وفلة حجاج

لكن مافيه مانع لو دليتوني على اماكن العوائل يمكن يصدف ان يكون معي عائلة قريبا

على العموم يعطيكم العافية كلكم على المجهود من بعض الاخوة الذين وفوا وكفوا

الصراحة احرجتوني بطيبكم