يامهندسين قير الهدد فيه ونه مزعجتني وش اسوي

[جداف]

السلام عليكم ورحمة الله وبركاته

كيف حالكم ان شاء الله بخير
عندي هدد مديل 2000 مركب عليه قير 2003 على حسب كلام اللي شريته منه
يقول الاول فجاه جيم ماعاد يعشق

المهم الحين عندي صوت ونه بهالقير مزعجتني وخايف منها
وديته ورشه وقالو لي ان فيه فضاوه بالعامود بس خلها احسن لك
لو فكيناه نزينه بس ما نضمن لك التروس يمكن يطلع فيها صوت

والحين اسمع فيه طقه اذا قومته مدري وش سالفته
ياليت تفيدوني او تدلوني على ورشه حلوه بالرياض للقيور وخرابتها


بنتظار ردكم يامهندسين

[ابوراكان تبوك]

من كلام المهندس اللي عندك صوت الرمانات اذا دعست كلتش والسيارة واقفه يروح اذا كان كذا ماعليك منه وسبب هذه المشكله عدم تغيير الزيت او الاستهلاك الزائد ( انت غير زيت القير احتياط اذا بتستخدمه بحالته )
ولا تفك القير الا عند مهندس شاطر لو تدفع زياده لأن قليل اللي يظبطه
الطقه اللي على بدايه القومه دايم تحصل من عمود الدوران شحمه عند بنشري وان شاء الله تروح انا مثلك كل ماتطلع الطقه اشحم عمود الدوران وتروح

[ابوسمرى]

مساء الخير
انا ماعرف ورشه بس دام القير يون تأكد من الزيت لايكون محترق لان الزيت المحترق مع الخط الطويل والحراره يجيم الهلال ويخرب القير ....

[ls1.5700]

في بعض الاحيان تكون الونه من الدبل وتفكر انها من القير لاازم المهندس
الي يفحص موترك ويحدده مضبوط
على العموم الونه تكون في بعض الاحيان من الرمان او حكه في التروس
او الزيت خفيف
حط له زيت 140
بنسبه الطقعه الي عند التقويمه هذى الصليب غيره اذا كان خربان واجد
او شحمه
ارجو اني افدتك اخوي العزيز

[جداف]

لا الزين جديد توني حاطه ولا تغير الصوت

طيب وش المهندس اللي مشهور بهالقيور بالرياض
اروح افحصه عنده

[هبوب ال شمال]

هلا اخوي اذا كانت الطقه تسمعها في التعشيقات فقط مثال اذا قومت الموتر وغيرته من الاول للثاني تطلع طقه او اذا رجعت من الثالث للثاني تسمعها ايضا
يعني ما تسمعها الا بالتغيرات فإن السبب من الكارونه فيها فضاوة وتعتبر طبيعية
ولا تشيل لها بال ولا لها ضرر ان شاء الله

[جداف]

لا بس مع اول قومه للموتر والا باقي التغييرات ما اسمعها

رحت اليوم الصناعيه عند العتيبي حق القيور وفحصه قال الدبل هو سبب الصوت مثل ما ذكر اخونا

عاد يقول هو ماله ضرر مجرد صوت واذا تبي يروح لازم تغير التروس والا تركب جديد والصراحه غالي

انا الصوت مسبب لي ضيقة صدر ما احب صوت بالسياره
حسيتني اكرها ولو بزينها غالي يقول يمكن يكلف 2000

وش شوركم ياجماعه

[هبوب ال شمال]

هلا اخوي مجداف انا انصحك تصلحه وان شاء الله تساهيل ومن ناحية
الشغل انصحك توديه لابو نايف تخصص دبلات وعنده ان شاء الله
القطع اللي تبيها وشغله مضمون وتلقى رقمه اذا بحثت عنه بالنت
على طول واعذرني ما اقدر انزل رقمه

[mekshaat]

التروس عندك فيها احتكاك والامتكسره وهل الزيت اللي حطيته
اصلي وش نوعه عموما لو وضبت أفضل لك خصوصا كانك راعي
بر بتحتاجه أو انك تجرب تستخدم معالج التروس يغلف الطبقه
المتآكله ويسوي حمايه يمكن ينفع معك لكن يمكن يفيدك الاخ
أصيل حجازي اكثر لو مر على موضوعك.

[جداف]

الله يعافيكم على الرد وبنتظار احد مريت عليه هالتجربه ليفيدنا اكثر

[شعيب المسمى]

ياخي كانه من الدبل ركب فرار وانتهى الموضوع ولابغيت الدبل اشبكهم تلقاه عند السليماني فالغرابي

[الششقاوي]

اخوي المشكله هذي مرت علي في gxr 1998

كانت فيه ونه خفيفه ومع الوقت بدت تزوود وفكيت القير وغيرت الرمانات والدبل غيرت الرمانات وكان بيني وبينهم اتفاق اذا ماراحت الونه ترجع لي قروووشي كامله مع سعر القطع

ولا راح صوت الونه وقالو وزنية عموووود ونفس المشكله واخر شي مريت لي ورشه وقال لي هذا الدبل لازم يتغير وبالفعل طلع هو سبب الونه والدبل اخذته ب 3000ريال من التشليح لموديل 2003 الكلام هذا في شهر 7

هذا والله اعلم بالمشكلة الي عندك ولو تقدر تسجل الصوت ويطلع واضح ممكن الاخوان يفيدونك اكثر

اما سالفة الفرار يفصل الدبل فهو مايفصله الفرار يفصل الكرونه الاماميه العمود مشبوك في الدبل