الفزعة يا أهل الخبرة صوت طقطقة في الفحمات

[اخوهند]

السلام عليكم

ياليت يفيدونا اهل الخبرة في الصوت اللي يطلع بعد تغيير الفحمات الأمامية مع المطبات الخفيفة ويختفي مع الضغط على البريك .
مع إني عندي توقعين وما جربتهن إلى هالحين وهي :

1- الصاجات الخفيفة اللي تجي لازقه خلف الفحمات بين الفحمة والكليبر يمكن تحتاج شوي عفط عشان ما يكون بينها وبين الفحمات والكليبر فراغ .

2- خوابير الكليبر اللي تثبت الفحمات وفي آخرها (تيلة) او مشكوبية اسيام , فيها رقلة من شد بلد أتوقع لو نحط عليها شطرطون سباكة ونشحمها يمكن تضبط .

أتمنى من اللي مرت عليه الحالة ولقى لها علاج يفيدنا . علماً أن السيارة اللي معي فورتشنر 2010

وتقبلوا تحياتي

[ls1.5700]

انا مع الخيار رقم واحد

[اخوهند]

للرفع الله يرفع قدركم

وياليت يفيدونا أهل الخبرة وترى هالمشكلة تجي في السيارات التالية حسب علمي :

(لاند كروزر - برادو - اف جي - فورتشنر - هايلكس - افالون - اوريون) وغيرها من السيارات اللي ما تحتاج فك الكليبر عند تغيير الفحمات . فقط تحتاج لسحب الخوابير ثم اخراج الفحمات .

[اخوهند]

أحبتي بعد البحث والتقصي والتجارب لمشكلة طقطقة الفحمات عند المطبات الصغيرة وعيون القطط والردميات تم التوصل إلى حل للمشكلة وهي :

الصوت يصدر من (الخوابير) يعني المسامير اللي تثبّت الفحمات في الكليبر لأنها بعد فترة من الزمن تتآكل ويصير بينها وبين الفتحة اللي تدخل فيها داخل الكليبر فضاوة وتتحرك وتصدر الصوت .

والحل بنصف ريال وهو إنك تجيب (تيب) سباكة مثل هذا اللي في الصورة


http://www.mekshat.com/pix/upload06/images/2012/09/mk36249_one.jpg

وتضعه على أطراف الخوابير اللي تدخل في الكليبر عشان تمنع الفضاوة في الأماكن المشار إليها بالأسهم هنا
(ترى الصورة ملطوشة من موضوع للأخ عبدالله العمرو ووضعت للتوضيح )


http://www.mekshat.com/pix/upload06/images/2012/09/mk36249_three.jpg

ثم ترجع الخوابير لأماكنها وتركّب (التيلة) يعني المشكوبية في نهاية الخوابير

وتمتع بقيادة بدون أصوات

هذا ما توصلت له واستفدت فإن أصبت فمن الله وإن أخطأت فمن نفسي والشيطان

ولكم تحياتي

[hamido]

فيه تيله تجي تمسك الفحمتين وتشدهن اكيد ماركبوهن سي السيم تاكد منه اكيد طايح

[YUKON_GMC]

بس اعتقد اذا حطيت شطرطون يجيم الكليبر ولايتحرك ان مسك مافك وان فك مامسك ؟؟

لأن الكليبر يتحرك مع دعس الفرامل والخوابير قواعد يمشي عليها الكليبر اثناء دعس الفراامل

[اخوهند]

فيه تيله تجي تمسك الفحمتين وتشدهن اكيد ماركبوهن سي السيم تاكد منه اكيد طايح

التيلة موجودة بس سيمها يختلف عن اللاند كروز تجي تيلتين مفصولة ماتجي طويلة تشبك الثنتين مع بعض
ولا هنت على المرور


بس اعتقد اذا حطيت شطرطون يجيم الكليبر ولايتحرك ان مسك مافك وان فك مامسك ؟؟

لأن الكليبر يتحرك مع دعس الفرامل والخوابير قواعد يمشي عليها الكليبر اثناء دعس الفراامل



كلامك صحيح ولذلك يجب الانتباه الى عدم تكثير التيب عشان ما يعض
ولو لاحظت الموديلات القديمة من المرسيدس تجي ربلتين في أطراف الخوابير لمنع الإهتزاز
وبيض الله وجهك على اهتمامك

[ابونومان]

مشكووووووووووووور بس يمكن حل مؤقت