أحتاج مشورتكم ومساعدتكم في قير سيارتي

[شاص]

السلام عليكم .. عندي فورد قيره تماتيك وأنا اللي فاكه ومحافظ على القير وصيانته .. المهم قبل كم يوم لاحظت عدم انتظام في التغييرات وبعدها صار يغير من الأول للثاني للثالث وإذا جاء الرابع يفضى ويقعد يحن حتى أشغل الأوفر درايف أو أرده لـ D2 ولاحظت ظهور صوت مثل الونة خفيف إذا عشقته ولمبة الأوفر درايف تقعد تأشر .. في ظنكم وش المشكلة ؟؟ وهل هناك ورشة تنصحون بها للقيور بالرياض ؟؟

[يكفيني نظرة]

هل غيرت الزيت والفلتر للقير؟؟

[شاص]

يكفيني نظره حياك الله .. الزيت والفلتر مغيره قبل أقل من سنة والموتر ما أمشي عليه كثير

[يكفيني نظرة]

الله يحييك ...
زيت قير الفورد يغير كل 40 الف على كلام الوكاله ولكن انت غيره الان وشيك على حساسات القير اعتقد انه منهن اذا ماضبط بعد التغيير..

[رفيع المقام]

دامك محافظ على القير وصيانته فالمشكله يالغالي من حساس الاوفر درايف على بدي القير الخارجي سعره ٤٠ريال وكااااله وتركيبه سهل..
ولكي تقطع الشك باليقين افحص كمبيوتر واللمبة تؤشر لانها اذا كانت طافيه ما يطلعها الكمبيوتر ..

[ابوراكان تبوك]

يا رجل لاتشيل هم قير الفورد مايخرب بسرعه ومثل ما افادك اخوي رفيع المقام حساس الاوفر درايف هو اللي يلعب بالقير فيه حساس خارجي في الجرم من برا وفيه حساس داخل القير افحص كمبيوتر قبل كل شيء والله ييسر أمرك

[mekshaat]

غير زيت القير واذا شفت الرايش كثير على مغناطيس الكارتير
اعرف ان الكلتشات معدومه وبعد ماتعبيه زيت راح تفرط الكلتشات
اذا هي سبب المشكله ومالك الا توضب وهذا الكلام من تجربه مع قير
الفورد وفي الغالب أول ماتبدا المشكله من التعشيقه الرابعه ماتلقم
أو تفوت.

[شاص]

يكفيني نظرة ، رفيع المقام ، أبوراكان ، مكشات .. شكرا لمروركم وتفاعلكم

تنصحون بورشة معينة للفورد بالرياض سواء لفحص الكمبيوتر أو تغيير الحساسات والزيت ؟

[mekshaat]

صارت معي نفس مشكلتك وطلع القير يحتاج توضيب
فيه مهندس سعودي عنده ورشه بالرياض وعنده مهندس
فلبيني خابره يوضب الفورد والكابرس والياباني يعني عنده
خبره بتوضيب القيور ويعطي ضمان على شغل اليد وبرسل
لك رقم المهندس السعودي وشاوره بالموضوع وبيعلمك سبب
المشكله.

[ls1.5700]

الله والعالم انها كلتشات محروقه
الله يعينك بس تاكد قبل
افحصه كمبيوتر
مثل ماقالولك الشباب

[ملك الفكتوريا]

عندي نفس المشكلة بالاول والثاني


اشتريت حساسين لهم علاقة بالتغييرات


بكره الصبح بشتغل عليهم واعطيك خبر

[شاص]

مكشات .. مشكور وصل الرقم

ls15700 .. جزاك الله خير نفحص ونشوف

ملك الفكتوريا .. بانتظار النتائج الله ييسر أمرك