غلاء اسعار الصقور

[ايزاك]

السلام عليكم ورحمت الله وبركاته. اسعد الله اوقاتكم بكل خير نلاحظ اخواني السنه هاذي خاصه فيه غلاء باسعار الصقور والمشكله ان الصيد صار قليل والحمايه الفطريه تهدد والقنوص صارو اكثر من الصيد ومع كل هاذي الظروف غلاء بالاسعار الصقور على ان فيه صقور تفرظ نفسها بالغلاء من ناحية اللون والسبق لاكن فيه صقور متوسطه صارت السنه هاذي دبل او اكثر وانا واحد مااعرف السبب ؟؟؟؟؟؟.

[(هزاع)]

نحمد الله عزوجل على كل حال
اعوذبالله من الغلا
الله يصلح احوال المسلمين

[قرناس حوران]

السلام عليكم ورحمه الله وبركاته
كلامك صحيح وترا كل شي صار غالي مهوبالطيور بس عسى الله ييسر الحال
وشاكر لك على الموضوع

[اقدم صقار]

عليكم السلام ورحمة الله وبركاته


اخوي انت ما شفت الا الطيور


كل شي غاالي الله لا يبلانا


ولاكن عسى ربك يعين

[أبودغيم]

صحيح كلامك ياخوي

بس هالايام الدنيا كلها شابه فوووق

كل شى غالى

يارجال حتي الانترنت صار غالى ههههههه

[خيال سهيل]

الغلا سببه الطمع واقصد بكذا التجار ولا النظريه الأقتصاديه الشهيره تقول العرض والطلب يتحكم بسعر البضاعه
والبضاعه ماليه السوق ومع كذا غاليه فالسبب طمع التجار وعدم مبالاه من المستهلك
وانا اتكلم عن جميع البضايع مو بس الطيور
لما شكي لعمر ابن الخطاب رض الله عنه وارضاه غلاء اللحم قال ارخصوه انتم قالو وكيف قال دعوه
لهم فيرخصونه لكم لاكن حنا عندنا شوي ضعف في عملية التسوق والتسويق

اما الطيور عاد موضوعها متشعب شوي لاكن على كثر شركات الأنتاج والي يستوردون الوحوش من
شرق وشمال الا انها كلمالها تغلا طيب ليش ؟؟؟؟؟
لحد يقول طمع ولا حد يقول كل شي غالي لأن اي بضاعه تتكلم فيها ليش غاليه تقول كل شي غالي طيب وبعدين
تجلس ترفعو بالأسعار كل واحد وعلى كيفه ؟؟؟؟؟

[شهاب 111]

أستغفر الله . أستغفر الله . أستغفر الله

[تميم2222]

مارفع سعر الطيور الا الاسترحات .... والسوق هو المحك الحقيقي لسعر الطير...حتى الوحوش والفروخ ... سعرها مقبول فيه والشراء فيه يتطلب خبره

[عيون النسر]

اللهم يسر ولا تعسر وهون علينا من
امور الدنيا والاخرة

[ايزاك]

اشكركم على المرور لاكن هل من اسباب غلاء الصقور قلة عرض الفروخ والوحش في الاسواق وكثرة الطلب

[عاذي]

الحمد والشكر لله وحده لاشريك له الله يكفينا شر غلا الاسعار في كل شيئ .

[ايزاك]

امين يارب العالمين

[حامد الحنيني]

السلام عليكم ورحمة الله وبركاته


بشكل عام


بداية الموسم ترتفع اسعار الطيور وبكل سنه زود


وبعد بداية الموسم بشهرين ترجع لأسعارها الطبيعيه


وفي نهاية الموسم تطيح اسعار الطيور بالقاع


بداية الموسم يكثر الطلب على الطيور من كثير من الصقاقير


اما طيره مات او باعه باخر الوقت او ضاع يعني قليل اللي معه طير يقعد كم سنه معه مثلل النظام القديم


الناس تبي التجديد وكل يقول ابي الزين قبل الناس ياخذونه ويدفع دراهمه لو عليه غليبه


وبنصف الموسم حالت ركود كل اخذله طير والحبارى انتصف وقتها


واخر الموسم لاهنا صيد ولاوناسه والجو غير مناسب


واغلب الناس عارض طيره ولاهنى طلب على الطيور


وتبدى الدوره من جديد


هذا والله اعلم

[ابن بريده]

على قولك الطيور غاليه وغاليه جدا طبعا لكثرة الهواه والمباهاه من البعض

[ABU HAIBAH]

راح الولع مع دور مشعان وصفوق ** يوم الحباري بالمنادي فروقي واليوم دور الطير فاشل وممحوق **كثرو صقاقيره على قل ذوقي

[ايزاك]

صح لسانك على الابيات

[ابوفيحان11]

الى ناس طاحت باالطيور بس هوايه اني صقار واهانوالطير

[ابوفيحان11]

راح الامير نايف الله يرحمه الي يقدر الطير

[ايزاك]

الله يرحمه عزالله انه يقدر الطير

[برق المغيب]

مثل ماقالوا الاخوان الغلا صار في كل شى 000 والطيور لندرتها وكثرة الصقارين في الوقت الحاضر ومزايداتهم الغير معقولة سبب في ارتفاع الاسعار ولنا في طيور الخوبة خير دليل 00 والله اعلم

[ايزاك]

يعطيك العافيه والله يعين على كثرتهم

[ملاعب الطير]

سلام
قلي وشهو اللي ماغلا؟
كل شي غلا وانا اخوك
جات على الطيور!!!
هههههه
انتهاء

[ايزاك]

وعليكم السلام اخوي ملاعب الطير واشكرك على مرورك بس الطيور مالها شغل بارتفاع الاسعار هاذيك قالو التوريد والتصدير ارتفع مع النفط اما الطيور مالها شغل ترتفع ولالها شغل بالنفط ولا مع الخيل ياشقراء

[هواجيس 0]

وعليكم السلام ورحمة الله وبركاته
والله السنه هذي غاليه بس عاد بدية انقله الطيور ترتفع

[الهارف15]

اتوقع سبب الغلاء قلة الطيور الي تدخل السعوديه بعكس
دولة الامارات الشقيقه مهرجانات عالميه وسباقات

[بندر خلف]

الشريطيه وما ادراك ماالشريطيه

يسوم منك الطير بـ 5 الاف وتبيعه

تلقاه بعد اسبوع منزل اعلان ويقول سيم بالجوال بـ 14

ويجيك غشيم صقاره فلوسه زايده ويشتري

[قرناس ثالث]

الله يزينها على كل مسلم

والا الاسعار حدث وحرج

[ابوفيحان11]

المشكله يشتري الشخص طير مزيون وغالي وموكره طيب ويخربه بكثر الدعو وفكه للحمام
وتجيه فرصة هدد على حباره مع نشامى شرواكم يملقها ويجنب عنها وبعدين يقول راعيه يبيها طىيار
وينغز الحبارى وتظرب الخضيره ويفلسون من الحبارى ويضيق ذيك اليله صدره من طيره
والطير ماتحبه الى اذا صاد وسلامنكم

[صقارعزاااام]

السلام عليكم ورحمة الله وبركاته


بشكل عام


بداية الموسم ترتفع اسعار الطيور وبكل سنه زود


وبعد بداية الموسم بشهرين ترجع لأسعارها الطبيعيه


وفي نهاية الموسم تطيح اسعار الطيور بالقاع


بداية الموسم يكثر الطلب على الطيور من كثير من الصقاقير


اما طيره مات او باعه باخر الوقت او ضاع يعني قليل اللي معه طير يقعد كم سنه معه مثلل النظام القديم


الناس تبي التجديد وكل يقول ابي الزين قبل الناس ياخذونه ويدفع دراهمه لو عليه غليبه


وبنصف الموسم حالت ركود كل اخذله طير والحبارى انتصف وقتها


واخر الموسم لاهنا صيد ولاوناسه والجو غير مناسب


واغلب الناس عارض طيره ولاهنى طلب على الطيور


وتبدى الدوره من جديد


هذا والله اعلم ما شاءلله عليك محلل اقتصادى محنك الله يوفقك كفيت وفيت.... اعجبتن وتبدى الدوره من جديد.........:good2: موفق حبيبى

[RKO]

كل شي زاد سعره

لكن الصقووووور غير وفيها قيمتها

[am8008]

حتى الأرانب صارت غالية. وين السبب .....

[ايزاك]

اشكرك على المرور بس الارانب ماادري انت امكن اخبر

[ذيب الحويد]

قصيدة الحويفي تشكي الحاااااال يالربع ......





القيـض راح وبـردن الليـالـي..........والطير عقب القرنسة كمّل الريش





والمزن بالمنشأ غـدا لـه ظلالـي.........وتراك ماتغر المزون المراهيـش





وتذكر الصقار وقـت مضـى لـي.........ايـام جالـي بالغبيـة مغابـيـش





يوم الحباري حوزهـن بالدحالـي ..........ليا فرع النادر طلبهـن مخاييـش





والخرب بادناهن يصيـر الموالـي............يوجس براسه للشجاعة نغاميـش





خـرب مغفـل ماحسـب للتوالـي............طقيق حنكانه سـوات القراقيـش





وجاه اشقر جوفه من النسر خالـي.............جزام صيـاده يقـض النشانيـش





له بالطيور البـرق فعـل ومدالـي............ضربه عطب ماهو مسوح وتناويش





ذاك الزمان اللي به المـر حالـي..............يوم الصقارة تنعش القلب وتعيـش





واليوم لو نقنص جنوب وشمالـي................صرنا على ما قيل مثل القراريـش





ما شوف والله للصقـارة مجالـي...............نقفي ونقبل يالحميدي على ويـش





مهمـا تجاوزنـا فيـاح السهالـي.............غير الدجاجة ما لقينـا عراميـش





ما شوف غير القوبعـة والكحالـي............وزرق الثعال اللي سواة القرافيش





عـزي لحالـك يازميلـي وحالـي............بارض الرحيل نفتش القشع تفتيش





والله يلولا الطيـر بالقلـب غالـي.............اني لاجوز من العنا والمطاريـش





لاكان حب الطير شـارك اعيالـي.............ولو ما تسلى بالولع كيف اباعيش





والله ماني عن غلا الطيـر سالـي............لو نعلفه من بارد الخبز والعيـش





لوكـان للخـارج نشـد الرحالـي..........وندفع على شانه ضريبة وبخشيش

[خالد بن قرمله]

أستغفر الله . أستغفر الله . أستغفر الله

[ايزاك]

اشكرك على مرورك اخوي ذيب الحويد وصح الله اللسان الشاعر

[ايزاك]

جزاك الله خير يااخوي خالد بن قرمله

[صقار الأسياح]

اخوي مافي غلا صراحه هذي الاسعار ورح لسوق الطيور بالرياض الخميس او الاثنين بالقصيم رخيييييييييييييصه البيتيه بالمره اما الطير المعروف والمشهود له يستاهل ولاوصل حقه


واخوي ذيب الحويد
والله ماني عن غلا الطيـر سالـي............لو نعلفه من بارد الخبز والعيـش

الحويفي هنا كان يقصد غلا الطير محبته وليست ارتفاع سعره تحيتي لك