حرارة الاكسنت مع السرعة

[sky_1993]

السلام عليكم
كيف حالكم يا شباب

سيارتي اكسنت 2004 قير عادي
انا قبل فترة وقفت على السيارة وانا على الطريق ووديناها للورشة قالو سير التيمن منقطع
واذا ركبنا السير راح يصير اداء المكينة نص لذلك لازم توضيب مكينة طبعاً وضبنا عندهم المكينة ,, بعد توضيب المكينة وبعد فترة تمرين المكينة صلحت المكيف ومن بعدها بدت مشاكل الحرارة ,, طبعا انا راعي خطوط تقريياً اسافر ﻷهلي كل اسبوع في بداية الطريق امشي 140 ماعندي اي مشكلة واذا طولت وانا ماشي ترتفع الحرارة بربع تقريباً (ولو ابتل على سرعتي بترتفع زيادة حتى توصل H ) ,, طبعا اذا ارتفعت اهدي شوي لين 100 وبعدين ترجع للمستوى الطبيعي ,, وبعدها اذا جبت الـ 120 تحتر فاظطر اكمل الخط وانا ماشي 100 او 110 (طبعا معاد شغلت المكيف في الخط)
بس احيانا اذا مشيت في الليل امشي 140 سلام سلام ما تحتر ابداً
تكفون يا شباب انصحوني باللي تشوفونة ,, علماً بأني غيرت الاديتر
احيانا افكر اشتري مكينة مستوردة ومضمونة واريح راسي
فأرجو منكم المساعدة
تحياتي :)

[وبل نجد]

تاكد من البلف
ومن الطرمبه
صارت معي مثلك في اكسنت 2005
وطلعت المشكله من البلف والغطاء والاديتر يبيله تصييخ

[ls1.5700]

طيب اخوي ليش تصدقهم وتوظب المكينه وهي مافيها شي
قسم بالله رفعت ضغطي
كان مغير سير الكام شفت بدون توظيب وخساير والمكينه مافيها شي
حتى ماهو لاازم يفكون المكينه لتغييره يفكون صدر المكينه فقط ويبلونه بجديد
المهم نرجع لموضوع الحراره
شيك على المراوح ودايرة المويه كامله
ودور لك ورشه ممتازه وخله يفحص لك راس المكينه فيه تنسيم او لا
اذا سلم الراس فان المشكله بسيطه مع اني شاك انهم مدبلين لك وجيه الراس
شيك ورد علينا

[sgl2002]

المراوح او الرديتر مسدود

[patrol-fa]

إذا كان ع كلامك ما ترتفع إلا بالسرعة فقط .. يعني بالوقفة تمام ..

لكن بالسرعة .. يدل ع ان البلا من الراس .. والراس إذا خربان ما تحتر إلا من إذا اسرعت

[sgl2002]

^^^
الراس ترتفع الحرارة ع طول

واقف ماشي وكل شي

[سارق الكحل]

شيك على المراوح

[مركز حراره]

غريبه
لكن سيخ الاديتر وتاكد من الغطاء

[maxima99]

مادامك غيرة اديتر جديد شيك ع البلف وشيك طرمبة الاديتر
لو الراس حق المكينه خربان كان الحراره ترتفع ع طول واقف او ماشي المكينه مافيها الا العافيه

[sky_1993]

تاكد من البلف
ومن الطرمبه
صارت معي مثلك في اكسنت 2005
وطلعت المشكله من البلف والغطاء والاديتر يبيله تصييخ

بإذن الله بأغير البلف والطرمبة بجديد
وبغير غطا الاديتر
لكن الاديتر جديد ماله 3 شهور ليش اسوي له تصييخ


طيب اخوي ليش تصدقهم وتوظب المكينه وهي مافيها شي
قسم بالله رفعت ضغطي
كان مغير سير الكام شفت بدون توظيب وخساير والمكينه مافيها شي
حتى ماهو لاازم يفكون المكينه لتغييره يفكون صدر المكينه فقط ويبلونه بجديد
المهم نرجع لموضوع الحراره
شيك على المراوح ودايرة المويه كامله
ودور لك ورشه ممتازه وخله يفحص لك راس المكينه فيه تنسيم او لا
اذا سلم الراس فان المشكله بسيطه مع اني شاك انهم مدبلين لك وجيه الراس
شيك ورد علينا

الشكوى لله وانا اخوك

لكن فيه ورشة في العروبة متخصصة في الحرارة بمرهم ان شاء الله :)


المراوح او الرديتر مسدود

المراوح شكلني بغيرها وبرتاح لكن كيف استدليت ان الاديتر مسدود


إذا كان ع كلامك ما ترتفع إلا بالسرعة فقط .. يعني بالوقفة تمام ..

لكن بالسرعة .. يدل ع ان البلا من الراس .. والراس إذا خربان ما تحتر إلا من إذا اسرعت

افااااا الله يستر بس من الراس والله يحميه لا يجيه شيء :D


^^^
الراس ترتفع الحرارة ع طول

واقف ماشي وكل شي

الحمدلله طمنتي الله يجزاك خير :)


شيك على المراوح

بغيرها وبرتاح :)

غريبه
لكن سيخ الاديتر وتاكد من الغطاء

يا اخي الاديتر جديد بس انا شاك في الغطاء

واعطنا مما اعطاك الله سير على الموضوع كل شوي :D



مادامك غيرة اديتر جديد شيك ع البلف وشيك طرمبة الاديتر
لو الراس حق المكينه خربان كان الحراره ترتفع ع طول واقف او ماشي المكينه مافيها الا العافيه



الله يريحك بالايمان وطاعة الرحمن هذا الكلام اللي يوسع الصدر :)
بس هل انت تقصدر بطرمبة الاديتر (طرمبة الماء) ؟؟


بيض الله وجيهكم يا اخوان واللي عنده اضافة او بيسعفني بورشة زينة يتفضل :good2:

[maxima99]

بإذن الله بأغير البلف والطرمبة بجديد



قبل لاتغير الطرمبه والبلف تأكد وهذا شرح ع شان تعرف فيها مشكله او لا
هذي طريقه منقوله
- اتساخ أو صدأ بلف الحرارة، وبالتالي لا يفتح عند درجة الحرارة المطلوبة، للتأكد من أن الثيروموستات يعمل بطريقة سليمة، أضغط بلطف على خرطوش الريديتر حينما تكون السيارة في طور الإحماء. إذا لم تتغير حرارة الخرطوش خلال دقائق من التشغيل، فإن هذا يعني إحتمال عطب الثيروموستات .



-ضعف ضغط طرمبة الماء: ويمكن الكشف على ضغط الطرمبة بالطريقة التالية:
تعال للسيارة وهي باردة، وافتح غطاء الرديتر وشغل السيارة، اتركها لمدة دقيقتين او لين تحتر شوي، عشان يفتح البلف، ثم ادعس بنزين اذا شفت الموية تتحرك في الرديتر الى اسفل واعلى او تدور، فهذا يعني انها تشتغل زين، وإلا فلا..
ان شاء الله افدتك

[فارس العيون]

كد خرب علي الجنزير ب ٢٠٠٥ وغيرته والحمدلله ماوضبت ولا سويت شي والامور تمام
لكن شيك على الرديتر والغطاء والبلف وماتشوف الا العافيه

[bandar1989]

ارسلي رقم جوالك على الخاص وانشاء الله اشوف حل لسيارتك

[bandar1989]

راسلني على بريدي bandarvip1989@hotmail.com

[demax]

اخوي انا صارت لي مثل مشكلتك

عند زيادة السرعه ترتفع الحراره وعند انخفاضها تنخفض الحراره

قم بتصييخ الرديتر فقط واستخدام المويه تبع تويوتا الحمرا او المويه الصفرا تبع الامريكي (خاصة باللديتر)

ولاعاد تستخدم مياه التحليه في الرديتر (تحتوي على املاح وكلس تسد قنوات التبريد)

[ريثان القصيم]

بإذن الله بأغير البلف والطرمبة بجديد
افضل لك تغييرها

وبغير غطا الاديتر
ايضا ضروري واصلي


لكن الاديتر جديد ماله 3 شهور ليش اسوي له تصييخ
مايحتاج تسييخ هو جديد اهم شي انه اصلي
ولاتنسى تغسل الاديتر من داخل كل اسبوع والموتر بارد بالماء القوي



المراوح شكلني بغيرها وبرتاح
شيك عليهن عند كهربائي ممتاز اذا يشتغلن كل اللي عليك يركب لهن الكهربائي فاصل داخل عندك وشغلهن واقف او على الخط


:good2:


ريثان القصيم

[مركز حراره]

سيخ الرديتر واغسل السرندل

[شد الرحال ...]

1- سيخ الاديتر .

2- غير البلف .

التصييخ : 120

البلف : 80

المجموع : 200


وراح تشوف الموتر اللي يعز راسك .

[ملك تميم]

اخوووي شيك علا مويت الاديتر يمكن الي غير الاديتر ماملاها

[كاشت بالبر]

تأكد من اللي الصغير اللي يطلع من الرديتر للقربة البلاستيك الصغيرة ( الخزان الإحتياطي )

يمكن منسد

وتأكد من مستوى ماء الراديتر والخزان الإحتياطي

وافحص :

بلف الحرارة
طرمبة الماء
غطاء الراديتر

مراوح الكهرب وحساساتها والخ ...



غيّر ماء الراديتر .. ولا تستخدم إلا الأصلي

ولازم لازم لازم يكون ماء الراديتر مخلوط بالماء المقطر .. مثلا بنسبة 50% ماء راديتر و 50% ماء مقطر

بعض انواع ماء الراديتر تجي مخلوطه وجاهزه ومكتوب عليها .. كل اللي عليك انك تصبه في الراديتر

وبعضها تجي ثقيله وتحتاج خلط بالماء المقطر