التهدية ب نمر القير العادي تضر السياره ولا ؟

[بدون عضويه]

السلام عليكم,,

باختصار التهدية ب القير العادي الي هو لا منك قربت من لفه تحط القير ب نمره ثقيله مثل 2 وترفع رجلك عن الكلتش نص او الين تعطيك التهدية المطلوبه

الزبده واحد شافني اسوي الحركة ذي وقال انها تعدم تروس الجربكس ومن الكلام ذا
مع العلم ان الواحد مرات يكون مسرع ويثقلها بنمرة مثل في الحواري الوسيعه

من منكم عنده اي كلمة عن الموضوع ؟

[سلاطين]

بصراحه انا افضل تخرب الفحمات ولا يخرب القير ولاكن اتوقع يكون فيه ضرر على الدزق والكلتش والله اعلم
والشباب يفيدونك ذوي الاختصاص تقبل مروري

[أصيل حجآ زي]

http://im.gulfup.com/2011-02-10/12973306271.jpg



نعم أخي الكريم :


تضـــُر كلا القيرين سواء العآدي أو التمآتيك .


الا أن كُنت في ســـُرعة بطيئة جدآ .
يعني من تحت وحول الــــ 33 كلم أو حولها وحوآليها .


أحذر :no2: فقد :
خرّبت {{{ أنا وما أدرآك ما أنا }}} عدة قيور
لأتبآهي أني سآئق حررررررررررررررّريف .

:looney:

[كاشت بالبر]

اتوقع تأثر

واذا ما أثرت على القير نفسه .. بتأثر على كراسي المكينه والقير .. لأن المكينه مع الدعس بقوه " مثل الانطلاق بقوه عند الاشاره " أو رد النمره بقوه وبعنف أو التفتفه .. تضر الكراسي وتقلل عمرها بشكل كبير

لكن اذا ترد نمره شوي شوي وباحتراف .. ان شاء الله ما راح تأثر أو على الاقل التأثير يكون أقل .. من رد النمر العنيف

يعني مثلا انت تمشي 100 بالخامس .. اترك البنزين الين توصل 80 ورد نمره لكن شوي شوي .. ولا تترك الكلتش بسرعه

رد النمره شوي شوي مفيد .. لأنه يساعدك على الفرمله وتهدئة السرعه بدل من زيادتها

لكن لو تفضي قير السيارة أو تحطه بالخامس .. بيصير مسك الفرامل اصعب واضعف


أما إذا كنت ترد نمر بعنف

نعم تضر القير و تضر كراسي القير والمكينه

لو تحسب سعر :

1) كراسي المكينه وكراسي القير .
2) القير ( توضيب \ أو تركيب قير من التشليح ) .
3) شغل يد التوضيب .. أو تغيير الكراسي

بتطلع اغلى بكثييييييييييييييييييييييييير من الفحمات أو القماشات


القير العادي .. عملي و يتحمل اكثر من الأوتوماتيك
وصيانته أرخص وأسهل .. ما تحتاج تفك كرتير الزيت وتغير الفلتر والخ ... مثل القير الاوتوماتيك

حتى زيت القير العادي رخيص .. مب غالي مثل الأوتوماتيك

[صحيح]

رد النمرة يستخدم عند السرعات المنخفضة حسب نقل النمرة من الى مثل من الرابع الى الثالث حسب السرعة .
وتستخدم التهدية بالنمرة في الغالب للسيارات الثقيلة النقل مثل الباصات او الوايتات لأن فراملها تستخدم خاصية ضغط الهواء.
وأذا كان الموتر محمل المهم تستخدم الحركة هذه لتساعد الموتر في التهدئة باسرع وقت ممكن.
والبعض يستخدمها في حال انسلاخ الكفر لتهدئة السيارة بدل الفرامل ولتثبيت السيارة بثقل تحميل المكينة والقير لتفادي انقلاب السيارة لاقدر الله.

[تمنيتك لي]

الآفضضضليه آنك تحآول آنك مآتهدي بآلتعشيق إلآ لضرورة

[الكلاسك]

نعم تضر ونص واللي يقول غير هالكلام اكرشه ( واحد معصب )
القير ما يستخدم للتهدئه الا في حالة النزول من المرتفعات فقط
وذلك لحماية الفحمات من الاشتعال !! يعني شي اهون من شي
وتستخدم بشكل مستمر يعني تحطها بنمره من اول النزله حتى تنتهي
مع استخدام الفرامل لمساعدة القير بشكل طفيف
غيره لالالالا

[ls1.5700]

التهديه بالمعقول ماتضر

[مافيه]

نعم تضره و الي يقول غير هالكلام ماعنده علم

اخوك مجربها على اكثر من سياره وبذكر انواعها و الخرابات الي واجهتني في القير

ددسن 2003 على وقته خربت علي النحاسات اكثر من مره و الكلتش ماكمل سنه
باث فندر 2004 نحاسات وغيرتها مره وحده وريحة الكلتش تفوح كملت معي السنه وبعتها
كورولا 2006 نحاسة الريوس ولم يتم تغييرها و نحاسة النمره ال3 + كلتش خلال 6 شهور + تخبيط القير بعد تقريبا 3 سنوات استعمال و ممشا ماتجاوز ال100 الف

وحاليا سيارتي قير عايدي و النمره ما استعملها الا وقت الحاجه

وقبل لاتفكر انها تضر القير او لا هي من اهم اسباب ارتفاع حرارة القير

[عابد-]

الركاده والتأني ما تجيب الندامه

[mekshaat]

أكيد تأثر عليه وعلى المكينه ويمكن الدفرنس
لاتستخدم الطريقه هذي الا للضروره والابعد
فتره بتعدم المحركات عليك.

[ابوراكان تبوك]

تضر القير بالدرجه الاولى بعد فتره طويله تفلت معك التروس بسبب ضعف الاهله ويضر عمود التيمن بعد

[وجعين]

تضر القير والمكينه والكلتش

[مدور طريق]

اذا كانت بشكل مستمر تضر
والعكس صحيح

في اعتقادي الطريقة هاذي تكون عند الضرورة مثلا البريك ميمسك زين تعطيه نمره بالتدرج من الاعلى الاسفل .

الي ياثر بالقير هي المطبات خاصة اذا ضربت مطب وانت معشق القير
انا دائم اذا قربت من مطب افضي القير وهاذا الشي يريح الموتر والقير مع بعض.:good2:

ولله الحمد كل مواتري زي الحلاوة :D

[عكس التيار]

طيب اذا صارت السياره فراملها من الاساس زفت ؟؟ يعني حتى لو غيرت الفحمات نفس الشي ماتمسك فرامل في هالحاله وش الدبره؟؟

[ابوراكان تبوك]

طيب اذا صارت السياره فراملها من الاساس زفت ؟؟ يعني حتى لو غيرت الفحمات نفس الشي ماتمسك فرامل في هالحاله وش الدبره؟؟
يمكن سيارتك تحتاج وزن فرامل امامي وخلفي

[aziz2727]

تضر جداً
سبق وان فرط علي جنزير المكينه بسبب ترجيع القير بنمره والسيارة مسرعة

[بدون عضويه]

جزاكم الله خير على المعلومات و توبه معد اهدي ب النمر