تصميم عمود إنارة متنقل لكشاف LED 50W متنقل بدون تثبيته بالسياره

[asak_9500]

بسم الله الرحمن الرحيم

السلام عليكم ورحمة الله وبركاته

إلى أعضاء منتدى مكشات الغالين

بعد طول إنقطاع عن المنتدى أقدم لكم

عمود إنارة متنقل لكشاف LED 50W متنقل ويكون حر بدون تثبيته بالسياره او غيره
فكرتي وتصميمي وتنفيذي

واللي جاب الفكرة أني ما ودي اربط موتري بالاضاءه عشان كشاف وغيره

بسم الله نبدأ

أولا: تحتاج قاعده مثل اللي بالصورة أو شبيهه أو نفس فكرتها بس حاول يكون حديدها ثقيل موب خفيف ومفتوحه بـ 3 فتحات او 4 مثل ما تبي بس 3 كافيه اذا ان شكلها دائري مثل هذي او مربعه

http://www.mekshat.com/pix/upload06/images/2012/09/mk39461_img_0907.jpg

أنا اخترت قاعدة عمود أناره قديم عندي بالمستودع قصيته وأخذت قاعدته
وطبعا الفايدة من العمود الابيض اللي بالنص ان الماصورة الاولى يسقط بوسطها ويعطيه ثبات

ثانيا: تحتاج مواصير حديد مثل اللي بالصورة تقصها على الطول اللي انت تبيه أنا أخترت تكون أطول ماصورة متر واحد عشان ما تاخذ مكان بطولها بالموتر
تخرم فتحات براس كل ماصورة وتلحم عليها صاموله لتعزيز ثبات كل ماصورتين ببعض
الماصورة الطويلة تركب بالقاعدة والثنتين الباقيه تركب ببعض وتتركب على الماصورة الطويله

http://www.mekshat.com/pix/upload06/images/2012/09/mk39461_img_0905.jpg

ثالثا: تحتاج قاعده يركب عليها الكشاف شبيهه بالصورة

http://www.mekshat.com/pix/upload06/images/2012/09/mk39461_img_0906.jpg

رابعا: تلحم صامولتين بقاعدة الكشاف الاساسيه لربطها بالقاعدة اللي بالعمود

http://www.mekshat.com/pix/upload06/images/2012/09/mk39461_img_0908.jpg

خامسا: يبيلك 3 اطناب ومطرقة لتثبيت القاعدة بالارض

سادسا: توصل جميع القطع السابقه وتشد المسامير زين وتشبك الكشاف بالكهرب وتستمتع بإضاءة جميلة وبالمكان اللي انت تختاره جهت الموتر او عكسه مثل ما تحب

http://www.mekshat.com/pix/upload06/images/2012/09/mk39461_img_0904.jpg

فيه سوال ممكن ينطرح من أحد بأن وش الحاجة من الاطناب أحفر حفره وادفن القاعدة وقضينا ؟؟؟؟
الحاجه منها أنك موب كل مكان تقدر تحفر حسب طبيعة الارض والاطناب باذن الله آمن وافضل

أتمنى أن الفكرة وضحت ولو أن فيه صور ناقصه للتوضيح لكن صورت على استعجال واتمنى أن الكل يستفيد منها

والسلام عليكم ورحمة الله وبركاته

[ولد وايل]

ماشاء الله تبارك الله ابداااااااااااااااااااااااااااااااااع كم التكلفه

[asak_9500]

منور أخوي ولد وايل

انا الصدق ما شريت شيء غير المسامير والكشاف

أما المواصير والقاعدة كلها من مستودع عندي وفيه اشياء واجد قديمه جمعتها وطلعت هالعمود

لكن ما اتوقع انها تكلف واجد كلها مترين ونص مواصير حديد سباكه وخل الحداد يسوي لك مثل هالقاعده وأمورك زينه ان شاءالله

[PATHFINDER 4]

ماشاء الله شغل صحححح الكشاف كم طلع عليك وهل هو من رفيق الدرب ولا من اخونا ولد وايل ؟؟

[asak_9500]

تسلم اخوي باثفيندر ٤

لا خذيته من ولد وايل

والصدق اني ما اخبر كم خذيته لاني مبطي شاريه وواحد من اخوياي هو اللي جايبه لي

[سرهيد]

السلام عليكم

ما شاء الله تبارك الله

شغل عدل الله يبيض وجهك

انا شخصيا استخدمت حامل كمرة لسهولة الطي والتنقل به وقمت بترهيمة وسيكون لي فيه موضوع مستقل لاحقا ان شاء الله

تقبل احترامي

موفق اخوي الكريم

[asak_9500]

هلابك اخوي سرهيد

والله يبيض وجهك والقراء يارب

عاد لا تبطي علينا بفكرتك يصير ازينها للكشاف الثاني ان شاءالله

[او خالد]

فكره رائعه
موفق خير ان شاء الله

[asak_9500]

مرورك اروع اخوي ابو خالد

[tabtab055]

صراحه فكره ممتازه جدا بيض الله وجهك انت ومن يقرأ

[asak_9500]

الله يجزاك خير اخوي tabtab055

[a7md07]

ماشاء الله تبارك الله الله ينفع بك وبافكارك

[حب لاينتهي]

بارك الله بك

[asak_9500]

ماشاء الله تبارك الله الله ينفع بك وبافكارك


بارك الله بك

مشكورين أخواني والله لا يحرمنا من دعواتكم وتحفيزكم

[محلات الكشاتة]

ماشاء الله
شغل عدل
سلمت يداك ياعم

[asak_9500]

ماشاء الله
شغل عدل
سلمت يداك ياعم

الله يسلم لي عمرك

تشكر على التحفيز والمرور