عندي فتك 2007 تماتيك فيه كم مشكله ياليت احد يقدر يفيدني

[abdullah-vtc]

السلام عليكم ورحمة الله وبركاته ..



عندي سفاري 2 فتك موديل 2008 قير تماتيك وفيه
كم مشكله يا اخواني واتمنى تساعدوني لو بالقليل
ولا استغني من نصايحكم .


1 - صوت وننة الكارونه واضحه عندي وهبلت
فيني واتوقع انها الاماميه ..
ابي الحل الجذري لها ؟؟

2 - فيه صوت تكتكه بالمكينه اذا دعست طلعت
والاحظها اكثر شي اذا مشيت جنب جدار
وفتحت الدريشه وهالصوت قديم تقريبا له
سنتين وانا اسمعه ووديته لاكثر من ورشه
ولا احد عرف وشو ؟؟


3 - عزم الموتر طايح بشكل ملحوظ ولا
ادري وش السبب ؟؟


4 - اذا زرييت على الموتر فززته نايممه مره
ومكتووومه وتحسه فززة ددسن واذا تعدا
الضغط 3 ونص انطلق مع نتعه خفيفه وزان
عزمه يعني كاننه ممسوك بحبل من ورا وفجاه
انقطع الحبل .. عجززت ابي حل لهالمشكله ؟؟


5 - صرفية النزين خياليه وكل ماوقفت شميت
ريحة البنزين واحيانا تدخل علي اذا فتحت الدريشه ..
مع العلم اني اعبي بنزين 95 ؟؟



6 - فيه طقه بالقير شنيعه احسها اذا هديت
عند اشاره ووقفت يطق القير طقه واضحه مرره ..
او اذا كنت معشق ريوس وبعدين عشقت
على (( دي )) يطق القيرر طقه قويه وحتى صوته
واضح مرره ..؟؟


7 - اذا شغلت الموتر الصبح وهو بارد يتفتف
وينزل الضغط على الصفر واحياننا يطفى يعني
يبيلي ادعس له عشان يشتغل واذا احتمى
ومشيت يقعد يتفتف شوي بس حق ابو 4 ثواني
وبعدين يضبط .. وش الحل ؟؟


ادري طولت عليكم لكن الشكوى لله رحت لاكثر
من ورشه ولا قدروا يصلحون الموتر .. اللي عنده
معلومه الله لايهينكم لايبخل علينا واللي يعرف
ورشه ممتازه للفتكات او شخص معين اروح له
ينفض موتري من الصدام للصدام ويعلمن وش
مشكلته لايبخل علينا بعد .. مع العلم ان موقعي الرياض ..

وعلى فكره رحت لورشة التركي اللي بالصناعيه
القديم ولا عطان وجه الله يهديه ..

واسف على الاطاله ولكم مني جزيل الشكر ...

[ابو خــــالد]

السلام عليكم ورحمة الله وبركاته ..



عندي سفاري 2 فتك موديل 2008 قير تماتيك وفيه
كم مشكله يا اخواني واتمنى تساعدوني لو بالقليل
ولا استغني من نصايحكم .


1 - صوت وننة الكارونه واضحه عندي وهبلت
فيني واتوقع انها الاماميه ..
ابي الحل الجذري لها ؟؟
غريبه:eek: مهيب عادته تخرب ابد...لايصير جايته ضربه ولاشي...
عموما مالي علم به لكن يفيدونك الربع
2 - فيه صوت تكتكه بالمكينه اذا دعست طلعت
والاحظها اكثر شي اذا مشيت جنب جدار
وفتحت الدريشه وهالصوت قديم تقريبا له
سنتين وانا اسمعه ووديته لاكثر من ورشه
ولا احد عرف وشو ؟؟


3 - عزم الموتر طايح بشكل ملحوظ ولا
ادري وش السبب ؟؟

قد صار لي مشكله قريبه من ذي والسبب أن البواجي قعدن 3سنين :Dماغيرتهن
وغيرتهن وغيرت صفاية البنزين وفلتر الهواء ورجع الموتر زي أول ماشاء الله
^^يعني سوله تصفيه
4 - اذا زرييت على الموتر فززته نايممه مره
ومكتووومه وتحسه فززة ددسن واذا تعدا
الضغط 3 ونص انطلق مع نتعه خفيفه وزان
عزمه يعني كاننه ممسوك بحبل من ورا وفجاه
انقطع الحبل .. عجززت ابي حل لهالمشكله ؟؟
اتوقع مشكلتك ذي له علاقه باللي قبله (رقم3)

5 - صرفية النزين خياليه وكل ماوقفت شميت
ريحة البنزين واحيانا تدخل علي اذا فتحت الدريشه ..
مع العلم اني اعبي بنزين 95 ؟؟
صرفية البنزين له علاقه برقم 3 والسبب أن البواجي مايحرقن البنزين بالكامل



6 - فيه طقه بالقير شنيعه احسها اذا هديت
عند اشاره ووقفت يطق القير طقه واضحه مرره ..
او اذا كنت معشق ريوس وبعدين عشقت
على (( دي )) يطق القيرر طقه قويه وحتى صوته
واضح مرره ..؟؟
شحّم العمدان ب10 عند أقرب بنشري وتروح...لكن نصيحه أنزل معه ولايفك مسدس الشحم لما تشوف الشحم بدا يطلع عشان تضمن أنه تشحّم زين وغالبهم يحط نقطة شحم عن قولة أنه شحم(يوفّـر على نفسه)

7 - اذا شغلت الموتر الصبح وهو بارد يتفتف
وينزل الضغط على الصفر واحياننا يطفى يعني
يبيلي ادعس له عشان يشتغل واذا احتمى
ومشيت يقعد يتفتف شوي بس حق ابو 4 ثواني
وبعدين يضبط .. وش الحل ؟؟
قد تكون من البواجي

ادري طولت عليكم لكن الشكوى لله رحت لاكثر
من ورشه ولا قدروا يصلحون الموتر .. اللي عنده
معلومه الله لايهينكم لايبخل علينا واللي يعرف
ورشه ممتازه للفتكات او شخص معين اروح له
ينفض موتري من الصدام للصدام ويعلمن وش
مشكلته لايبخل علينا بعد .. مع العلم ان موقعي الرياض ..
لك رساله عالخاص
وعلى فكره رحت لورشة التركي اللي بالصناعيه
القديم ولا عطان وجه الله يهديه ..

واسف على الاطاله ولكم مني جزيل الشكر ...

العفو ماسوينا إلا الواجب:)

[sgl2002]

١- ركب فرارات لان تغيير الكارونة غالي
٢- عادية

٣ و ٤ و ٧ هذي اقرب مالها خرطوش الهواء اللي بين قربة الهواء والثلاجة يكون مشقوق او مرتخي قفيزه لو بشكل بسيط وهو اللي يسبب هذي الحاجات

٦ - شحم العمدان وترا اغلب الفتكات بها هالدقه بالقير


اخيرا لازم تكون مغير البواجي وصفاية البنزين وفلتر الهواء وتنظف الثروتل عشان هي المسؤولة عن امور العزم والطفية

وطرمبة البنزين افحص ضغطها ممكن تكون ضعيفه

[abdullah-vtc]

هاوي الذيب ياجعلك بالجنه ووالديك وماقصرت وراح اسوي الاشياء اللي قلتهن
وان شاء الله يضبط الوضع ..

اشكرك من صميم قلبي

[abdullah-vtc]

Sgl2002

تسلم الله يرضى عليك وبيض الله وجهك واليوم ان شاء
راح ابدا باللي قلت لي ..

اشكرك

[ابوصالح 5007]

هلا بك يالغالي
انا الموتر كان اذا دعست له دعسه قويه يكتم او يقطع تسذا وكان الخرطوش حق الهوا فيه شق غيرته وغيرت بواجي وصفايه وفلتر هوا والحمد لله ظبط الموتر
انتبه للخرطوش حق الهوا يمكن فيه شق وانتبه بعد كل ماجا ينظفه البنشري لان يمكن يفكه بقوه ويتسبب بشقه او قطعه .موتري فتك 2006
اتمنى اني افدتك واسف على الاطاله .

[المرتهي]

2 - فيه صوت تكتكه بالمكينه اذا دعست طلعت
والاحظها اكثر شي اذا مشيت جنب جدار
وفتحت الدريشه وهالصوت قديم تقريبا له
سنتين وانا اسمعه ووديته لاكثر من ورشه
ولا احد عرف وشو ؟؟

صوت التكتكه اذا كانت مستمرة واذا دعست فجأة يطلع صوت كانه جنزير يفرط
هذا شي طبيعي خصوصا اذا الموتر ممشاة حول الـ 200 هذا وانا اخوك صوت بلوف وطبيعي في جميع السيارات الجددة الي تكون مكاينها VVT-I وهالنوع ماتنوزن البلوف
اتمنى افدتك