مطلوب طراد للايجار لرحلة بحرية بالجبيل اهم شي غير سعودي

[محمدww]

السلام عليكم
ياخوان نبي نطلع انا والشباب رحلة بحرية بكرة الخميس تاريخ 4/11/1433
وياليت يكون سواق الطراد ماهو سعودي
الكل بيقول ليش والسعودي وش فيه
ياخوان حنا مجموعه كل شهر نطلع على الاقل مرتين من الجبيل وياكثر ماطلعنا مع سعوديين (وياكثر ارقامهم معي) ومانطلع بشي يسوى الطلعه وحجتهم دايم الرزق على لله
وكل واحد نطلع معه يودينا لاماكن مافيها صيد يادوب تطلع 15 سمكه واحيان اقل(مادري غشامه مادري لعانه:mad:))
وبسراحه لاعت كبودنا من التصريف والزحلقه ومن كلمة ياشباب ماعليش حظكم اليوم شين
واهم شي انكم ابستطوو وحنا نقول اي ولله انبسطنا ومن الداخل نقول>>>اي بسطه ياعم :mad:
بسراحه جربنا 2 غير سعوديين ولنا اكثر من سنه معاهم
ولله الحداق ماشالله معاهم شي خيالي
ماعمرنا طلعنا معاهم الا الثلاجه مليانه
الحين واحد منهم مسافر ومطول
والثاني بكرة معاه ناس والاسبوع الجاي برضه محجوز الخميس
فياليت اللي عنده رقم احد مايبخل علينا به
((واهم شي غير سعودي))
وماعليش لو طولت بالموضوع عليكم

[عاشق البحرE]

عليك السلام أخوي محمد ww ....

الخير يخص و الشر يعم ... مع احترامي الكبير كلامك هذا مو صحيح يمكن نزلت مع سعودين في نهايه شهر او بدايه شهر او في وقت من السنه مو جيد الصيد فيه .. بس ما تحكم على كل السعودين بأنهم ناس غير موثوق فيهم .. على كلامك انك نزلت مع السعودين و تعرفهم كلهم اللي في الجبيل .. ما اظن اني نزلتك مره و طلعت بدون ثلاجه على الأقل .. و في نفس الوقت ما تحكم على الجميع من شخص او شخصين ..

حمد الله و بفضل الله اللي ينزلون معي يدوروني من جديد و لو قلت لهم بحولكم على ناس ثانيه ما يرضون .. و الله الشاهد على كلامي .. حتى اني مرات اصرف الزباين و أعتذر عشان اطلع طلعات خاصه مع ربعي او طلعات اللفاح ..

معليش لا تزعل من كلامي بس حبيت ابين لك انك انت غير اخوك و أخوك غير ابوك و غير صاحبك و كل واحد تختلف اطباعه و أخلاقه ... و الواحد ما يعمم الشيئ و يحكم عليه بتجربه او تجربتين .. و أصابع ايدك مو سوى ..

و هذي ارقام بعطيك ايها لناس في الجبيل و مو سعودين عشان ترضي ضميرك

ابراهيم 0500886277 فرضه جبيل البلد

سمير 0508502089 فرضه البوعينين ( جبيل الصناعيه)

و الله يعطي كل واحد على قد نيته ..

[محمدww]

لله يعطيك العافيه اخوي عاشق
اولا ابراهيم اخوي ماعلية غبار وانا من عملائه القديمين من ايام لما كان في ابوعينين الفناتير
ابراهيم عنده زباين بكره ومعتذر لي من الاسبوع اللي طاف
ثانيا:فعلا ياخوي الشر يعم وانا جربت 6 سعوديين ومافي فايده
والواحد ماهو صراف راجحي كل شوي يقعد يجرب وانا اخوك لين يلقى الامين الخبير
ومعك حق السعوديين ماهم كلهم سوا بس يمكن من العشرة واحد تلقاه يوديك بكل امانه اذا هو فعلا خبير
وعلى فكره ماعمرنا طلعنا الا في بداية الشهر ونهاية الشهر مع ابراهيم وواحد ثاني هندي
ومارجعنا الاثلاجتنا مليانه وبأمكانك تساله
اما بالنسبة للسعوديين طلعنا اكثر من مره معاهم في نص الشهر تخيل واحد منهم ماظلمته ولله يعطيه على قد نيته
يقول اذا الخيط واظح بالقمرى السمكه تخاف منه؟؟!!
وواحد ثاني يشهد ربي على طالعين في نص القمرى ويقول السمك صار الحين ماعاد ياكل صار يخاف<<يحسبنا مخفات
اخوي عاشق يوم امس جاري طالع مع خويه على طراده ويقول ملينا انا واللي معانا ثلاجاتنا
هذا وحنا في اول الشهر

بالنهاية وانا اخوك اشوف ان المساله مسالة امانه وخبرة
ماهو بس الواحد ياخذ فلوس ويسكت الزباين بكم سمكة وبالنهاية يتحالفون الشباب عنها كل واحد يقول لاولله مايجيني خذها انت
وكلام الحق وانا اخوك مايزعل واتمنى اني ماطولت عليك
ومشكور على اجتهادك

[الوحش79]

اخوي محمد

انتبه من الايام اللي تطلع فيها
في ايام يكون فيها حالة البحر فساد وهذي تعتمد على التيارات المائيه
ومنها تعرف الايام اللي تصلح للحداق من السيف او داخل البحر
وراح ارفق لك البيانات في موضوع منفصل
لتعم الفائده

ايضاً للاهميه
اذا وصلت لاي مكان ولقيت ان الماء حار نسبياً
مباشره غير المكان لان السمك شحيح جداً فيه
و
لان السمك يبحث عن الاماكن البارده نسبياً
ايضاً
الاماكن اللي يكثر فيها العشب ابعد عنها شوي
وخلك بينها وبين الفراغات الرمليه

ولو رحت للعميق بمالايتعدى ١٨ متر فهو ممتاز
اما اعمق من ١٨ متر يقل السمك والحياة فيه

بالنسبه للسعوديين ابحث باليوتيوب عن حداق ابونواف وشوف طلعاته
رجال يعجبك ونصوح وحبوب تلاقي رقمه باحد المقاطع

عموماً راح ارفق الموضوع الان وبامكانك الاستفاده منه
واي خدمه انا بالخدمه

والله يوفقك بمايسرك ويرضيك

[الوحش79]

هذا رابط الموضوع

http://www.mekshat.com/vb/showthread.php?t=530694

[الرحموني]

يغلق الموضوع


للتعريض بالاساءة للاخرين

وحتى لا ندخل في نقاشات ومهاترات نحن في غنى عنها