شورك ياراعي التجربه الطمره او الرميح … ؟!!

[عطيب الشوق]

السلام عليكم ورحمة الله وبركاته

اسعد الله او قاتكم بكل خير …
يا اخوان انا في حيره بين ثلاجة الطمره الحاليه الموجوده لدى السنيدي ( الويكو ) بعد ما اصبح وكيلها
او ثلاجة الرميح وكلها ممدوحات وخاصه الطمره الاوله رعية الفرارات
واللي انا حريص عليه مسألة سرعة التبريد وحفظ البرودة وقوة العزل واحتياج التهويه بعض الثلجات ما تحب الكتمه لابد من منفس هواء ولا ماتبرد وكذلك الكهرب والتحويله
فمن لديه علم او سابق تجربه يفيدنا بغظ النظر عن الاسعار

تحياتي لكم
ابوسعد

[علي الشهري]

حياك الله يا أبو سعد
لا تتعدى الطمرة وأنا أخوك
والطمرة اللي بالسوق الآن نوعين:
1- اللي أزرارها (لمس) هذي أفضل وكمبروسرها دانفوس الألماني
2- اللي زرها (تحريك يمين شمال) هذي في الدرجة الثانية وكمبرسرها صيني أقل جودة من دانفوس

[اتجاه السحاب]

حياك الله
جربتهن كلهن وكل وحدة له ميزة
عندك ثلاجة الرميح :تتميز بحفظ البرودة بعد إذا طفيتها لأداخلة أستيل وحفظت البرودة لمدة ٦ساعات
لكن عيبها : بطيئه التثليج
أما الطمرة :فهي تتميز بسرعه التثليج والتبريد وأقل صرفية للكهرب
عيبها :ماتحفظ البرودة لأن داخلة بلاستيك قوي
وأرشح لك الويكو اللي وكيلها السنيدي ممتازة جدا وهي معي، الآن وعلى كلام محل السنيدي أن الكمبرسر إيطالي والفرار ألماني..

[سرهيد]

السلام عليكم

كل ما كانت السلعة لها قطع وصيانة كانت اقرب للشراء .

انصحك اخي من واقع تجربة بثلاجة الويكو فراعي البر يحرص على سرعة التبريدة وقلة صرفية الكهرباء وهذه متوفرة في ثلاجات الويكو ....

ان حصل لك من الانواع القديمة ولو مستخدمة فجيد ، والا عليك بالحالية بحكم وجود ضمان وصيانة من قبلها وكيلها السنيدي ...

تحياتي لك

[عطيب الشوق]

ياهلا ومسهلا اخوي التنهات شرفني مرورك

والله يا صاحبي الظاهر انها الويكو هي اللي بيرسي عليها الشراء
لكن اظنك كنت تقصد الانتاج الاول افضل في ردك حسيت انك عكست الشغله ولا انا غلطان ؟

عموما جزاك الله خير وماقصرت والله يكتب اجرك

تحياتي لك ابوسعد

[عطيب الشوق]

اتجاه السحاب هلا وغلا بأخوي شرفني مرورك

وعزالله انك جبت الكلام المفيد من غير قصور بالاخوان التنهات وابو عبدالله
واهم ما يهم راعي البر في هالثلاجات سرعة التبريد واستهلاك الكهرب

توكلنا على الله ونبي ناخذ الويكو

جزاك الله خير وكتب الله اجرنا واجرك

تحياتي
ابوسعد

[عطيب الشوق]

الله يحيي العمده سرهيد شرفني حضورك

كلام مختصر ومفيد ومثل ماتفضلت والاخوان اهم شي سرعة التبريد واستهلاك الكهرب
واثرة نقطة مهم قد تكون ليست على البال حالياً قطع الغيار والصيانه فيما بعد وهذا الاهم والقديمه طيبه لكن عجزت احصلها واللي عنده متمسك ولا وده يبيع ولا ينلام

اشكرك وكل من شاركنا وكل من نوى في قلبه ذلك ولم يشارك لأي سببٍ كان

جزاك الله خير يبو عبدالله عسى ربي يكتب اجرك

اخوكم الصغير
ابوسعد

[شقران نجد]

حي الله شيخنا ابو سعد ....

وش الساعه المبروووكه

زي ماقالك الشايب ابو عبدالله:D;) ولا يهون باقي الأحباب عليك بالويكو ,,,,,

انا عندي القديمه روووعه ,,,,,

اخوك

شقران

[خالد الغنامي]

الويكو ام فرار لك ولزمن



نصيحة لا تعداها مع ولد عمي لها 6 سنوات والله ما قد اشتكى منها

[عطيب الشوق]

ارحب ارحب يا شيخنا شقران
ساعتك ابرك يا حبيبنا
والله ياطول العمر الشور طيب ولاني متعديه وابو عبدالله وانت ولا يهونون بقية الاخوان مالي منكم بد جعل من عقبكم للجنه والله يجزاكم خير

شرفني مرورك وتراي لازلت انتظر وعدك وزيارتك لي وتشريف محلي

اسعدني تواجدك

تحياتي لك
ابوسعد

[عطيب الشوق]

اخوي خالد يا هلابك ويا مرحبا
شرفني مرورك جعل والديك في الجنه
جزاك الله خير على الشور وعز الله ماقصرت

اشكر لك تواجدك ولاهتت

ابوسعد

[عجاج الليل]

عليك ب ثلاجات إنجل