صيانة الوكاله

[mohaon]

الموتر برادو 2006 سته سلندر , شاريه قبل ثلاثة ايام وهو ماشي 107 الف
قبل امس خذيت موعد للصيانه عن طريق موقع تويوتا واتصلوا امس وعطوني رقم الحجز , رحت اليوم الصبح وتوني جاي قبل شوي
المهم
راجع الموظف ملف السياره وقال ان اخر تشييك للسياره كان على 40 الف في عام 2008 , والعداد الان 107 الف فتحتاج صيانه للمئة الف , طيب كم تكلف ؟ انا سأل , حوالي ثلاثة الاف ريال قال لي, طبعا سويت ولد نعمه وحاولت ان اخفي علامات الاضطراب, وش بتسوون بالزبط ؟ قال التالي :
غيار زيت مكينه مع فلتر - فلتر هواء المكينه - زيت القير والصفايه - تغيير زيوت الدفرنسات الامامي والخلفي - غيار زيت الدبل - تغيير صفاية بنزين - تغيير بواجي - تغيير جلود مساحات - تدوير الكفرات نجيب اللي ورى قدام واللي قدام ورى
التغييرات الاختياريه : فلتر هواء مكيف - سير مكيف
بعد هذا السرد وجدت انه مافيه داعي اني اسوي ولد نعمه , قلتله وش ذا الغلا الحين شوية زيوت وفلاتر بالسعر ذا , حاول يقنعني قاللي بالعكس السعر مناسب انت عارف ان زيت القير فقط ب 950 ريال
المهم تركته وقلت له بفكر واستخير المبلغ كبير ويوازي راتب موظف
وش رايكم بالسعر ؟؟؟
هل يحتاج اني اغير اللي يقول عليه ؟
بالنسبه لزيوت الدفرنسات والدبل قلتله كثير يقولون انها ماتتغير , قال هذي معلومات قديمه يتوارثها الناس من الاجيال السابقه يجب تغيير الزيوت كل 40 الف كيلو
كيف الوضع ؟؟؟؟

[hguvfd]

الله يطعمك خيرة ويكفيك شرة هذا شغل الوكالة بس خذ نصيحتي اذا كنت ودك تشيك رح ترايستار والله شغلهم ممتاز و امانه من واقع تجربتي و بالوفيق

[mekshaat]

خذ الزيوت من الوكاله أو من موزع معتمد أرخص لك
واشتغلها برا وشف الفرق بالسعر وخلك بالورشه اذا
جو يغيروون لك الزيوت والقطع عشان تطمن على
شغلك.

[ابو فهد...]

زيت الدفرنس والقير العادي ما يغير
وجلد المساحات شفهن اذا كان يمسحن زين لا تغيرهن

[mohaon]

الله يطعمك خيرة ويكفيك شرة هذا شغل الوكالة بس خذ نصيحتي اذا كنت ودك تشيك رح ترايستار والله شغلهم ممتاز و امانه من واقع تجربتي و بالوفيق

جزاك الله خير اخوي .. تريستار اللي باخر الصناعيه القديمه شرق ... صح ؟
بمر الوكاله في الغد ان شاء الله وبسأل عن اسعار الزيوت والفلاتر ثم بسير عليهم واشوف اجمالي السعر كم يطلع


خذ الزيوت من الوكاله أو من موزع معتمد أرخص لك
واشتغلها برا وشف الفرق بالسعر وخلك بالورشه اذا
جو يغيروون لك الزيوت والقطع عشان تطمن على
شغلك.
هذا اللي ناويه ان شاء الله بس كثير يقولون بالذات زيت القير لاتغيره الا بالوكاله واكيد هالكلام ينطبق على زيوت الدفرنسات والدبل ؟


زيت الدفرنس والقير العادي ما يغير
وجلد المساحات شفهن اذا كان يمسحن زين لا تغيرهن

القير تماتيك اخوي ابو فهد , الاخ اصيل حجازي يقول ان كل الزيوت تتغير سواء دفرنس او قير او دبل و لكل الانواع عادي او تماتيك ,,, وغيره يقول لا ,,, والوكاله تقول ايه ,,, وانت تقول لا !!!
اللي في بالي ومقتنع فيه ان الالات الميكانيكيه نوعان نوع يتزيت ونوع يتشحم وان كلهم يجب تغييرهم
نوع التزييت يحتاج مدة تغيير اسرع من مدة التشحيم بحكم اختلاف الخواص في كلا المادتين , عند اقتراب نهاية اجل كل منهما تجد الزيت فقد لزوجته واصبح قريبا من الماء والشحم اصبح كانه تراب
هذا اللي في بالي واللي كنت مقتنع فيه , لكن ردود الاعضاء في هذا المنتدى وغيره وتقريبا شبه اتفاق الكثير منهم على عدم تغيير زيوت الدفرنس والدبل وايضا القير في كثير من الاحيان يجعل الواحد موسوس ومحتاس

[ابو فهد...]

القير التماتيك كل ٦٠ الف يغير مع الفلتر
اما الدفرنس والدبل اذا نقص تزيده واذا رحت لم بنشر او الوكاله او احد النصابين يبي يقولك غيره واذا غيرته يمكن يطق عليك واحد من العيال معه باترول اجتهد وغير زيت الدفرنس ثمن طقت عليه الكارونه وركب وحده جديده وبعد الاستخدام والفجر بدات تون والحين تون ونتها تجيب الغثا والرجال احين متعذب

[صياد الجبل]

انا معي جيب ربع 2009

ماشي حول 80 غيرت زيت الدبل والقير والدفرنسات بالوكاله ولاشفت الا كل خير