مشكله في دبل الباترول

[عاشق نجد111]

السلام عليكم ورحمه الله وبركاته
مساكم الله بالخير

السالفه وما فيها عندي باترول ربع 2005 وعليه فرارات برازيليه ولا فيه مشكله
لكن اليوم غرست ونزلت اشغل الفرارات والا الدبل يوم عيا يشتغل وافصل الفرارات اكثر من مره لكن ماعنده نيه يشتغل علما ان ما فيه صوت ولا طقه ولا شي

افيدوني بخبرتكم مشكورين

تحياتي

[ابو فهد...]

لانك ما شبكت الفرارات الا يوم غرست
المفروض اذا دخلت تشبكهن قبل ما تغرس

[عاشق نجد111]

يعني وش الخراب هالحين
ما فرقت شبكته قبل التغريسه والا بعدها
ودايم ما اشبكه الا اذا غرست ولاواجهت اي مشكله منه

شاكر مرورك
تحياتي

[. ذيب ساحوق]

ابد نفس قضيتي هي هي كني اشووفك هههههه

والفرارت الي على موتري برزيليه سود مالها ست شهور وماشتغلت غير 3 او 4 مرات وغرست هاك المره وانزل اشغلهن ومنا ومنا يوم عيت تشتغل ونزلت هنا موضوع والي بعض الاخوان يقول انكسر ولا ندري وش بلاهاااا


لكن طااالبك اذا لقيت حل علمني ياابعدي مكلفتنا وحرام تطش

[ls1.5700]

اخوي المشكله من الفرارة ( التحضيره ) هم الخربانات
انا دايم احذر منهم مالهم امان ابد
غيرهم وحط فلنجة الوكاله ابركلك

[عاشق نجد111]

مشكورين على المرور
طيب انا عندي الفرار على الجهتين كيف اعرف الخربان منهم لان واحد قديم له ازود من السنه وواحد ماله الا. 4 شهور

تحياتي

[محمد المدني]

تاكد منه اذا سمعته طق اعرف انه سليم والعكس هذي المشكله صادفت واحد من الربع ويقول وديته عند ميكانيكي فك الفرار وشاف السسته لقاها منفلته وركبها الحمد لله اموره تمام الحين

[عاشق نجد111]

اخوي محمد عز الله صدقت واحد يطق والثاني لا
وانا عندي واحد جديد مخليه اسبير هل اقدر اركبه بنفسي

تحياتي

[محمد المدني]

والله مالي علم بس الافضل عند الميكانيكي ماياخذ ربع ساعه

[محمد المدني]

خبرنا وش يصير معاك

[العطاوي a511]

لايكون الدبل جيم من كثر ماهو نايم ماعنده شغل وانت فاصله

[sgl2002]

هذي مشكلة بالفرارات

لاتشبكها اذا غرزت

لازم تشبكها قبل

ممكن تصدف معك كم مره وتشبك اذا غرزت

لكن الاغلب انها وقت التغريز ماتنفع

لذلك اذا تورطت ما شبكت

فك مساميرها وطلع الفرار وشغل الدبل

[. ذيب ساحوق]

طيب يااخوان هل يباع فرار واحد لحاله ؟؟

لاني مادري وش صار على الي عندي خايف يكون واحد مكسور

[عاشق نجد111]

مشكورين على المرور

وبكره ان شاء الله ابفك اللي اتوقع انه خربان واركب الجديد وارد لكم خبر ان شاء الله وان شاء الله يضبط

تحياتي

[عاشق نجد111]

مساء الخير للجميع

فكيت الفرار اللي توقعت انه خربان وركبت بداله واحد جديد واشتغل الدبل ابشركم

تحياتي

[. ذيب ساحوق]

طيب وش طلع فيه يوم فكيته وهل يمكن انه يتسوا

[ابوسند9]

اسباب عدم شبك الفرار وانت مغرز
- اما يكون سبرنق الفرار ضعيف وبكذا ما يدفع راس الفرار من الدخل لراس العكس
- كثرة الشحم في الفرار تحول دون شبك الفرار احينا
- او ان العكس يكون محمل ولا يشبك ترس الفرار مع راس العكس
- عدم موافقة احينا سنن راس العكس مع سنن راس الفرار
للاسباب اعلاه
نقول الافضل ا شبك الفرار قبل دخولك النفود والزبده هنا الحركه وهي تلغي جميع الاسباب اعلاه.
واذا غرزت وما شبك فيه عدة حلول
- لف الدركسون بسرعه يمين يسار مع فصل وشبك الفرار
- طرق الفرار بمطرقه ومن ثم التجربه واعادة الكره
- رفع الكفر وتدويره باليد
كذالك حبيت اذكراسباب كسر الفرار وقاعده خذها الفرار ما ينكسر اللى اذا غرزت ومن ثم عشقت الفرار ففي هذا الحاله ومع نتل السياره يشبك الفرار بشكل مفاجئ في طرف راس العكس ومن ثم ينكسر
واخير الوقايه خيرا من العلاج اشبك قبل تدخل
مع العلم اني استخدم الفرار اكثر من 15 سنه واحينا انساها مشبوكه شهرين ولا شفت منها الحمدلله اي مشاكل واستخدامي لها بشكل مستمر