طريقة جيده للصيد على الشاطئ

[صياد بالسيف]

بسم الله الرحمن الرحيم

أولا السلام عليكم..
أحب أعطيكم من معلوماتي المتواضعة واللي ما تساوي خبراتكم الكبيرة في الصيد وأريد نصيحتكم.

حبيت أعطيكم طريقة أنا دايما أستخدمها أثناء الصيد وهي جيده خصوصا إذا كانت معك سناره وخيوط. أنا اللي أسويه هو كالتالي:
أجيب الخيط وأحط فيه بين 6 إلى 9 ميادير وأحطله بلد صغير وأصغر الرقعة اللي بين الخيط الأساسي والميدار علشان الميادير ما تتشربك مع بعض وأرمي خيطي وأثبته وأروح أصيد بالسناره وكل نص ساعة أحس بالخيط إذا صاد ولا لا. في مره من المرات لقيت صايد 5 سمكات مره وحده يعني تقدر تسوي هذي الطريقة وترمي الخيط ولا راح تكلفك شي بس لازم تكون ماهر في رميه لأن الميادير واجد والخيط طويل شوي.

حبيت أعطيكم اللي عندي من معلومات يمكن تفيدكم

[White_Shark]

الطريقة جميلة للسمك الصغير , ودائماً مايستخدمونها الجاليات الاسيويه في صيدهم لأنهم يحبون الأسماك الصغيرة ومياديرهم صغار مرة , والطعم اللي يستخدمونه برضه صغير , ولكن فيها عدة عيوب إن كنت تقصد لصيد الأسماك الكبيرة :

- الصعوبة في الرمي ( جهد مضاعف ).
- خطورة إن الميادير ترجع عليك أثناء التلويح .
- تستهلك طعم أكثر .
- سهولة التشيير ( التصخير ) .
- كثر الربطات تضعف الخيط .

ولكن هذا مايمنع من أنك تواصل بهذي الطريقة إذا كنت مرتاح منها وتحس أنك تصيد ويكفيك صيدك .

نتمنى لك التوفيق .. وتقبل تحياتي .

[الرحموني]

هذه الطريقة نسميها

الظفاير او العمرة ونستخدمها في صيد الغزير تسقيط من البوت

وايضاً في الارسال من الشاطئ

لاهنت يا صاحب الموضوع

[صياد بالسيف]

نسيت هي يسمون هذه الطريقة عندنا خيط المد وترا السمك اللي أصيده كبر الكف تقريبا والميدار مو صغير مره وهو فعلا يعتمد على مهارة رميتك للخيط وشكرا على المرور والملاحظات..

[ربان الخليج]

نعم هذي نسميها مدة واذا زادت عن 10ميادير نسميها شكه0بس بأمكانك تكبرالميادير وتحط في كل ميدار ميده وتنزل بنفسك البحروترميها قدر المستطاع وترجع0والا ترسلها بكيس نايلون والا فلين طبعا اذا الهواء معك~/تحياتي

[baracuda]

شكرا على الطريقة ومنكم نستفيد

[folix]

الله يعطيك العافية يالغالي ،،

[سكن حبك سكن]

فكرة ممتازة, بارك الله فيك.

[accentkool]

هذي تشبة حركة الشكة الخيط الطويل فية حول 10 ميادير ويثبت بعمق الصدر في صخرتين ويترك لمدة فوق الساعتين

[MANSOR QATAR]

ماشاءلله عليكم والله الواحد يستفيد منكم معلومات حلوه
الله يعطيكم الصحه والعافيه

[صياد بالسيف]

الله يعافيكم وشكرا على المرور الجميل .. ولكن الحذر بطريقة رميه لازم يكون ماهر بالتلويح أو زي ما قالوا الاخوان بالنايلون..

[ADIBADIB]

مشكورين على هذا الجهد

[الفارس6]

طريقه حلوه بس في يبيعو خيوط فيها اكثر من خطاف بالمحلات بس يمكن مافي كثير بس اذا جبت منها ﻻزم المكان الي تصيد فيه مافيه تصخير مره جربته وصادت سمكتين مع بعظ بس المشكله صخر علي قطعت الخيط و السمكتين الله يخلف عليها متعلقه بالخيط و الخيط مصخر هههههاي

[سعدالطاير]

مشكور اخوي
صياد بالسيف
والله يجزاك كل خير
وطريقتك حلوه وسبق استخدمتها لانها تعطي مجال لاكثر من سنارة
والله يرزقنا ويرزقك بالرزق الواسع
تحياتي

[حداق متمرس]

مشكور اخوي على الطريقه

تحياتي لكم

[samihrt]

الله يعطيك العافيه

[samihrt]

احنا نسميها السبحه

[م.عصام الغيطى]

مشكور اخى الكريم